Faamasino 13:1-25
13 Ua toe faia foʻi e le fanauga a Isaraelu mea e leaga i le silafaga a Ieova,+ ona tuuina atu ai lea o i latou e Ieova i lima o Filisitia+ mo tausaga e 40.
2 O le taimi lenā, sa iai se tasi tagata o Soraa+ mai i le aiga o Tanu,+ o Manoa+ lona igoa. Sa pā lana avā, ma e leʻi fanauina e ia se tama.+
3 Ona faaali mai lea o le agelu a Ieova i le fafine, ma fai mai iā te ia: “Faauta, o oe e pā, e te leʻi fanauina se tama. Ae o le a e tō ma fanau mai se tama.+
4 O lenei, ia e faaeteete ina ia aua neʻi e inu i se uaina po o se ʻava malosi,+ aua foʻi e te ʻai i se mea e lē mamā.+
5 Faauta! O le a e tō ma e fanaua se tama tama, e lē oo foʻi se tafi i lona ulu,+ auā e avea le tama ma Naseri i le Atua mai i lona fanau mai;* ma o ia foʻi e taʻimua i le faaolaina o Isaraelu mai i lima o tagata Filisitia.”+
6 Ona alu lea o le fafine ma faapea atu i lana tane: “Sa iai se tagata o le Atua moni na sau iā te aʻu, o lona tino mai sa pei o se agelu a le Atua moni, e ofoofogia lava. Ou te leʻi fesili i ai po o fea e sau ai o ia, e na te leʻi taʻuina mai foʻi lona igoa.+
7 Ae ua fai mai o ia iā te aʻu, ‘Faauta! O le a e tō ma e fanauina se tama tama. O lenei, aua neʻi e inu i se uaina po o se ʻava malosi, aua foʻi e te ʻai i se mea e lē mamā, auā e avea le tama ma Naseri i le Atua mai i lona fanau mai* e oo i le aso e oti ai.’”
8 Ua faatoga atu Manoa iā Ieova e faapea: “Faamolemole Ieova e, seʻi toe sau lava le tagata o le Atua moni lea na e auina mai, ina ia faatonu i maʻua i le mea e ma te faia i le tama o le a fanau mai.”
9 Ua faafofoga le Atua moni iā Manoa, ona toe sau ai lea o le agelu a le Atua moni i le fafine a o nofo i le fanua, ae e leʻi iai Manoa lana tane faatasi ma ia.
10 Ona tamo‘e vave atu loa lea o le fafine ma taʻu atu i lana tane: “Faauta! Ua toe faaali mai iā te aʻu le tagata lea na sau i le isi aso.”+
11 Ona tulaʻi lea o Manoa ma ō ma lana avā. Ua alu atu o ia i le tagata, ma faapea atu iā te ia: “Po o oe le tagata lea na tautala i laʻu avā?” Ua fai mai o ia: “O aʻu lava lea.”
12 Ona fai atu lea o Manoa: “Ia taunuu lava au upu! O le a faape‘ī le olaga o le tama, ma o le ā le galuega e na te faia?”+
13 Ona fai mai lea o le agelu a Ieova iā Manoa: “Ia tausia e lau avā o mea uma na ou fai atu ai iā te ia.+
14 Aua neʻi ʻai o ia i se mea e faia mai i le vine, aua neʻi inu i le uaina po o le ʻava malosi,+ aua foʻi neʻi ʻai i so o se mea e lē mamā.+ O mea uma ua ou poloaʻi atu ai, ia tausia e ia.”
15 Ona fai atu lea o Manoa i le agelu a Ieova: “Ia e nofo mai faamolemole, seʻi o ma saunia mo oe se tamaʻi ʻoti.”+
16 Ae ua fai mai le agelu a Ieova iā Manoa: “Afai ou te nofo, ou te lē ʻai i lau mea‘ai; ae afai e te manaʻo e faia ai se taulaga mū iā Ieova, ia e faia lava.” E leʻi iloa lava e Manoa o le agelu lea a Ieova.
17 Ona fai atu lea o Manoa i le agelu a Ieova: “O ai lou igoa,+ ina ia o ma vivii atu ai iā te oe pe a taunuu au upu?”
18 Ae ua fai mai le agelu a Ieova iā te ia: “Aiseā ua e fesili ai i loʻu igoa, auā e ofoofogia lava?”
19 Ona ave lea e Manoa o le tamaʻi ʻoti ma le taulaga i meaʻai* ma ofo atu i luga o le papa iā Ieova. Ua Ia faia se mea ofoofogia a o vaavaai atu Manoa ma lana avā.
20 A o alu aʻe le mumū o le afi i le lagi mai i le fata faitaulaga, ona alu aʻe ai lea o le agelu a Ieova i le mumū o le afi mai i le fata faitaulaga, a o vaavaai atu Manoa ma lana avā. Ona la faapaʻuʻū faō ai lea i le eleele.
21 E leʻi toe faaali mai lava le agelu a Ieova iā Manoa ma lana avā. Ona iloa ai lea e Manoa, o le agelu lava lea a Ieova.+
22 Ua fai atu Manoa i lana avā: “O le a ta feoti nei, auā ua ta vāai i le Atua.”+
23 Ae ua fai mai lana avā iā te ia: “Pe ana finagalo Ieova e fasiotia i taʻua, semanū e na te lē talia le taulaga mū+ ma le taulaga i meaʻai mai i o ta lima, semanū e na te lē faaalia mai nei mea uma iā i taʻua, ma semanū e na te lē taʻu mai foʻi iā i taʻua nei mea.”
24 Mulimuli ane, ona fanaua lea e le fafine o se tama tama ma faaigoa iā Samasoni.+ A o tuputupu aʻe le tama, ua faamanuia atu pea Ieova iā te ia.
25 Ua amata ona faagaeetia o ia e le agaga o Ieova+ i Maane-tanu+ i le vā o Soraa ma Esetaola.+
Faamatalaga Pito i Lalo
^ Epe., “mai i le faaautama.”
^ Epe., “mai i le faaautama.”
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
