Iosua 17:1-18
17 Ua maua e le ituaiga o Manase+ lo latou tofi e ala i le faia o le vili,+ auā o ia o le ulumatua a Iosefa.+ O Makiro+ foʻi o le ulumatua a Manase ma o le tamā o Kiliata, ua maua e ia o Kiliata ma Vasana,+ auā o ia o le tagata tau.
2 Ua maua foʻi le tofi o ē ua totoe o le fanauga a Manase e tusa ma o latou aiga, e mo le fanauga a Apieseru,+ o le fanauga a Eleka, o le fanauga a Aserieli, o le fanauga a Sekema, o le fanauga a Eferu, ma le fanauga a Semita. O tagata nei na tupuga mai iā Manase le atalii o Iosefa, o tane e tusa ma o latou aiga.+
3 A o Selofeata+ le atalii o Eferu, le atalii o Kiliata, le atalii o Makiro, le atalii o Manase, e leai ni ona atalii ae e na o ona afafine, ma o igoa nei o ona afafine: o Maala, o Noa, o Hakelu, o Meleka ma Tiresa.
4 Ona latou ō mai lea i luma o Eleasaro+ le ositaulaga, o Iosua le atalii o Nuno ma ē e taʻitaʻi, ua faapea mai: “Na poloaʻi mai Ieova iā Mose e aumai iā i matou se tofi faatasi ma uso o lo matou tamā.”+ Ona avatu lea iā i latou o se tofi faatasi ma uso o lo latou tamā,+ e tusa ma le faatonuga a Ieova.
5 E sefulu isi tofi na maua e Manase e ese mai i le laueleele o Kiliata ma Vasana, ia sa i le isi itu* o Ioritana,+
6 ona ua maua e afafine o Manase se tofi faatasi ma ona atalii; ua maua foʻi e ē ua totoe o le fanauga a Manase le laueleele o Kiliata.
7 O le tuaoi o Manase e mai i le tuaoi o Asera e oo i Mekemeta+ lea e i luma o Sekema,+ ma e oo atu le tuaoi i le itu i saute* i le laueleele o tagata o loo nonofo i Enetapua.
8 Ua maua e Manase le laueleele o Tapua,+ ae ua maua e le fanauga a Efaraima le aai o Tapua, i le tuaoi o Manase.
9 E alu ifo le tuaoi i le ālia o Kana, e agaʻi i le itu i saute o le ālia. Na iai aai o Efaraima i totonu o aai o Manase,+ ma o le tuaoi o Manase e i le itu i mātū o le ālia, ma e gata mai i le sami.+
10 E maua e Efaraima le itu i saute, a o Manase le itu i mātū, ma o lona tuaoi le sami;+ a o le tuaoi i mātū e oo atu i Asera, ma le itu i sasaʻe e oo atu i Isakara.
11 Ua maua e Manase i laueleele o Isakara ma Asera, o Pete-seana ma ona tamaʻi aai, o Ipelamo+ ma ona tamaʻi aai, o ē o loo nonofo i Toro+ ma ona tamaʻi aai, o ē o loo nonofo i Enetoro+ ma ona tamaʻi aai, o ē o loo nonofo i Tanaka+ ma ona tamaʻi aai, ma ē o loo nonofo i Mekito ma ona tamaʻi aai. E tolu nuu maualuluga na ia maua.
12 Ae e leʻi mafai e le fanauga a Manase ona tuliesea ē na nonofo i nei aai; ua maumaua‘i tagata Kanana e nonofo i nei aai.+
13 Ina ua malolosi le fanauga a Isaraelu, na latou faatigāina tagata Kanana i galuega mamafa,+ ae latou te leʻi tuliesea uma i latou.+
14 Ua faapea mai le fanauga a Iosefa iā Iosua: “Aiseā ua e tuuina mai ai iā i matou* e na o le vaega e tasi o le laueleele e fai ma o matou tofi?+ O i matou o le nuu e matuā toʻatele, auā ua faamanuia i matou e Ieova seʻia oo mai i le aso nei.”+
15 Ona tali atu lea o Iosua iā i latou: “Afai o outou o le nuu ua matuā toʻatele, inā ō ia i le vaomatua, ma ia tāina i lalo mo outou le laueleele o tagata Perisē+ ma Rafaimi,+ auā ua laʻitiiti tele le vaega maugā o Efaraima+ mo outou.”
16 Ona fai mai lea o le fanauga a Iosefa: “E lē lava lea vaega maugā mo i matou, ma o tagata Kanana uma o loo nonofo i le vanu,* e tofu ma kariota o le taua+ e iai uʻamea maamaʻai,* o i latou i Pete-seana+ ma ona tamaʻi aai, ma i latou i le vanu* o Isereelu.”+
17 Ona fai atu lea o Iosua i le fanauga a Iosefa, o Efaraima ma Manase: “O outou o le nuu ua matuā toʻatele, ma ua tele foʻi lo outou malosi. E lē lava le vaega e tasi o le laueleele e fai ma o outou tofi,+
18 ae ia fai foʻi mo outou le vaega maugā.+ E ui o le vaomatua, ae o le a outou tāina i lalo ma o i inā e gata mai ai lo outou tuaoi. Auā o le a outou tuliesea tagata Kanana, e ui ina malolosi ma iai a latou kariota o le taua e iai uʻamea maamaʻai.”*+
Faamatalaga Pito i Lalo
^ E faasino atu i le itu i sasaʻe.
^ Epe., “itu taumatau.”
^ Epe., “iā te aʻu.”
^ Po o “le fanua laugatasi.”
^ Epe., “kariota uʻamea o le taua.”
^ Po o “le fanua laugatasi.”
^ Epe., “kariota uʻamea o le taua.”
