Iosua 6:1-27
6 Ua matuā puipuia le aai o Ieriko ina neʻi sao atu ai le fanauga a Isaraelu, e leai foʻi se tasi na toe alu i totonu po o se tasi na sau i fafo.+
2 Ona fetalai mai lea o Ieova iā Iosua: “Faauta, ua ou tuuina atu i lou lima Ieriko ma lona tupu, atoa ma tagata totoa malolosi.+
3 A o outou tane totoa uma, e tatau ona outou savavali faataamilo i le aai, e faatasi ona faataamilo i le aai. Ia outou faia faapena mo aso e ono.
4 Ia ave foʻi e ositaulaga e toʻafitu o pū* e fitu i luma o le Atolaau. Ae ia outou savavali faataamilo faafitu i le aai i le aso lona fitu, ma ia ili pū+ e ositaulaga.
5 Pe a latou ilia le pū, ma outou faalogo i le leo o le pū, ona alalaga lea o tagata totoa uma i le alaga tele o le taua; ona soloia uma ai lea i lalo o pā o le aai,+ ona ō aʻe ai lea o tagata totoa, ma taʻitasi ma ō atu i luma.”
6 Ona valaau atu lea o Iosua le atalii o Nuno i ositaulaga, ma faapea atu iā i latou: “Inā ave ia le atolaau o le feagaiga, ma ia ave foʻi e ositaulaga e toʻafitu o pū e fitu i luma o le Atolaau a Ieova.”+
7 Ua ia fai atu foʻi i tagata totoa: “Ia outou ō atu ma savavali faataamilo i le aai, ia muamua atu i luma o le Atolaau a Ieova tagata totoa* ua faaauupegaina.”+
8 E pei lava ona fai atu Iosua i tagata, ua ō atu ositaulaga e toʻafitu o loo aveina pū e fitu ma ili i luma o Ieova, ua mulimuli atu foʻi ositaulaga o loo aveina le atolaau o le feagaiga a Ieova iā i latou.
9 Ua muamua atu tagata totoa* ua faaauupegaina i luma o ositaulaga o loo ilia pū, ae mulimuli atu isi tagata totoa* i ē o loo aveina le Atolaau, a o ilia pea pū.
10 Ua poloaʻi atu Iosua i tagata totoa: “Aua neʻi outou alalaga pe faalogoina o outou leo, ma ia aua foʻi neʻi fai atu e se isi se upu seʻia oo i le aso ou te fai atu ai iā te outou, ‘Inā alalaga ia!’ Ona outou alalaga ai lea.”
11 Ua ia fai atu ia faatasi ona savavali faataamilo ma le Atolaau a Ieova i le aai, a uma lea, ona latou ō atu lea i le togālauapi ma nonofo ai i le pō.
12 Ona tulaʻi lea o Iosua i le taeaopō, ua ave aʻe foʻi e ositaulaga le Atolaau+ a Ieova.
13 Ua savavali foʻi ositaulaga e toʻafitu o loo aveina pū e fitu i luma o le Atolaau a Ieova a o ilia pea pū, o loo savavali atu i o latou luma tagata totoa* ua faaauupegaina, ae mulimuli atu isi tagata totoa* i le Atolaau a Ieova a o ilia pea pū.
14 E faatasi ona latou savavali faataamilo i le aai i le aso lona lua, ona latou toe foʻi lea i le togālauapi. Na latou faia faapea mo aso e ono.+
15 Ua oo i le aso lona fitu, ua latou alapopō ina ua tafa mai ata o le vaveao, ona latou ō atu lea ma faapea ona savavali faataamilo faafitu i le aai. E na o le aso lava lenā na latou savavali faataamilo faafitu ai i le aai.+
16 I le taimi lona fitu, na ilia ai e ositaulaga pū, ona faapea atu lea o Iosua i tagata totoa: “Inā alalaga ia;+ auā ua tuuina mai e Ieova le aai iā te outou.
17 E tatau ona faaumatia le aai ma mea uma o iai;+ o na mea uma o Ieova e ana. Tau lava o Raava+ le fafine talitane e tatau ona faaolaina, ma i latou uma o i lona fale, auā na ia faalalafi avefe‘au na tatou aauina atu.+
18 A o outou, ia outou faamamao ese mai i mea e tatau ona faaumatia,+ ina neʻi outou tuʻinanau ma ave nisi o na mea e tatau ona faaumatia,+ ma faia ai Isaraelu ma mea ua tatau mo le faaumatiaga, ma aumaia ai mala.*+
19 A o siliva, auro, o mea e faia i le ʻapamemea ma le uʻamea, o mea ia e paia mo Ieova.+ E tatau ona tuuina atu i le mea e teu ai ʻoa a Ieova.”+
20 Ona alalaga lea o tagata totoa ina ua ilia pū.+ Ina ua faalogo tagata totoa i le leo o pū ma ua alalaga foʻi i le alaga tele o le taua, ona soloia uma ai lea i lalo o le pā.+ Ona ō lea o tagata totoa i totonu o le aai, ua taʻitasi foʻi ma ō atu i luma, ma faatoʻilaloina le aai.
21 Ua latou faaumatia mea uma i le aai i le pelu, o tamāloloa ma fafine, o ē iti ma ē matutua, o povi, o mamoe, ma asini.+
22 Ua fai atu foʻi Iosua i tamāloloa e toʻalua na ō atu faalilolilo e mata‘i le nuu: “Inā ō atu ia i le fale o le fafine talitane, ma aumai i fafo le fafine ma i latou uma ua faatasi ma ia, e pei lava ona oulua tautō atu ai iā te ia.”+
23 Ona ō atu lea o tauleleʻa na aauina atu faalilolilo e mata‘i le aai, ua la aumai Raava, o lona tamā, o lona tinā, o ona tuagane, ma i latou uma ua faatasi ma ia; ioe, ua la aumaia ma le saogalemu lona aiga uma,+ ma tuu i latou i tua o le togālauapi o Isaraelu.
24 Ua latou susunu le aai ma mea uma o iai. E na o siliva, auro, o mea e faia i le ʻapamemea ma uʻamea, na latou avatu i le mea e teu ai ʻoa i le fale o Ieova.+
25 Ae na faasaoina e Iosua le fafine talitane o Raava ma le aiga o lona tamā, ma i latou uma ua faatasi ma ia;+ ma o loo nofo o ia i Isaraelu e oo mai i aso nei,+ auā na ia faalalafi avefe‘au na aauina atu faalilolilo e Iosua e mataʻi le aai o Ieriko.+
26 I lenā taimi, ua faia ai e Iosua se tautoga* e faapea: “E malaia i luma o Ieova le tagata e na te toe fausia lenei aai o Ieriko. E oti lana ulumatua pe a ia toe faia le faavae, ma e oti foʻi lana uii pe a ia toe faatutūina ona faitotoʻa.”+
27 Sa faatasi pea Ieova ma Iosua,+ ma ua taʻutaʻua o ia i le lalolagi uma.+
Faamatalaga Pito i Lalo
^ Epe., “pū e faia i seu o le mamoe poʻa.”
^ Epe., “le vaegaʻau.”
^ Epe., “le vaegaʻau.”
^ Epe., “le muliʻau.”
^ Epe., “le vaegaʻau.”
^ Epe., “le muliʻau.”
^ Po o “faafitauli.”
^ Pe atonu “ua faatautō ai e Iosua tagata i lenei tautoga.”
