Numera 23:1-30
23 Ona fai atu lea o Palaamo iā Palako: “Ia e fausia i lenei mea ni fata faitaulaga se fitu,+ ma ia e sauniuni ni povi poʻa se fitu ma ni mamoe poʻa se fitu mo aʻu.”
2 Ona faia lea e Palako e pei ona fai mai ai Palaamo. Ua faia e Palako ma Palaamo ni taulaga i le povi poʻa ma le mamoe poʻa i fata faitaulaga taʻitasi.+
3 Ua faapea atu Palaamo iā Palako: “Ia e tū i autafa o lau taulaga mū, ae seʻi oʻu alu. Atonu e afio mai Ieova ma te feiloaʻi. Po o le ā lava e na te faailoa mai iā te aʻu, ou te taʻu atu iā te oe.” Ona alu lea o ia i se aʻega taalaelae.
4 Ua feiloaʻi le Atua iā Palaamo,+ ona ia fai atu lea iā te Ia: “Ua ou faatulaga ni fata faitaulaga se fitu, ma ua ou faia ai taulaga i le povi poʻa ma le mamoe poʻa i fata faitaulaga taʻitasi.”
5 Ona tuu mai lea e Ieova o upu nei i le gutu o Palaamo:+ “Ia e toe foʻi atu iā Palako, ma o upu nei e ao ona e fai atu.”
6 Ua toe foʻi mai o ia, ma vaaia Palako o loo tutū faatasi ma perenise uma o Moapi i autafa o lana taulaga mū.
7 Ua ia taʻu atu lenei feʻau faavaloaga:+
“Sa aumaia aʻu e Palako le tupu o Moapi mai i Arama,+Mai i atumauga i le itu i sasaʻe:
‘Ia e sau e faamalaia Iakopo mo aʻu.
Ioe, ia e sau e taʻusala Isaraelu.’+
8 E faapefea ona ou faamalaia o ē e leʻi faamalaiaina e le Atua?
E faapefea foʻi ona ou taʻusalaina o ē e leʻi taʻusalaina e Ieova?+
9 Ua ou iloa atu i latou mai i tumutumu o papa,Ua ou iloa atu foʻi i latou mai i aʻega.
O i inā ua nonofo ai le nuu na o i latou lava;+Ua manatu i latou e ese i latou mai i isi nuu.+
10 O ai e mafai ona faitauina pefu ninii o Iakopo+Pe faitauina le tasi vaefā o Isaraelu?
Seʻi oʻu oti i le oti o ē ua amio saʻo,Ia tusa foʻi loʻu iʻuga ma i latou.”
11 Ona fai mai lea o Palako iā Palaamo: “O le ā lau mea ua fai iā te aʻu? Na ou amia oe ina ia faamalaia oʻu fili a o lenei ua e faamanuia iā i latou.”+
12 Ae ua ia tali atu: “Pe e lē tatau ea ona ou tautala i upu uma ua tuu mai e Ieova i loʻu gutu?”+
13 Ona fai mai lea o Palako iā te ia: “Faamolemole seʻi ta ō i se mea e mafai ona e vaai atu ai iā i latou. E na o se vaega o i latou e te iloa atu, ae e te lē iloa atu i latou uma. Ia e faamalaia i latou mo aʻu mai i inā.”+
14 Ua ia ave o ia i le fanua o Sofima, i le tumutumu o Peseka,+ ua faia fata faitaulaga e fitu ma fai ai taulaga i le povi poʻa ma le mamoe poʻa i fata faitaulaga taʻitasi.+
15 Ona fai atu lea o Palaamo iā Palako: “Ia e tū i autafa o lau taulaga mū ae seʻi oʻu alu ma te feiloaʻi ma Ia i o.”
16 Ona feiloaʻi lea o Ieova ma Palaamo ma tuu nei upu i le gutu o Palaamo:+ “Ia e toe foʻi atu iā Palako, ma o upu nei e ao ona e fai atu.”
17 Ua toe foʻi mai o ia iā te ia, ma vaaia o loo tū o ia i autafa o lana taulaga mū, ma o loo faatasi o ia ma perenise o Moapi. Ona fesili mai lea o Palako iā te ia: “O le ā le mea ua fetalai mai ai Ieova?”
18 Ona ia taʻu atu lea o lenei feʻau faavaloaga:+
“Inā tulaʻi ia Palako ma faafofoga mai.
Ia faafofoga mai iā te aʻu, Le atalii o Seporu.
19 E lē o se tagata le Atua e tala pepelo ai o ia,+E lē o se atalii foʻi o se tagata e sui ai lona mafaufau.*+
Pe a ia fetalai i se mea, pe e na te lē faia ea?
Pe a ia fetalai i se mea, pe e na te lē faataunuuina ea?+
20 Faauta! O laʻu feʻau ia faamanuia;Ua Ia faamanuia,+ ma e lē mafai ona ou toe liliuina.+
21 E lē faataga e ia so o se mana faataulāitu e faasagatau iā Iakopo,E lē faataga foʻi e ia so o se faafitauli e oo iā Isaraelu.
Ua iā te i latou Ieova lona Atua,+Ua viiviia leotele o ia o se tupu iā i latou.
22 Ua aumaia e le Atua i latou mai i Aikupito.+
Ua pei o ia o seu o se povi poʻa o le vao iā i latou.+
23 Auā ua leai se faalauatau e faasagatau iā Iakopo,+Po o se valovaloga faataulāitu faasaga iā Isaraelu.+
E mafai ona faapea atu nei e uiga iā Iakopo ma Isaraelu:
‘Maʻeu le mea ua faia e le Atua!’
24 O le a tulaʻi lenei nuu e pei o se leona,E pei foʻi o le leona, o le a faatū e ia o ia lava i luga.+
E lē taoto i lalo seʻi vaganā ua ʻaina mea ua saeia,E inu foʻi i le toto o ē ua fasia.”
25 Ona fai mai lea o Palako iā Palaamo: “Afai e lē mafai ona e faamalaia iā te ia, e lē tatau foʻi la ona e faamanuia atu iā te ia.”
26 Ua tali atu Palaamo iā Palako: “Pe na ou lē fai atu ea iā te oe, ‘Ou te faia mea uma e fetalai mai ai Ieova’?”+
27 Ona fai mai lea o Palako iā Palaamo: “Faamolemole sau ia seʻi ta ō i se isi mea. Atonu o le a lelei i le silafaga a le Atua moni, ma mafai ai ona e faamalaia o ia mo aʻu mai i inā.”+
28 Ua ave e Palako o Palaamo i le tumutumu o Peoro lea e faafesagaʻi ma Iesimoni.*+
29 Ona fai atu lea o Palaamo iā Palako: “Ia e fausia i lenei mea ni fata faitaulaga se fitu, ma ia e sauniuni ni povi poʻa se fitu ma ni mamoe poʻa se fitu mo aʻu.”+
30 Ua faia e Palako e pei ona fai mai ai o Palaamo, ma ua ia faia taulaga i le povi poʻa ma le mamoe poʻa i fata faitaulaga taʻitasi.