Numera 27:1-23
27 Ona ō mai ai lea o afafine o Selofeata+ le atalii o Eferu, le atalii o Kiliata, le atalii o Makiro, le atalii o Manase mai i le aiga o Manase, le atalii o Iosefa. O igoa o ona afafine o Maala, o Noa, o Hakelu, o Meleka, ma Tiresa.
2 Ua latou tutū i luma o Mose ma Eleasaro le ositaulaga, ma luma foʻi o taʻitaʻi+ ma le faapotopotoga atoa, i le faitotoʻa o le faleʻie o le feiloaʻiga, ma ua latou faapea mai:
3 “Na oti si o matou tamā i le toafa, ae e leʻi iai o ia i ē na aufaatasi e tetee iā Ieova, o ē na lagolagoina Koru;+ na oti ona o lana lava agasala ae e leʻi maua ni ona atalii.
4 Aiseā ua aveesea ai le igoa o lo matou tamā mai i lona aiga ona ua leai ni ona atalii? Seʻi aumai so matou tofi faatasi ma uso o lo matou tamā.”
5 Ona tuuina atu lea e Mose o la latou mataupu i luma o Ieova.+
6 Ua fetalai mai Ieova iā Mose:
7 “E saʻo afafine o Selofeata. E ao lava ona e avatu iā i latou le tofi faatasi ma uso o lo latou tamā, ma tuu atu le tofi o lo latou tamā iā i latou.+
8 Ia e fai atu foʻi i le fanauga a Isaraelu, ‘Afai e oti se tamāloa ae e leai sona atalii, ia outou faia ni fuafuaga e tuu atu le tofi i lona afafine.
9 Ae afai e leai sona afafine, ia outou tuu atu lona tofi i ona uso.
10 Ae afai e leai ni ona uso, ia outou tuu atu lona tofi i uso o lona tamā.
11 Ae afai e leai ni uso o lona tamā, ia outou tuu atu lona tofi i le tagata o lona aiga e sili ona latalata lana faiā iā te ia, ma e ave mo ia le tofi. Ia fai lenei mea ma tulafono e tusa ma iʻuga o faamasinoga mo le fanauga a Isaraelu, e pei ona poloaʻi mai ai Ieova iā Mose.’”
12 Ona fetalai mai lea o Ieova iā Mose: “Ia e alu aʻe i lenei mauga o Aperima,+ ma vaai atu i le laueleele o le a ou avatu i le fanauga a Isaraelu.+
13 A e vaai i le laueleele, ona faatasia ai lea o oe ma ou tagata*+ e pei fo‘i o Arona lou uso,+
14 talu ai ina ua finau mai le faapotopotoga iā te aʻu i le toafa o Tisina, na oulua fouvale i laʻu faatonuga ina ia faapaiaina aʻu i o latou luma e ala i le vai.+ O vai nei o Meripa+ i Katesa+ i le toafa o Tisina.”+
15 Ua faapea atu Mose iā Ieova:
16 “Ia tofia e Ieova, o le Atua o le ola o tagata uma,* se tane ina ia vaavaaia le faapotopotoga,
17 o lē e ulu atu ma toe sau i o latou luma, ma o lē e taʻitaʻia atu i latou ma toe aumai i latou, ina neʻi avea le faapotopotoga a Ieova e pei o ni mamoe ua leai se leoleo mamoe.”
18 Ona fetalai mai lea o Ieova iā Mose: “Ia e ave Iosua le atalii o Nuno, o ia o se tane ua agavaa,* ma faaee lou lima i ona luga.+
19 Ia e faatū o ia i luma o Eleasaro le ositaulaga ma luma o le faapotopotoga atoa, ma ia e tofia o ia o se ta‘ita‘i a o latou vāai mai.+
20 Ia e tuuina atu iā te ia se vaega o le pule o loo iā te oe,*+ ina ia faalogo ai le faapotopotoga atoa o le fanauga a Isaraelu iā te ia.+
21 E tū foʻi o ia i luma o Eleasaro le ositaulaga, o lē e fesili atu mo ia e tusa ai ma le faamasinoga o le Urima+ i luma o Ieova. E latou te ō atu ona o lana faatonuga, e latou te ō mai foʻi ona o lana faatonuga, o ia atoa ma le fanauga uma a Isaraelu ua faatasi ma ia, ma le faapotopotoga atoa.”
22 Ona faia lea e Mose e pei ona poloaʻi mai ai Ieova iā te ia. Ua ia ave Iosua ma faatū o ia i luma o Eleasaro le ositaulaga, ma luma foʻi o le faapotopotoga atoa
23 ma faaee ona lima i ona luga ma tofia o ia o se ta‘ita‘i,+ e pei ona fetalai mai ai Ieova e ala iā Mose.+
Faamatalaga Pito i Lalo
^ O se faaupuga faafatusolo lea mo le oti.
^ Epe., “o agaga o tagata ma mea uma.”
^ Epe., “o se tane ua iai le agaga.”
^ Po o “se vaega o lou mamalu.”
