O ā Mea e Talitonu i ai Molimau a Ieova?

“Matou te mananao e faalogo i lou talitonuga, auā na pau le mea matou te iloa e uiga i nei Kerisiano e faapea ua taʻuleagaina i latou i so o se mea!” (Galuega 28:22, The Living Bible) Sa faataatia e nei taʻitaʻi o le nuu i Roma o le uluai senituri se faataʻitaʻiga lelei. Na latou mananao e faalogo i le puna, na i lo o le na o ē faitio o i tua.

I se tulaga talitutusa, o Molimau a Ieova i aso nei e masani ona tautalagia faasagatau i ai, ma o se mea sese le faatalitalia o le aʻoaʻoina o le mea moni e uiga ia i latou mai i puna e talasalatua. O lea ua matou fiafia ai e faamatalaina ia te oe nisi o a matou talitonuga autū.

Le Tusi Paia, Iesu Keriso, ma le Atua

Matou te talitonu “o Tusi Paia uma lava e mai le Agaga o le Atua ia, e aoga foi ia.” (2 Timoteo 3:16) Ma e ui la ina finau mai nisi faapea e lē avea moni i matou o ni Kerisiano, ua lē saʻo lenei mea. Matou te ioe atoatoa i le molimautino a le aposetolo o Peteru e uiga ia Iesu Keriso e faapea: “E leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.”​—Galuega 4:12.

Ae peitai, talu ai sa fetalai Iesu faapea o ia o le “Atalii o le Atua” ma faapea “o le Tamā ua na auina mai au,” e talitonu la Molimau a Ieova faapea e sili le Atua i lo Iesu. (Ioane 10:36; 6:57) O Iesu lava ia na faailoa mai: “Auā e sili loʻu Tamā ia te aʻu.” (Ioane 14:28; 8:28)  O lea matou te lē talitonu ai faapea e tutusa Iesu ma le Tamā, e pei o la le aʻoaʻoga o le Tasitolu Paia. Na i lo lena, matou te talitonu faapea o ia sa foafoaina e le Atua ma e maulalo ifo o ia ia te Ia.​—Kolose 1:15; 1 Korinito 11:3.

I le gagana faa-Samoa, o le suafa o le Atua o Ieova. Ua faapea mai le Tusi Paia: “O oe, e ou le suafa o IEOVA, na o oe lava o le Silisili ese i le lalolagi uma.” (Salamo 83:18) E tusa ai ma lenei faalauiloaga, sa matuā faamamafaina e Iesu le suafa o le Atua, i le aʻoaʻoina o ona soʻo ia tatalo: “Lo matou Tamā e, o i le lagi, ia paia lou suafa.” Ma o ia lava foi sa tatalo i le Atua: “Ua ou faaali atu lou suafa i tagata na e foai mai ia te au.”​—Mataio 6:9; Ioane 17:6.

E talitonu Molimau a Ieova faapea e ao ona pei i latou o Iesu i le faailoaina atu o le suafa o le Atua ma ana fuafuaga i isi. O lea ua matou tauavea le igoa Molimau a Ieova auā o loo matou faaaʻoaʻo ia Iesu, ʻle molimau faamaoni.’ (Faaaliga 1:5; 3:14) Ma le talafeagai, ua faapea mai le Isaia 43:10 i tagata o sui o le Atua: “Ua fetalai mai Ieova, O outou o aʻu molimau, ma laʻu auauna o le na aʻu filifilia.”

Le Malo o le Atua

Sa aʻoaʻoina e Iesu ona soʻo ia tatalo, “Ia oo mai lou Malo,” ma sa ia faia lena Malo ma matua autū i ana aʻoaʻoga. (Mataio 6:10; Luka 4:43) E talitonu Molimau a Ieova faapea o le Malo o se pulega moni mai le lagi, o le a pule i luga o le lalolagi, ma e faapea o Iesu Keriso o lona Tupu tofia e lē vaaia. “E i lona ua le Malo,” ua fai mai ai le Tusi Paia. “E leai se mea e gata mai ai ona tele o lona malo ma le filemu o lona malo.”​—Isaia 9:6, 7.

Ae peitai, o le a lē na o Iesu Keriso le tupu o le pulega a le Atua. O le a iai ni pule lagolago e toatele faatasi ma ia i le lagi. “Pe afai tatou te onosai,” sa tusi mai ai le aposetolo o Paulo, “e fai foi i tatou ma tupu  faatasi ma ia.” (2 Timoteo 2:12) Ua faailoa mai e le Tusi Paia faapea o na tagata o ē e toe faatutuina ia pule faatasi ma Keriso i le lagi e faatapulaa le numera i “le selau afe ma afe e fa sefulu ma le fa o afe o e ua faatauina nai le lalolagi.”​—Faaaliga 14:1, 3.

O le mea moni, so o se pulega lava e tatau ona iai tagatanuu, ma e talitonu Molimau a Ieova faapea o le faitau piliona e ese ai mai nei tupu faalelagi o le a latou mauaina le ola e faavavau. Mulimuli ane, o le lalolagi o le a faaliliuina i se parataiso matagofie, o le a faatumulia i nei tagatanuu onomea o le Malo o le Atua, e gauai uma atu i le pule a Keriso ma ana tupu lagolago. O lea ua mausali ai le talitonuga o Molimau a Ieova faapea o le lalolagi paneta o le a matuā lē faaumatiaina ma o le folafolaga a le Tusi Paia o le a faataunuuina: “E fai lava le nuu mo tagata amiotonu, e nonofo ai pea i latou.”​—Salamo 37:29; 104:5.

Ae o le a faapefea ona oo mai le Malo o le Atua? E ala ea i le gauai atu o tagata uma ma le loto i ai i le pulega a le Atua? I le tuufaafeagai ai, ua faailoa i se auala moni e le Tusi Paia faapea o le oo mai o le Malo o le a manaomia ai le faalaa tuusaʻo ane a le Atua i upufai o le lalolagi: “E faatuina . . . e le Atua o le lagi o le malo e le faaumatia e faavavau; o lea malo foi . . . na te tuʻimomomoina ma faaumatia ia malo uma, a o ia e tumau lava e faavavau.”​—Tanielu 2:44.

O afea o le a oo mai ai le Malo o le Atua? E faavae i valoaga o le Tusi Paia ua faataunuuina nei, ua talitonu Molimau a Ieova o le a lē pine ona oo mai lea. Matou te  valaauina ai oe ina ia e iloiloina nisi o valoaga na valoia mai ai vala o “aso e gata ai” o lenei faiga amioleaga o mea. Ua faamauina i le Mataio 24:3-14; Luka 21:7-13, 25-31; ma 2 Timoteo 3:1-5.

Talu ai lo matou ʻalolofa ia Ieova lo tatou Atua ma o matou loto atoa, agaga, manatu, ma le malosi, atoa ma o matou tuaoi e pei o i matou lava,’ ua lē vaevaeina ai i matou i tulaga faaleatunuu, lanu, ma le vafealoaloai. (Mareko 12:30, 31) Ua matauina i matou i le lalolagi aoao ona o le alofa ua faaalia i totonu o o matou uso Kerisiano o ē o loo iai i atunuu uma lava. (Ioane 13:35; 1 Ioane 3:10-12) O lea ua tausisia ai pea e i matou se tulaga solitu agaʻi i upufai faapolotiki o na atunuu. Ua matou taumafai ia pei o uluai soʻo o Iesu, i latou na ia fetalai ai: “E le ni o le lalolagi i latou, faapei o aʻu foi ou te le so le lalolagi aʻu.” (Ioane 17:16) Ua matou talitonu faapea o le tumau ai ona vavae ese mai le lalolagi o lona uiga o le aloese lea mai i amioga lē mamā ua matuā taatele i aso nei, e aofia ai le pepelo, gaoi, faitaaga, mulilua, tauatane, tauafafine, faaaogāseseina o le toto, ifo i tupua, ma isi lava mea faapena ua taʻusalaina i le Tusi Paia.​—1 Korinito 6:9-11; Efeso 5:3-5; Galuega 15:28, 29.

Faamoemoe mo le Lumanai

Ua talitonu Molimau a Ieova faapea o le soifuaga o loo iai nei i lenei lalolagi e lē na ona pau lea. Matou te talitonu faapea na auina mai e Ieova Keriso i le lalolagi e faamaligiina lona totoola e fai ma togiola, ina ia mafai ai e tagata ona maua se tulaga amiotonu ma le Atua ma maua ai le ola e faavavau i se faiga fou o mea. E pei ona fai mai ai se aposetolo a Iesu: “O lenei ua taʻuamiotonuina nei i tatou i lona toto.” (Roma 5:9; Mataio 20:28) E matuā loloto le agaga faafetai o Molimau a Ieova i le Atua ma lona Alo mo lenei sauniuniga togiola ua tatala ai le avanoa mo le ola i le lumanai.

Ua iai le mautinoa atoatoa o Molimau a Ieova i se ola i le lumanai, e faavae i le toetu mai le oti i lalo o le Malo o le Atua. E pei ona aʻoaʻoina mai e le  Tusi Paia, matou te talitonu faapea, a oti le tagata ona faamuta moni lea ona toe iai, “e faaumatia i lea lava aso ona manatunatu.” (Salamo 146:3, 4; Esekielu 18:4; Failauga 9:5) Ioe, o le ola i le lumanai mo ē ua oti e faavae i le manatuaina o i latou e le Atua i le toetu.​—Ioane 5:28, 29.

Ae peitai, ua mautinoa e Molimau a Ieova faapea o le toatele o ē o loo ola nei o le a faasaoina pe a aumaia e le Malo o le Atua le iʻuga i pulega uma lava o loo iai nei ma, e pei ona sa faasaoina Noa ma lona aiga i le Lolo, o le a faapea foi ona latou ola pea ina ia olioli i le ola e faavavau i se lalolagi faamamāina. (Mataio 24:36-39; 2 Peteru 3:5-7, 13) Peitai, matou te talitonu o le faasaoina e faalagolago lea i le ausia o mea manaomia a Ieova, e pei ona fai mai ai le Tusi Paia: “O le a mavae atu foi le lalolagi, . . .  a o lē fai le finagalo o le Atua, e tumau lea e faavavau.”​—1 Ioane 2:17; Salamo 37:11; Faaaliga 7:9, 13-15; 21:1-5.

E manino lava, e lē mafai ona faaaofia i inei talitonuga uma o Molimau a Ieova, ae matou te valaaulia oe ina ia mauaina atili nisi faamatalaga.

Vagana ua faasinoina, o mau sii uma lava o le Tusi Paia e mai le Tusi Paia Samoa, Lomiga 1884.

[Faamatalaga faaopoopo i le itulau 4]

Ua matou tauavea ai le igoa Molimau a Ieova auā o loo matou faaaʻoaʻo ia Iesu