Pe E te Manaʻo e Fia Iloa Atili e Faatatau i le Tusi Paia?

 Aiseā e Faitau ai le Tusi Paia?

E ESE le Tusi Paia mai i so o se isi lava tusi—o loo aofia ai aʻoaʻoga alofa mai le Atua. (1 Tesalonia 2:13) Afai e te faatatauina mea o loo aʻoaʻoina e le Tusi Paia, o le a matuā aogā lava iā te oe. O le a e faateleina ai lou alofa mo le Atua ma o le a tosina vavalalata atu ai iā te ia, o Lē e Foaʻi mai “mea lelei uma . . . ma mea alofa uma e atoatoa ona lelei.” (Iakopo 1:17) O le a oo ina e silafiaina le auala e faalatalata atu ai iā te ia i le tatalo. O le a mafai foʻi ona e mātauina le fesoasoani a le Atua, i taimi o faigatā. Afai e te faafetaui atu lou soifuaga i tapulaa ua faatulaga mai i le Tusi Paia, o le a avatu la iā te oe e le Atua le ola e faavavau.—Roma 6:23.

O loo iai i le Tusi Paia ia upu moni e faamalamalamaina ai. O i latou ua maua le poto o le Tusi Paia, ua tuusaunoa i latou mai manatu lē saʻo lea o loo pulea ai ola o le faitau miliona o tagata. Mo se faaaʻoaʻoga, o le iloaina o le upu moni e faatatau i le mea e tupu pe a tatou feoti ua tuusaʻoloto ai tatou mai i le fefe faapea e mafai e ē ua maliliu ona faaleaga mai iā i tatou, pe faapea foʻi o loo mafatia o tatou tauaiga ma uō ua maliliu. (Esekielu 18:4) O le aʻoaʻoga a le Tusi Paia i le toetū ua avatu ai se faamāfanafanaga i ē ua maliliu ē e pele iā i latou. (Ioane 11:25) O le iloaina o le mea moni e faatatau i agelu amioleaga, ua tatou mataala ai i le mataʻutia o faiga faaagaga ma ua fesoasoani ai iā i tatou e iloa le māfuaaga o le anoanoaʻi o faafitauli i le lalolagi.

 O mataupu silisili mai le Atua o loo i le Tusi Paia, ua faaalia mai iā i tatou le auala e ola ai ina ia maua faamanuiaga i la le tino. O se faaaʻoaʻoga, o le “faautauta i masaniga” e saosaolaumea lea i le soifua mālōlōina lelei. (1 Timoteo 3:2, NW) E ala i le ‘⁠faamamāina o i tatou i mea uma e leaga ai le tino ma le agaga,’ ua tatou ʻalofia ai le faaleagaina o lo tatou soifua mālōlōina. (2 Korinito 7:1) O le faatatauina o fautuaga a le Atua o loo i le Tusi Paia, e saosaolaumea lea i le mauaina o le fiafia i le faaipoipoga ma faaleleia ai foʻi manatu talafeagai o se tagata mo ia lava.—1 Korinito 6:18.

Afai e te faatatauina le Afioga a le Atua, o le a avea oe o se tagata e sili atu ona fiafia. E fesoasoani mai le iloa o le Tusi Paia ina ia tatou maua le filemu i le tagata i totonu ma le lotomalie, ma aumai ai le faamoemoe. E fesoasoani iā i tatou e ati aʻe ma faaleleia uiga lelei e pei o le alofa mutimutivale, alofa, olioli, filemu, agalelei, ma le faatuatua. (Kalatia 5:22, 23; Efeso 4:24, 32) O uiga faapena e fesoasoani ina ia avea ai i tatou ma tane po o se avā, tamā po o se tinā, atalii po o se afafine, e sili atu ona lelei.

Pe sa iai ea se taimi na e taumanatu ai e faatatau i le lumanaʻi? Ua faailoa mai e valoaga o le Tusi Paia iā i tatou po o fea o tatou iai i le gasologa o taimi. E lē gata o loo faamatala mai e nei valoaga le tulaga o loo iai le lalolagi i aso nei, ae o loo faaalia mai ai foʻi e faapea ua toe o se aga ona faaliliuina loa lea e le Atua le lalolagi e avea ma parataiso.—Faaaliga 21:3, 4.

 Fesoasoani Ina ia Malamalama i le Tusi Paia

Atonu na e taumafai e faitau le Tusi Paia ae sa e iloaina e faigatā ona malamalama i ai. Atonu e te leʻi silafiaina po o gafea o le Tusi Paia e suʻe i ai ina ia maua ai tali o au fesili. Afai o le tulaga lenā, e lē na o oe ua tupu ai lenā mea. Tatou te manaʻomia uma lava le fesoasoani ina ia malamalama ai i le Afioga a le Atua. Ua saunia e Molimau a Ieova i atunuu e tusa ma le 235, ni aʻoaʻoga faale-Tusi Paia e aunoa ma se totogi mo le faitau miliona o tagata. O le a latou fiafia foʻi e fesoasoani atu iā te oe.

E masani lava e sili ona lelei ona suʻesuʻeina faasolosolo le Tusi Paia, e amata i aʻoaʻoga faavae. (Eperu 6:1) A o faaauau ona e faia, o le a matuā lelei ona e aveina i fale “mea aano”—o lona uiga, o upu moni loloto. (Eperu 5:14) O le Tusi Paia o le tusi autū lea. O lomiga e faavae i le Tusi Paia, e pei o le polosiua O le ā e Manaomia e le Atua Mai ia i Tatou?, o le a fesoasoani iā te oe ina ia malamalama i faamatalaga faale-Tusi Paia i mataupu eseese.

 Pe E te Finagalo Malie e Faaalu se Taimi i Vaiaso Taʻitasi Ina ia Malamalama ai i le Tusi Paia?

O le tulaga masani lava e mafai ona fuafua se suʻesuʻega faale-Tusi Paia i se taimi ma se nofoaga e talafeagai ma oe. O le toʻatele e fai le suʻesuʻega i o latou lava aiga. O nisi e suʻesuʻe e ala i le telefoni. O le polokalame o le suʻesuʻega, e lē o se vasega e iai ni tagata se toʻatele, ae o se faatulagaga e mo na o oe lava e fetuunaʻi ai ina ia fetaui ma lou tulaga totino, e aofia ai ma lou tulaga tau i le silafiaina o mea atoa ai ma le maualuga tau aʻoaʻoga. E leai ni suʻega e faia, ma o le a lē faia foʻi se mea e faamasiasi ai oe. O au fesili faale-Tusi Paia o le a taliina, ma o le a e aʻoaʻoina le auala e faalatalata atu ai i le Atua.

E te lē totogia se tau mo lenā suʻesuʻega faale-Tusi Paia. (Mataio 10:8) E ofo fua atu i tagata o lotu uma lava ma i latou e lē o ō i ni lotu ae e naunau moni lava e faateleina lo latou poto i le Afioga a le Atua.

O ai e mafai ona auai i le talanoaga? O lou aiga atoa. So o se uō foʻi e te manaʻo e valaaulia e mafai ona auai. Ae afai e te lē manaʻo i ai, e mafai ona fai le talanoaga tau lava o oe.

E toʻatele ua faaavanoaina se itula i vaiaso taʻitasi e suʻesuʻe ai le Tusi Paia. Afai e mafai ona e faaalu se taimi e sili atu pe itiiti ifo foʻi i vaiaso taʻitasi, e mafai e Molimau ona faaavanoa atu i latou lava e fesoasoani iā te oe.

 O se Valaaulia Ina ia Faia se Suʻesuʻega

Matou te valaaulia oe ina ia faafesootaʻi atu Molimau a Ieova. O se tasi o auala e te faia ai lenei mea o le tusi atu lea i se tuatusi o loo i le pito i lalo. O le a faia se fuafuaga mo se tasi e faia se suʻesuʻega faale-Tusi Paia i le aiga ma oe e aunoa ma se totogi.

□ Auina mai iā te aʻu se kopi o le polosiua O le ā e Manaomia e le Atua Mai ia i Tatou? Faailoa mai le gagana.

□ Faamolemole ia faafesootaʻi mai aʻu e uiga i se suʻesuʻega faale-Tusi Paia e aunoa ma se totogi.

Seʻi vaganā ua faaalia, o mau uma o le Tusi Paia e mai le Tusi Paia Samoa, Lomiga 1884.