Talavou e, O le a Faapefea Ona Faaaogā o Outou Olaga?

“OU TE manaʻo i le manuia silisili mai i loʻu olaga.” O le faamatalaga lea a se teine talavou. E mautinoa o lou manaʻo foʻi lenā. Ae e faapefea la ona e mauaina le “manuia silisili” mai i lou olaga? E ono fai atu i latou o loo faia faasalalauga faapea au aumea, atonu e oo lava foʻi i ou faiaʻoga, e maua mai lea manuia silisili i le iai o le tele o tupe ma le iai o se galuega maualuga ma telē le totogi—ia avea o sē ua iloga i ni mea ua ausia!

Peitaʻi ane, o loo lapataʻi mai le Tusi Paia i tupulaga talavou, o le matuā saʻilia o le manuia i meafaitino, e leai se eseesega ma “le ʻai i le matagi.” (Failauga 4:4) O se tasi o māfuaaga, e lē toʻatele ni talavou ua iʻu ina maua ʻoa ma se igoa taʻutaʻua. O i latou ua oo i lenā tulaga, ua masani ona latou fesagaʻi ma ni tulaga e sili atu ona mafatia ai. Fai mai se talavou Peretania, o lē na ia matuā saʻilia se galuega e maualuluga ni faailoga na manaʻomia ai: “E pei lava nei manuia o se atigipusa, e te tilotilo atu i totonu, e augapiu ma se mea o iai.” E moni, e mafai e se galuega ona maua mai ai i nisi taimi se tamaoaiga ma se tulaga taualoa. Peitaʻi e lē mafai ona faamalieina ai lou “manaʻoga faaleagaga.” (Mataio 5:3, NW) E lē gata i lea, ua lapataʻi mai le 1 Ioane 2:17 e faapea, ʻe mavae atu foʻi le lalolagi.’ E tusa lava pe e te taulau manuia i lenei lalolagi, ae e mo na o sina taimi puupuu.

O lea ua augani mai ai le Failauga 12:1 i talavou: “Ia e manatua le na faia oe i ona po o lou taulealea.” Ioe, o le auala e sili ona lelei e te faaaogāina ai lou olaga, o le auauna atu lea iā Ieova le Atua. Ae muamua, e tatau ona e agavaa ina ia auai i le auaunaga i le Atua. E mafai faapefea ona e faia lenā mea? O ā mea e aofia ai i le auauna atu i le Atua?

Ia Agavaa e Avea ma Molimau a Ieova

O le laasaga amata lava, e tatau ona e faatupu aʻe se faanaunauga e te fia auauna i le Atua—ma e lē otometi ona oso aʻe lenā faanaunauga, e tusa lava po o ou mātua o ni Kerisiano. E tatau ona ati aʻe sa oe lava faiā ma Ieova. Na fai mai se teine talavou: “E fesoasoani le tatalo iā te oe ina ia iai sa oe lava faiā ma Ieova.”—Salamo 62:8; Iakopo 4:8.

Ua faamatilatila mai e le Roma 12:2 le isi laasaga e tatau ona e uia. Ua faapea mai: “Ia outou suesue pe se a le finagalo o le Atua, o mea ua lelei, ma le mālie, ma le atoatoa.” Po ua iai ea se taimi ua e tau faalētonu ai i nisi o mea ua e aʻoaʻoina? Ia e utagia la le timaʻiga a le Tusi Paia, ma ʻia e suesue’ oe lava ina ia faamautinoa pe moni nei mea! Ia fai ni au lava saʻiliʻiliga. Ia faitau le Tusi Paia ma lomiga faale-Tusi Paia. Ae o le aʻoaʻoina o mea e uiga i le Atua e lē na o se mataupu e tau ina faaaogā i ai le mafaufau. Ia faaalu se taimi e mafaufau loloto ai i mea o loo e faitauina, ina ia goto ifo i lou loto. Ona mafai ai lea ona tuputupu aʻe lou alofa i le Atua.—Salamo 1:2, 3.

Ona sosoo lea ma lou taumafai e talaʻi atu i isi i se tulaga faasamasamanoa i mea ua e aʻoaʻoina, pe atonu i au uō i le aʻoga. O le laasaga e sosoo ai, o le talaʻi mai i lea fale i lea fale. Atonu e iai taimi e te feiloaʻi atu ai i sau uō i le aʻoga a o e talaʻi, ma atonu i le taimi muamua, e ono faapopoleina ai oe i lenei mea. Peitaʻi o loo augani mai le Tusi Paia ina ia tatou lē ʻmamā i le tala lelei.’ (Roma 1:16) O lenā e te avatuina le feʻau o le ola ma le faamoemoe! Aiseā la e te mā ai fua?

Afai o ni Kerisiano ou mātua, atonu la ua leva ona outou galulue faatasi ma i laʻua i lenei galuega. Ae po o mafai ea ona e faia nisi mea e sili atu na i lo le tau lava o lou tūtū i le faitotoʻa e aunoa ma sau tala e fai, pe na o le tuu atu foʻi o mekasini ma sāvali? Po o mafai ona e tautala atu lava oe i le tagata e ona le fale, ma faaaogā le Tusi Paia e aʻoaʻo atu i ai? Afai e leai, ia e talosaga atu mo se fesoasoani a ou mātua po o se tagata taʻumatuaina o le faapotopotoga. Ia fai ma ou sini lou agavaa e avea o se tagata talaʻi e leʻi papatisoina o le tala lelei!

Mulimuli ane, o le a e faia sou tuuina atu—e te tautō ai i le Atua o le a amata atu i lenā taimi ona e auauna iā te ia. (Roma 12:1) Ae peitaʻi, o le tuuina atu e lē na o se mataupu e fitoitonu iā te oe. E finagalo le Atua i tagata uma ina ia latou ʻtaʻutino atu [“i le lautele,” NW] ma oo mai ai le ola.’ (Roma 10:10) I le taimi o lou papatisoga, e muamua ai ona e faalauiloa atu i au upu lou faatuatua. Ona sosoo lea o le papatisoga i le vai. (Mataio 28:19, 20) O le mea mautinoa, o le papatisoga o se laasaga e tāua tele. Peitaʻi, aua e te nofoaʻi ona o ni ou lagona faapea atonu e iai se itu o le a e lē taulau ai. Pe afai e te faalagolago i le Atua mo le malosi, o le a ia foaʻi mai iā te oe “le matuā tele o le mana” ina ia mafai ai ona e tū mausalī.—2 Korinito 4:7; 1 Peteru 5:10.

I le taimi o lou papatisoga, e avea ai oe o se tasi o Molimau a Ieova. (Isaia 43:10) E tatau ona iai se aafiaga tele o lenei mea i le auala o le a faaaogāina ai lou olaga. O le tuuina atu e aofia ai lou ʻfaafitia o oe lava.’ (Mataio 16:24) Atonu e te lafoaʻia ai nisi o ou sini ma ni faanaunauga totino ua iai, ae ʻmuai saili le malo o le Atua.’ (Mataio 6:33) Ona tatala mai ai lea e le tuuina atu ma le papatisoga le tele o avanoa e faia ai faapea. Seʻi o tatou talanoaina nisi o na avanoa.

Avanoa e Auauna ai Faataimi Atoa i le Atua

● O le auaunaga faapaeonia o se tasi lea o na avanoa. O se tagata talaʻi o loo paeonia, o se Kerisiano papatisoina lea o loo avea ma faaaʻoaʻoga lelei, o lē ua ia faatulaga e faaaluina le 70 itula po o le sili atu i masina taʻitasi i le talaʻiina o le tala lelei. O le faateleina o itula e te faaalu i le fanua o le a fesoasoani lenā iā te oe e faatupulaʻia ai ou tomai i le talaʻi ma le aʻoaʻo atu. E toʻatele paeonia ua tofo i le olioli o le fesoasoani atu i a latou tagata suʻesuʻe o le Tusi Paia ina ia avea ma Molimau papatisoina. O le ā se galuega totogi e mafai ona faapena sona fiafia ma se faamalieina e maua mai ai?

Ina ia maua tupe mo le tausiga o i latou, ua toʻatele ai paeonia e galulue i ni galuega totogi faavaitaimi. E toʻatele e muaʻi fuafua mo lenei tiute tauave, e ala i le aʻoaʻoina o se tomai patino i le aʻoga pe e aʻoaʻo mai i o latou mātua. Pe afai e manatu oe ma ou mātua o le a aogā lou mauaina o nisi aʻoaʻoga faaopoopo pe a māeʻa au aʻoga maualuluga, ia faamautinoa o le māfuaaga o lenā fuafuaga e lē ina ia suʻe ai ni tupe se tele, ae ina ia lagolagoina ai lau faiva ma atonu foʻi ina ia mafai ai ona e auauna faataimi atoa.

Ae peitaʻi, e taulaʻi atu le olaga o se paeonia, e lē i lana galuega totogi, ae i lana faiva—le fesoasoani atu i isi ina ia latou maua le ola! Aiseā e lē avea ai le auaunaga paeonia ma ou sini totino? O le auaunaga paeonia e masani lava ona oo atu ai i isi faaeaga. Mo se faaaʻoaʻoga, ua siitia atu nisi paeonia i vaipanoa o loo sili ona manaʻomia ai ni tagata talaʻi o le Malo. O isi ua latou aʻoaʻoina se isi gagana ma auauna ai, a lē i se faapotopotoga i lo latou lava atunuu o loo faaaogāina lenā gagana, pe o le ō atu foʻi i se isi atunuu. Ioe, o le auaunaga paeonia o se ala tauia lea o le olaga!

 ● O le auaunaga faamisionare o le isi lea avanoa. Talu mai le 1943, ua saunia ai e le Aʻoga Faale-Tusi Paia a le Olomatamata o Kiliata mo paeonia agavaa, se aʻoaʻoga e sili ona lelei mo le auaunaga faamisionare. E tuuina atu i le ʻaufaauu se tofiga e auauna ai o ni tagata talaʻi faataimi atoa i atunuu ese. O le tele o nei atunuu, e faigatā le tulaga o le soifuaga, o lea la, e manaʻomia tele ai i le auaunaga faamisionare i latou e lelei le soifua mālōlōina. E oo lava foʻi i na tulaga, ae o loo mauaina pea e misionare ni olaga fiafia ma le faamalieina.

● O le Aʻoga mo Toleniga i le Faiva sa faavaeina mo le toleniina o toeaina ma auauna o le faiva o ē ua agavaa ma e lē o faia ni o latou aiga. E valu vaiaso e faia ai suʻesuʻega māeʻaeʻa, e talanoaina ai mataupu e pei o tiute tauave o toeaina ma auauna o le faiva, le faalapotopotoga, ma le lauga atu i le lautele. O nisi ua tofia e auauna i o latou lava atunuu. O isi ua talosagaina e auauna i nisi atunuu.

● O le auaunaga i Peteli e aofia ai le auauna faatauofo i se tasi o ofisa o lālā a Molimau a Ieova. O nisi tagata o aiga Peteli o loo galulue patino lava i le sauniaina o lomiga faale-Tusi Paia. O isi o loo faatinoina ni tofiga e lagolago atu i ai, e pei o le tausia lelei o fale ma meafaigaluega, po o le tausia foʻi o manaʻoga faaletino o le aiga Peteli. O tofiga uma lava o ni faaeaga paia o le auaunaga iā Ieova. E lē gata i lea, ua olioli i latou o loo galulue i le Peteli i le iloaina, po o le ā lava le galuega o loo latou faia, ae o loo manuia ai se aofaʻiga tele o o latou uso i le lalolagi aoao.

E iai nisi taimi e valaaulia ai ni uso o iai ni tomai faapitoa ina ia auauna i le Peteli. Peitaʻi, o le tele lava o isi, e latou te faatoʻā mauaina se toleniga pe a iai i inā. O i latou i Peteli e lē o auauna mo le mauaina o ni manuia faaletino, ae ua faamalieina i latou i sauniuniga o loo faia mo mea taumafa, o potu o loo nonofo ai, ma sina alauni talafeagai mo le faatauina o nisi lava mea totino e latou te manaʻomia. O le auala lenei e faamatalaina ai e se tasi uso talavou o le aiga Peteli lana auaunaga: “E matuā manaia lava! E lē faigofie le pipii atu i le faasologa masani ua faatulagaina, peitaʻi e anoanoaʻi faamanuiaga ua ou maua i loʻu auauna ai i inei.”

● O le auaunaga i atunuu eseese e mafai ai e se tasi ona faia sona sao i le fausiaina o fale o le lālā ma Maota o le Malo. O auauna i atunuu eseese, e pei ona faaigoa ai, o loo faimalaga atu i atunuu ese ina ia fesoasoani i na galuega o faugāfale. O se tasi lenei o auaunaga paia, e tai tutusa atu i le galuega a ē na fausiaina le malumalu o Solomona. (1 Tupu 8:13-18) O fuafuaga mo le tausiga o i latou o loo galulue i le auaunaga i atunuu eseese, e tai tutusa lava ma le tausiga o le aiga Peteli. Maʻeu se faaeaga ua maua e nei uso ma tuafāfine, i le auauna ai i lenei vala o galuega mo se viiga o Ieova!

Ia Auauna iā Ieova ma le Tagata Atoa

O le auauna atu iā Ieova o le auala lea ua sili ona lelei e faaaogā ai lou olaga. Aiseā e te lē mafaufau ai nei e faatū sou lava sini o le auauna faataimi atoa i le Atua? Ia e talanoaina le auaunaga faataimi atoa faatasi ma ou mātua, o toeaina o la outou faapotopotoga, ma la outou ovasia o le matagaluega. Pe afai e te fia alu i Peteli, le Aʻoga Faale-Tusi Paia mo Uso Nofofua, po o le Aʻoga Faale-Tusi Paia mo Ulugalii Kerisiano, ia e auai atu i fono o loo faia mo i latou e fia talosaga mai, na e faia i taimi o fonotaga matagaluega ma tauaofiaga itumalo.

E mautinoa lava, e lē o tagata uma e ono agavaa ai pe mafai foʻi ona auauna faataimi atoa. O nisi taimi, e avea faafitauli tau i le soifua mālōlōina, o tulaga tautupe, ma tiute tauave faaleaiga, ma itu e faatapulaa mai ai le tele o mea e mafai ona faia e se tasi. Ae oo lava i na tulaga, e tatau pea i Kerisiano uma tuuina atu ona latou utagia le poloaʻiga a le Tusi Paia: “E te alofa atu [iā Ieova] lou Atua ma lou loto atoa, ma lou agaga atoa, ma lou manatu atoa.” (Mataio 22:37) E finagalo Ieova ina ia e faia le mea e sili ona lelei e tusa ai ma lou tulaga o loo iai. Po o le ā lava la lou tulaga o iai, ae ia avea ma taulaʻiga o lou olaga lou auauna atu iā Ieova. Ia faataatitia ni sini faatiokarate e mafai ona ausia. Ioe, “ia e manatua le na faia oe i ona po o lou taulealea”—ona faamanuiaina ai lea o oe e faavavau, ona o lou faia faapea!

Vaganā ua faasinoina, o loo faaaogā le lomiga 1884 o Le Tusi Paia mo mau sii mai “Le Feagaiga Tuai”; o le lomiga 1969 mo “Le Feagaiga Fou.” Afai e mulimuli mai i le mau sii le NW, e faaliliuina mai le New World Translation of the Holy Scriptures, i le gagana Peretania.