Ua Toeitiiti Mou Atu Puapuaga!

 E lē taumatea na e taumānatu pe aiseā ua tele ai puapuaga. Ua autausagā o mafatia tagata ona o taua, le mativa, mala, solitulafono, faiga lē tonu, maʻi ma le oti. Ua faateteleina puapuaga i le selau tausaga ua mavae. Pe e iai ea se taimi o le a mou atu ai nei puapuaga?

Ioe, ua toe o se aga ona mou atu lea o puapuaga. Ua taʻua i le Tusi Paia: “E toe itiiti, ona leai lea o le tagata amio leaga. . . . A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.” O le ā le umi o le a fai ai le lalolagi mo tagata amiotonu? “E fai lava le nuu mo tagata amiotonu, e nonofo ai pea i latou.”—Salamo 37:10, 11, 29.

O le a liua le lalolagi e fai ma parataiso pe a uma ona aveesea e le Atua le amioleaga ma puapuaga. A uma lenā, ona ola fiafia lea o tagata e oo i le faavavau, e aunoa ma se maʻi. Ua valoia e le Afioga a le Atua: “E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga.”—Faaaliga 21:4.

O le a toe tutū mai foʻi tagata ua maliliu e olioli i faamanuiaga i lea lalolagi fou: “O le a toe tutū mai ē ua amiotonu atoa ma ē ua amiolētonu.” (Galuega 24:15) O le pogai lea na fetalai atu ai Iesu Keriso i le tagata na tautau i ona autafa, o lē na salamō ma faatuatua iā Iesu: “Ta te faatasi ai ma oe i parataiso.”—Luka 23:43.

 Aiseā ua Puapuagatia ai Tagata?

Talu ai na finagalo le Atua e ola manuia tagata, aiseā la na ia lē taofia ai le amataga mai o puapuaga? Aiseā ua umi tele ai ona ia lē taofia puapuaga?

Na lelei atoatoa tino ma mafaufau o Atamu ma Eva ina ua faia i laʻua e le Atua. Na ia tuuina i laʻua i se faatoʻaga matagofie, ma ave i ai ni galuega faafiafia loto. Ua taʻua i le Tusi Paia: “Ua silasila atu le Atua i mea uma ua na faia, faauta foʻi, ua matuā lelei lava.” (Kenese 1:31) Ana la faalogo i le Atua, semanū e lelei atoatoa la laʻua fanau, ma avea ai le lalolagi ma parataiso e ola ai e faavavau tagata i le filemu ma le olioli.

Na foaʻi atu e le Atua iā Atamu ma Eva se meaalofa matagofie, o le saʻolotoga lea e fai ai a laʻua lava filifiliga. E leʻi pei i laʻua o ni masini e lē iloa fai ni filifiliga. Ae ina ia faaauau ona la ola fiafia, sa tatau ona la filifili e usiusitai i tulafono a le Atua. Na fetalai le Atua: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai.” (Isaia 48:17) E ogaoga āuga e oo i ai pe a sesē a laʻua filifiliga e fai, auā na faia le tagata ina ia faatonuina e le Atua. Ua faapea mai le Tusi Paia: “E lē o i le tagata lona ala, e lē o i le tagata e savali ona faatonuina le mea e ui ai o ia.”—Ieremia 10:23.

Ae pagā lea, na manatu o tatou uluaʻi mātua e mafai ona la faatonuina o laʻua ala, e aunoa ma le fesoasoani a le Atua. Ina ua la fouvale i le pule a le Atua, na lē toe tausia i laʻua e le Atua ma na la melea ai lo laʻua ola lelei atoatoa. Na ola matutua ma feoti mulimuli ane ai. Ona na tatou tupuga mai iā Atamu ma Eva, o le ala lea ua tuufaasolo mai ai le agasala ma le oti iā i tatou uma lava.—Roma 5:12.

 Le Finauga o le Pule Silisili Ese

Aiseā na lē faaumatia ai e le Atua Atamu ma Eva ma toe faia se isi ulugalii fou? Auā foʻi na luʻia le pule silisili ese a le Atua, o lana aiā e pule ai. O le fesili na tulaʻi mai, po o ai e iai le aiā e pule ai, ma o ai e tatau ona pule? Pe e manuia olaga o tagata e aunoa ma le pule a le Atua? E pau le auala e faamautū ai e le Atua pe e manuia olaga o tagata e aunoa ma lana pule pe leai, o le tuu lea o se taimi e pulea ai e tagata i latou lava. E tatau ona lava le taimi e tuu atu i tagata e fai ai a latou pulega eseese. O nei pulega e aofia ai faiga faapolotiki, o mataupufai a tagata, faiga tau tamaoaiga, ma faiga faalelotu e aunoa ma le taʻitaʻiga a le Atua.

O le ā le iʻuga ua oo i ai? E tusa ai ma tala o mea na tutupu i le faitau afe o tausaga ua tuanaʻi, ua matuā faateteleina puapuaga. Na matuā ogaoga puapuaga o tagata i le senituri ua teʻa. E faitau miliona tagata na fasiotia i le Taua Lona Lua a le Lalolagi. E silia i le 100 miliona ē ua fano o latou ola i taua. Ua salalau atu le solitulafono ma faiga sauā. Ua matuā taatele le faaaogāina o fualaau faasāina. O loo faaauau ona pepesi faamaʻi e maua ona o feusuaʻiga. E faitau sefulu miliona tagata ua feoti i tausaga taʻitasi ona o le matelāina ma faamaʻi. Ua malepelepe aiga ma ua leagafaia amioga a tagata i le atulaulau uma. Ua iso malo o tagata i se vaifofō mo nei faalavelave. E leai se malo ua soloiesea le ola matua, maʻi ma le oti.

O mea uma nei na valoia e le Tusi Paia o le a tutupu i ona pō nei. Ua taʻua i le Tusi Paia lo tatou vaitaimi o “aso e gata ai” o lenei lalolagi lea “e oo mai ai aso faigatā.” Ua moni ai le valoaga a le Tusi Paia, “o tagata amio leaga ma ē taupelopelo, e alualu pea lava lo latou leaga.”—2 Timoteo 3:1-5, 13.

 Ua Toeitiiti Mou Atu Puapuaga

Ua faamaonia i mea ua tutupu, ua toeitiiti muta le taimi o loo tuu mai i tagata e pule ai i latou iā i latou lava, e aunoa ma le taʻitaʻiga a le Atua. Ua manino le mata o le vai, e lē manuia pulega a tagata e aunoa ma le taʻitaʻiga a le Atua. E na o le pulega lava a le Atua e maua ai le filemu, fiafia, soifua mālōlōina lelei atoatoa ma le ola e faavavau. O lea la, ua toeitiiti ona faamuta e Ieova le amio leaga ma puapuaga. Ua toe o se aga ona faalaa mai lea o le Atua e faaumatia lenei lalolagi malapagā.

Ua valoia i le Tusi Paia: “O ona pō o ia tupu [o pulega a tagata i aso nei] e faatūina ai e le Atua o le lagi o le malo [i le lagi] e lē faaumatia e faavavau. . . . Na te tuʻimomomoina ma faaumatia ia malo uma lava [o pulega i aso nei], a o ia e tumau lava e faavavau.” (Tanielu 2:44) O le aʻoaʻoga autū a le Tusi Paia, o le faamaonia lea o le tonu o le pule silisili ese a Ieova po o lana aiā e pule ai, e ala i lona Malo i le lagi. Na valoia e Iesu se tasi o vala tāua o le faailoga o “aso e gata ai.” Na fetalai o ia: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.

O ai o le a faasaoina pe a oo mai le gataaga? E maua le tali i le Tusi Paia: “O ē amio saʻo, latou te mau i le nuu; ma ē ua sao a latou amio, e faatotoeina ai i latou; a e vavaeeseina o ē amio leaga ai le laueleele.” (Faataoto 2:21, 22) O ē amio saʻo, o tagata ua aʻoaʻoina le finagalo o Ieova ma mulimuli i ai. Na fetalai Iesu Keriso: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Ioe, o le a “mavae atu foʻi le lalolagi, . . . a o lē fai le finagalo o le Atua, e tumau lea e faavavau.”—1 Ioane 2:17.

Vaganā ua faasinoina, o loo faaaogā le lomiga 1884 o Le Tusi Paia mo mau sii mai “Le Feagaiga Tuai”; o le lomiga 1969 mo “Le Feagaiga Fou.” Ua suia le sipelaina o upu e tusa ma le auala o loo faaaogāina ai i aso nei.