O LE maso o se figota e pipii i papa, laupapa, po o tino o vaa. E ese mai i isi figota o le sami ia e pipii saʻo i se mea, o le maso e pipii i se mea e ala i ni aa e tai pei o ni filo ninii e taʻua o le byssus. O lenei auala e fesoasoani tele i le maso i le auala e maua ai ana meaʻai ma oo atu ai i isi nofoaga. E foliga mai e lē malolosi tele nei aa e tatalia ai le malolosi o galu. E faapefea ona fesoasoani nei aa i le pipii o le maso ma lē tafia ese ai e galu?

Ia Mātau: O aa po o le byssus, e malō le isi itu ae vaivai ma memeʻi le isi itu. E tusa ai ma suʻesuʻega a tagata suʻesuʻe, o le 80 pasene o nei aa e malō ae 20 pasene e vaivai, lea e tāua tele mo le pipiimau o le maso. O le māfuaaga lea e mafai ai ona pipiimau le maso e ui i le fesouaʻi o galu o le sami.

Na faapea mai le polofesa o Guy Genin, e “mataʻina” le iʻuga o lenei suʻesuʻega. Na ia faaopoopo mai: “E ofoofogia nei aa, ona o le auala atamai na faatulaga ai ona itu malō ma itu vaivai.” E talitonu saienitisi o le auala na faatulaga ai nei aa po o byssus, ua telē lona aogā i le fausiaina o meafaigaluega e faapipii ai mea i le fausiaina o fale ma vaa i lalo o le sami, pipii ai uaua i ponaivi, ma mea faapipii e faaaogā i taotoga. Ua faapea mai se polofesa i le Iunivesite o Kalifonia i Santa Barbara i le Iunaite Setete, e igoa iā J. Herbert Waite: “E tele mea e aʻoaʻoina mai i le natura e fesootaʻi atu i mea faapipii.”

O le ā sou manatu? Pe na teʻi lava ua iai aa po o byssus o maso? Pe na foafoaina?