I le pei o le tele o atunuu i aso nei, ua amanaʻia e Italia aiā tatau a ona tagatānuu e teena le auai i vaegaʻau ona o o latou lotofuatiaifo. Ae e lē o le mea lena na tupu i taimi uma. Na māfua ona talia e Italia ia aiā tatau a tagata ona o le tele o tulaga faigatā na fesagaʻia e Molimau a Ieova.

Na faaauau pea mo le tele o tausaga ona faamalosia tagata Italia e auai i vaegaʻau ina ua māeʻa le Taua Lona II a le Lalolagi. I le faatoʻā māeʻa o le taua i le 1946, e na o le 120 Molimau na iai i le atunuu atoa. Ae a o faaauau pea ona tuuina atu e tagata o latou ola iā Ieova, na faatupulaʻia ai le aofaʻi o tane talavou Molimau o ē na tetee atu i le auai i vaegaʻau e tusa ai ma le tulafono. Na faavae a latou tetee i mataupu silisili mai le Tusi Paia i le solitū, teena le sauā ma le alofa i tuaoi.

O se suʻesuʻega na faia e le ofisa o le lālā i Italia na latou iloa ai e pe a ma le 14,180 uso o ē o loo soifua pea na faafalepuipuiina ona o le teena o le auai i vaegaʻau. Pe a tuufaatasi, pe a ma le 9,732 tausaga na faafalepuipuiina ai nei uso mai i le taufaaiʻuiʻuga o le vaitau o le 1960 seʻia oo i le taufaaiʻuiʻuga o le vaitau o le 1990.

Na taʻua e se faitofā o le talafaasolopito o Sergio Albesano i Turin i Italia, “o le toʻatele o tane talavou i le falepuipui o ē na teena le auai i vaegaʻau,” na faia aʻe i Molimau a Ieova. Na ia toe faapea mai, “e faafetaia le lototetele o nei tane talavou ua mafai ai ona iloa e tagata lautele le faafitauli”.

Na feiloaʻi lē na avea muamua ma Palemia a o avea ma Minisita o le vaegaʻau a Italia i le vaitau o le 1960 o Giulio Andreotti ma Molimau na faafalepuipuiina, ina ia malamalama atili ai i māfuaaga na latou teena ai le auai i vaegaʻau. Na ia tusi mai e faapea: “Ou te maofa i lo latou lē aafia i soo se faiga faapolotiki ona o o latou talitonuga faale tapuaʻiga. Na iai māfuaaga na latou falepuipui ai mo le tele o tausaga ma lē ofuina le togiga i le falepuipui.”

O le tulafono muamua e amanaʻia ai i latou e teena le auai i vaegaʻau na faatoʻā faamaonia i le 1972. E ui ina faapea mai le tulafono e mafai ona auai i se isi auaunaga, ae o loo i lalo pea o le vaavaaiga a le vaegaʻau ma e leʻi taliaina e o tatou uso lenā tulaga.

Mulimuli ane iā Iulai 8, 1998, na pāsia ai e le Malo o Italia se tulafono fou e faavae ai se auaunaga e lē aafia i lalo o le pulega a le vaegaʻau, ma na talia e Molimau a Ieova. Iā Aokuso 2004, na pāsia ai e Italia le tulafono e lē toe faamalosia ai le auai i vaegaʻau, ma na faamamaluina iā Ianuari 2005.

E toʻatele le ʻau atamamai na viiviia le sao o Molimau a Ieova i le mea ua tupu e aofia ai ma Sergio Lariccia, o se lōia ma o se polofesa o le tulafono i le Iunivesite o Sapienza i Roma. Na ia faapea mai: “Na taʻua e le ʻau failotu i vaegaʻau o se ʻmatuā lē faaaloalo i le atunuu le lē auai i vaegaʻau, ma e lē aafia ai le faaalia o le alofa faa-Kerisiano ma ua faaalia ai lo latou palaaai,’ ae ona o le tutumau o le toʻatele o Molimau a Ieova, na latou saosaolaumea ai i le faaleleia o tulafono ma le auala e mafaufau ai tagata i Italia.”

E lē na o tulafono a Italia na aafia ona o o tatou uso. E feoloolo leoleo o le falepuipui na avea ma Molimau a Ieova ona o uiga lelei na latou mātauina i Molimau i le falepuipui. E manatua e Giuseppe Serra: “O le faaaʻoaʻoga a na Molimau talavou na uunaʻia ai aʻu e fai saʻu suʻesuʻega faale Tusi Paia.” Na avea o ia ma Molimau i le 1972. (Tagaʻi i le pusa o loo i lalo)

E tatou te olioli i le faaaʻoaʻoga lototele a tele o augātupulaga a o tatou uso ma o latou aiga i Italia, faapea foʻi ma le toʻatele o isi i le ʻauuso i le lalolagi aoao, o ē matuā faatāuaina le faatonuga ia lē “toe aʻoaʻoina foʻi i taua.”​—Isaia 2:4.