23 MARCH 2022 | NYAYA IYI PAYAVA: 11 OCTOBER 2024
RUSSIA
NYAYA IYI PAYAVA—MITONGO YAKANGA YAPIWA YAKACHINJWA PAKADZORERWA NYAYA MUDARE | Jehovha Anotsigira Hama Nehanzvadzi 6 Dzakatendeka
Musi wa10 October 2024, dare reKhabarovsk Territory Court rakazivisa mutongo waro panyaya yakadzoswa mudare yahanzvadzi Maya Karpushkina, hama Stanislav Kim, hama Nikolay Polevodov, hanzvadzi Svetlana Sedova, uye hama Vitaliy Zhuk, nemudzimai wavo Tatyana. Mitongo yakanga yambosendekwa yakanga yapiwa Maya, Svetlana, naTatyana yakadzikiswa negore rimwe chete. Mutongo wekugara mujeri wakanga wapiwa Stanislav wakadzikiswa kuenda pamakore 7 nemwedzi 2. Mutongo waVitaliy wakadzikiswa kuenda pamakore 7 nemwedzi 4 uye mutongo waNikolay wakadzikiswa kuenda pamakore 7 nehafu. Mitongo yavo yakabva yasendekwa, saka hama dzacho dzakabva dzatobudiswa mujeri musi iwoyo.
Musi wa20 June 2024, dare reIndustrialniy District Court of the Khabarovsk Territory rakapa mutongo waro panyaya yahanzvadzi Maya Karpushkina, hama Stanislav Kim, hama Nikolay Polevodov, hanzvadzi Svetlana Sedova, uye hama Vitaliy Zhuk, nemudzimai wavo Tatyana. Maya akapiwa makore 4 ekugara mujeri asi mutongo wacho wakambosendekwa. Svetlana naTatyana vakapiwa makore 5 ekugara mujeri asi mitongo yacho yakambosendekwa. Hanzvadzi idzi hadzisati dzava kufanira kuenda kujeri. Stanislav akatongerwa kugara mujeri kwemakore 8 nemwedzi 2. Vitaliy akatongerwa kugara mujeri kwemakore 8 nemwedzi 4 uye Nikolay akatongerwa kugara mujeri kwemakore 8 nehafu. Hama idzi ndidzo dzekutanga kutongerwa kugara mujeri kwenguva yakareba kudai kubva pakabhanwa basa redu muna 2017. Hama dzacho dzakabva dzatoendeswa kujeri.
Zvinhu Zvakaitika
10 November 2018
Mapurisa akavhiringidza vanhu vanenge 55 vainge vakaungana panzvimbo yekudyira vachifara havo. Vese vaivapo kusanganisira vana, vakabvunzurudzwa, vakatorwa mafingerprint uye mapikicha
12 November 2018
Hama Stanislav, Nikolay, naVitaliy vakaendeswa kujeri rinochengetwa vanhu vakamirira kutongwa. Hanzvadzi Maya, Svetlana, naTatyana vakarambidzwa kubuda munharaunda yavanogara
14 January 2019
Hama Nikolay naVitaliy vakabudiswa mujeri rinochengetwa vanhu vakamirira kutongwa uye vakaudzwa kuti vaisafanira kubva pamba
29 January 2019
Stanislav akabudiswa mujeri rinochengetwa vanhu vakamirira kutongwa uye akaudzwa kuti aisafanira kubuda munharaunda yaanogara
18 July 2019
Nyaya yacho yakaendeswa kudare reIndustrialniy District Court rekuKhabarovsk Territory
2 August 2019
Nikolay akatanga kubvumidzwa kubva pamba
9 September 2019
Imwe nyaya ine chekuita naStanislav uye Nikolay yakaendeswa kudare reZheleznodorozhniy District Court rekuKhabarovsk
5 November 2019
Nikolay akarambidzwa kubuda munharaunda yaanogara
18 January 2020
Stanislav naVitaliy vakatanga kubvumidzwa kubva pamba
4 February 2020
Stanislav naNikolay vakanzi vaiva nemhosva pane imwe nyaya yavo yakanga yaendeswa kudare. Dare reZheleznodorozhniy District Court rekuKhabarovsk rakatongera mumwe nemumwe wavo makore maviri mujeri asi mutongo wacho wakabva wasendekwa padivi asi vari kuramba vachiongororwa
3 August 2020
Nyaya yakanga yaendeswa kudare reIndustrialniy District Court yakadzorerwa kuhofisi yemuchuchisi zvakaita kuti muchuchisi adzorerezve nyaya yacho kudare kuti iongororwe
29 September 2020
Dare reKhabarovsk Regional Court rakaongorora nyaya yakanga yaunzwa zvakare mudare nemuchuchisi. Stanislav naNikolay vakabvumidzwa kuti vataure nemutongi. Vakataura kuti nyika yeRussia, kungofanana nedzimwe nyika yakasaina zvibvumirano zvekusatyora kodzero dzevanhu vemunyika mayo uye kusavhiringidza rusununguko rwavo rwekunamata
12 October 2020
Dare reKhabarovsk Regional Court rakabvumirana nemutongo wakanga wapiwa nedare reIndustrialniy District Court uye nyaya yacho yakadzorerwa kuhofisi yemuchuchisi
15 December 2021
Nyaya yacho yakaendeswa zvekare kudare reIndustrialniy District Court
Nhoroondo Yeupenyu
Tinoziva kuti Jehovha acharamba achitsigira hama nehanzvadzi idzi nevamwewo vakawanda vari ‘mugore guru rezvapupu.’—VaHebheru 12:1.