SHAPITRƐ 35

Wopo wɔkɔnge w’okokami ndjala ilongo yɛ Ndjambe?

M’ɔkɔngɔ wɔ mpomana la mbalaka kɛmɔtshi, Jeremy ɛnaka djonyi djɛ ndjala ilongo yɛ Ndjambe. Atepelaka ante: “Winá wɔ mayalaka l’ɛnɔnyi 12, papa kɛso atokadjɛka. Lofu lɔmɔtshi l’otsho lálɔmbaki lá mbeto, lawɔndaki Yehova djɛnde nkotshɛ́ papa djɛ nde nkalɔ lá mvulu.”

Má yɛnyi y’efula yeyalaki lande, Jeremy ɔsaka Bible djɛnde ko awangaka mbala. Winá wɔ ndakome lá Yeembo 10:14, nde atɔnɔlaka efula. Vɛrse djɛsɔ ntepelaka lá nkambo djɛ Yehova ante: ‘Te wɛ ndeke ose ndjolo olendakande. Wɛ olekɔ okotshɔ wɔ wɔna etshike.’ Jeremy ntepelaka ante: “Ndawokaka etengo Yehova ndanshimelaka nde lemi djɛ lemi ndjewa ente nde alekɔ okotshɔ wɔmi, nde alekɔ papa kɛmi. Papa kɛkɔnge kɛ wɔlɔ k’okokami mba ndooleka nde?”

NTSHA opomana l’okakasano etengo wɔ Jeremy kana lako, Bible nyɛnyɛka ente Yehova nkɔpaka wɛ ndjala ilongo yɛnde. Lá nsɔsɔlɔ, Bible ntepelaka ante: ‘Sukana la Ndjambe, ko nde angosukana le we.’ (Djakɔbɔ 4:8) Kokanela nsakiso k’etepela wɛsɔ: Kaanga ngopakoke nyɛna Yehova edjinge ndɔpɛlama nyape kaanga ndambo, nde nkɔlɔmbaka djɛ wɛ ndjala ilongo yɛnde!

Koko djɛ wɛ ndjala ilongo yɛ Ndjambe ngo wɛ ndjila welo. Tɔkɔsa ndjɔmbɔmba: Ntsha ombokona nsoso lá mvulu kɛko, wɛ ndjewaka ente djepangofula ngo yɔmɛlɛ. Djɛ nsoso djɛkɔ mfula wɔlɔ, ngo wɛ ndoovutelaka washi la ndootshika l’edjena kɛ wɔlɔ. Oyɛwɔ ngo nghɔsɔ djɛ ndjala ilongo yɛ Ndjambe. Wopo wɔkɔnge w’okokɛ nangha djɛ djokanelo djɛnyo ndjalaka winá enkfumɔ ngo wolo?

Alekɔ djonyi ndjekaka Bible

Djɛ ndjala ilongo yɛ nsɔsɔlɔ, ndɔmbamaka nangha akambo ape winá w’osawolanyo, ndjekameyɛ la ntepela. Alekɔ ngo wopo wɔk’ɔmɔ lá nkambo djɛ ilongo yɛso la Ndjambe. Badji edjinge wekelo wɔ Bible alekɔ wopo ɔmɔtshi wekameyɛso akambo wa Ndjambe ohonande ntoshimela.—Yeembo 1:2, 3.

Koko mbala imɔtshi, opasasangaka ndjeka. L’edjena kɛ ndjeka, dangala efula nkɔpaka ndenda televisiɔ, ntomba, kana nsawola la winawɔ. Koko ntsha ɔkɔpa ndjala ilongo nya Ndjambe, wɛ ladjɛ nkotshɛ akambo wɔtɔlɔmbande. Wɛ ladjɛ ndoowekameyɛ má ndjekaka Otepela wɔnde.

Koko, tokake wɔma. Wekelo wɔ Bible wopalekɔ odjito. Wɛ nkoka nsasanga la wekelo kaanga ntsha okanela ente opalekɔ l’akoka efula wa ndjeka. Nkambo djɛ ntondo dj’okokɛ nangha nde, nsomba winá wɔ ndjeka Bible. Wɔn’omoto ɔmɔtshi w’etawɔ Lais atepelaka ante: “Lemi ndekɔ la nonghanyi kɛmi, ekete kɛ ntondo k’onananghakami nkɛsɛ nkfumɔ nde, mbala shapitrɛ kɛmɔ kɛ Bible.” Maria, kanga lolekɔ l’ɛnɔnyi 15, alekɔ la nonghanyi ketshikitanyi. Atepela ante: “Lemi mbalaka Bible nkɔlɔ nkfumɔ, lá ntondo kɛ lemi ndjetama.”

Djɛ mbanga la nonghanyi kɛko kɛ wekelo, lenda ipapango yelekɔ́ lá  nkishi. Masɔ, funa lanɛ l’anse winá w’okokɛ ndɔsaka kaanga minitɛ 30 djɛ ndjeka Otepela wɔ Ndjambe.

․․․․․

Nonghanyɛ winá wɔ ndjekaka apalekɔ nkambo dj’ekomo. Winá wɔ ngongowanga ndjeka Bible, mbala imɔtshi ɔngɛna ente apayalaka winá enkfumɔ wɔdju. Mbala imɔtshi ongoyawoka etengo Jezreel, olangala wolekɔ́ l’ɛnɔnyi 11, wotepelisá ante: “Ntenyi mɔtshi djelá Bible ndekɔ wolo edjinge djepokamá.” Ntsha okɛ ngo nghɔsɔ, mbɔ topekɔke. Winá enkfumɔ ɔsaka wekelo wɔ Bible etengo mbamba kɛ ndjekameyɛ Yehova Ndjambe, ilongo yɛko. L’ilá k’etsho, ongootateyɛ nsasanga edjinge mba wapɔ efula má wekelo wɔ Bible, ntsha wɛ nkindjɛ ndjila welo!

Lɔlɔmbɔ alekɔ la ntshina

Lɔlɔmbɔ alekɔ alekɔ wopo ɔmɔtshi w’osawolakaso la Ndjambe. Lɔlɔmbɔ alekɔ opapɛyɛ wɔ ntshina efula! Okoka nsawola nya Yehova winá onkfumɔ w’ɔkɔpɛ la mbile kana l’otsho. Edjinge nde alekɔ winá enkfumɔ entshupa djɛ nkekameyɛ. Nkambo deka djonyi nde, nde nkɔpaka ndjoka akambo w’ɔkɔpɛ ndooshimela. Djɛkondeke Bible okokembɛnde ante: ‘Lá akambo ankfumɔ nyotakiyanake, koko nyoshimele Ndjambe ehomba wɛnyo má lɔlɔmbɔ la ɛwɔndɔwɔndɔ esanga la ekawoyelo kɛ lokasa.’—Filipɛ 4:6.

Etengo vɛrse djɛsɔ ɛnyɛwɔ, akambo walekɔ efula w’okokɛ nshimela Yehova. L’anteyi k’akambo wasɔ ndeke lolekɔ edjinge ekakasano la ekiyano wɛko. Okoka edjinge ndɔɔlɔmba djɛ ndokawoyɛ lokasa. Ape ongokawoyɛke winako lokasa má akambo wa wɔlɔ wokonanghelakawɔ? Okoka nanghaka wopo wɔk’ɔmɔ te Yehova, kanga lombokonanghelá akambo efula ndeka wopo wɔ ilongo inkina inkfumɔ okokande nkonanghela.—Yeembo 106:1.

Funa l’anse lanɛ, akambo amɔtshi wokokɛ nkawoyɛ Yehova lokasa.

․․․․․

Ipa l’ehamo, ongopomanake l’akambo wakɔpɛyɛka wɔma edjinge wakovungusanyɛka mbala la mbala. Yeembo 55:22 ntepelaka ante: ‘Ɛkɛ odjito wɔko te Yehova, ko nde angokosuka. Nde apawolaki kaanga ndambo daambi djɛ onto wɔ wɔlɔ nkfɔ.’

Funa lanɛ l’anse, wayi wakokiyanyɛ w’ɔkɔpɛ ndɔmba lá nkambo djɛkɔ.

․․․․․

Wayi wa ngapomana lá lowiko

Lá djokanelo djɛko nya Yehova nkambo mɔtshi ndekɔ djɛ ngopakoke nyimɛ yimba. Ontshumbi yeembo Davidɛ afunaka ante: ‘Nyɔlɛtɛ ko nyɔnghɛna ente Yehova alekɔ wɔlɔ.’ (Yeembo 34:8) Winá wɔ Davidɛ ndafunaka Yeembo 34, ayalaka m’ɔkɔngɔ wɔ nde mpomana la nkambo mɔtshi dj’okiyano. Nde atalotaki Nkfumi Saolo, kanga lohonaki ndooyaka, ɔsɔ ayalaka ohemba wɔ wolo efula. Koko nde ayalaka ladjɛ ntisamá ngo le antonyi wande ase Filistiya. Etengo ndɛnyi ante wakɔpa ndooyaka, Davidɛ ananghaka etengo ambotata okadji edjinge nkambo djɛsɔ ndeke l’okotshisá djɛ nde ndota.—1 Samwɛlɛ 21:10-15.

Davidɛ atatepela ante má balo djɛnde ndeke ndalonge djɛ ndota. Koko, nde apɛyɛka Yehova lomo. Má bango djɛ yeembo yɛ sotepelaki má djiko, nde afunaka ante: ‘Lemi ndjopolaka Yehova ikanyi, ko nde ankandjimolaka. Nde antshungolaka má wɔma wɛmi enkfumɔ.’ (Yeembo 34:4) Má ndenda wayi wapomanisá lande lá lowiko, Davidɛ akokaka nkembɛ anto ankina ante: ‘Nyɔlɛtɛ ko nyɔnghɛna ente Yehova alekɔ wɔlɔ.’ a

Wɛ ovungɔ nkambo mɔtshi djekokomelisá lá lowiko lɔko dj’ɛnyɛ ente Yehova nkolamaka? Ntsha oyɛwɔ nde nghɔsɔ, mbɔ funa lanɛ l’anse. Apengo nkambo dj’ekekete. Kohemba nkanela ɛtshɔkɔ ɛmɔtshi kaanga wɛ daambi wowɛ lá lowiko lɔ lofu la lofu, wɛ mbala imɔtshi opilaka yimba.

․․․․․

Ambotshi wako ndeke lokolakanyisá akambo wa nsɔsɔlɔ welá Bible? Ntsha nghɔsɔ, mbɔ ɔsɔ alekɔ ɔtshɔkɔ. Koko, wɛ ladjɛ nsanga ilongo nghɔmɛlɛ wɛ nya Ndjambe. Ntsha wɛ otananghe nkambo djɛsɔ, mbɔ kamba la wayi walekɔ́ lá shapitrɛ yɛnɛ djɛ mbanga djoyi djɛsɔ. Yehova angɔtshɔkɔla welo wɛko. Bible ntepelaka ante: “Nyokindjɛ ndɔmba, ko wanghɔnyɔpɛyɛ; nyokindjɛ mpona, ko nyongowa.”—Mateo 7:7.

WALA WAYI EFULA WALENDANA LA DJOYI DJƐSƆ LÁ SHAPITRƐ 38 EDJINGE 39, VƆLIMƐ 1

LÁ SHAPITRƐ YƐWƆLAMA

Ongokake wolo nshimela anto amɔtshi wayi walendana la Ndjambe? Eka wopo wɔ nseela djawo djɛko.

[Nɔtɛ kelánse kɛ nʼkishi]

VƐRSE DJ’ƆSAMISA ƆTƐ WƆ DJAMBA

‘Osasa le anto w’ewa ehomba wɛwɔ welá nyuma.’—Mateo 5:3.

DAKO

Walaka ngo akishi anɛyi wa Bible mfu inkfumɔ, ko ongoshiyɛ Bible dj’otondo l’ɔnɔnyi ɔmɔ.

ONGEWAKE . . . ?

Ladjikɛnde owala onkanda wɔnɛ edjinge okamba l‘alako waposá má Bible, nkambo djɛsɔ nyɛnyɛka ente Yehova nkilaka yimba.—Djɔanɛ 6:44.

KƐNƐ K’OYƐ LADJƐ NANGHA!

Djɛ mba wapɔ má wekelo wɔmi wɔ Bible, lemi ladjɛ ․․․․․

Djɛ ndɔmbaka winá enkfumɔ ipa la mpetshɛ, lemi ladjɛ ․․․․․

Nkambo dj’ɔkɔpami ndjopola ambotshi wami lá wopo w’oyɛmi nde ․․․․․

ONGEWAKE?

● Wopo wɔkɔnge w’okokɛ nangha wekelo wɔ wɔlɔ wɔ Bible w’onto nyɔmɛlɛ?

● Lamo Yehova ɔkɔpande ndjoka alɔmbɛlɔ w’anto wa ntshamba djɛ djɔ?

● Wopo wɔkɔnge w’okokɛ ndɔngɔsɔla yopo yɛko yɛ ndɔmba?

[Efunelo]

“Winá wɔ mayalaka ilɛngɛ, máhetolaka alɔmbɛlɔ wami ngo mpetola. Koko win’ɔsɔ ndɔlɔmba akambo wa wɔlɔ edjinge wa nyɛtshi wopomanami lá lofu la lofu. Etengo mfu ipe yopasangaka, kɛsɔ nkotshɛka lemi dj’ipa mpetola akambo wakɔ amɔ.”—Eve

[Ipapango/​Nʼtshango]

 Lembetela Bible djɛko

1. Sɔna ɔkɔndɔ ɔmɔtshi welá Bible w’ɔkɔpɛ mbala. Lɔmba djɛ wɛ mba balo djɛ ndjoka akambo w’owalɛ.

2. Wala ɔkɔndɔ wɔkɔ wɔlɔwɔlɔ. Towalake lankeke lankeke. Winá wɔ ngotawale, tokatɔnɔlaka lá wayi wakɔ. Kamba l’akoka wako ankfumɔ wakoka nkokotshɛ́ djɛ wɛ: Djala etengo onto w’ɛna kɛnɛ k’owalɛ, ndjoka etepela w’anto watepelá, ndjoka lohoyi, ndɛta nkete djɛ ndɛ, edjinge akambo ankina. Ɛna ɔkɔndɔ wɔkɔ etengo onanghemawɔ nde winá wɔsɔ!

3. Tɔnɔla lá akambo wa ngowalaki. Yawopola weepó wɛwɔlamá wɛnɛ:

● Ladjikɛnge Yehova ndafune ɔkɔndɔ wɔnɛ lá Bible?

● Anto wakɔna woyɛso ladjɛ ndjokola, edjinge anto wakɔna walekɔ ndjɔmbɔmba yɛ nyɛtshi yɛ ndjewɔ?

● Olakanyelo wɔkɔnge w’okokami mba m’ɔkɔndɔ wɔnɛ?

● Ɔkɔndɔ wɔnɛ ondakanyɛwɔ nge lá nkambo djɛ Yehova edjinge lá wopo w’onanghande akambo?

4. Nangha lɔlɔmbɔ l’itenyi te Yehova. Shimelande kɛnɛ kɛ ngekaki má wekelo wɔko wɔ Bible la wopo w’okanelɛ nkamba l’akambo wakɔ lá lowiko lɔko. Kawoyɛka Yehova lokasa mfu inkfumɔ lá nkambo dj’opapɛyɛ wɔ ndɔkɔpɛyɛ, Otepela wɔnde w’ekina, Bible!

[Nʼtshango]

‘Otepela wɔko wolekɔ owaya l’ekolo wɛmi, edjinge osase lá mboka kɛmi.’—Yeembo 119:105.

[Ipapango/​Nʼtshango]

Lenda nkambo djeleka djonyi dj’oyɛ ladjɛ nangha

Opawa winá wɔ ndɔmba? Opawa winá wɔ ndjeka Bible? Mbala efula, nkambo djɛsɔ ndenanaka la wopo w’osɛ akambo waleka djonyi.

Sɛsa tokanyi tɔnɛ: Ɔsa kanti ko ilá abanga wa nkekete l’eteyi. Lodjɛká lɔsɛnga lá kanti kfu. Win’ɔsɔ ombowa kanti kembolola la lɔsɛnga edjinge l’abanga.

Tshanghanyɛka nkete má bomba, ko ɔsa ngo lɔsɛnga lɔkɔ l’abanga wakɔ. Tshikitanyɛ win’ɔsɔ: Ilá lɔsɛnga ntondo lá bomba, ko ilá abanga l’ɔkɔngɔ. Ape apangokoka? Ladjikɛnde ombilaka lɔsɛnga ntondo lá bomba.

Olakanyelo wɔkɔnge wɔ ngombowa? Bible ntepelaka ante: “Nyɔkɔmɛ akambo waleka djonyi.” (Filipɛ 1:10) Ntsha ombohetshɛ tokakambo tɔ daambi tɔ etengo, etombo l’edjena kɛ ntondo, opangowa mbamba lonkina kɛ nkamba l’akambo waleka kekete lá lowiko lɔko, kana ntepela ente akambo wa nyuma. Koko ntsha ombokilika etepela welá onkanda wɔ Filipɛ, ɔnghɛna ente ongowa mbamba kɛ nkotshɛ akambo wakɔ ape, w’Onkfumi edjinge walendana l’etongelo. Akambo ankfumɔ ndendamaka má wopo wɔ nkambo dj’ohetshɛ lá ntondo!

[Nʼtshango]

Etengo nsoso djembokonama lá mvulu, djokanelo djɛso la Ndjambe ndɔmbamaka ndɔngɔsɔlaka ntsha tɔkɔpa ente djekembe