BUKUASHI BUA BAABA BAFUISHE
Bukuashi bukile buwa kui baaba be na kinyongua
MU BINO BIPUA BISHALE BASHA BINANGU BEBUNGI MBAKIMBE BYA KULONGA BI KINYONGWA AKIKALAA NAKYO MUNTU MUFUISHE MUNTU ADI MUFULE. Kadi, anka byatwikeele bebileshe, elango dyooso dibuwa ndipushene na binangu bya kala bi mu Bible. Bino abilesha kalolo shi bukunkushi bwi mu Bible ta mbutale kipungo kampanda nya. Kadi, mu Bible tamwi penda malango a kutudila lukulupilo. Mwi myanda yatushi balombeene kupeta ingi mbalo, ikumbeene kunyingishA bano be na kinyongwa kukila ingi yooso.
Kwikala bashinguule shi bakwetu bafwe tabakwete kukyenga
Bible amba mu mukanda wa Mulungudi 9:5 shi: “Bafwe tabauku kintu su nkimune.” “Mpàngo yaabo aikafudiila.” (Mis. 146:4) Mu kuIpushena na ano mayi, Bible apwandjikisha lufu na tuloo mu butaale.—Yowano 11:11.
Lukumiino lukata mwi Efile sha kifulo alwitunyingisha
Bible amba bino, mu mukanda wa Misambo 34:15: “Meeso a Yehowa * ee kwi balulame, na matwi abelekye ku misaase yaabo.” Kufungwila Efile Mukulu eshimba dyetu mu luteko kwi bu bwanga bukata bwa kinyongwa kukila kwisamba na ungi muntu. Akwitukwasha bwa kunyingisha kipwano kyetu na Mupangi etu, mukumbeene kufuba na bukome bwaye bwa kwitunyingisha.
Lukulupilo lwibuwa alutungu kwikala nalo bwa mafuku e kumpala
Banda kupwandjikisha nguba ekala bano booso be mu mashama basangukye pano pa nsenga! Bible akula misango ibungi pabitale uno nguba. Palesha abikekala nshalelo a bantu mu aa mafuku, Bible amba shi Efile Mukulu “akumuna mpolo yooso ku meeso aabo. Lufu taalwikala kwanka dimo. Takwikala dimo sunga maalo, sunga kwidila, sunga mukumbo.”—Kibafumbwilwe 21:3, 4.
Bantu bebungi bakumiine mwi Efile Mukulu a mu Bible, abapetaa bukome bwa kulwa na kinyongwa mwanda mbalongye bya kwikala na lukulupilo lwa kumona bakwabo bafwe dingi. Bu kileshesho, Ann, baadi mufwishe mulume aaye na bipwa 65, amba shi: “Bible anshinkamiisha shi bakwetu batudi bafule bafwe tabakwete kukyenga na dingi shi Efile Mukulu akyebe kusangusha bano booso be mu binangu byaaye. Bino binangu abinfwila nsaa yooso yantentekyesha kufwisha kwande, na byabya n’obesha kulwa na kinyongwa kya uno mwanda ukata unfwile!”
Tiina, atwikeele besambile mu ingi miisambo ikile amba shi: “Kubanga efuku dibaadi difwe Timo, napusha bikwete Efile Mukulu kunkwasha. Ne mumone eyendo bi mboko ya Yehowa ayitukwasha mu mafuku e bukobo. Na mulayilo lwa lusangukilo wi mu Bible aumweneka kwandi kalolo shi ngw’eyendo. Aumpa bukome bwa kutungunuka na kwenda kumpala mpa n’efuku dyankyebe kumona Timo dingi.”
Ano mayi abo e mumune na abipushaa midiyo ya bantu be na lukumiino shi Bible nga kutudila eshimba. Sunga omona shi milayilo ya Bible tayikitshika sunga shi mbilotwa bya bisumanga, abitungu wetatshishe obe nabeene bwa kutaluula bishinkamiisho abilesha shi malango na milayilo ya mu Bible ngy’eyendo. Okyebe kumona shi Bible nyi mbukwashi bukile bukata bwa bano be na kinyongwa kya kufwisha.
LONGA INGI MYANDA ITALE LUKULUPILO LUI KUANKA BUA BAFUE
Tala video iitale mu site etu a jw.org
Bible etulaa’shi mu mafuku e kumpala atukyebe kukuukila bakwetu bafwe abasanguka
Nkinyi akitufwila su tubaafu? Lwaluulo lwibuwa lwa Bible alwitunyingisha na kwitukankamisha
Tala mbalo ifunde’shi BIBLIOTEKE > MA VIDEO (Video ya mu kipindji kya: BIBLE)
WE NA LUKALO LWA MUKANDU WIBUWA?
Na ino mikandu ibi yatukwete kutemesha nsaa yooso, mbalo kinyi yatudi balombeene kupeta mukandu wibuwa? Uno video esamba pabitale broshire a Mukandu wibuwa w’Efile Mukulu!
Tala pa mbalo ifunde’shi MALONGYESHA A MU BIBLE > BUTAALE & MULOO
^ Yehowa nyi eshina dy’Efile Mukulu dyatupete mu Bible.
Tala dingi
NGALUULO YA KU NKONKO YA MU BIBLE
Buakinyi bantu bakuete kufua?
Lualulo lua Bible alunyingisha na kupa bantu lukulupilo.
