Përse jeta është plot me probleme?
Lajmërim i Mbretërisë Nr. 34
Përse jeta është plot me probleme?
A është e mundur një parajsë pa probleme?
PROBLEMET SERIOZE VAZHDOJNË TË KEQËSOHEN—PËRSE?
Njerëzit gjithmonë kanë pasur probleme. Megjithëse shumë njerëz mendojnë se teknologjia moderne mund t’i zgjidhë ato, problemet serioze vazhdojnë të keqësohen.
Krime: Pak njerëz ndihen të sigurt kur ecin në rrugë apo edhe kur janë brenda mureve të shtëpisë së tyre. Në një vend evropian, gjatë vitit të fundit në çdo 3 persona 1 ka qenë viktimë e krimit.
Mjedisi: Ndotja e ajrit, tokës dhe ujit po përhapet gjithnjë e më shumë. Në vendet e zhvilluara, një e katërta e njerëzve nuk ka ujë të pijshëm në dispozicion.
Varfëria: Më shumë se kurrë më parë, ka të varfër dhe të uritur. Në disa vende, mbi 90 përqind e njerëzve jetojnë në varfëri; në 30 përqind të forcës punëtore në botë, rreth 800 milionë janë të papunë ose kanë një punë të papërshtashme; dhe numri vazhdon të rritet.
Urija: Edhe në qoftë se ti vetë ke mjaft për të ngrënë, milionat që rriten dita-ditës nuk kanë. Në vendet e pazhvilluara, çdo vit vdesin nga urija të paktën 13 milionë njerëz prej, të cilëve shumica janë fëmijë.
Lufta: Qindra mijëra njerëz janë vrarë gjatë dhunës etnike të kohëve të fundit. Në shekullin e 20-të, lufta ka marrë qindra milionë jetë njerëzish.
Probleme të tjera: Problemeve të mësipërme u shtohen edhe shkatërrimi gjithnjë e më i madh i familjeve, numri në rritje i nënave të pamartuara, rritja e të pastrehëve, shtrirja e përdorimit të drogës dhe imoraliteti i pafrenueshëm. Me të drejtë një ish-anëtar i kabinetit shtetëror të SH.B.A. tha: «Ka shumë shenja të . . . kalbëzimit të civilizimit.» Gjatë 30 vjetëve të fundit, popullsia e Sh.B.A. është rritur 41 përqind, kurse krimet e dhunshme 560 përqind, lindjet e paligjshme 400 përqind, divorcet 300 përqind dhe numri i vetëvrasjeve tek adoleshentët mbi 200 përqind. Edhe në kombe të tjera është e njëjta situatë.
Përse problemet vazhdojnë të keqësohen?
Përgjigjen na e jep Krijuesi ynë. Fjala e tij i quan këto kohë të mbushura me probleme, «ditët e fundit», një periudhë në të cilën do të ketë «kohë të vështira». (2. Timoteut 3:1, Dio) Ditët e fundit të kujt? Këtu Bibla flet për ‘mbarimin e botës’.—Mateu 24:3, Dio.
Problemet e sotme gjithnjë në rritje, janë dëshmi e qartë se fundi i këtij sitemi gjërash është afër, duke përfshirë fundin e ligësisë dhe të atyre që janë përgjegjës për të. (Mateu 24:3-14; 2. Timoteut 3:1-5; Zbulesa 12:7-12) Së shpejti, Perëndia do të ndërhyjë dhe do të shohë se të gjitha problemet e sotme janë zgjidhur plotësisht.—Jeremia 25:31-33; Zbulesa 19:11-21.
FETË E KËSAJ BOTE KANË DËSHTUAR
Në vend që të ndihmojë në zgjidhjen e problemeve të sotme, atyre u shtohet edhe sistemi botëror fetar. Gjatë luftërave, katolikët kanë vrarë miliona katolikë e protestantët miliona protestantë. Jo shumë kohë më parë, në Ruanda, ku shumica janë katolikë, njerëzit vranë njëri-tjetrin me qindra mijëra! (Shiko pikturën në të majtë.)
A do të shkonte Jezui në luftë me pushkë apo hanxhar në dorë e të vriste dishepujt e tij, për shkak se kombësia e tyre ishte e ndryshme nga ajo e tij? Sigurisht që jo! «Kush e do Perëndinë,—thotë Bibla,—duhet ta dojë edhe bashkëbesimtarin e tij.» (1. Gjonit 4:20, 21, ECM) Fetë e kësaj bote kanë dështuar ta bëjnë këtë. «Ata pohojnë se e njohin Perëndinë, po me vepra e mohojnë.»—Titit 1:16, Dio.
Për më tepër, duke mos iu përmbajtur me të vërtetë parimeve biblike mbi moralin, fetë e botës i kontribuojnë shkatërrimit tronditës të moralit në mbarë botën.
Jezui tha se fenë e rremë mund ta dallosh nga feja e vërtetë «nga frytet e tyre»—nga ajo që anëtarët e saj bëjnë. Gjithashtu, ai tha: «Çdo dru që nuk jep fryt të mirë pritet dhe hidhet në zjarr.» (Mateu 7:15-20, Dio) Fjala e Perëndisë na nxit të largohemi nga feja që sjell fryte të këqija që të mos shkatërrohemi.—Zbulesa 18:4.
Feja e vërtetë nuk ka dështuar
Feja e vërtetë «jep fryte të mira», veçanërisht dashuri. (Mateu 7:17; Gjoni 13:34, 35) Cila vëllazëri e krishterë dhe e bashkuar ndërkombëtare e praktikon këtë dashuri? Kush nuk pranon të vrasë bashkëbesimtarët apo edhe këdo tjetër?—1. Gjonit 3:10-12.
Dëshmitarët e Jehovait njihen si ata që sjellin «fryte të mira». Në të gjithë globin, në më shumë se 230 vende, ‘i kanë farkëtuar shpatat e tyre e i kanë bërë plugje’. (Isaia 2:4, ECM) Dashuria e tyre për njerëzit tregohet edhe nga bindja e tyre ndaj urdhrit të Krishtit për të predikuar «lajmin e mirë» të Mbretërisë së Perëndisë në mbarë botën. (Mateu 24:14, ECM) Ata, gjithashtu, praktikojnë dhe mbështesin moralin e lartë të mësuar në Bibël.—1. Korintasve 6:9-11.
Feja e vërtetë nuk ka dështuar. Ajo i udhëheq njerëzit drejt të Vetmit që është i aftë për të zgjidhur problemet e njerëzimit. Së shpejti, ai do të sjellë një botë krejtësisht të re. Kush është Ai? (Të lutemi shiko faqen mbrapa.)
PARAJSA PA SHQETËSIME ËSHTË E SIGURT
Nëse do të mundje, a do t’i zgjidhje të gjitha problemet që brengosin njerëzimin? Pa dyshim që do ta bëje! A duhet të mendojmë se Krijuesi ynë i dashur, i cili është i vetmi që ka fuqinë dhe mençurinë për të zgjidhur problemet e njerëzimit, do të bënte më pak?
Bibla zbulon se Perëndia do të ndërhyjë në çështjet njerëzore përmes qeverisë së tij qiellore që gjendet në duart e Jezu Krishtit. Ajo do t’i «copëtojë» qeveritë e korruptuara mbi tokë. (Danieli 2:44, Dio; Mateu 6:9, 10) Përse? Duke iu drejtuar Perëndisë, psalmisti u përgjigj: «Ta dijnë se ti vetëm, që quhesh Zoti [Jehova, BR], je Shumë i Larti mbi gjithë dheun.»—Psalmi 83:18, Dio.
A do të mbijetojë njeri kur kjo botë të shkatërrohet? «Bota . . . do të kalojë,—thotë Bibla.—Përkundrazi, kush e kryen vullnetin e Perëndisë, do të jetojë përgjithmonë.» (1. Gjonit 2:17, ECM) Ku do të jetojnë përgjithmonë këta të mbijetuar? Bibla përgjigjet: «Të drejtët do të trashëgojnë tokën dhe do të banojnë gjithnjë mbi të.»—Psalmi 37:9-11, 29, Dio; Proverbat 2:21, 22.
Në botën e re të Perëndisë, «nuk do të ketë më as vdekje, as vaj, as ofshamë, as dhembje». (Zbulesa 21:4, ECM) S’do të ketë më krime, varfëri, uri, sëmundje, hidhërim dhe vdekje! Ja, edhe të vdekurit do të jetojnë përsëri! «Të vdekurit do të ringjallen.» (Veprat 24:15, ECM) Vetë toka do të transformohet në një parajsë të vërtetë.—Isaia 35:1, 2; Luka 23:43.
Çfarë duhet të bëjmë për të gëzuar jetën në botën e re të Perëndisë? Jezui tha: «Kjo është jeta e përjetshme, të të njohin ty, të vetmin Perëndi të vërtetë, dhe Jezu Krishtin që ti ke dërguar.» (Gjoni 17:3, Dio) Miliona njerëz me zemër të sinqertë në mbarë botën po e marrin këtë njohuri, e cila u mundëson atyre që të përballojnë tani problemet e shumta personale që kanë, dhe ajo që është më e rëndësishmja, u jep bindje të plotë se ato probleme që janë jashtë mundësisë së tyre për t’u zgjidhur, do të rregullohen plotësisht në botën e re të Perëndisë.
[Burimi i figurës në faqen 2]
WHO foto nga P. Almasy
[Burimi i figurës në faqen 3]
Jerden Bouma/Sipa Press