Yob 9:1-35
9 Dan Yob taki:
2 „Mi sabi taki na so sani de.
Ma fa wan libisma kan abi leti efu en nanga Gado de na fesi krutu?
3 Efu wan sma wani hartaki nanga Gado,*a no ben o man piki Gado nowan fu den dusun aksi di A ben o poti gi en.
4 A koni srefsrefi èn a abi furu makti.
Suma man kakafutu gi en sondro fu kisi mankeri?
5 A e puru* bergi na den presi, sondro fu wan sma sabi.A e drai den tapu te en ati e bron.
6 A e meki grontapu seki na en presièn a e seki den fundament fu grontapu.
7 A e taigi a son fu no skèin moroèn a e tapu a leti fu den stari.
8 Na en w’wan e bradi hemel.A e waka na tapu den bigi skwala fu se.
9 A meki den starigrupu As,* Kesil* nanga Kima*èn a meki den starigrupu di de na zuidsei.*
10 A e du bigi sani di sma no man ferstan.Den kfalek sani di a e du furu so te, taki wi no man teri den.
11 Te a e waka psa, mi no e si en.Te a e psa mi, mi no sabi srefi.
12 Suma man tapu en te a e grabu wan sani?
Nowan sma man taigi en: ’San yu e du?’
13 Gado no o hori ensrefi fu no atibron.Srefi den yepiman fu Rahab* o boigi gi en.
14 Dan san o psa te mi o piki en!Mi musu luku bun san mi o taigi en!
15 Srefi efu mi ben abi leti, mi no ben o piki en.
Na soso begi mi man begi mi krutuman* fu sori sar’ati gi mi.
16 Efu mi kari en, a o piki mi?
Mi no denki taki a o arki mi.
17 Nanga wan bigi sibibusi a e gi mi mankerièn somaar a e gi mi moro soro.
18 A no e gi mi na okasi fu blo srefi.A e meki mi swari soso bita sani.
19 Efu den ben o luku suma tranga, Gado na a moro trangawan.
Efu den ben o kari en na fesi krutu, a ben o taki: ’Suma man krutu mi?’*
20 Awinsi mi ben abi leti, tòg mi eigi mofo ben o taki dati mi ogri.Awinsi mi ben e du soso bun,* tòg a ben o taki dati mi fowtu.*
21 Srefi efu mi no du nowan ogri,* mi no sabi san o psa nanga mi.Mi no wani a libi disi srefsrefi.*
22 Na so sani de kba. Dati meki mi taki:’Awinsi na wan bun sma* noso wan ogri sma, a e meki den alamala dede te fu kba.’
23 Efu wan bigi frudu ben o kiri sma wantronso,a ben o lafu te a si fa den sma di no du ogri e pina.
24 A libi grontapu gi den ogrisma.A e tapu den ai* fu den krutuman fu grontapu.
Efu a no en e du dati, dan suma e du en?
25 Mi libi e psa gwe moro esi leki wan sma di e lon tranga.Den dei fu mi e lon gwe sondro fu si wan bun.
26 Den e psa gwe leki boto di meki fu warimboèn leki aka di e saka kon fu grabu wan meti.
27 Awinsi mi taki: ’Mi o fergiti san e moro mi,mi no o swa mi fesi moro èn mi o prisiri’,
28 tòg mi e frede taki a pen fu mi no o gwe.Mi sabi taki noiti yu o si mi leki wan bun sma.
29 Yu o feni nomonomo taki mi fowtu.*
Fu san ede mi e tan du muiti fu soso?
30 Awinsi mi wasi nanga a watra fu snewèn awinsi mi wasi mi anu nanga sopo,
31 tòg yu ben o poti mi na ini wan petièn mi eigi krosi srefi ben o tegu gi mi.
32 A no de wan man leki mi, taki mi ben o man piki ennoso taki wi ben o man go na fesi krutu.
33 Nowan sma kan koti krutu gi wi.Nowan sma kan de leki krutuman gi wi.*
34 Efu a no ben o naki mi moro*èn efu a no ben o frede mi,
35 dan mi no ben o frede fu taki nanga en,bika mi no gwenti taki te mi e frede.
Futuwortu
^ Noso: „wani tyari Gado na fesi krutu”.
^ Noso: „skoifi”.
^ Kande disi na a starigrupu di den e kari Grote Beer (Ursa Major).
^ Kande disi na a starigrupu di den e kari Orion.
^ Kande disi na den stari di den e kari Plejaden na ini a starigrupu Stier.
^ Hebrewtongo: „den insei kamra fu zuidsei”.
^ Kande disi na wan bigi meti di e libi na ini se.
^ Noso kande: „a sma di tyari mi go na fesi krutu”.
^ Noso: „Suma man taki dati mi fowtu?”
^ Noso: „Awinsi mi no du nowan ogri”.
^ Hebrewtongo: „du kruktudu”.
^ Noso: „Srefi efu mi du soso bun”.
^ Noso: „Mi e tegu gi a libi disi”.
^ Noso: „wan sma di e dini Gado”.
^ Hebrewtongo: „fesi”.
^ Hebrewtongo: „ogri”.
^ Hebrewtongo: „kan poti en anu na tapu wi ala tu”.
^ Hebrewtongo: „Efu a ben o puru en fonfon-tiki na mi tapu”.