Kownukondre nyunsu nr. 37

Wan boskopu gi heri grontapu

A kaba fu falsi kerki de krosibei!

▪ San na falsi kerki?

▪ Fa a sa kon na wan kaba?

▪ Sortu krakti a sa abi na yu tapu?

 San na falsi kerki?

Yu e broko yu ede nanga ala den ogri di kerkisma e du? Yu feni en wan bun sani te sma di e taki dati den e dini Gado e feti na ini orloku, te den e du ala sortu ogri-ati sani fu gens tiriman, èn te den e du ala sortu kruktudu? Fu san ede a gersi leki na kerki e meki taki so furu problema de?

A no ala bribi e meki taki den takru sani disi e pasa, ma na soso falsi kerki de frantwortu gi den problema disi. Yesus Krestes, wan prenspari man gi furu sma di e bribi na ini Gado, ben taki dati falsi kerki e meki taki sma e du takru sani, neleki fa wan „siki bon e meki froktu di no bun” (Mateyus 7:15-17). Sortu takru sani falsi kerki e meki sma du?

Falsi kerki  . . .

▪ E MOKSI NA INI ORLOKU NANGA POLITIEK: A tijdschrift Asiaweek e taki dati na ini Asia èn sosrefi na tra presi, tiriman di gridi fu kisi moro makti e gebroiki kerki fu kori sma, so taki den sma du san den wani. Leki bakapisi fu dati, a tijdschrift e warskow: „A gersi leki grontapu e kon bruya moro nanga moro.” Wan prenspari kerki tiriman na ini Amerkankondre ben taki: „Yu musu kiri den terrorist bifo den kiri tra sma.” Fa a man disi wani lusu a problema disi? A e taki: „Kiri den alamala na ini a nen fu Masra.” Ma Bijbel e taki: „Efu wan sma e taki: ’Mi lobi Gado’, ma toku a e teige en brada, dan a sma dati na wan leiman” (1 Yohanes 4:20). Yesus ben taki srefi: „Tan lobi un feanti” (Mateyus 5:44). Omeni kerki yu sabi di e gi pasi taki den memre fu den e go feti na ini orloku?

▪ E PANYA FALSI LERI: Furu kerki e leri sma taki wi abi wan sili noso wan yeye na ini wi skin, di wi no man si nanga wi ai. Den e taki sosrefi dati a yeye disi e tan na libi te wi dede. Furu fu den kerki dati e gebroiki a leri disi fu kori den memre fu den soso fu kisi wini gi densrefi. Wán fasi fa den e du dati, na taki den e aksi moni fu begi gi den sili fu den dedewan. Ma Bijbel e leri wi wan tra sani. A e taki: „Da sieli disi doe sondoe, a sa dede” (Esekièl 18:4, Da Bijbel na ini Sranantongo). „Bikasi dem libisoema sabi dati dem sa dede; ma dem dede soema no sabi noti” (Preikiman 9:5, Da Bijbel na ini Sranantongo). Yesus ben leri sma taki den dedewan sa kisi wan opobaka; disi no ben o de fanowdu efu libisma ben abi wan sili di no e dede (Yohanes 11:11-25). A kerki fu yu e leri sma taki a sili noso a yeye, no e dede?

▪ E GI PASI TAKI SMA E DU HURUDU: Na ini son kondre, son kerki e poti mansma nanga umasma di e libi wan homo-sekslibi, leki domri, èn den e dwengi tirimakti fu gi pasi taki tu mansma noso tu umasma trow nanga makandra. Srefi kerki di e krutu hurudu, e horibaka gi kerki fesiman di ben e abi seks nanga pikin-nengre. Ma san Bijbel e taki fu hurudu? A e taki krin: „No kori unsrefi. Sma di e huru, sma di e anbegi kruktugado, sma di e du sutadu, mansma di e meki tra mansma gebroiki den fu abi seks nanga den, mansma di abi seks nanga tra mansma . . . no sa kisi a kownukondre fu Gado” (1 Korentesma 6:9, 10). Yu sabi kerki di e gi pasi taki sma e du hurudu?

 San o pasa nanga den kerki di e gi sma pasi fu du takru sani? Yesus ben warskow: „Ibri bon di no e meki bun froktu, musu koti trowe èn iti go na ini faya” (Mateyus 7:19). Fu tru, neleki fa sma e koti wan bon puru di no e meki bun froktu, na so den falsi kerki o kisi pori tu! Ma fa disi o pasa, èn o ten a o pasa? Wan profeititori di skrifi na ini a Bijbel buku Openbaring, kapitel 17 nanga 18, e gi piki tapu na aksi disi.

Fa falsi kerki o kisi pori?

Pruberi fu si a sani disi na yu fesi. Wan huru-uma e sidon na tapu a baka fu wan meti di e frede sma. A meti disi abi seibi ede nanga tin tutu (Openbaring 17:1-4). San a huru-uma disi e prenki? A abi makti tapu „den kownu fu grontapu”. A weri purper krosi, a e gebroiki wierook, èn a gudu pasa marki. Boiti dati, nanga na afkodrei di a e du, a e ’kori ala pipel’ (Openbaring 17:18; 18:12, 13, 23). Bijbel e yepi wi fu si taki a huru-uma disi e prenki den kerki fu grontapu. A huru-uma no e prenki wán spesrutu kerki nomo, ma ala den kerki di e meki taki sma e du takru sani.

A meti di a huru-uma e sidon na tapu, e prenki den politiek makti fu grontapu (Openbaring 17:10-13). * Na wan agersifasi, falsi kerki e rèi na tapu a baka fu den politiek tiriman disi, fu di a e pruberi fu abi krakti tapu den bosroiti di den e teki èn tapu den sani di den e du.

Ma heri esi, wan span sani o pasa. „Den tin tutu di yu si, èn sosrefi na ogri meti, o abi bita-ati gi a huru-uma; den o teki ala san a abi èn den o libi en nanga sososkin, dan den o nyan a meti fu en skin èn den o bron en nanga faya èn noti no sa tan abra fu en” (Openbaring 17:16). Wantronso, sondro taki sma e fruwakti wan sani, den politiek makti fu grontapu o opo densrefi teige den falsi kerki èn den o pori en krinkrin! San o meki taki den politiek makti du disi? A Bijbel buku Openbaring e piki: „Gado meki den du san en ben abi na prakseri” (Openbaring 17:17). Iya, Gado sa aksi frantwortu na den falsi kerki gi ala den ogri-ati sani di den du na ini a nen fu En. Gado sa krutu den na wan reti fasi, èn A sa gebroiki den politiek mati fu a huru-uma fu kiri na uma.

San yu musu du efu yu no wani taki den takru sani di o pasa nanga falsi kerki pasa nanga yu? „Komoto drape, mi pipel”, na so a boskopuman fu Gado taki (Openbaring 18:4). Iya, now na a ten fu lowe komoto fu falsi kerki! Ma pe yu kan lowe go? Yu no musu tron wan sma di no e bribi na ini Gado, fu di a tamara fu den sma di no e bribi na ini Gado, no sa moi tu (2 Tesalonikasma 1:6-9). A wan-enkri presi pe wi kan feni kibri, na a kerki di abi a tru bribi. Ma fa yu kan kon sabi san na a kerki di abi a tru bribi?

 Fa yu kan kon sabi sortu kerki abi a tru bribi

Sortu bun sani a kerki di abi a tru bribi musu meki sma du?—Mateyus 7:17.

A kerki di abi a tru bribi . . .

▪ E GI SMA DEKI-ATI FU SORI LOBI: Tru anbegiman „no de wan pisi fu grontapu”, den no prati fu di den de fu wan tra ras noso tra kulturu, èn den e sori ’lobi gi makandra’ (Yohanes 13:35; 17:16; Tori fu den Apostel 10:34, 35). Den no e kiri makandra. Na presi fu dati, den lobi makandra so te, taki den de klariklari fu gi den libi gi makandra efu dati de fanowdu.—1 Yohanes 3:16.

▪ E LERI SMA FU POTI FRUTROW NA INI GADO WORTU: A kerki di abi a tru bribi no e leri sma fu hori densrefi na den „gwenti” nanga den „komando fu libisma”. Na presi fu dati, a kerki di abi a tru bribi e leri sma san skrifi na ini Gado Wortu, Bijbel (Mateyus 15:6-9). Fu san ede? Fu di „na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti”.—2 Timoteyus 3:16.

▪ E TRANGA NA OSOFAMIRI ÈN A E LERI SMA FU LIBI NA WAN FASI DI FITI:

A kerki di abi a tru bribi e leri mansma fu „lobi den wefi leki den eigi skin”, a e yepi wefi fu kisi ’dipi lespeki gi den masra’, èn a e leri pikin fu ’gi yesi na den papa nanga mama’ (Efeisesma 5:28, 33; 6:1). Boiti dati, a e leri sma di kisi spesrutu frantwortu fu tyari densrefi na wan fasi di fiti.—1 Timoteyus 3:1-10.

Wan kerki de di e du ala den sani disi? A buku Holocaust Politics, di kon na doro na ini 2001, e taki: „Efu moro sma ben e libi soleki fa Yehovah Kotoigi e leri sma èn soleki fa Yehovah Kotoigi e libi, dan a Holocaust (a pisi ten di a Nazi tirimakti fu Doisrikondre kiri ipi-ipi Dyu nanga tra sma) no ben o pasa, èn sma no ben o kiri trawan fu di den de fu wan tra ras, wan tra politiek grupu, noso wan tra kulturu.”

Iya, Yehovah Kotoigi e sori sma na ini Bijbel fa den musu tyari densrefi na wan yoisti fasi. Ma den e du moro leki dati srefi; densrefi e libi akruderi den sani di den leri fu Bijbel, èn den e du dati na ini 235 kondre. Wi e gi yu a deki-ati fu aksi Yehovah Kotoigi fu yepi yu fu leri san Gado e aksi fu yu, so taki yu kan dini en na a yoisti fasi. Now a no a ten fu draidrai, ma fu handri. A kaba fu falsi kerki de krosibei!—Sefanya 2:2, 3.

□ Grantangi, seni wan sma kon gi mi fu studeri Bijbel nanga mi sondro taki mi abi fu pai gi dati.

[Futuwortu]

[Prenspari pisi na tapu bladzijde 3]

Falsi kerki abi makti tapu „den kownu fu grontapu”

[Prenspari pisi na tapu bladzijde 3]

„Komoto drape, mi pipel”