Kownoekondre njoensoe nr. 34

Foe san ede a libi foeroe nanga someni problema?

Wan paradijs sondro problema — A kan?

 SERJOESOE PROBLEMA E KON MORO OGRI — FOE SAN EDE?

Sma ben abi problema ala ten. Ala di foeroe sma ben denki taki sabidensi foe a ten disi ben kan loesoe den, tokoe den serjoesoe problema e kon ogri moro nanga moro.

Takroedoe: A no foeroe sma e firi taki den de fri foe ogri te den e waka na strati noso srefi te den e sidon na ini den eigi oso. Na ini wán kondre na Europa, pikinmoro wán sma foe ibri dri sma ben kisi foe doe nanga takroedoe na ini wan jari di no pasa so langa.

A kontren pe sma e libi: Boen foeroe foe a loktoe, a gron nanga a watra e doti moro nanga moro. Na ini den pôti kondre, wan di foe fo pisi foe den sma no man kisi krin watra.

Pôti fasi: Moro pôti sma de leki oiti, èn sma di de nanga angri. Moro leki 90 procent foe den sma na ini son kondre libi na wan pôti fasi; 30 procent foe den wrokoman na grontapoe, so wan 800 miljoen, no man feni wroko noso den no abi nofo wroko — èn a nomroe e gro.

Angri: Srefi efoe joesrefi abi nofo foe njan, dan miljoenmiljoen sma no abi njan èn a nomroe disi e gro. Na den moro pôti kondre, no moro mendri leki 13 miljoen sma, moro foeroe foe den na pikin-nengre, e dede ibri jari foe den bakapisi di e kon foe angri ede.

Feti: Doesoendoesoen sma dede na ini na ogri di sma foe difrenti ras doe makandra nanga tranga, no so langa pasa. Èn na ini a di foe 20 jarihondro, feti kiri moro leki wán hondro miljoen sma.

Tra problema: Ma boiti den problema di kari na tapoesei, joe e kisi ete taki moro osofamiri e broko, moro mama de di no trow, moro sma no abi wan presi foe tan, heri ipi sma e gebroiki drug na wan fowtoe fasi, moro nanga moro sma e doe hoeroedoe. Nanga reti wan man, di fosi ben de wan memre foe na Amerkan kabinet, ben taki: „Toemoesi foeroe boeweisi de, taki . . . a fasi fa libisma e libi, kon takroe srefisrefi.” Ini den 30 jari di pasa, a nomroe foe sma di e libi na Amerkankondre ben gro nanga 41 procent, ma a takroedoe di doe nanga tranga ben gro kefalek esi nanga 560 procent. A nomroe foe pikin di gebore dorosei foe a trowlibi, ben gro nanga 400 procent, a nomroe foe brokotrow ben gro nanga 300 procent, a nomroe foe tini di kiri densrefi ben gro nanga moro leki 200 procent. Na ini tra kondre a situwâsi de a srefi.

Foe san ede den problema kon moro ogri?

A Mekiman foe wi e gi a piki. En Wortoe e kari a ten disi di foeroe nanga problema, „den lasti dei”, wan pisi ten pe „moeilek ten [ben] sa kon, di [ben] sa tranga foe pasa” (2 Timoteus 3:1). Den lasti dei foe san? We, bijbel e taki foe ’a kaba vo grontapo’. — Mateus 24:3, Da Njoe Testament nanga dem Psalm.

Den problema na ini a ten disi di e kon moro nomonomo, na wan krin boewesi taki a kaba foe a seti foe sani disi de krosibei, san wani taki toe a kaba foe ogridoe èn foe den sma di de frantiwortoe gi na ogridoe disi (Mateus 24:3-14; 2 Timoteus 3:1-5; Openbaring 12:7-12). Heri esi Gado sa kon na mindri èn a sa sorgoe taki ala den problema na ini a ten disi sa kisi wan loesoe krinkrin. — Jeremia 25:31-33; Openbaring 19:11-21.

 DEN RELISI FOE A GRONTAPOE DISI NO DOE SAN DEN BEN MOESOE DOE

Na presi foe den relisi sistema foe a grontapoe disi e jepi foe loesoe den problema foe a ten disi, den e meki den kon moro foeroe. Te feti e feti, dan Katoliksma e kiri Katoliksma, èn Protestantsma e kiri Protestantsma na ipi-ipi. No so langa pasa ete na Rwanda, pe moro foeroe sma na Katolik, doesoendoesoen sma ben kiri makandra! (Loekoe a prenki na a kroektoe-anoesei foe a bladzijde.)

A de so, taki Jesus ben sa go feti nanga wan gon noso wan howroe èn kiri den disipel foe en, foe di den ben de foe wan tra kondre? Kwetikweti! „A sma di lobi Gado”, na so bijbel e taki, „moesoe lobi en brada toe” (1 Johanes 4:20, 21). Den relisi foe a grontapoe disi no doe dati. „Den e meki bekènti na poebliki taki den sabi Gado, ma nanga den wroko foe den, den e sori taki den no wani sabi en.” — Titus 1:16.

Boiti foe dati, foe di den relisi foe grontapoe no e hori den bijbel markitiki ini a tori foe boen gwenti nanga wet, hei troetroe, den e meki taki na heri grontapoe boen gwenti nanga wet e go na baka na so wan ogri fasi.

Jesus ben taki dati ’na en froktoe’ sma ben sa kan si a difrenti na mindri falsi relisi nanga a troe relisi — na den sani di den memre foe a falsi relisi e doe. A ben taki toe: „Ibri bon di no e meki boen froktoe, den e koti poeroe èn e trowe en na ini faja” (Mateus 7:15-20). A Wortoe foe Gado e gi wi deki-ati foe lowe foe relisi di e meki pori froktoe èn so boen, sa kisi pori. — Openbaring 18:4.

A troe relisi doe san a ben moesoe doe

A troe relisi „e meki boen froktoe”, spesroetoe lobi (Mateus 7:17; Johanes 13:34, 35). Sortoe internationaal brada fasi foe kresten di de na ini wán fasi, e sori a sortoe lobi dati? Soema e weigri foe kiri den wan di de foe a srefi relisi foe den noso iniwan tra sma? — 1 Johanes 3:10-12.

Sma sabi taki Jehovah Kotoigi e meki a „boen froktoe” dati. Na heri grontapoe, na mori leki 230 kondre, ’den naki den feti-owroe kon tron proegoe’ (Jesaja 2:4). A lobi di den abi gi sma de foe si toe, foe di den e gi jesi na a komando foe Krestes foe preiki a „boen njoensoe” foe Gado Kownoekondre na heri grontapoe (Mateus 24:14). Den e libi akroederi den hei moreel markitiki toe di bijbel e leri èn den e horibaka gi dati toe. — 1 Korentesma 6:9-11.

A troe relisi doe san a ben moesoe doe. A e tjari sma go na a wan-enkri Sma di man tjari wan loesoe kon gi den problema foe a libisma famiri. Heri esi a Sma dati sa tjari wan heri njoen grontapoe kon. Soema na a sma dati? (Grantangi loekoe a bladzijde na bakasei foe a traktaat disi.)

 WI KAN DE SEIKER FOE WAN PARADIJS SONDRO PROBLEMA

Efoe joe ben sa man, joe no ben sa loesoe ala den problema di e pina a libisma famiri? A no de foe taki! Wi moesoe denki taki wi lobi-ati Mekiman, di en wawan abi a makti nanga a koni foe loesoe den problema foe a libisma famiri, no sa doe dati toe?

Bijbel e sori wi taki Gado sa boemoei nanga den afersi foe libisma, nanga jepi foe en hemel tiri ini anoe foe Jesus Krestes. A tiri dati sa „broko” den pori tiri foe grontapoe „na pisipisi” (Danièl 2:44; Mateus 6:9, 10). Èn foe san ede? Ala di a psalm singiman e taki nanga Gado, a e piki: „So taki sma kon sabi joe, di nen Jehovah, joe wawan na a Moro Heiwan na heri grontapoe.” — Psalm 83:18.

Sma sa tan na libi, te a grontapoe disi e kon na wan kaba? „Grontapoe e pasa gowe”, bijbel e taki, „ma a sma di doe a wani foe Gado, e tan foe têgo” (1 Johanes 2:17). Pe den sma disi, di sa tan na libi, sa libi foe têgo? „Na den regtfardikiwan sa abi grontapoe, èn den sa libi na tapoe foe têgo”, bijbel e piki. — Psalm 37:9-11; Odo 2:21, 22.

Na ini a njoen grontapoe foe Gado, „dede no sa de moro, no wan sari, no wan babari, no wan pen no sa de moro” (Openbaring 21:4). No wan takroedoe, no wan pôti fasi, no wan angri, no wan siki, no wan sari, no wan dede no sa de moro! Ija, srefi den dedewan sa libi baka! „Wan opobaka sa de” (Tori foe den Apostel 24:15). Èn grontapoe srefi sa kon tron wan troetroe paradijs. — Jesaja 35:1, 2; Lukas 23:43.

San wi moesoe doe foe njan boen foe a libi na ini a njoen grontapoe foe Gado? Jesus ben taki: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Miljoenmiljoen opregti sma na heri grontapoe e teki a sabi dati na ini den. Disi e meki taki den man kakafoetoe gi foeroe foe den problema di densrefi abi now, ma a moro prenspari sani de, taki a e gi den ala froetrow taki den problema di den no man loesoe, sa kisi wan loesoe krinkrin na ini a njoen grontapoe foe Gado.

[Sma di abi a reti foe a prenki na tapoe bladzijde 2]

WHO fowtow di P. Almasy meki

[Sma di abi a reti foe a prenki na tapoe bladzijde 3]

Jerden Bouman/Sipa Press