Heri esi nowan pina sa de moro!

 Kande wan leisi na ini yu libi yu aksi: ’Fu san ede sma e pina so?’ Dusundusun yari kaba a libisma famiri pina hebi fu feti, pôtifasi, rampu, ogridu, kruktudu, siki, nanga dede. Na ini den lasti hondro yari di pasa, libisma nyan pina moro leki na iniwan ten na fesi. Oiti wan kaba sa kon na ala a pina disi?

A piki di e gi trowstu na iya, èn disi sa pasa heri esi! Gado Wortu, Bijbel, e taki: „Ogrisma no sa de moro . . . Ma den safri-ati sma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki.” O langa den safri-ati sma sa abi grontapu, èn o langa den sa abi vrede? „Den regtfardikisma srefi sa abi grontapu leki a gudu fu den, èn den sa libi na tapu fu têgo.”​—Psalm 37:10, 11, 29.

Baka te Gado puru ogridu nanga pina, dan a grontapu sa kenki kon tron wan paradijs. Sma sa man libi fu têgo na ini bun gosontu èn den sa de koloku. Gado Wortu e taki na fesi: „[Gado] sa figi ala watra puru na den ai, èn dede no sa de moro, nowan sari, nowan babari, nowan pen no sa de moro.”​—Openbaring 21:4.

Na ini a nyun grontapu dati, srefi den dedewan sa kisi wan opobaka fu man ondrofeni den blesi disi tu: „Wan opobaka o de fu den regtfardikiwan nanga den onregtfardikiwan” (Tori fu den Apostel 24:15). Disi na fu san ede Yesus Krestes ben kan taigi wan ogri man di ben abi berow èn di ben sori taki a ben poti bribi na ini en: „Yu sa de nanga mi na ini Paradijs.”​—Lukas 23:43.

 Fu san ede sma bigin pina?

Efu Gado ben abi na prakseri fu gi libisma so wan tumusi moi tamara, dan fu san ede a gi pasi taki sma bigin pina? Fu san ede a e meki taki disi e pasa so langa kaba?

Di Gado ben meki Adam nanga Eva, A ben meki den volmaakti na skin sei èn na frustan sei. A poti den na ini wan paradijs dyari èn a ben gi den wroko fu du di ben gi den prisiri. Bijbel e taki: „Gado ben si ala san a ben meki èn luku! a ben de heri bun” (Genesis 1:31). Efu den ben gi yesi na Gado, dan den ben o kisi volmaakti pikin èn a heri grontapu ben o tron wan paradijs pe sma ben o libi fu têgo na ini vrede èn na ini koloku.

Gado ben poti na ini Adam nanga Eva wan moi sani, namku a fri wani; na so a meki libisma. Den no ben de leki robot di no abi frustan. Ma efu den ben wani tan koloku, dan den ben musu gebroiki a fri wani fu den na a yoisti fasi; fu gi yesi na den wet fu Gado. Neleki fa Gado e taki: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Efu libisma no ben o gebroiki a fri wani na wan yoisti fasi, dan dati ben o meki taki den kisi rampu leki bakapisi, fu di libisma meki na so wan fasi, taki sondro a tiri fu Gado, den no kan abi bun bakapisi. Bijbel e taki: „A no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu.”​—Yeremia 10:23.

A de wan sari sani taki a fosi papa nanga mama fu wi ben feni taki den no ben abi a tiri fu Gado fanowdu fu man abi wan bun libi. Ma di den drai den baka gi a tirimakti fu Gado, dan a no ben horibaka moro gi den  èn na so fasi den lasi a volmaaktifasi fu den. Na so den bigin go na baka èn te fu kaba den kon grani èn den dede. Fu di wi na pikin fu den, meki wi kisi na onvolmaaktifasi dati sosrefi èn wi e dede tu.​—Romesma 5:12.

A moro prenspari afersi—Suma abi a reti fu tiri?

Fu san ede Gado no pori Adam nanga Eva dan, so taki a ben kan meki wan tra libisma paar? Fu di sma ben tyalensi a reti di Gado abi fu tiri hemel nanga grontapu. Na aksi di ben opo kon na: Suma abi a reti fu tiri, èn a tiri fu suma na a yoisti wan? Te wi e luku den sani di kari na fesi moro fini, dan wi kan aksi: Libisma ben kan libi moro bun sondro a tiri fu Gado? Fu di Gado gi libisma nofo ten fu luku efu den ben kan tiri densrefi sondro en, meki A ben o sori krinkrin efu libisma ben o abi en moro bun te En ben o tiri den, noso te den ben o tiri densrefi. A ten di Gado gi libisma fu tiri densrefi sondro en ben musu de langa nofo fu gi den pasi fu pruberi ala sortu sani na politiek sei, na ini a libimakandra, na ekonomia sei, èn na kerki sei.

San ben de a bakapisi fu dati? Dusundusun yari fu libisma historia e sori krin taki moro nanga moro sma e pina. Na ini den lasti hondro yari di pasa, a libisma famiri pina srefisrefi moro leki oiti bifo. Milyunmilyun sma lasi den libi na wan ogri-ati fasi na a ten fu a Holocaust. Pasa 100 milyun sma lasi den libi na wan ogri-ati fasi na ini feti. Ogridu nanga ogri di sma e du nanga tranga de na ala sei. Moro nanga moro sma na grontapu e gebroiki drugs. Siki di sma kan gi trawan nanga yepi fu seks, e tan panya na ala sei fu grontapu. Ibri yari, someni tenti milyun sma e dede fu angri nanga siki. Na osofamiri-libi, nanga a fasi fa sma e tyari densrefi e go na baka na ala sei. Nowan enkri libisma  tirimakti man lusu den problema disi. Nowan fu den man puru owrudei, siki, nanga dede.

A situwâsi fu libisma de soleki fa Bijbel ben fruteri na fesi taki a ben o de na ini a ten fu wi. Gado Wortu e kari a ten fu wi, „den lasti dei” fu a seti fu sani disi di ’muilek, èn di tranga fu pasa’. Èn soleki fa Bijbel e taki, dan ’ogrisma nanga bedrigisma e kon ogri moro nanga moro’.​—2 Timoteyus 3:1-5, 13.

Heri esi nowan pina sa de moro

Ala buweisi e sori taki a pruberi di libisma ben pruberi fu libi sondro a tiri fu Gado ben abi takru bakapisi, ma a sani disi e kon na wan kaba heri esi. A kon na fesi krinkrin taki libisma no man tiri densrefi kwetikweti sondro Gado. Na soso a tirimakti fu Gado kan tyari vrede, koloku, bun gosontu, nanga têgo libi kon. Sobun, Yehovah gi pasi taki sma abi fu du nanga ogridu èn taki den e pina, ma a ten dati e doro wan kaba. Heri esi Gado sa bemui nanga libisma afersi, fu di a sa pori a heri seti fu sani disi di no bun kwetikweti.

Bijbel profeititori e taki: „Na ini den dei fu den kownu dati [libisma tirimakti di de now], a Gado fu hemel sa opo wan kownukondre [na hemel] di noiti no sa kisi pori. . . . A sa broko ala den kownukondre disi [den tirimakti fu a ten disi] na pisipisi èn tyari wan kaba kon na den, èn ensrefi sa tan te ten di no skotu” (Danièl 2:44). A buweisi taki Yehovah abi a reti fu tiri hemel nanga grontapu, nanga yepi fu a Kownukondre fu en na hemel, na a moro prenspari leri fu Bijbel. Di Yesus ben fruteri na fesi fu wan prenspari marki fu „den lasti dei”, dan a ben taki: „A bun nyunsu disi fu a kownukondre o preiki gi ala sma na heri grontapu, so taki ala kondre kan yere dati, èn dan a kaba o kon.”​—Mateyus 24:14.

 Suma sa tan na libi te a kaba e kon? Bijbel e piki: „Bika den opregtisma na den wan di sa libi na grontapu, èn den wan sondro fowtu na den wan di sa tan abra na en tapu. Fu taki fu den ogrisma, den sa koti den puru fu grontapu srefi” (Odo 2:21, 22). Den opregtisma na den sma di e leri sabi a wani fu Yehovah èn den e libi akruderi dati. Yesus Krestes ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.” (Yohanes 17:3). Iya, „grontapu e pasa gowe . . . , ma a sma di e du a wani fu Gado, e tan fu têgo”.​—1 Yohanes 2:17.

Te a no skrifi tra fasi, dan den bijbeltekst na ini a traktaat disi teki puru fu a disiten New World Translation of the Holy Scriptures​—With References