Nyan Bun fu na Osofamiri Libi

¿Osofamiri kan de trutru koloku?

Fa den kan de koloku?

 ¿Yu sabi osofamiri di de wán èn di de koloku neleki den osofamiri di yu e si na ini a traktaat disi? Na ala sei wi e si taki osofamiri e prati. Brokotrow, a de di sma no de seiker efu den kan tan du a wroko di den e du, den problema fu papa noso mama di de den wawan, fruwakti di no e kon tru — ala den sani disi e meki a problema kon moro bigi. Wan koniman tapu a kontren fu na osofamiri libi ben kragi: „Safrisafri ala sma kon sabi now san ben taki na fesi dati na osofamiri libi ben o go na baka.”

Fu san ede someni seryusu problema e kon na tapu den osofamiri na ini a ten disi? Fa wi kan nyan bun fu na osofamiri libi?

Fa na Osofamiri Ben Bigin

Efu wi wani wan piki na tapu den aksi disi, dan wi musu sabi fa a trowlibi nanga na osofamiri ben bigin. Bika efu wan Sma — wan Kriaman — ben seti a trowlibi nanga na osofamiri, dan osofamiri memre musu go na en fu kisi tiri, fu di na en ben sa sabi moro bun fa wi kan nyan bun dorodoro fu na osofamiri libi.

A de wan moi sani fu si, taki furu sma e bribi taki no wan Sma ben seti na osofamiri. The Encyclopedia Americana e taki: „Wan tu sabiman wani tyari a bigin fu a trowlibi go baka na a fasi fa meti, di lagi moro libisma, e libi makandra nanga den paar.” Toku Yesus Krestes ben taki fu a kria di man nanga uma kria. A ben gebroiki  a Bijbel tori fu fositen, leki a fonten pe a ben teki den wortu fu en taki, èn a ben taki: „San Gado tyari kon na ondro wán tyatyari, no meki no wan sma prati den.​—Mateus 19:4-6.

So bun, Yesus Krestes abi leti. Wan koni Gado ben kria den fosi libisma èn a ben seti sani gi wan koloku osofamiri libi. Gado ben tyari a fosi paar kon na makandra na ini wan trowlibi èn a ben taki dati a man „musu tai hori na en wefi èn den musu tron wán skin” (Genesis 2:22-24). ¿Fu dati ede, a ben sa kan, taki den problema di osofamiri abi na ini a ten disi, de fu di den e libi wan libi di no e kruderi nanga den markitiki di a Kriaman poti na ini en Wortu, Bijbel?

 Sortu Pasi Yu Musu Waka fu Abi Bun Bakapisi?

Sondro tweifri yu sabi taki grontapu na ini a ten disi e horibaka gi a prakseri di sma e prakseri densrefi nomo, èn a suku di den e suku fu satisferi densrefi nomo. „Bigi-ai na wan gosontu sani”, na so wan sma, di abi fu du nanga moni afersi, ben taigi wan klas fu sma na Amerkankondre, di ben kaba a hei skoro fu den. „Yu kan abi bigi-ai èn toku yu kan de tevrede nanga yusrefi.” Ma a feti di sma e feti na baka materia gudu no abi bun bakapisi. Fu taki en leti, dan a lobi gi materia gudu na wan fu den moro bigi sani di e tyari na osofamiri libi kon na ini kefar, fu di a e pori a matifasi fu libisma èn e nyan sma ten nanga moni. Na kontrari, luku fa soso tu odo fu Bijbel e yepi wi fu si san de prenspari gi wi fu de koloku.

„Moro betre yu e nyan gruntu nanga sma di yu lobi, leki yu e nyan a moro bun meti pe sma no wani si makandra na ai.”

„Moro betre yu e nyan drei bredebuba nanga vrede fu a yeye, leki yu abi wan fesa-nyanyan na ini wan oso di furu nanga trobi.”

Odo 15:17; 17:1, „Today’s English Version”.

¿Na krakti wortu, a no so? ¡Prakseri nomo fa grontapu ben sa de tra fasi efu ala osofamiri ben hori densrefi na den prenspari sani disi! Bijbel e gi warti tiri tu fu a fasi fa memre fu na osofamiri musu handri nanga makandra. Luku soso wan tu fu den tirilin di a e gi.

Masra: ’Lobi un wefi leki un eigi skin.’​—Efeisesma 5:28-30.

¡Na wan eenvoudig sani, ma a e wroko bun srefisrefi! Bijbel e taigi wan masra tu taki a musu ’gi en wefi grani’ (1 Petrus 3:7). Disi a masra e du fu di a e poti spesrutu prakseri na tapu en wefi, èn a wani taki tu dati a musu sori safufasi, èn sori taki a e frustan en wefi, èn ala ten baka a musu gi en wefi a dyaranti taki a lobi en. A musu hori na prakseri tu fa en wefi e denki fu sani èn a musu arki en. (Teki gersi Genesis 21:12.) ¿Yu no e agri taki ibri osofamiri sa abi wini efu a masra e handri nanga en wefi fu di a e sorgu en bun, neleki fa ensrefi wani fu sma handri nanga en?​—Mateus 7:12.

 Wefi: „Abi dipi lespeki gi [un] masra.”​—Efeisesma 5:33.

Wan wefi kan sorgu taki a koloku na ini na osofamiri e kon moro bigi efu a e yepi en masra fu du den hebi frantiwortu di a abi. Disi na san Gado ben abi na prakseri na ini a bigin, fu di a ben gi a masra wan wefi fu de „wan yepiman gi en, leki wan fitipisi fu en” (Genesis 2:18). ¿Yu kan frustan sortu blesi a de gi na osofamiri libi te wan wefi e sori lespeki gi en masra fu di a e horibaka gi den bosroiti di a masra e teki èn fu di a e wroko makandra nanga en fu man doro den marki di poti gi na osofamiri?

Trowpatna: „Masra nanga wefi musu de getrow na makandra.”​—Hebrewsma 13:4, TEV.

Te den de getrow na makandra, dan na osofamiri libi sa abi wini fu dati trutru. Nofotron sutadu e pori wan osofamiri (Odo 6:27-29, 32). Na wan koni sani fu dati ede, taki Bijbel e gi deki-ati: „De koloku nanga yu wefi èn feni prisiri nanga a pikinwenke di yu ben trow . . . Fu san ede yu ben sa gi a lobi fu yu na wan tra uma?”​—Odo 5:18-20, TEV.

Papa nanga mama: „Kweki [den pikin fu unu] akruderi a pasi gi [den].”​—Odo 22:6.

Te papa nanga mama e gi ten na den pikin èn e poti prakseri na den tapu, dan na osofamiri libi trutru sa kon moro bun. So bun, Bijbel e gi papa nanga mama tranga fu leri den pikin fu den den yoisti gronprakseri ’te den e sidon na ini den oso èn te den e waka na pasi èn te den e didon èn te den e opo’ (Deuteronomium 11:19). Bijbel e taki tu, dati papa nanga mama musu sori taki den lobi den pikin fu den fu di den e gi den trangaleri.​—Efeisesma 6:4.

Pikin: „Un pikin, un gi yesi na un papa nanga mama ini wánfasi nanga Masra.”​—Efeisesma 6:1.

A tru, taki na ini a kruktu grontapu disi, a no de ala ten makriki fu gi yesi na yu papa nanga mama. ¿Ma toku, yu no e agri taki a de wan koni sani fu du san a Sma di seti na osofamiri libi, e taigi wi? En sabi san na a moro bun sani fu meki wi osofamiri libi kon de moro koloku. So bun, du muiti fu gi yesi na yu papa nanga mama. Abi a fasti bosroiti fu wai pasi gi den furu tesi fu grontapu fu kori yu fu du san no bun.​—Odo 1:10-19.

 O moro soifri ibri memre fu na osofamiri e fiti a rai di Bijbel e gi, o moro bun a sa go na ini na osofamiri libi. No wawan a sa de so, taki na osofamiri e nyan bun fu wan moro bun libi now, ma den sa abi a fruwakti fu abi wan tumusi moi tamara na ini a nyun grontapu di Gado pramisi (2 Petrus 3:13; Openbaring 21:3, 4). ¡So bun, meki a kon de wan gwenti gi na osofamiri fu studeri Bijbel makandra! Milyunmilyun osofamiri na heri grontapu feni taki a tiri di de fu feni na ini a buku A sroto gi wan kolokoe osofamiri, na wan sani di e gi wini trutru.

Efu den no taki dati a de trafasi, dan ala den Bijbeltekst di skrifi dya, wi ben teki fu a Nieuwe-Wereldvertaling van de Heilige Schrift.