Sortu Howpu De gi Lobiwan Di Dede?

„Efu wan sma dede, a sa libi baka?” na so a man di nen Yob ben aksi dati langa ten pasa (Yob 14:14, King James Version). Kande yusrefi e broko yu ede nanga a tori disi. Fa yu sa firi efu yu ben sabi taki yu kan de baka nanga den lobiwan fu yu leti dyaso na grontapu pe ala sani e waka kefalek bun?

We, Bijbel e pramisi: „Den dedewan fu yu sa libi. . . . Den sa opo baka.” Bijbel e taki tu: „Na den regtfardiki sma, srefi sa abi grontapu leki a gudu fu den, èn den sa libi na en tapu fu têgo.”​—Yesaya 26:19; Psalm 37:29.

Fu kan bribi den sortu pramisi disi, wi musu piki wan tu prenspari aksi: Fu san ede libisma e dede? Pe den dedewan de? Fa wi kan sabi trutru taki den kan libi baka?

Dede, èn San E Pasa te Wi Dede

Bijbel e tyari kon na krin taki biginbigin di Gado ben meki libisma, a no ben meki den fu dede. A ben meki den fosi libisma, Adam nanga Efa. A ben poti den na ini wan paradijs na grontapu, di nen Eden. Baka dati a ben taigi den fu meki pikin. A ben taigi den tu fu bradi a Paradijs tanpe fu den te leki heri grontapu ben kon de wan paradijs. Adam nanga Efa ben o dede soso efu den no ben o du san Gado ben taigi den.​—Genesis 1:28; 2:15-17.

Fu di Adam nanga Efa no ben warderi a switifasi fu Gado, meki den ben trangayesi en èn den ben musu pai a strafu di Gado ben o gi den. „Yu [sa] drai go baka na a gron,” na so Gado ben taigi Adam, „bika na drape Gado ben teki yu puru. Bika doti yu de èn na doti yu sa drai go baka” (Genesis 3:19). Bifo Gado ben meki Adam, a no ben de na no wan pe; a ben de doti. Fu di Adam ben  trangayesi, noso ben sondu, meki a ben kisi a strafu fu tron doti baka, dati wani taki dati a no ben o de kwetikweti.

So bun, dede wani taki, dati no wan libi no de. Bijbel e sori san na a difrenti fu den tu sani disi: „Sondu e pai nanga dede, ma a presenti di Gado e gi, na têgo libi” (Romesma 6:23). Bijbel e sori taki te sma dede dan den no sabi notinoti: „Bika den libiwan sabi ete, taki den sa dede; ma fu a sei fu den dedewan, den no sabi notinoti” (Preikiman 9:5). Te wan sma dede, dan Bijbel e fruklari: „En yeye e komoto gowe, a e go baka na en gron; na a dei dati den prakseri fu en e lasi gowe.”​—Psalm 146:3, 4.

Ma efu na Adam nanga Efa wawan ben trangayesi a komando di Gado ben gi den na ini Eden, dan fu san ede wi alamala e dede? Bika wi alamala gebore, baka di Adam ben trangayesi Gado. Na so a kon taki wi alamala kisi sondu nanga dede fu en. Soleki fa Bijbel e fruklari: „Nanga wán man [Adam], sondu ben kon na grontapu èn nanga sondu dede kon, na so dede panya go na ala libisma.”​—Romesma 5:12; Yob 14:4.

Toku wan sma ben sa kan aksi: ’Libisma no abi wan sili di e tan na libi te a sma dede?’ Furu sma leri trawan a sani disi. Den ben taki srefi taki dede na wan fasi fu tyari sma go na wan tra libi. Ma a prakseri dati no e kon fu Bijbel. Na presi fu dati, a Wortu fu Gado e leri taki yu na wan sili, taki yu sili na yu trutru, dati na yu heri skin nanga yu frustan (Genesis 2:7; Yeremia 2:34; Odo 2:10). Bijbel e taki tu: „A sili di e sondu — ensrefi sa dede” (Esekièl 18:4). No wan presi na  ini Bijbel wi e leri taki libisma abi wan sili di e tan na libi te a skin dede.

Fa Libisma Kan Libi Baka

Baka di sondu nanga dede ben kon na ini grontapu, Gado ben tyari kon na krin taki a ben abi na prakseri fu gi den dedesma wan libi baka. A ben o gi den wan opobaka. So bun Bijbel e fruklari: „Abraham . . . ben hori na prakseri taki Gado ben man opo [en manpikin Isak] baka na dede srefi” (Hebrewsma 11:17-19). Abraham ben abi leti fu bribi a sani disi, bika Bijbel e taki fu na Almaktiwan: „A no de wan Gado fu den dedewan, ma fu den libiwan, bika gi en, den alamala e libi.”​—Lukas 20:37, 38.

Iya, na Almakti Gado no abi a makti wawan fu gi den sma di a abi na prakseri wan opobaka na dede, ma a wani du disi tu. Yesus Krestes srefi ben taki: „No fruwondru fu disi, bika a yuru e kon pe ala sma di de na ini den memregrebi, sa yere en sten èn sa kon na doro.”​—Yohanes 5:28, 29; Tori fu den Apostel 24:15.

Syatu baka di Yesus ben taki disi, a ben miti wan beri e komoto na Nain, wan foto na ini Israèl. A yonkuman di dede, ben de a wan-enkri pikin fu wan weduwe. Yesus ben sari na uma di a ben si fa na uma ben krei. So  bun, a ben komanderi a dedeskin fu di a ben taki: „Yonkuman, mi e taigi yu: Opo tanapu!” A man opo sidon èn Yesus gi en na en mama.​—Lukas 7:11-17.

Neleki fa a weduwe dati ben prisiri, na so sma ben prisiri tu di Yesus ben go na a oso fu Yairus, wan fesiman dinari fu a snoga. En umapikin fu 12 yari, dede. Ma di Yesus doro na ini na oso fu Yairus a go na a dede pikin èn a taki: „Meisje, opo!” A pikin opo!​—Lukas 8:40-56.

Baka dati, Lasarus, a mati fu Yesus, dede. Di Yesus ben doro na a oso fu Lasarus, Lasarus dede fo dei kaba. Marta, a sisa fu Lasarus, ben sari srefisrefi ma a ben sori taki a abi howpu, fu di a ben taki: „Mi sabi taki a sa opo baka na a opobaka na a lasti dei.” Ma Yesus ben go na a grebi èn ben taigi sma fu puru a ston di ben tapu a grebi èn a ben bari taki: „Lasarus kon na doro!” Lasarus kon na doro!​—Yohanes 11:11-44.

Go denki now fu a tori disi: San ben pasa nanga Lasarus na ini den fo dei di a dede? Lasarus no ben taki kwetikweti taki a ben go na wan hemel pe sma e kisi soso blesi noso taki a ben go na wan hel pe sma e pina. Efu a ben go drape trutru, dan seiker a ben o taki fu en. Nôno, di Lasarus dede, dan a no ben sabi notinoti. Efu Yesus no ben meki a kon baka na libi, dan a ben o tan so, te „na a opobaka na a lasti dei”.

A tru taki den wondru disi fu Yesus ben tyari bun kon gi sma fu wan syatu pisi ten nomo, fu di den sma di a ben gi wan opobaka ben dede baka. Ma 1900 yari pasa, a ben buweisi taki sma di dede kan kon na libi baka trutru nanga a krakti fu Gado! Nanga den wondru disi Yesus ben sori pikinso kaba san sa pasa na grontapu te Gado Kownukondre o tiri.

Te wan Lobiwan Dede

Te dede, a feanti fu wi, kiri wan sma, dan kande yu e sari srefisrefi, ala di yu e howpu na ini wan opobaka. Abraham ben bribi taki a wefi fu en ben o libi baka, toku  wi e leisi dati „Abraham ben go na inisei fu singi kragisingi gi Sara èn fu krei gi en” (Genesis 23:2). Fa a ben de nanga Yesus? Di Lasarus dede, dan Yesus ben „soktu na ini yeye èn a ben sari srefisrefi”. Syatu baka dati Yesus „ai ben lon watra” (Yohanes 11:33, 35). So bun, te wan lobiwan fu yu dede, èn yu e krei, dan disi no wani taki dati yu swaki.

Te wan pikin-nengre dede, dan a hebi spesrutu gi a mama. So bun, Bijbel e sori taki wan mama kan sari trutru (2 Kownu 4:27). A no de fu taki, dati a tranga tu gi a papa, fu di en srefi lasi wan pikin. „O, moro betre mi ben dede, misrefi, na presi fu yu”, na so David ben e bari krei di en manpikin Absalom dede.​—2 Samuèl 18:33.

Ma fu di yu e bribi na ini na opobaka, dan yu no sa sari pasa marki ala ten. Soleki fa Bijbel e taki, dan yu no sa „sari neleki fa den tra sma e sari di no abi wan howpu” (1 Tesalonikasma 4:13). Na presi fu dati, yu sa suku Gado na ini begi, èn Bijbel e pramisi taki „ensrefi sa horibaka gi yu”.​—Psalm 55:22.

Te a no taki tra fasi, dan den bijbeltekst teki skrifi fu a New World Translation of the Holy Scriptures