Suma na trutru a tiriman fu grontapu?

Furu sma ben sa piki na aksi na tapusei nanga wán wortu nomo — Gado. Ma a de prenspari fu si, taki Bijbel no e taki dati Yesus Krestes noso en Tata na den trutru tiriman fu a grontapu disi. Na a tra sei Yesus ben taki: „A tiriman fu a grontapu disi o trowe go na dorosei.” Èn a ben taki moro fara: „A tiriman fu grontapu de na pasi e kon. A no abi makti na mi tapu.”​—Yohanes 12:31; 14:30; 16:11.

Sobun, a tiriman fu a grontapu disi na wan gensman fu Yesus. Suma ben kan de a sma disi?

A situwâsi na grontapu e gi wi buweisi

Awansi omeni muiti opregti libisma du, toku grontapu pina hebi na ini a heri historia. Disi e meki taki sma di e denki, e aksi densrefi, soleki fa a koranti skrifiman David Lawrence, di dede kaba, ben aksi ensrefi: „’Vrede na grontapu’ — pikinmoro ala sma wani dati. ’Bun-ati firi gi sma’ — pikinmoro ala sma na grontapu abi a firi disi gi makandra. San e pasa dan? Fu san ede feti kan broko iniwan momenti, aladi sma gebore nanga a firi fu abi vrede?”

Disi gersi wan sani di no kan, a no so? Aladi sma meki nanga a firi fu libi ini vrede, toku a de so, taki furu tron den no wani si makandra na ai èn den e kiri makandra — èn disi den e du na wan trutru ogri-atifasi. Prakseri fa sma e kiri makandra na ipi-ipi sondro taki a e du den wan sani. Libisma gebroiki gas kamra, strafuman kampu, fetisani di e spiti faya, napalmbom, nanga tra ogri-ati fasi fu gi makandra hebi skin-ati èn fu kiri makandra sondro fu abi sari-ati.

Yu e bribi taki libisma, di e angri fu abi vrede èn fu de koloku, man du den sortu bigi ogri disi nanga makandra? Sortu makti e meki taki sma e du den takru sani disi, noso e tyari den go na ini situwâsi di e dwengi den fu du den  tumusi ogri sani disi? Oiti yu aksi yusrefi efu wan ogri makti de di wi no man si; wan ogri makti di abi krakti tapu sma èn di e pusu den fu du ogri nanga tranga?

Kon sabi den tiriman fu grontapu

Wi no abi fu rai suma na dati, bika Bijbel e sori krin taki wan koni sma, di wi no man si, e tiri libisma nanga den nâsi. A skrifi so: „Heri grontapu de na ini a makti fu na ogriwan.” Èn Bijbel e sori suma na dati, te a e taki: „A wan di den e kari Didibri nanga Satan . . . e kori sma na heri grontapu.”​—1 Yohanes 5:19; Openbaring 12:9.

Na wan okasi di „Didibri kon tesi” Yesus, dan Yesus no ben meki sma tweifri efu Satan na a tiriman fu a grontapu disi. Bijbel e tyari kon na krin san ben pasa: „Didibri tyari en go na wan kefalek hei bergi èn a sori Yesus ala den kownukondre fu grontapu nanga a moi fu den; a taigi Yesus: ’Mi o gi yu ala den sani disi efu yu boigi èn anbegi mi wan leisi nomo.’ Ne Yesus taigi en: ’Gowe fu dya, Satan!’”​—Mateyus 4:1, 8-10.

Prakseri fu a sani disi. Satan ben tesi Yesus, fu di a ben pristeri en „ala den kownukondre fu grontapu”. Ma a pristeri di Satan ben pristeri den kownukondre disi, ben o de wan trutru tesi efu Satan no ben de a tiriman fu den? Nôno, dati no ben o de so. Èn luku taki Yesus no ben taki dati den grontapu tirimakti disi no ben de fu Satan. Efu dati no ben de so, dan Yesus ben o taki dati. Fu dati ede wi kan taki, dati Satan Didibri trutru na a tiriman fu grontapu di wi no man si! Fu taki en leti, Bijbel e kari en „a gado fu a grontapu sistema disi” (2 Korentesma 4:4). Ma fa a du kon taki so wan ogrisma ben kan kisi so wan makti posisi?

A sma di ben tron Satan, ben de wan engel di Gado ben meki, ma a ben kon dyarusu tapu a posisi fu Gado. A ben tyalensi a reti di Gado abi fu tiri. Fu du dati a ben gebroiki wan sneki fu taki nanga a fosi uma, Eva, fu kori en, èn na so wan fasi a ben man kisi Eva nanga en masra Adam, fu du san en ben wani, na presi fu den gi yesi na Gado (Genesis 3:1-6; 2 Korentesma 11:3). A ben taki tu, dati a ben o man meki ala den pikin fu Adam nanga Eva di no ben  gebore ete, drai den baka gi Gado. Sobun, Gado ben gi Satan pasi fu buweisi efu san a ben taki de tru, ma sani no waka bun gi Satan.​—Yob 1:6-12; 2:1-10.

Na wan prenspari sani fu si, taki a no Satan wawan e tiri grontapu. A ben kori wan tu tra engel fu teki en sei ini na opo di a ben opo ensrefi teige Gado. Den engel disi ben kon tron ogri yeye, den yeye yepiman fu en. Bijbel e taki fu den, te a e gi Kresten deki-ati: „Tanapu kánkan gi den triki di Didibri e gebroiki fu kori sma; bika wi no e feti nanga libisma, ma . . . nanga den tiriman fu a dungru disi, nanga den ogri yeye na hemel.”​—Efeisesma 6:11, 12.

Kakafutu gi ogri yeye

Den ogri yeye disi di wi no man si, èn di e tiri a grontapu, abi a fasti  bosroiti fu kori a heri libisma famiri fu no anbegi Gado moro. Wán fasi fa den ogri yeye e du disi, na fu horibaka gi a prakseri taki sma e tan na libi baka te den dede, aladi a Wortu fu Gado e sori krin taki den dedewan no sabi noti (Genesis 2:17; 3:19; Esekièl 18:4; Psalm 146:3, 4; Preikiman 9:5, 10). Sobun, wan ogri yeye, di e taki neleki a dedesma, kan taki nanga den famiriman noso den mati fu a sma dati nanga yepi fu wan sma di e wroko makandra nanga den yeye, noso nanga yepi fu wan „sten” di komoto na a yeyekondre di wi no kan si. A „sten” e du leki en na a sma di dede, ma en na trutru wan ogri yeye!

Sobun, efu yu yere so wan „sten”, no meki a kori yu. Kakafutu gi ala san a e taki, èn gebroiki den wortu fu Yesus: „Gowe fu dya, Satan!” (Mateyus 4:10; Yakobus 4:7) No meki na angri fu kon sabi sani fu a yeye kondre meki yu go suku a demakandra fu den ogri yeye. A demakandra nanga ogri yeye den e kari afkodrei, èn Gado e warskow den anbegiman fu en gi ibri fasi fu afkodrei. Bijbel e krutu wan „sma di e koti luku . . . di e du lukuman-wroko . . . noso wan sma di e suku rai na wrokoman fu den ogri yeye, noso na sma di e du lukuman-wroko, noso iniwan sma di e aksi sani na den dedewan”.​—Deuteronomium 18:10-12; Galasiasma 5:19-21; Openbaring 21:8.

Fu di afkodrei e tyari wan sma kon na ini a makti fu den ogri yeye, meki yu musu kakafutu gi ala den wroko fu den, awansi omeni prisiri den e gi yu noso o span den e sori fu de. Den sortu wroko disi wani taki sosrefi, a luku di sma e luku na ini wan kristal bol fu sabi sani fu a tamara, a gebroiki di sma e gebroiki Ouiya bord, sani di sma e kon sabi noso e firi sondro fu den gebroiki den feifi zintuig fu den (ESP), a leisi di wan sma e leisi den lin fu na anu, nanga astrologie. Na ini oso di ogri yeye meki kon tron den kontren, den meki babari tu èn ben meki sma si sani.

Boiti dati, ogri yeye e gebroiki den sondu firi fu libisma na wan takru fasi, fu di den e gi sma deki-ati fu leisi buku, fu luku felem, nanga telefisi programa di e sori seks hurudu, nanga wan morsu fasi fu libi. Den ogri yeye sabi taki efu sma no puru fowtu prakseri na den ede, dan den sa abi  bun furu krakti na den sma tapu, èn disi sa meki taki den sma e tyari densrefi na wan hurudu fasi — neleki fa den ogri yeye srefi e tyari densrefi.​—Genesis 6:1, 2; 1 Tesalonikasma 4:3-8; Yudas 6.

A tru taki kande furu sma e spotu nanga a prakseri taki ogri yeye e tiri a grontapu disi. Ma a no de fu fruwondru taki den no e bribi disi, bika Bijbel e taki: „Satan srefi e tan kenki ensrefi kon tron wan engel fu leti” (2 Korentesma 11:14). A moro koni fasi di Satan gebroiki fu kori sma, ben de a breni di a e breni furu sma fu den no bribi taki en nanga den ogri yeye fu en de trutru. Ma no meki disi kori yu! Didibri nanga den ogri yeye fu en de trutru, èn yu musu kakafutu gi den ala ten.​—1 Petrus 5:8, 9.

Koloku taki a ten de krosibei now pe Satan nanga den yepiman fu en no sa de moro! „Grontapu [sosrefi den ogri yeye tiriman fu en] e pasa gowe”, na so Bijbel e gi leki dyaranti, „ma a sma di e du a wani fu Gado, sa tan fu têgo” (1 Yohanes 2:17). Iya, fu tru, a sa de wan prisiri ten te na ogri makti dati sa komoto na pasi! Fu dati ede, meki wi de na mindri den wan di e du a wani fu Gado èn nyan bun fu têgo fu a libi na ini a regtfardiki nyun grontapu fu Gado.​—Psalm 37:9-11, 29; 2 Petrus 3:13; Openbaring 21:3, 4.

Te a no skrifi tra fasi, dan ala den bijbeltekst na ini a traktaat disi teki puru fu a Nyun-Grontapuvertaling fu den Kresten Griki Buku fu Bijbel.

[Prenki na tapu bladzijde 4]

Satan ben kan pristeri Yesus ala den tirimakti fu a grontapu disi efu den no ben de fu en?