Kownoekondre njoensoe nr. 35

Wan ten sa kon pe ala sma sa lobi makandra?

 Lobi gi sma na wi sei kon kowroe

MILJOENMILJOEN sma e firi taki den de na ini wan onseiker èn sari situwâsi, pe den no kan go na no wan presi foe feni jepi. Wan bisnis-oema di de nanga pensjoen ben taki: ’Wan neti wan weduwe di e libi na a srefi sodro-oso pe mi e libi, ben klòp na mi doro èn ben taki dati a abi a firi taki a de en wawan sondro foe sma e broko den ede nanga en. Mi ben taigi en na wan maniri fasi ma sondro wan firi, taki mi no ben abi ten gi en. A ben aksi pardon taki a ben froeferi mi èn a ben gowe.’

Na wan sari sani taki a srefi neti dati, a weduwe ben kiri ensrefi. Baka ten, a bisnis-oema ben taki dati a ben leri wan „prenspari sani, foe di a ben meki a fowtoe foe seni en birfrow gowe”.

A sori di sma no e sori lobi gi sma na den sei, foeroetron e tjari sari bakapisi kon. Na ini feti na mindri etnisch groepoe na ini Bosnia nanga Hersegofina, di ben de fosi wan pisi foe Joegoslafia, den ben poeroe nanga tranga moro leki wan miljoen sma foe den oso foe den èn den ben kiri tintin doesoen sma. Soema ben kiri den? „Den birtisma foe wi”, wan oemapikin ben kragi di den ben jagi poeroe foe en dorpoe. „Wi ben sabi den.”

Na ini Rwanda, den ben kiri hondrohondro doesoen sma, foeroetron na den eigi birtisma foe den ben doe dati. „Hoetoe nanga Toetsi [ben libi] makandra, ben trow nanga makandra, den no ben broko den ede noso no ben sabi srefi soema ben de wan Hoetoe èn soema ben de wan Toetsi”, na so The New York Times ben skrifi. „Ne wantronso wan kenki kon”, èn „a kiri foe sma ben bigin.”

Na a srefi fasi djoe nanga Arabiri na ini Israèl e libi sei na sei, ma foeroe foe den no wani si makandra na ai. A situwâsi de a srefi nanga foeroe Katoliksma nanga Protestantsma na ini Ierland èn nanga moro nanga moro sma na ini tra kondre. Noiti na ini a historia lobi ben mankeri so na grontapoe.

Foe san ede lobi gi sma na wi sei kon kowroe?

A Kriaman foe wi e gi a piki. A Wortoe foe en, bijbel, e kari a ten pe wi e libi na ini, „den lasti dei”. Disi na wan pisi ten di, soleki fa bijbel profeititori e taki, sma „no [ben] sa abi natuurlijk firi foe lobi”. Foe den „moeilek ten [disi] . . . di tranga foe pasa”, di den Boekoe foe bijbel e kari toe „a bosroiti foe a seti foe sani”, Jesus Krestes ben taki na fesi dati „a lobi foe moro foeroe sma sa kon kowroe”. — 2 Timoteus 3:1-5; Mateus 24:3, 12.

Dati meki a sori di sma no e sori lobi na ini a ten disi na wan pisi foe a boeweisi taki wi e libi na ini den lasti dei foe a grontapoe disi. Kolokoe taki a wani taki toe, dati heri esi wan regtfardiki njoen grontapoe di lobi e tiri en sa kon na ini a presi foe a grontapoe disi foe godelowsoe sma. — Mateus 24:3-14; 2 Petrus 2:5; 3:7, 13.

Ma wi abi reide troetroe foe bribi taki so wan kenki kan kon — taki ala sma kan leri foe lobi makandra èn foe libi na ini vrede nanga makandra?

 Lobi gi sma na wi sei — Wan troetroe sani

„SOEMA troetroe na a sma na mi sei?”, wan fosi jarihondro afkati ben aksi Jesus. Sondro tweifri a ben froewakti dati Jesus sa taki: ’Den kompe djoe foe joe.’ Ma ini wan tori foe wan Samariaman di ben abi sari-ati, Jesus ben sori taki sma foe tra nâsi na sma na wi sei toe. — Lukas 10:29-37; Johanes 4:7-9.

Jesus ben poti krakti na tapoe taki, boiti a lobi gi Gado, a lobi gi sma na wi sei moesoe abi krakti na tapoe a libi foe wi (Mateus 22:34-40). Ma wan groepoe sma oiti ben de di ben lobi troetroe den sma na den sei? Den fositen kresten ben doe dati! Sma ben sabi den foe a lobi di den ben abi gi tra sma. — Johanes 13:34, 35.

Fa a de na ini a ten disi? Sma e sori a lobi di Krestes ben sori? Na Encyclopedia Canadiana e taki: „A wroko foe Jehovah Kotoigi de a kon na libi baka èn a kon boen baka foe na owroe krestendom di Jesus nanga den disipel foe en ben poti na ini den libi . . . Den alamala na brada.”

San dati wani taki? A wani taki dati Jehovah Kotoigi no e gi pasi meki noti — no ras, no nationaliteit, noso etnisch fasi fa wan sma kweki — no meki den no wani si den sma na den sei na ai. Èn den no sa kiri no wan sma, bika na wan agersi fasi den naki den feti-owroe foe den kon tron proegoe èn den lansri foe den kon tron grasi-nefi (Jesaja 2:4). Te joe loekoe en boen, dan sma sabi den Kotoigi leki sma di e teki fesi foe jepi den sma na den sei. — Galasiasma 6:10.

Dati meki wan ede-artikel na ini Sacramento Union na ini Kalifornia ben taki: „A nofo foe taki dati efoe heri grontapoe ben libi akroederi a bribi foe den Jehovah Kotoigi, dan wan kaba ben sa kon na a trowe di sma e trowe broedoe èn a si di sma no wani si makandra na ai, èn lobi ben sa tiri leki kownoe.” Wan skrifiman foe a tijdschrift Ring na ini Hongaria ben taki: „Mi kon na a bosroiti taki, efoe Jehovah Kotoigi ben de den wan-enkri sma di e libi na grontapoe, dan feti ben sa tapoe, èn den wan-enkri wroko foe den skowtoe ben sa de foe loekoe a verkeer èn foe gi pasportoe.”

Ma wi moesoe erken taki wan kefalek bigi kenki na heri grontapoe sa de fanowdoe efoe ala sma moesoe lobi makandra. Fa a kenki dati sa kon? (Grantangi loekoe a bladzijde na bakasei foe a traktaat.)

 Te ala sma sa lobi makandra

WAN begi di Jesus Krestes ben leri, ben sori taki wan kefalek bigi kenki de krosibei. Na ini en barinen Bergitaki, Jesus ben leri wi foe begi: „Joe kownoekondre moesoe kon. Joe wani moesoe doe na grontapoe, soleki fa a de na hemel.” — Mateus 6:10, King James Version.

San na a Kownoekondre foe Gado? A de wan troetroe tiri, wán di e tiri komoto na hemel. Dati meki den e kari en „a kownoekondre foe hemel”. Jesus Krestes, a „Granman foe Vrede”, en Tata poti en na wroko foe di a poti en foe de Tiriman foe dati. — Mateus 10:7; Jesaja 9:6, 7; Psalm 72:1-8.

Te a Kownoekondre foe Gado e kon, dan san o pasa nanga a grontapoe disi di foeroe nanga bita-ati? „A kownoekondre” sa „broko” ala den kroeka tirimakti foe a grontapoe disi „na pisipisi èn tjari wan kaba kon na den” (Danièl 2:44). Bijbel e tjari kon na krin: „Grontapoe e pasa gowe . . . , ma a sma di e doe a wani foe Gado, e tan foe têgo.” — 1 Johanes 2:17.

Bijbel e taki foe a njoen grontapoe foe Gado: „Na den regtfardiki sma sa abi grontapoe, èn den sa libi na tapoe foe têgo” (Psalm 37:9-11, 29; Odo 2:21, 22). Dati sa de troetroe wan toemoesi moi ten! „Dede no sa de moro, no wan sari, no wan babari, no wan pen no sa de moro” (Openbaring 21:4). Srefi dede sma sa libi baka, èn a heri grontapoe sa kenki kon tron wan troetroe paradijs. — Jesaja 11:6-9; 35:1, 2; Lukas 23:43; Tori foe den Apostel 24:15.

Foe kan libi na ini a njoen grontapoe foe Gado, dan wi moesoe lobi makandra, soleki fa Gado e leri wi foe doe (1 Tesalonikasma 4:9). Wan bijbel studenti foe Owstoesei ben taki: „Mi e loekoe go na a ten te, soleki fa bijbel e pramisi, ala sma sa leri foe lobi makandra.” Èn wi kan de seiker taki Gado sa hori ensrefi na den pramisi foe en! „Na mi taki en,” a e taki, „mi sa meki a pasa toe.” — Jesaja 46:11.

Ma foe kan njan boen foe den blesi na ondro a Kownoekondre foe Gado, dan joe moesoe teki sabi foe bijbel na ini joe, soleki fa miljoenmiljoen opregti sma na heri grontapoe e doe (Johanes 17:3). A brochure San Gado e aksi foe wi? di abi 32 bladzijde, sa jepi joe. Joe kan kisi wan eksemplaar efoe joe gebroiki a coupon di de foe feni na tapoe a bladzijde na fesi èn seni en go na a adres di de moro krosibei foe joe oso.

□ Mi ben sa wani kisi a brochure San Gado e aksi foe wi?

□ Grantangi kontakti mi foe abi wan oso-bijbelstudie sondro foe pai gi dati.

[Sma di abi a reti foe den prenki na tapoe bladzijde 2]

Wan sma di e loeroe foe kiri trawan èn wan beri na ini Bosnia: Reuters/Corbis-Bettmann