Yesus Krestes​—Suma na en?

„FURU sma di no de Kresten srefi e bribi taki A ben de wan kefalek bun èn koni leriman. Fu tru a ben de wan sma di ben abi krakti tapu trawan moro leki ala tra sma di oiti ben libi” (The World Book Encyclopedia). Suma na „En”? Yesus Krestes, a sma di bigin nanga Krestendom. Yu sabi suma na en? Wan fasi de taki a abi krakti tapu a libi fu yu?

Den sani di pasa di Yesus ben du en diniwroko, skrifi na ini Bijbel na ini fo historia buku di sma e kari den Evangelie. Omeni wi man frutrow den tori disi? Baka di Will Durant, wan barinen historia skrifiman, ben ondrosuku den tori, a ben skrifi: „A ben sa de wan moro bigi wondru leki ala den wondru di skrifi na ini den Evangelie, taki wan tu gewoon man na ini wán geslakti nomo ben sa meki wan tori di e taki fu wan sma di abi someni makti èn di e hari a prakseri fu sma someni, tori di abi so wan tumusi moi ethiek na ini, èn di e sori na so wan krakti fasi fa bradafasi musu de na mindri libisma.”

Ma milyunmilyun sma na den kondre na Owstusei èn na tra presi, no sabi Yesus Krestes. Kande den e bribi taki a ben de, ma den no denki taki a abi wan sani fu du nanga a libi fu den. Fu den sani ede di den sma du di e kari densrefi bakaman fu Yesus, meki tra sma no feni en fanowdu fu prakseri Yesus. ’Den ben trowe wan atoombom na tapu Nagasaki,’ son sma na Yapan ben sa taki, ’wan foto pe moro Kresten e libi leki na moro furu foto na Yapan.’

Ma yu ben sa taki dati na a fowtu fu datra taki wan sikisma e siki efu a sikisma no ben doe san datra taigi en? Soleki fa a sori, dan yu no ben sa du dati. Langa ten kaba den sma fu Krestenhèit no du den sani di Yesus leri fu  kan lusu den problema di den abi ibri dei. So bun, fu san ede yusrefi no e go leri wan sani fu Yesus na presi fu drai baka gi en, fu di den sma di e kari densrefi Kresten no e du san a e leri? Leisi Bijbel èn kon sabi suma Yesus de trutru èn fa a kan kenki yu libi srefi.

Lobi​—Dati na san a e leri

Yesus Krestes ben de wan kefalek bun leriman di ben libi na Palestina so wan 2000 yari pasa kaba. Sma no sabi furu fu en pikin-nengreten (Mateus, kapitel 1 nanga 2; Lukas, kapitel 1 nanga 2). Di Yesus ben tron 30 yari, dan a ben bigin nanga en diniwroko fu „gi kotoigi fu a waarheid” (Yohanes 18:37; Lukas 3:21-23). Den fo historia skrifiman di skrifi sani fu Yesus libi, ben poti prakseri na a diniwroko di a ben du gi ala sma den lasti dri nanga afu yari di a ben de na grontapu.

Di Yesus ben du en diniwroko, dan a ben leri den disipel fu en fa den ben kan kakafutu gi difrenti problema na ini den libi. San ben de a sroto? Dati ben de lobi. Na ini wan fu den moro barinen taki na ini historia, di sma e kari a Bergitaki, Yesus ben leri den disipel fu en fa fu sori lobi gi tra libisma. A ben taki: „Ala sani, fu dati ede, di unu wani fu sma du gi unu, unu musu du gi den so srefi” (Mateus 7:12). Den e kari a gronprakseri disi a Gowtu Lin. Den „sma” di Yesus ben taki dya, na so srefi den feanti fu wi. Na ini a srefi taki dati a ben taki: „Tan lobi den feanti fu unu èn tan begi gi den wan di e frufolgu unu” (Mateus 5:44). A no de so, taki so wan lobi ben sa lusu furu  problema di wi abi na ini a ten disi? A Hindu fesiman Mohandas Gandhi ben prakseri so. Den taki dati a ben taki: „Te [wi] ben sa agri nanga makandra fu den sani ede di Krestes ben leri na ini a Bergitaki disi, dan wi . . . ben sa lusu den problema fu . . . heri grontapu.” Efu sma e du den sani di Yesus leri fu lobi tra sma, dan dati kan puru den problema fu libisma.

A lobi fu en ben de fu si na den sani di a ben du

Yesus ben du san a ben leri. A ben feni tra sma moro prenspari leki ensrefi èn a ben sori lobi nanga den sani di a ben du. Wan dei, Yesus nanga den disipel fu en ben yepi furu sma sondro fu teki a ten fu nyan. Yesus ben si taki den disipel fu en ben musu „rostu pikinso”, dati meki den ben go na wan tiri presi. Ma wan ipi sma ben doro drape fosi den èn den ben wakti te leki Yesus nanga den disipel ben doro drape. San yu ben sa du efu yu ben de na Yesus presi? We, Yesus „ben sari den” èn „ben bigin leri den furu sani” (Markus 6:30-34). Fu di a ben sari sma someni, meki a ben yepi tra sma.

Den sani di Yesus ben du fu a bun fu tra sma, no ben de leri na yeye fasi wawan. A ben du sani tu fu yepi den. Fu eksempre, a ben gi nyanyan na 5000 sma (boiti umasma nanga pikin-nengre) di ben arki en te latilati wan dei. Na wan tra okasi a ben gi 4000 sma nyanyan. Na a fosi okasi a ben gebroiki feifi brede nanga tu fisi, èn na a tra okasi a ben gebroiki seibi brede nanga wan tu pikin fisi (Mateus 14:14-21; 15:32-38; Markus 6:35-44; 8:1-9). Den ben de wondru? Iya, a ben de wan sma di ben du wondru.

Yesus ben meki furu sikisma kon betre tu. A ben meki den breniman, den malengriman, den gwasiman, nanga den dofuman kon betre. Iya, a ben gi dedesma wan  opobaka srefi! (Lukas 7:22; Yohanes 11:30-45) Wan leisi wan gwasiman ben begi en: „Efu yu wani nomo, yu kan meki mi kon krin.” San Yesus ben du? „A ben langa en anu èn ben fasi en, èn ben taigi en: ’Mi wani. Kon krin’” (Markus 1:40, 41). Wan tranga firi fu wani yepi den ben meki Yesus du so. A ben sori nanga den wondru dati taki a ben lobi den sma di ben pina.

A muilek fu bribi disi? Ma Yesus ben du moro furu fu den wondru fu en pe sma ben man si en. Srefi den sma di ben gens en, di ala leisi baka ben pruberi fu feni wan fowtu na en, no ben kan taki dati a no ben du wondru (Yohanes 9:1-34). Boiti dati, a ben du den wondru fu en nanga wan marki. Den ben yepi sma fu kon sabi Yesus leki a sma di Gado ben seni kon.​—Yohanes 6:14.

Te wi e luku den sani di Yesus ben leri sma èn a libi fu en syatu nomo, dan dati wawan kan meki taki wi lobi en èn wani lobi sma soleki fa en ben lobi den. Ma dati a no a wan-enkri fasi fa Yesus kan abi krakti tapu a libi fu yu. A no ben de soso wan kefalek bun leriman di ben leri sma fu lobi trawan. A ben sori taki bifo a ben tron wan libisma, a ben de a wan-enkri gebore Manpikin fu Gado (Yohanes 1:14; 3:16; 8:58; 17:5; 1 Yohanes 4:9). So srefi, ala di a no de wan libisma moro, toku a de na libi, èn dati e meki taki a e tron srefi wan moro prenspari sma gi yu. Bijbel e sori taki Yesus ben kisi wan opobaka èn now a tron Kownu fu Gado Kownukondre  (Openbaring 11:15). Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3; 20:31). Iya, te yu e teki sabi fu Yesus Krestes na ini yu, dan yu kan kisi na okasi fu libi fu têgo na ini a Paradijs! Fa so? Fu san ede yu no e leri moro fu Yesus èn si fa „a lobi di Krestes abi, e poti wan fruplekti na wi tapu” fu du san en ben du? (2 Korentesma 5:14) Yehovah Kotoigi sa breiti fu yepi yu.​—Yohanes 13:34, 35.

Te a no taki tra fasi, dan ala den Bijbeltekst teki skrifi fu a New World Translation of the Holy Scriptures.