Yu Ben Sa Wani Sabi Moro fu Bijbel?

 Fu San Ede Yu Musu Leisi Bijbel?

BIJBEL na wan tumusi aparti buku. Na ini a buku disi wi e feni rai di e sori a lobi di Gado abi gi wi (1 Tesalonikasma 2:13). Efu yu e du so srefi san Bijbel e leri, dan yu sa kisi furu winimarki. Yu sa kisi moro lobi gi Gado èn yu sa kisi wan bun matifasi nanga en, a Sma di e gi wi „ibri bun presenti nanga ibri volmaakti kado” (Yakobus 1:17). Yu sa kon sabi fa fu taki nanga en te yu e begi. Te problema miti yu, dan yu kan ondrofeni fa Gado e yepi sma. Efu yu e seti yu libi akruderi den markitiki di skrifi na ini Bijbel, dan Gado sa gi yu têgo libi.​—Romesma 6:23.

Bijbel e taki fu tru tori di e meki wi frustan sani moro bun. Den sma di e leri sabi Bijbel e kon fri fu den fowtu denki di e basi a libi fu milyunmilyun sma. Fu gi wan eksempre, te wi sabi soifri san o pasa baka te wi dede dan wi no sa frede taki den dedewan kan du wi ogri. So srefi wi no sa frede moro taki den famiriman nanga den mati fu wi di dede kaba, e nyan pina (Esekièl 18:4). Den sani di Bijbel e leri fu na opobaka, e trowstu den sma di lasi lobiwan na ini  dede (Yohanes 11:25). Te wi sabi a tru tori fu den godelowsu engel, dan dati e meki taki wi de na ai gi den kefar fu afkodrei èn wi sa man frustan fu san ede grontapu lai so furu problema.

Den gronprakseri fu Gado di skrifi na ini Bijbel e sori wi fa fu libi na wan fasi di e tyari winimarki kon na skin sei. Fu gi wan eksempre, te wi de „bescheiden na ini gwenti” dan dati e meki taki wi sa abi wan moro bun gosontu (1 Timoteus 3:2). Te wi e ’krin wisrefi fu ibri doti fu a skin èn fu a yeye’, dan wi no sa pori wi gosontu (2 Korentesma 7:1). Te wi e gebroiki a rai fu Gado di de fu feni na ini Bijbel, dan dati sa gi wi wan koloku trowlibi èn wi sa lespeki wisrefi.​—1 Korentesma 6:18.

Efu yu e du san Gado Wortu e taki, dan yu sa firi moro koloku. Sabi fu Bijbel e yepi wi fu kisi wan korostu ati. A e meki taki wi de tevrede èn a e gi wi howpu. A e yepi wi fu kweki den moi eigifasi soleki sari-ati, lobi, prisiri, vrede, bun-ati, nanga bribi (Galasiasma 5:22, 23; Efeisesma 4:24, 32). Den sortu eigifasi disi e yepi wi fu tron moro bun masra noso wefi, moro bun papa noso mama, moro bun manpikin noso umapikin.

 Yu aksi yusrefi oiti san o pasa na ini a ten di e kon? Den Bijbel profeititori e sori wi taki a ten di wi e libi na ini na wan tumusi prenspari ten na ini a libisma historia. Boiti taki den profeititori disi e taki fa a de nanga grontapu na ini a ten disi, den e sori so srefi taki heri esi Gado sa kenki grontapu kon tron wan paradijs.​—Openbaring 21:3, 4.

Wi Abi Yepi Fanowdu fu Frustan Bijbel

Kande yu pruberi fu leisi Bijbel ma yu no man frustan san yu e leisi. Kande yu no sabi pe na ini Bijbel yu kan feni piki tapu den aksi fu yu. Efu dati de so, dan yu no de yu wawan. Wi alamala abi yepi fanowdu fu frustan a Wortu fu Gado. Yehovah Kotoigi e gi milyunmilyun sma bijbelstudie na ini sowan 235 kondre, sondro taki den sma disi abi fu pai gi dati. Den Kotoigi sa breiti fu yepi yu tu.

Furutron a moro bun fu studeri Bijbel akruderi wan spesrutu sistema. Disi yu kan du te yu e bigin nanga prenspari leri (Hebrewsma 6:1). O moro yu e go na fesi nanga a studie, o moro yu sa man teki „tranga nyanyan”, dati wan taki, moro dipi tru tori (Hebrewsma 5:14). Den sani di yu sa leri e komoto fu Bijbel. Bijbel publikâsi, soleki a buku San Bijbel e leri wi trutru?, sa yepi yu fu frustan den pisi na ini Bijbel di e taki fu difrenti sortu tori.

 Yu Wani Studeri Bijbel Ibri Wiki?

Furutron den Kotoigi kan studeri nanga yu na wan ten èn na wan presi di yusrefi feni bun. Furu sma e studeri na den eigi oso. Wan tu sma e studeri nanga yepi fu telefon srefi. Yehovah Kotoigi no e studeri nanga grupu fu sma; den e studeri nanga yu wawan, ala di den e fiti a studie na a situwâsi fu yu, na den sani di yu sabi, èn so srefi na a skoroleri di yu kisi. Yu no abi fu meki examen èn den Kotoigi sa sorgu taki yu no sa firi syen. Yu sa kisi piki tapu den aksi fu yu di abi fu du nanga Bijbel, èn yu sa leri fa fu kisi wan bun matifasi nanga Gado.

Yu no abi fu pai gi so wan bijbelstudie (Mateus 10:8). Yehovah Kotoigi de klariklari fu studeri nanga sma fu ala bribi èn so srefi nanga den sma di no abi wan bribi, ma di trutru wani sabi moro fu a Wortu fu Gado.

Suma kan teki prati na a takimakandra? Yu heri osofamiri. Iniwan mati di yu wani kari kon, kan teki prati so srefi. Noso, efu dati na san yu wani, den Kotoigi kan hori a takimakandra nanga yu wawan.

Furu sma e poti wán yuru wan wiki na wan sei fu studeri Bijbel. Efu yu abi moro ten, noso efu yu no abi so furu ten ibri wiki, dan den Kotoigi sa seti sani fu yepi yu.

 Wan Kari fu Teki Leri

Wi e gi yu deki-ati fu meki kontakti nanga Kotoigi fu Yehovah. Wán fasi fa yu kan du dati, na fu skrifi go na wan fu den adres di kari na ondrosei. Yehovah Kotoigi sa sorgu taki wan sma e kon hori wan oso-bijbelstudie nanga yu sondro taki yu abi fu pai gi dati.

□ Grantangi seni mi wan eksemplaar fu a buku San Bijbel e leri wi trutru?

□ Grantangi kontakti mi fu hori wan oso-bijbelstudie nanga mi sondro taki mi abi fu pai gi dati.

Te a no taki tra fasi, dan ala den bijbeltekst teki fu a New World Translation of the Holy Scriptures.