LES 11
Den man di ben skrifi sani fu Yesus
Yu e si den man na tapu a prenki?— Den nen Mateyus, Markus, Lukas, Yohanes, Petrus, Yakobus, Yudas nanga Paulus. Den man disi ben e libi na ini a ten fu Yesus. Den ben skrifi sani fu Yesus. Pe den skrifi den sani disi? Na ini Bijbel. Meki wi luku san wi kan leri fu den.
San yu kan fruteri fu den man disi?
Dri fu den man disi ben de apostel di ben e preiki nanga Yesus. Yu sabi den nen?— Mateyus, Yohanes, nanga Petrus. Den apostel Mateyus nanga Yohanes ben sabi Yesus heri bun èn ala tu skrifi wan buku fu Yesus en libi. Na apostel Yohanes skrifi wan buku tu di nen Openbaring èn a skrifi dri brifi di de na ini Bijbel. Den brifi nen Wán Yohanes, Tu Yohanes nanga Dri Yohanes. Na apostel Petrus skrifi tu brifi di de na ini Bijbel. Den brifi disi nen Wán Petrus nanga Tu Petrus. Na ini a brifi Tu Petrus, na apostel Petrus skrifi fu a ten di Yehovah ben taki komoto fu hemel. Yehovah ben taki fu Yesus: ’Disi na mi manpikin. Mi lobi en èn mi breiti nanga en.’
Den tra man na tapu a prenki ben e skrifi sani tu fu Yesus na ini den buku fu den. Wan fu den ben de Markus. A kan taki a ben de na a presi pe sma grabu Yesus èn taki a si ala san pasa. Wan trawan na Lukas. A ben de wan datra. A kan taki baka di Yesus dede, Lukas tron wan Kresten. Wan Kresten na wan sma di e bribi na ini Yesus.
Na tapu a prenki yu e si tu tra man di skrifi Bijbel. Den na den pikin brada fu Yesus. Yu sabi fa den nen?— Den nen Yakobus nanga Yudas. Fosi, den no ben bribi na ini Yesus. Den ben denki srefi taki Yesus ben law pikinso. Ma baka wan pisi ten den bribi na ini Yesus èn den tron Kresten.
A lasti man di wi o taki fu en na Paulus. A ben skrifi wan pisi fu Bijbel tu. Di a no ben bribi ete na ini Yesus, a ben nen Saulus. A no ben lobi den sma di ben bribi na ini Yesus èn a ben du furu ogri nanga den. Yu sabi fu san ede Paulus bigin bribi na ini Yesus?— Wan dei, Paulus ben e waka go na a foto Damaskus. Ne a yere wan sma e taki nanga en komoto fu hemel. A ben de Yesus! Yesus aksi Paulus: ’Fu san ede yu e du ogri nanga den sma di e bribi na ini mi?’ Baka dati, Paulus no du ogri moro èn en srefi bigin bribi na ini Yesus. Paulus skrifi 14 buku di de na ini Bijbel, fu Romesma te go miti Hebrewsma.
Wi e leisi Bijbel ibri dei, a no so?— Te wi e leisi Bijbel, wi kan leri furu sani fu Yesus. Yu wani sabi moro fu Yesus?—
