1, 2. (a) Sortu ogri ben miti Nabot nanga den manpikin fu en? (b) San na tu fasi di wi musu abi fu man si sani soleki fa Gado e si sani?

PRAKSERI a tori disi. Sma e lei gi wan man taki a du wan seryusu ogri. A sani disi e meki taki a man disi e kisi dedestrafu. Famiriman nanga mati fu en no man bribi san pasa, fu di den sma di fruteri a lei na wisiwasi sma. Prakseri fa sma di lobi retidu e firi te den e si fa sma e ston a man nanga den manpikin fu en kiri. A sani disi a no wan anansitori. A sani disi pasa nanga Nabot, wan reti-ati futuboi fu Yehovah. Nabot ben e libi na a ten fu Kownu Akab fu Israel.—1 Kow. 21:11-13; 2 Kow. 9:26.

² Na ini na artikel disi wi o luku na ondrofenitori fu Nabot èn a di fu wan reti-ati owruman na ini a Kresten gemeente fu a fosi yarihondro. Na owruman dati no ben si sani na a yoisti fasi. Te wi o luku den Bijbel eksempre disi, dan wi o si taki a prenspari fu abi sakafasi efu wi wani sori taki wi e si sani soleki fa Yehovah e si sani. Wi o si tu taki wi musu de klariklari fu gi pardon te wan sma na ini a gemeente e du wan hati sani nanga wi noso nanga wan trawan. Na so wi e sori  taki wi e si sani soleki fa Yehovah e si sani.

3, 4. San wi sabi fu Nabot, èn fu san ede a no ben wani seri a droifidyari fu en gi Kownu Akab?

³ Nabot ben e anbegi Yehovah na wan ten di furu Israelsma ben e teki na eksempre fu Kownu Akab nanga en ogri-ati wefi, Kownu-uma Iseibel. Den sma disi di ben e anbegi Bâal, no ben abi lespeki gi Yehovah èn den no ben e gi yesi na den wet fu en. Ma gi Nabot, a matifasi di a ben abi nanga Yehovah, ben moro prenspari leki en libi srefi.

⁴ Leisi 1 Kownu 21:1-3. Nabot no ben wani seri en droifidyari gi Akab, èn a no ben wani wan moro bunwan tu. Fu san ede? Nabot taigi Akab na wan lespeki fasi: „Te mi e prakseri a fasi fa Yehovah e si sani, dan noiti mi kan gi yu a gron di a gi den afo fu mi.” Nabot ben weigri fu di a wet di Yehovah ben gi a pipel ben taki dati wan sma no ben mag seri a famirigudu fu en fu ala ten (Lef. 25:23; Num. 36:7). A de krin taki Nabot ben e si sani soleki fa Yehovah e si sani.

5. San Iseibel du so taki en masra ben kan kisi a droifidyari?

⁵ A de wan sari sani taki a bosroiti di Nabot teki meki taki Kownu Akab nanga en wefi du wan tu takru sani nanga en. Fu di Iseibel ben wani a droifidyari gi en masra, meki a meki sma fruteri lei fu Nabot. Na so Nabot nanga den manpikin fu en kisi dedestrafu. San Yehovah ben o du?

6, 7. Fa Yehovah sori taki a lobi retidu? Fu san ede a sani disi ben o de wan trowstu gi den famiri nanga mati fu Nabot?

⁶ Yehovah seni Elia go esi-esi na Akab. Elia krutu Akab taki a ben de wan kiriman nanga wan fufuruman. Sortu strafu Yehovah ben o gi en? A srefi sani di miti Nabot nanga den boi fu en, ben o miti Akab, en wefi, nanga den manpikin fu en.—1 Kow. 21:17-25.

⁷ Aladi Nabot en famiri nanga mati ben e sari srefisrefi taki Akab ben kiri den lobiwan fu den, toku a ben de wan trowstu gi den taki Yehovah ben sabi fu na ogri di ben pasa èn taki a no draidrai fu du wan sani na a tori. Ma wan sani pasa di den no ben fruwakti, èn a ben musu fu de wan tesi gi den. Den ben o sori sakafasi èn den ben o tan frutrow tapu Yehovah?

8. San Akab du di a yere sortu strafu Yehovah ben o gi en? San ben de a bakapisi?

⁸ Di Akab yere taki Yehovah ben o strafu en gi a sani di a du, dan „a priti en krosi èn a weri den krosi di sma gwenti weri te den e sari. A no nyan nowan sani èn a ben e sari srefisrefi.” Akab sori sakafasi! San ben de a bakapisi? Yehovah taigi Elia: „Fu di a sori sakafasi, meki mi no o meki ogri miti en te a de na libi. Mi o meki ogri miti Akab famiri, na a ten te a manpikin fu en e tiri leki kownu” (1 Kow. 21:27-29; 2 Kow. 10:10, 11, 17). Yehovah „a sma di e ondrosuku sma ati” ben sori sari-ati gi Akab.—Odo 17:3.

9. Fu san ede sakafasi ben o yepi Nabot en famiri nanga mati?

⁹ Di den famiri nanga mati fu Nabot yere san Yehovah bosroiti, dan fa den ben feni a sani dati? Kande a sani disi ben de wan tesi gi den. Efu dati ben de so, dan sakafasi ben o yepi den fu tan anbegi Yehovah èn fu tan abi a frutrow taki noiti Gado e du kruktudu. (Leisi  Deuteronomium 32:3, 4.) Te Yehovah o gi den reti-ati sma wan opobaka, dan Nabot, den manpikin fu en, nanga den famiri fu den o ondrofeni taki Yehovah ala ten e du san reti (Yob 14:14, 15; Yoh. 5:28, 29). Boiti dati, wan sma di abi sakafasi, e memre taki „a tru Gado srefi o krutu ala sani di sma e du, sosrefi ibri sani di tra sma no man si, awinsi na wan bun sani noso wan takru sani” (Preik. 12:14). Iya, te Yehovah e krutu sma, dan a e poti prakseri tu na sani di wi no sabi. Sobun, sakafasi e yepi wi fu no lasi bribi na ini Yehovah.

10, 11. (a) O ten wi ben kan feni en muilek fu agri nanga a fasi fa sani e waka na ini a gemeente? (b) Na sortu fasi sakafasi o yepi wi?

¹⁰ San yu o du efu wan owruman e teki wan bosroiti di yu no e frustan noso di yu no feni bun? Fu eksempre, san yu o du efu wan sma di yu lobi e lasi wan grani di a ben abi na ini na organisâsi? San yu o du efu yu no e agri taki yu trowpatna, yu manpikin noso yu umapikin, noso wan bun mati fu yu puru fu a gemeente? San yu o du efu yu e bribi taki den owruman meki wan fowtu di den sori sari-ati gi wan sma di sondu? Den  sortu situwâsi disi kan meki en muilek gi wi fu tan frutrow na ini Yehovah èn na ini na organisâsi fu en. Fa sakafasi kan yepi yu te yu e kisi fu du nanga so wan situwâsi? Meki wi go luku tu fasi fa sakafasi kan yepi wi.

¹¹ A fosi sani, na taki te wi abi sakafasi wi o hori na prakseri taki wi no sabi ala sani. Awinsi wi sabi furu fu wan tori na Yehovah wawan sabi san de na ini wan sma en ati (1 Sam. 16:7). Efu wi e frustan a sani disi bun, dan wi o sori sakafasi, wi o frustan taki wi no sabi ala sani, èn wi o denki tra fasi fu sani. A di fu tu sani, na taki sakafasi o yepi wi fu lespeki a bosroiti di den owruman teki èn fu wakti teleki Yehovah du wan sani na a situwâsi. A de soleki fa a koni man disi ben skrifi: „A o go bun nanga den sma di abi lespeki gi a tru Gado . . .  Ma a no o go bun kwetikweti nanga den ogri sma” (Preik. 8:12, 13). A no de fu taki dati te wi e sori sakafasi, dan dati o tyari wini kon gi ala sma di abi fu du nanga a tori.—Leisi 1 Petrus 5:5.

12. Sortu tori wi o luku now, èn fu san ede?

¹² Na ini Antiokia na Siria wan sani ben pasa di ben de wan tesi gi den Kresten drape. Den ben o abi fu sori sakafasi èn den ben o abi fu gi trawan pardon. Meki wi luku a tori dati fu si fa a o yepi wi fu kon sabi efu wi de klariklari fu gi trawan pardon. A o yepi wi tu fu kon si fu san ede Yehovah wani taki wi gi trawan pardon.

13, 14. Sortu grani na apostel Petrus ben abi, èn fa a sori deki-ati?

¹³ Na apostel Petrus ben de wan owruman na ini a Kresten gemeente èn furu sma ben sabi en. A ben e wroko makandra nanga Yesus èn a ben abi prenspari frantwortu (Mat. 16:19). Fu eksempre, na ini a yari 36, Petrus ben abi a grani fu fruteri Kornelius nanga en osofamiri a bun nyunsu. A sani dati ben de wan bigi sani fu di Kornelius no ben de wan Dyu èn a no ben besnèi. Di Kornelius nanga en osofamiri kisi santa yeye, dan Petrus taki: „Suma kan tapu den sma disi di kisi a santa yeye leki wi, fu teki dopu na ini watra?”—Tori 10:47.

¹⁴ Na ini a yari 49, den apostel nanga den owruman na ini Yerusalem ben hori wan konmakandra fu bosroiti efu wan trakondre sma di ben tron wan Kresten ben musu besnèi. Na a konmakandra disi Petrus taki sondro frede èn a memre den brada taki wan tu yari na fesi, sma di no ben de Dyu ben kisi santa yeye. A ben de wan yepi gi den brada fu a tiri skin fu a fosi yarihondro, di Petrus fruteri den san a ben si nanga en eigi ai (Tori 15:6-11, 13, 14, 28, 29). Soleki fa a sori, dan den Kresten di no ben de Dyu ben e warderi en taki Petrus ben fruteri den sani disi sondro frede. A no de fu taki dati a no ben muilek gi den Kresten dati fu poti den frutrow na ini so wan lepi brada!—Hebr. 13:7.

15. Sortu fowtu Petrus meki di a ben de na ini Antiokia na ini Siria? (Luku a prenki na a bigin fu na artikel.)

¹⁵ Syatu baka a konmakandra fu a yari 49, Petrus go na Antiokia na ini Siria. Di a ben de drape a ben e moksi nanga den brada di no ben de Dyu. A no de fu taki dati den ben leri furu fu Petrus. Wi kan frustan taki den ben fruwondru di wantronso Petrus no ben e nyan moro nanga den. Den tra Dyu brada na ini a gemeente, srefi Barnabas ben du a srefi leki Petrus, aladi dati no ben bun. Fa  a du kon taki wan lepi Kresten owruman ben kan meki so wan fowtu? A sani disi ben kan tyari prati kon na ini a gemeente. Ma a bun fu aksi wisrefi san wi o du efu wan owruman taki noso du wan sani di hati wi.

16. Fa Petrus kisi piri-ai, èn sortu aksi e opo kon?

¹⁶ Leisi Galasiasma 2:11-14. Petrus ben frede libisma (Odo 29:25). Aladi Petrus ben sabi heri bun fa Yehovah ben e denki fu a tori, toku a ben e frede san den Dyu Kresten di ben besnèi ben o denki fu en. Na apostel Paulus ben de tu na a konmakandra di hori na ini a yari 49. Di a miti Petrus na ini Antiokia, dan a piri-ai gi en fu di a ben e hoigri (Tori 15:12). Fa den Kresten di no ben de Dyu ben o feni a sani di Petrus ben du nanga den? Den ben o naki futu? Petrus ben o lasi den moi grani di a ben abi?

17. Di Yehovah gi Petrus pardon, dan fa Petrus kisi wini fu dati?

¹⁷ Soleki fa a sori, dan Petrus sori sakafasi èn a teki a piri-ai fu Paulus. Bijbel no e taki dati a lasi den grani fu en. Fu taki en leti, bakaten a skrifi tu brifi nanga yepi fu santa yeye èn den brifi dati de wan pisi fu Bijbel. A moi fu sabi taki na ini a di fu tu brifi fu en, Petrus e kari Paulus „wi lobi brada” (2 Petr. 3:15). Aladi a kan taki a fowtu di Petrus ben meki ben hati den Kresten di no ben de Dyu, toku Yesus di de na edeman fu a gemeente, tan gebroiki en (Ef. 1:22). Sobun, den memre fu a gemeente ben abi na okasi fu gi en pardon, neleki fa Yesus nanga en Tata ben du dati. Wi e howpu taki nowan sma naki futu fu di wan man di ben abi sondu meki wan fowtu.

18. Na ini sortu situwâsi a de fanowdu fu si sani soleki fa Yehovah e si sani?

¹⁸ Neleki fa a ben de na ini a fosi yarihondro, na so den owruman na ini den Kresten gemeente fu a ten disi e meki fowtu tu fu di „wi alamala e sondu furu tron” (Yak. 3:2). Kande wi e agri nanga a sani disi, ma san wi o du te wan brada e du wan hati sani nanga wi? Wi o si sani soleki fa Yehovah e si sani? Fu eksempre, san yu o du te wan owruman e taki wan sani di e sori taki a e denki takru fu sma di de fu wan tra ras noso fu wan tra kulturu? Yu o naki futu efu wan owruman e taki wan sani di e hati yu? Yu o de gaw fu feni taki a brada disi no kan de owruman moro? Noso yu o tan wakti teleki Yesus, na edeman fu a gemeente du wan sani na a tori? Yu o prakseri den someni yari di a brada disi tan dini Yehovah, na presi taki yu e tan prakseri a fowtu di a meki? Efu wan brada di du wan hati sani nanga yu e tan dini leki owruman noso efu a e kisi moro grani, dan yu o breiti gi en? Efu yu de klariklari fu gi en pardon, dan yu e sori taki yu e si sani soleki fa Yehovah e si sani.—Leisi Mateyus 6:14, 15.

19. San wi musu meki muiti fu du?

¹⁹ Den sma di lobi retidu e angri gi a dei te Yehovah o tyari wan kaba kon na ala den ogri di Satan nanga na ogri sistema disi e du nanga libisma (Yes. 65:17). Teleki a ten dati doro, dan ibriwan fu wi musu du muiti fu si sani soleki fa Yehovah e si sani. Sobun, meki wi hori na prakseri taki wi no sabi ala sani èn meki wi de klariklari fu gi pardon na den wan di e sondu teige wi.