Mi gebore ini 1935 na ini a foto Darlaston, wan kontren fu Ingrisikondre. Sma ben kari en a Blaka Kondre fu di furu blaka smoko ben komoto fu den fabriki drape. Di mi ben abi fo yari, mi papa nanga mama bigin studeri Bijbel nanga Yehovah Kotoigi. Di mi ben abi sowan 14 yari, mi ben de seiker taki disi na a waarheid èn mi teki dopu na ini 1952 di mi ben abi 16 yari.

Na a ten dati, mi bigin teki leri na wan bigi fabriki pe den ben e meki wrokosani nanga wagi onderdeel. Den ben e leri mi fu du wan prenspari wroko na kantoro èn mi ben lobi en srefisrefi.

Mi ben musu teki wan prenspari bosroiti di wan kring-owruman aksi mi fu bigin hori a mindriwiki Gemeente Bukustudie na ini a gemeente fu a foto Willenhall pe mi ben tan. Ma a no ben makelek srefisrefi fu teki a bosroiti dati. Na a ten dati, mi ben e go na tu gemeente. Te mindriwiki mi ben go na wan gemeente krosibei fu mi wrokopresi na ini Bromsgrove, sowan 32 kilometer fu mi oso. Èn ini a weekend te mi ben go baka na mi papa nanga mama oso, dan mi ben go na a gemeente na ini Willenhall.

Fu di mi ben wani horibaka gi Yehovah en organisâsi, meki mi teki a kari fu a kring-owruman. Fu man du dati, mi ben musu libi a kantorowroko di mi ben lobi so te. Fu di mi meki Yehovah sori mi a pasi, meki mi ben man abi wan libi di gi mi furu prisiri. Noiti a no hati mi taki mi teki a bosroiti dati.

Di mi ben e go na Gemeente Bromsgrove, dan mi miti Anne, wan moi sisa di ben e poti a diniwroko na a fosi presi. Wi trow na ini 1957, èn makandra wi du a gewoon pionierwroko, a spesrutu pionierwroko, wi du kringwroko nanga Betelwroko. Anne gi mi prisiri mi heri libi langa.

Na ini 1966 wi ben breiti fu go na a di fu 42 klas fu a Gileadskoro. Den ben seni wi go na Malawi, wan kondre di furu sma e kari a waran ati fu Afrika, fu di den sma drape abi switifasi èn den lobi meki trawan firi bun. Ma wi no ben sabi taki wi no ben o man tan langa drape.

Wi doro na Malawi tapu 1 februari 1967. A fosi mun wi meki muiti fu leri a tongo, èn baka dati wi bigin nanga a kringwroko. Wi ben rèi wan Kaiser Jeep. Son sma ben denki taki a wagi dati ben man rèi na ala presi, srefi na ini liba. Ma dati no ben de so. Wi ben man rèi na ini lagi watra nomo. Son leisi wi ben tan na ini wan kampu di meki fu tokotoko, èn ini alen ten wi ben musu tapu na ondrosei fu a daki nanga wan tapolin. Disi no ben de wan switi fasi fu bigin a kringwroko, ma wi ben lobi en!

Na ini april mi kon frustan taki lanti ben o gi wi problema. Mi ben yere a presidenti, Datra Hastings Banda, e taki na radio. A ben taki dati Yehovah Kotoigi no e pai lantimoni èn taki den e opo den srefi teige lanti. A no de fu taki dati den sani disi no tru. Wi alamala ben sabi taki a trutru problema ben de taki wi no ben e teki sei na ini politiek èn taki wi no ben wani bai politiek partèi karta.

Na ini september wi ben leisi na koranti taki a presidenti taki dati den brada e meki trobi na ala sei. Na wan politiek konmakandra a ben taki dati heri esi lanti ben o tapu a wroko fu Yehovah Kotoigi. Den ben tapu a wroko fu wi tapu 20 oktober 1967. Syatu baka dati, skowtu nanga sma fu immigratie kon na a bijkantoro fu tapu a presi èn fu seni den zendeling gowe fu a kondre.

Baka di den poti wi dri dei na strafu-oso, den seni wi go na Maurisius, wan kondre di Ingrisikondre ben e tiri. Ma den tiriman fu Maurisius no ben wani gi wi primisi fu tan leki zendeling. Sobun den brada seni wi go na Rodesia (now a nen Zimbabwe). Di wi doro drape, wi miti wan lantiman fu immigratie di ben atibron nanga  wi. A no ben wani meki wi pasa go na ini a kondre, a taki: „Yu no mag tan na Malawi. Den no wani meki yu tan na Maurisius. Now yu wani tan dya fu di a makelek.” Anne bigin krei. A ben gersi leki nowan sma no ben wani wi! Na a momenti dati mi ben wani gowe langalanga go baka na oso na Ingrisikondre. Te fu kaba, den sma fu immigratie gi wi pasi fu tan wan neti na a bijkantoro, ma wi ben musu go na a edekantoro fu den a dei baka dati. Wi ben weri srefisrefi, ma wi libi sani na ini Yehovah anu. A tra bakadina, sondro taki wi ben fruwakti dati, wi kisi primisi fu tan leki toerist na ini Zimbabwe. Noiti mi o frigiti fa mi ben firi a dei dati. Mi de seiker taki Yehovah ben sori wi a pasi di wi musu waka.

Di mi ben de na a bijkantoro fu Zimbabwe, den brada poti mi fu wroko na a Dienstafdeling pe wi ben e sorgu gi Malawi nanga Mosambik. Den brada na ini Malawi ben kisi hebi frufolgu. Wan fu den sani di mi ben musu du ben de fu vertaal den brifi di den kring-owruman fu Malawi ben seni kon. Wan fu den neti di mi ben wroko lati fu klari wan brifi, mi krei di mi leisi fu den ogri-ati sani di den ben e du nanga den brada nanga sisa fu mi. * Ma a ben naki mi ati tu fu si taki den ben tai hori na Yehovah, taki den ben sori bribi èn taki den ben e horidoro.​—2 Kor. 6:4, 5.

Wi du ala san wi man fu gi den brada nanga sisa di tan na baka na ini Malawi Bijbel leri, èn sosrefi den wan di lowe go na Mosambik. A tongo di sma e taki moro furu na ini Malawi na Tyityewatongo. A grupu di ben vertaal buku na ini a tongo dati, froisi go na wan bigi gron fu wan brada. Nanga prisiri a brada bow oso nanga wan kantoro gi den. Drape den go doro nanga a prenspari wroko fu vertaal buku di e taki fu Bijbel.

Wi ben seti sani gi den kring-owruman fu Malawi fu go ibri yari na a Tyityewatongo kongres na ini Zimbabwe. Drape den ben kisi den schema fu den kongreslezing. Te den ben drai go baka na Malawi, dan den ben prati a leri nanga den brada nanga sisa so furu leki den man. Wan fu den yari di den kon na Zimbabwe, wi ben man orga wan Kownukondre Diniwroko-skoro fu tranga den kring-owruman disi di ben du a wroko fu den sondro frede.

Na ini februari 1975 mi go luku den Kotoigi fu Malawi di lowe go na den kampu na ini Mosambik. Den brada ben e hori densrefi na den sani di Yehovah en organisâsi seti, soleki a nyun seti fu abi wan skin fu owruman na ini ibri gemeente. Den nyun owruman ben seti furu sani di abi fu du nanga na anbegi. Den ben e hori publikitaki, den ben e taki fu a deitekst nanga A Waktitoren, èn den ben e hori bigi konmakandra srefi. Den ben seti den kampu neleki wan kongres. Fu eksempre, den ben abi afdeling fu krin a presi, fu sorgu gi nyanyan, èn fu kibri sma so taki ogri no miti den. Den getrow brada disi ben du bun furu nanga yepi fu Yehovah, èn mi kisi furu deki-ati di mi gowe fu drape.

Syatu fosi 1980 a bijkantoro fu Sambia bigin sorgu gi Malawi. Ma mi ben prakseri den brada nanga sisa fu Malawi ete èn mi tan begi gi den. Furu tra brada ben e du dati tu. Mi ben de wan memre fu a Bijkantoro Komte fu Zimbabwe èn na difrenti okasi mi ben miti nanga brada fu na edekantoro, makandra nanga brada di ben teki fesi na ini Malawi, Zuid-Afrika, nanga Sambia. Ibri tron wi ben aksi a srefi sani: „San wi kan du moro fu yepi den brada nanga sisa fu Malawi?”

Baka wan pisi ten den no ben frufolgu den brada so furu moro. Pikinsopikinso den brada nanga sisa di lowe fu a kondre, drai kon baka na Malawi. Èn den wan di tan na baka, no ben ondrofeni so furu ogri-ati sani moro. Den kondre lontu Malawi ben poti na ini a wet fu den taki a pipel fu Yehovah ben kan preiki èn hori konmakandra baka. Mosambik ben du a srefi sani dati na ini 1991. Ma wi ben aksi wisrefi: ’O ten Yehovah Kotoigi na ini Malawi o kon fri?’

Te fu kaba a politiek situwâsi kenki na ini Malawi èn na ini 1993 den tiriman gi Yehovah Kotoigi pasi fu du den wroko baka. Syatu baka dati, mi ben e taki nanga wan zendeling di aksi mi: „Yu o go baka na Malawi?” Na a ten dati mi ben abi 59 yari, ne mi piki en: „No mi owru tumusi!” Ma a srefi dei dati wi kisi wan brifi pe a Tiri Skin gi wi a kari fu drai go baka.

Wi ben lobi wi toewijzing na Zimbabwe. Dati meki a ben tranga gi wi fu teki wan bosroiti. Wi ben de koloku na ini Zimbabwe èn na ini ala den yari wi ben meki bun mati drape. Na wan switi fasi a Tiri Skin taki dati wi ben mag tan na ini Zimbabwe efu wi ben wani dati. Sobun, a ben o makelek fu du san wisrefi wani èn fu tan na Zimbabwe. Ma mi e memre ete taki mi ben prakseri fa Abraham nanga Sara gi yesi na Yehovah èn den gowe libi a moi oso fu den na ini den owrudei.​—Gen. 12:1-5.

Wi bosroiti fu du san Yehovah en organisâsi aksi wi fu du, èn tapu 1 februari 1995 wi drai go baka na Malawi. Dati ben de precies 28 yari baka a fosi leisi di wi doro Malawi. Wan Bijkantoro Komte ben seti, pe mi nanga tu tra brada ben de na ini. Heri esi wi ben e seti sani fu orga a wroko fu Yehovah Kotoigi baka.

A de wan bigi blesi fu si fa Yehovah meki a wroko go na fesi esi-esi! Na ini 1993 wi ben abi 30.000 preikiman. A no langa baka dati na ini 1998, a nomru dati kon tron moro leki 42.000. * A Tiri Skin ben feni en bun taki wi bow wan nyun bijkantoro so taki wi ben man horibaka gi a wroko di ben kon moro furu. Wi bai wan pisi gron fu 12 hectare na ini Lilongwe, èn den ben poti mi fu wroko na ini a bow komte.

Na ini mei 2001, Brada Guy Pierce fu a Tiri Skin ben hori a lezing fu gi den nyun gebow abra na Gado. Moro leki tu dusun Kotoigi fu Malawi srefi ben kon. Furu fu den ben dopu moro leki 40 yari kaba. Den getrow brada nanga sisa disi nyan pina furu yari langa di a wroko ben tapu. Den ben pôti fu di den no ben abi furu moni, ma yu kan taki dati den ben gudu fu di den ben abi wan tranga bribi èn wan tumusi bun matifasi nanga Yehovah. Tapu a dei disi den ben breiti fu si a nyun Betel fu den. Na ala sei fu Betel den ben  e waka makandra e singi Kownukondre-singi na wan Afrikan fasi. A sani disi naki mi ati srefisrefi, a ben de a moro moi sani di oiti mi ondrofeni. Disi ben de wan krin buweisi taki Yehovah e blesi den wan di e tan horidoro aladi den e kisi tesi.

Baka di den kaba bow a bijkantoro, mi ben breiti di mi bigin kisi toewijzing fu hori lezing fu gi Kownukondre zaal abra na Gado. Na organisâsi ben seti sani fu bow Kownukondre zaal esi-esi na ini kondre pe den brada nanga sisa no abi furu moni. Den gemeente na ini Malawi ben kisi wini fu a seti dati. Bifo a ten dati, wan tu gemeente ben kon makandra na ini kampu di den ben meki fu eucalyptus bon. Den ben gebroiki grasi fu tapu a daki èn den ben sidon na tapu langa bangi fu tokotoko. Now den brada ben e wroko tranga fu baka ston na ini wan spesrutu onfu di den meki, èn den bow moi nyun konmakandra presi. Ma den ben lobi den bangi, bika den taki: Ala ten yu kan fiti ete wan sma na tapu wan bangi!

Mi ben lobi fu si tu fa Yehovah yepi sma tron lepi Kresten. A ben naki mi ati di mi si taki yongu Afrikan brada ben wani yepi. Den ben kisi leri fu Yehovah en organisâsi èn fu di den ben du a wroko bun, meki den kisi moro ondrofeni tu. Na so fasi den ben man tyari moro frantwortu na ini Betel èn na ini den gemeente. Den gemeente ben kon moro tranga nanga yepi fu nyun kring-owruman. Furu fu den abi wan wefi. Aladi a kulturu de so èn aladi den famiri srefi e fruwakti taki sma musu kisi pikin te den trow, toku den trowpaar disi teki a bosroiti fu no meki pikin ete, so taki den kan du moro gi Yehovah.

Baka 52 yari na ini Afrika mi kisi problema nanga mi gosontu. A Bijkantoro Komte ben aksi a Tiri Skin efu wi ben kan go dini na Ingrisikondre baka. Den ben feni dati bun. Wi ben sari taki wi ben abi fu gowe libi a toewijziging di wi lobi, ma a Betelfamiri fu Ingrisikondre e sorgu heri bun gi wi na ini wi owrudei.

Mi meki Yehovah sori mi a pasi di mi musu waka, èn mi abi na overtoigi taki dati ben de a moro bun bosroiti di mi teki na ini mi heri libi. Efu mi ben frutrow tapu mi eigi frustan, dan mi no sabi pe mi ben o de now. Yehovah ben sabi langa ten kaba san mi ben abi fanowdu fu ’meki mi pasi kon reti’ (Odo 3:5, 6). Di mi ben de wan yonkuman, mi ben angri fu leri fa ala sani e wroko na ini wan bigi bisnis. Ma na organisâsi fu Yehovah di de na heri grontapu leri mi fu du wan wroko di e gi mi moro furu prisiri. A dini di mi e dini Yehovah meki mi abi wan koloku libi èn a e tan gi mi prisiri fu du dati!