Disi na wan Bijbeltekst di furu sma sabi èn di sma gwenti gebroiki. Sma e taki dati nowan tra vers na ini Bijbel e sori „so krin fa Gado e firi gi libisma èn fa a o frulusu den”. Dati meki na ini son kondre, den wortu fu a tekst disi, noso a tekst srefi, Yohanes 3:16, de fu si na okasi pe furu sma e kon, na tapu oto, na tapu skotu, èn na tra presi.

A musu de so taki den sma di e gebroiki a tekst disi e bribi taki Gado lobi den èn taki a o frulusu den. Fa a de nanga yu? San a lobi fu Gado wani taki gi yu? San yu denki taki Gado du fu sori taki a lobi yu?

Furu sma e agri taki na Gado meki hemel nanga grontapu, a naturu, nanga libisma. Den libisani na grontapu meki na so wan koni fasi taki a musu de so taki na wan makti koni sma meki den. Furu sma e taigi Gado tangi ibri dei gi a libi di a gi den. Den e frustan tu taki na Gado wawan e gi den sani soleki a loktu, watra, nyanyan, dreiten nanga alenten, so taki den kan tan na libi èn nyan bun fu a libi.

A bun te wi e taigi Gado tangi gi ala den sani dati, fu di en na a Mekiman èn a sma di e hori wi na libi (Psalm 104:10-28; 145:15, 16; Tori fu den apostel 4:24). Wi kan frustan fa Gado lobi wi te wi e prakseri ala den sani di a du so taki wi kan de na libi. Na apostel Paulus ben taki en na a fasi disi: „[Gado] e gi ala sma libi, a e meki den  bro èn a e gi den ala sani. Bika na en meki taki wi de na libi, taki wi e buweigi èn taki wi de.”—Tori fu den apostel 17:25, 28.

Ma aladi Gado e gi wi nyanyan fu man tan na libi, toku dati a no a wan-enkri fasi fa a e sori lobi gi wi. A meki wi hei moro meti fu di a gi wi frustan di e yepi wi fu sabi taki wi abi en fanowdu, èn a e yepi wi tu fu kon sabi en (Mateyus 5:3). Na so libisma di e gi yesi na Gado kan abi a howpu fu tron „pikin” fu en.—Romesma 8:19-21.

Soleki fa Yohanes 3:16 e taki moro fara, dan Gado sori taki a lobi wi di a seni en Manpikin, Yesus, kon na grontapu fu gi wi leri fu a Gado èn a Tata fu en, èn fu dede gi wi. Ma furu sma e taki dati den no e frustan krin fu san ede a ben de fanowdu taki Yesus dede gi libisma. Den no e frustan tu fa a dede fu Yesus e sori taki Gado lobi libisma. Meki wi go luku fa Bijbel e yepi wi fu frustan fu san ede Yesus dede èn san a dede fu en wani taki gi wi.

Ala libisma e kon siki, den e kon owru, èn den e dede te fu kaba. Ma a no dati Yehovah Gado ben wani biginbigin. A gi den fosi tu libisma a howpu fu libi fu têgo na ini wan paradijs na grontapu. Ma a ben aksi wán sani fu den: Den ben musu gi yesi na en. Gado ben taki dati efu den no ben o du dati, den ben o dede (Genesis 2:17). A tru taki a fosi libisma opo ensrefi teige Gado, èn na so a tyari dede kon gi ensrefi èn gi den bakapikin fu en. Na apostel Paulus e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu.”—Romesma 5:12.

Ma Gado „lobi retidu” (Psalm 37:28). Aladi Gado strafu a fosi libisma di trangayesi en fu espresi, toku a no bosroiti taki libisma ben o tan pina èn dede soso fu di wán man ben trangayesi en. Na presi fu dati, a hori ensrefi na a wèt fu en, èn a bosroiti taki wan paiman ben musu pai gi a libi di a fosi libisma lasi. Na so a du san reti so taki libisma di e gi yesi na en kan kisi têgo libi baka (Eksodes 21:23). Ma fa libisma ben o man abi a libi baka di Adam lasi? We, wan sma ben musu gi a libi fu en di ben abi a srefi waarde leki a di fu Adam. Dati na wan libi sondro sondu.

A de krin taki nowan sondu bakapikin fu Adam ben man pai so wan paiman, ma Yesus ben man du dati (Psalm 49:6-9). Fu di Yesus ben gebore sondro sondu, meki a ben abi a srefi libi leki Adam. Sobun, di Yesus gi en libi, dan a puru libisma na ini katibo fu sondu. Na so a gi den bakapikin fu den fosi tu libisma na okasi fu abi a srefi libi di Adam nanga Eva ben abi fosi (Romesma 3:23, 24; 6:23). San wi musu du fu man kisi wini fu a bigi lobi dati?

Meki wi luku Yohanes 3:16 baka. Luku den wortu „ala sma di e bribi na ini en [Yesus] no sa dede, ma sa kisi têgo libi”. Disi wani taki dati wi musu du wan sani fu man kisi têgo libi. Efu wi wani „kisi têgo libi”, dan wi musu bribi na ini Yesus èn wi musu gi yesi na en.

Kande yu e aksi yusrefi: ’Fu san ede wi musu gi yesi? Yesus no ben taki dati „ala sma di e bribi na ini en” sa kisi têgo libi?’ Iya, a prenspari taki wi abi bribi. Ma wi musu hori na prakseri tu taki soleki fa Bijbel e sori, dan a no nofo te wan sma e taki nomo dati a e bribi na ini Yesus. Soleki fa wan buku e taki, dan a wortu di Yohanes gebroiki na ini den fositen tongo no wani taki nomo taki wan sma „e bribi na ini wan trawan, ma taki a sma e poti en frutrow na tapu a sma dati” (Expository Dictionary of Old and New Testament Words). Wan sma di wani taki Gado feni en bun, no musu sabi nomo taki Yesus na a Frulusuman. A sma dati musu du tranga muiti tu fu du san Yesus e leri. Efu a no du dati, dan a bribi fu en de fu soso. Bijbel e taki: „Bribi na wan dede sani te wan sma no e du sani fu sori a bribi fu en” (Yakobus 2:26). Sobun, san wan sma musu du, na taki a musu sori bribi na ini Yesus, iya, a musu libi na wan fasi di e kruderi nanga a bribi fu en.

Paulus e taki en so: „A lobi fu Krestes naki wi ati, bika wi kon frustan taki wán sma dede gi ala sma . . . Sobun, a dede gi ala sma. Dati meki den sma di e libi, no musu libi gi densrefi moro, ma gi a sma di dede gi den èn di kisi wan opobaka” (2 Korentesma 5:14, 15). Te wi abi trutru warderi gi a frulusu-ofrandi fu Yesus, dan dati musu gi wi deki-ati fu tyari kenki kon na ini wi libi. Wi no musu libi gi wisrefi moro, ma gi Yesus di dede gi wi. Dati wani taki dati wi musu si en leki wan prenspari sani fu du san Yesus leri wi. A kenki dati o abi krakti tapu a denki fu wi, tapu den bosroiti di wi e teki, èn tapu ala san wi e du. Sortu blesi den sma di e bribi na ini Yesus o kisi?

A lasti pisi fu Yohanes 3:16 e taki fu a sani di Gado o du gi den wan di e poti bribi na ini a lusu-paiman èn di e hori densrefi na den leri fu Bijbel. Gado bosroiti taki den reti-ati sma dati ’no sa dede, ma den sa kisi têgo libi’. Ma tu sortu howpu de gi den wan di e kisi wini fu a lobi fu Gado.

Yesus taki dati wán grupu o kisi têgo libi na hemel. A ben taigi den reti-ati disipel fu en krin taki a ben o sreka wan presi gi den so taki den kan tiri makandra nanga en te a kisi glori (Yohanes 14:2, 3; Filipisma 3:20, 21). Den wan di sa kisi wan opobaka fu libi na hemel „o de priester fu Gado èn fu Krestes, èn na ini den wán dusun yari, den o tiri leki kownu makandra nanga en”.—Openbaring 20:6.

Wan pikin grupu nomo fu den bakaman fu Krestes o kisi a grani dati. Fu taki en leti, Yesus ben taki: „No frede, un pikin ipi, bika un Tata feni en bun fu gi unu a Kownukondre” (Lukas 12:32). Omeni sma o de fu a „pikin ipi” dati? Openbaring 14:1, 4 e taki: „Mi si a Pikin Skapu [Yesus Krestes di kisi wan opobaka] e tanapu na tapu Sion-bergi [na hemel], makandra nanga wán hondro fotenti na fo dusun sma. A nen fu en nanga a nen fu en Tata ben skrifi na tapu a fesi-ede fu den. . . . Den na den fosiwan di bai puru na mindri libisma gi Gado èn gi a Pikin Skapu.” Te yu e luku den milyardmilyard sma di libi na grontapu, dan 144.000 sma na wan „pikin ipi” nomo. Bijbel e taki dati den na kownu. Ma suma den o tiri?

Yesus ben taki fu ete wan grupu reti-ati sma di o kisi blesi fu a hemel Kownukondre. Soleki fa Yohanes 10:16 e sori, dan Yesus ben taki: „Mi abi tra skapu tu, di no de fu a skapupen disi. Mi musu tyari den kon tu, èn den o arki mi sten èn den o tron wán ipi di abi wán skapuman.” Den „skapu” dati abi a howpu fu libi fu têgo na grontapu. Dati na a srefi howpu di Adam nanga Eva  ben abi biginbigin. Fa wi du sabi taki den sma disi o libi na grontapu?

Bijbel e taki furu leisi fu a Paradijs di o de na grontapu. Efu yu srefi wani leisi fu a tori dati, dan opo yu Bijbel èn leisi den tekst disi: Psalm 37:9-11; 46:8, 9; 72:7, 8, 16; Yesaya 35:5, 6; 65:21-23; Mateyus 5:5; Yohanes 5:28, 29; Openbaring 21:4. Den vers dati e taki dati wan kaba o kon na feti, angriten, siki, nanga dede. Den e taki tu dati wan ten o kon te bun sma o breiti taki den man bow den eigi oso, taki den man prani den eigi gron, èn taki den man kweki den pikin fu den na ini wan grontapu pe ogri no e miti sma. * Yu ben o wani kisi den blesi dati tu? Wi abi bun reide fu bribi taki den pramisi dati o kon tru heri esi.

Efu yu e teki ten fu prakseri ala den sani di Gado du gi yu èn gi a heri libisma famiri, dan a de krin taki a du bun furu kaba. Wi de na libi, wi abi frustan, wi de gosontu, èn wi man sorgu wisrefi. Ma san moro prenspari, na taki a lusu-paiman di Gado gi nanga yepi fu Yesus di dede gi wi, kan tyari moro bigi blesi kon gi wi soleki fa Yohanes 3:16 leri wi.

Te wi o libi fu têgo na ini wan grontapu pe sma kan libi switi, sondro fu frede gi siki, feti, angriten, noso dede, dan dati o tyari furu blesi kon gi wi èn wi sa de koloku trutru. A de na yu efu yu o kisi den blesi dati. Ma a sani di yu musu aksi yusrefi na disi: San mi e du gi Gado?