Yehovah Gado na a sma di e gi libi (Psalm 36:9). Sobun, wi kan frustan taki a srefi Gado disi man gi dedesma libi baka. Bijbel e gi a dyaranti taki na dati Gado o du na ini a ten di e kon. (Leisi Tori fu den apostel 24:15). Ma fu san ede a o du dati?

Sensi a bigin, wi Mekiman ben wani taki libisma ben musu libi fu têgo na grontapu (Genesis 1:31; 2:15-17). Te now ete a wani dati gi libisma. A e hati en fu si fa libisma e pina now èn fa den e dede so esi.—Leisi Yob 14:1, 14, 15.

A de so taki Gado meki libisma fu libi na hemel? Nôno. Gado meki engel fu libi na hemel. A meki libisma fu libi na grontapu (Genesis 1:28; Yob 38:4, 7). Prakseri sosrefi den sma di Yesus gi wan opobaka. Di den kisi wan opobaka, dan na leti dyaso na grontapu den libi go doro. Na so a o de tu na ini a ten di e kon. Furu sma di o kisi wan opobaka o libi dyaso na grontapu.—Leisi Yohanes 5:28, 29; 11:44.

Ma Gado bosroiti taki wan tu sma o libi na hemel te den kisi wan opobaka. Drape den no o abi libisma skin, ma den o de yeye (Lukas 12:32; 1 Korentesma 15:49, 50). Den sma di kisi wan opobaka fu libi na hemel o tiri grontapu leki kownu makandra nanga Krestes.—Leisi Openbaring 5:9, 10.