1. Yini lesayifundza emhlanganweni wemnyaka wa-2023?

 EMHLANGANWENI wemnyaka wa-2023, a satfola lushintjo lolujabulisako kuloko lesikukholelwako futsi seva tindzaba letimnandzi letimayelana nemsebenti wekushumayela. Sibonelo nje, seva kutsi kungenteka labanye babe nelitfuba lekutihlanganisa nebantfu baJehova ngisho nangemuva kwekubhujiswa kweBhabhulona Lenkhulu. Saphindze seva kutsi kusukela ngaNovember 2023, ngeke kusadzingeka kutsi bamemeteli beMbuso bakubike konkhe labakwentile emsebentini wekushumayela. Lolushintjo lusho kutsi kushumayela sengumsebenti longakabaluleki yini, futsi longasaphutfumi njengakucala? Cha!

2. Yini leyenta umsebenti wekushumayela uphutfume kakhulu lilanga nelilanga? (Makho 13:10)

² Kushona kwelilanga ngalinye kuwenta uphutfume kakhulu umsebenti wekushumayela. Kwentiwa yini loko? Ngobe sikhatsi sesiya ngekuphela. Cabanga ngaloko Jesu lakuphrofetha ngemsebenti wekushumayela kulamalanga ekugcina. (Fundza Makho 13:10.) Ngekusho kwaMatewu, Jesu watsi tindzaba letimnandzi betitawushunyayelwa emhlabeni wonkhe ngaphambi kwekutsi “kuphela” kufike. (Mat. 24:14) Ligama lelitsi kuphela lisho kucedvwa ngalokuphelele kwelive lelibi laSathane. Jehova sewulibekile ‘lilanga neli-awa’ latawukwenta ngalo  loku. (Mat. 24:36; 25:13; Imis. 1:7) Lilanga ngalinye lisisondzeta kakhulu kuleso sikhatsi. (Rom. 13:11) Kodvwa njengobe kuphela kusengakefiki, kufanele sichubeke sishumayela.

3. Yini leyenta sishumayele?

³ Njengobe senta umsebenti wekushumayela, sifuna kutibuta nangu umbuto lobalulekile: Yini leyenta sishumayele tindzaba letimnandzi? Kamelula nje, lutsandvo. Nasishumayela sikhombisa kutsi siyatitsandza tindzaba letimnandzi, siyabatsandza bantfu, futsi ngetulu kwako konkhe siyamtsandza Jehova kanye nelibito lakhe. Ase sicoce ngakunye kwaloku.

SIYASHUMAYELA NGOBE SIYATITSANDZA TINDZABA LETIMNANDZI

4. Sitiva njani nasitfola tindzaba letimnandzi?

⁴ Usakhumbula yini kutsi wativa njani ngesikhatsi utfola tindzaba letimnandzi, mhlawumbe weva kutsi kutelwe lilunga lelisha lemndeni nobe kutsi utfole umsebenti lebewuwudzinga kakhulu? Siyaciniseka kutsi bewukulangatelela kucocela emalunga emndeni wakho nobe bangani bakho letindzaba letimnandzi. Kwenteka lokufanako yini ngesikhatsi uva tindzaba letimnandzi kunato tonkhe, lokutindzaba letimnandzi teMbuso waNkulunkulu?

5. Wativa njani ngesikhatsi ucala kufundza liciniso leliseVini laNkulunkulu? (Buka nesitfombe.)

⁵ Cabanga ngekutsi wativa njani ngesikhatsi ucala kufundza liciniso leliseVini laNkulunkulu. Wafundza kutsi Babe wakho wasezulwini uyakutsandza, ufuna ube yincenye yemndeni wakhe, wetsembise kucedza buhlungu nekuhlupheka, wakwetsembisa nekutsi utawuphindze ubabone bantfu lobatsandzako lasebashonile bavuswa emhlabeni lomusha, kanye nalokunye lokunyenti. (Mak. 10:29, 30; Joh. 5:28, 29; Rom. 8:38, 39; Semb. 21:3, 4) Lamaciniso akujabulisa kakhulu. (Luk. 24:32) Wakutsandza loko bewukufundza, futsi bewungakhoni kubindza nalamaciniso laligugu!​—Catsanisa naJeremiya 20:9.

6. Yini loyifundza kuloko lokwenteka ku-Ernest nakuRose?

 ⁶ Cabanga nganaku lokwenteka. Lomunye umzalwane lokutsiwa ngu-Ernest b bekaneminyaka lengaba ngu-10 ngesikhatsi kushona babe wakhe. Ernest utsi: “Bengitibuta: ‘Uye ezulwini yini babe? Ufe siphelane yini?’ Bengihawukela nangibona labanye bantfwana banabobabe.” Ernest bekavame kuya emathuneni, afike aguce ethuneni lababe wakhe bese uthantaza utsi: “Nkulunkulu ngiyakucela, ngifuna kwati kutsi ukuphi babe.” Ngemuva kweminyaka lengaba ngu-17 babe wakhe ashona, boFakazi bacela kudadisha liBhayibheli na-Ernest, futsi wavumela etulu. Wajabula kakhulu nakafundza kutsi labafile abati lutfo, kufana nekutsi bakulobukhulu butfongo futsi liBhayibheli letsembisa kutsi batawuvuswa ekufeni esikhatsini lesitako. (Shu. 9:5, 10; Imis. 24:15) Ekugcineni, watitfola timphendvulo temibuto lebeseyimhluphe sikhatsi lesidze! Ernest wajabula kakhulu ngemaciniso laseBhayibhelini lebekawafundza. Umkakhe, lokunguRose naye wacala kudadisha liBhayibheli futsi njenga-Ernest, naye wakutsandza loko bekakufundza. Babhajatiswa nga-1978. Bacocela emalunga emndeni wabo lamaciniso laligugu, bangani kanye nalabanye bebafuna kulalela. Umphumela waloko kutsi basite bantfu labangetulu kwa-70 kutsi bagcine babhajatisiwe.

7. Yini leyentekako nangabe silitsandza kakhulu liciniso leliseBhayibhelini? (Lukha 6:45)

⁷ Kusebaleni kutsi nangabe silitsandza liciniso leliseBhayibhelini, ngeke sikhone kuthula nalo. (Fundza Lukha 6:45.) Sitiva njengebafundzi baJesu labatsi: “Ngeke siyekele kukhuluma ngetintfo lesitibonile nalesitivile.” (Imis. 4:20) Silitsandza kakhulu liciniso kangangekutsi sifuna kulicocela bantfu labanyenti.

SIYASHUMAYELA NGOBE SITSANDZA BANTFU

8. Yini leyenta sicocele labanye tindzaba letimnandzi? (Buka libhokisi lelitsi “ Tsandza Bantfu​—Wente Bafundzi.”) (Buka nesitfombe.)

⁸ Natsi siyabatsandza bantfu njengaJehova neNdvodzana yakhe. (Taga 8:31; Joh. 3:16) Sibavela kakhulu labo ‘labangamati Nkulunkulu’ futsi ‘labete litsemba.’ (Ef. 2:12) Bangene shi etinkingeni, futsi tsine sinaloko labakudzingako, lokutindzaba letimnandzi teMbuso waNkulunkulu. Ngenca yekutsi siyabatsandza futsi siyabavela, sifuna kwenta konkhe lesingakwenta kuze sibacocele tindzaba letimnandzi. Lomlayeto loligugu ungabenta babe nelitsemba, ubanike imphilo lencono nyalo futsi ubente babe nelitsemba lekutfola “kuphila lokungukonakona,” lokukuphila  lokuphakadze eveni lelisha laNkulunkulu.​—1 Thim. 6:19.

9. Simemetela siphi secwayiso ngelikusasa, futsi ngasiphi sizatfu? (Hezekeli 33:7, 8)

⁹ Kutsandza bantfu kuphindze kusente sibecwayise ngekuphela kwalelive lelibi lokusondzelako. (Fundza Hezekeli 33:7, 8.) Sibavela buhlungu bomakhelwane betfu nemalunga emindeni yetfu langamkhonti Jehova. Bantfu labanyenti baphila ngendlela levamile, abakwati loko lokutako, ‘lokukuhlupheka lokukhulu lokungazange sekube khona kusukela kwaba khona umhlaba, nalokungeke kuphindze kube khona.’ (Mat. 24:21) Sifuna bakwati loko lokutawenteka ngesikhatsi sekwehlulela. Kutawucale kubhujiswe inkholo yemanga, bese kubhujiswa lelive lelibi nge-Amagedoni. (Semb. 16:14, 16; 17:16, 17; 19:11, 19, 20) Sithantazela kutsi bantfu labanyenti basilalele lesecwayiso futsi bancume nyalo kukhonta Jehova kanye natsi. Kodvwa kutsiwani ngalabo labangasilaleli lesecwayiso, lokufaka ekhatsi emalunga emindeni yetfu lesiwatsandzako?

10. Kubaluleke ngani kutsi sichubeke secwayisa bantfu?

¹⁰ Njengobe kuchaziwe esihlokweni lesendlulile, kungenteka kube yintsandvo yaJehova kusindzisa bantfu labatawukholwa kuye nababona iBhabhulona Lenkhulu ibhujiswa. Nangabe kutawenteka loko, kusho kutsi nyalo kubaluleke kakhulu kutsi sichubeke secwayisa bantfu. Cabanga nganaku: Loko lesibatjela kona nyalo kungenteka ngiko labatakukhumbula ngaleso sikhatsi. (Catsanisa naHezekeli 33:33.) Mhlawumbe batawukhumbula secwayiso labasiva kitsi futsi loko kubente bacale kukhonta Jehova kanye natsi kungakephuti kakhulu. Njengalogadzi welijele waseFiliphi lowashintja ngemuva ‘kwekutamatama kwemhlaba lokukhulu,’ mhlawumbe labanye labangalaleli nyalo batawushintja ngemuva kwekubhujiswa kweBhabhulona Lenkhulu lokutawumangalisa umhlaba wonkhe.​—Imis. 16:25-34.

SISHUMAYELA NGOBE SITSANDZA JEHOVA NELIBITO LAKHE

11. Simnika njani Jehova inkhatimulo, ludvumo nemandla? (Sembulo 4:11) (Buka nesitfombe.)

¹¹ Sizatfu lesibaluleke kakhulu lesenta sishumayele tindzaba letimnandzi kutsi sitsandza Jehova Nkulunkulu nelibito lakhe lelingcwele. Umsebenti wekushumayela siwutsatsa njengendlela lesidvumisa ngayo Nkulunkulu lesimtsandzako. (Fundza Sembulo 4:11.) Natsi siyavuma kutsi Jehova Nkulunkulu ukufanele kwemukela inkhatimulo, ludvumo kanye nemandla etikhontini takhe letetsembekile. Siyamkhatimulisa futsi simdvumise nasinika labanye bufakazi  lobucinisekisako bekutsi “wadala tonkhe tintfo” futsi siyaphila ngenca yakhe. Simnika emandla etfu nasisebentisa sikhatsi setfu, netintfo tetfu nasenta konkhe lokusemandleni kuye ngetimo tetfu kuze sishumayele. (Mat. 6:33; Luk. 13:24; Khol. 3:23) Kalula nje, siyakutsandza kukhuluma ngaNkulunkulu lesimtsandzako. Sikukhandza kufanele kutsi sitjele labanye ngelibito lakhe nangekutsi lisho kutsini. Ngasiphi sizatfu?

12. Silingcwelisa njani libito laNkulunkulu nasenta umsebenti wekushumayela?

¹² Kumtsandza Jehova kwenta kutsi singcwelise libito lakhe. (Mat. 6:9) Sifuna kulihlanta libito lakhe ekuhlanjalatweni ngemanga lamabi aSathane. (Gen. 3:1-5; Jobe 2:4; Joh. 8:44) Nasishumayela, simelela Nkulunkulu ngekutsi sitjele bonkhe labo labasilalelako liciniso ngaye. Sifuna bonkhe bantfu bati kutsi buntfu bakhe lobuhamba embili lutsandvo, kutsi indlela yakhe yekwehlulela ilungile nekutsi ngekushesha uMbuso wakhe utakucedza konkhe kuhlupheka futsi uletsele bonkhe bantfu kuthula nenjabulo. (Hla. 37:10, 11, 29; 1 Joh. 4:8) Nasivikela libito lakhe emsebentini wekushumayela, sisuke singcwelisa libito lakhe. Kuyasijabulisa nekwati kutsi senta ngekuvumelana nelibito letfu. Sisho ngani?

13. Yini leyenta sitigcabhe ngekubitwa ngekutsi siBoFakazi BaJehova? (Isaya 43:10-12)

¹³ Jehova usibite ngekutsi ‘sibofakazi’ bakhe. (Fundza Isaya 43:10-12.) Eminyakeni leyendlulile, Sigungu Lesibusako sabhala incwadzi satsi: “Ayikho intfo leligugu kakhulu kwendlula kubitwa ngekutsi siBoFakazi BaJehova.” c Sisho ngani? Cabanga nganasi sibonelo. Kube bekungatsiwa udzinga umuntfu lotawuba ngufakazi wakho ecaleni, bewungakhetsa  umuntfu lomatiko nalometsembako, futsi lonelidvumela lelitawenta kutsi kwetsenjwe loko lakushoko. Ngekutsi Jehova asikhetse kutsi sibe boFakazi bakhe, ukhombisa kutsi usati kahle futsi uyetsemba kutsi sitamfakazela kutsi nguye yedvwa Nkulunkulu weliciniso. Sitigcabha kakhulu ngekuba boFakazi bakhe kangangekutsi sisebentisa onkhe ematfuba lesiwatfolako kuze sente bantfu balati libito lakhe futsi sikhombise kutsi tonkhe tintfo letimbi letikhulunyiwe ngaye tingemanga. Ngekwenta njalo, sihamba etinyatselweni telibito letfu lesitigcabhako ngalo lelitsi BoFakazi BaJehova!​—Hla. 83:18; Rom. 10:13-15.

SITAWUCHUBEKA SISHUMAYELA KUZE KUBE SEKUGCINENI

14. Ngutiphi tintfo letijabulisako lokungenteka tenteke esikhatsini lesitako?

¹⁴ Sijabula kakhulu ngekwati loko lokungenteka esikhatsini lesitako! Ngekusitwa nguJehova, siyetsemba kutsi basebanyenti bantfu labatawemukela liciniso ngaphambi kwekutsi kucale kuhlupheka lokukhulu. Ngetulu kwaloko, kuyasijabulisa nekutsi ngekuhlupheka lokukhulu, lokusikhatsi lesitawuba matima kakhulu, kusenekwenteka babe banyenti bantfu labashiya lelive laSathane lelihhohlokako futsi badvumise Jehova kanye natsi!​—Imis. 13:48.

15-16. Yini lesitawuchubeka siyenta, futsi sitawuyenta kuze kube ngunini?

¹⁵ Kwanyalo kunemsebenti lobalulekile lokufanele siwente, lokungumsebenti longeke uphindze wentiwe wekushumayela tindzaba letimnandzi teMbuso waNkulunkulu emhlabeni wonkhe. Ngesikhatsi lesifanako, kufanele sichubeke secwayisa bantfu. Kufanele bati kutsi kuphela kwalelive lelibi kusondzela ngekushesha. Nasenta njalo, sitawutsi nasifika sikhatsi sekwehlulela, batawati kutsi umlayeto besiwumemetela bewuvela kuJehova Nkulunkulu.​—Hez. 38:23.

¹⁶ Ngako yini lesitimisele kuyenta? Kutsandza tindzaba letimnandzi, kutsandza bantfu futsi ngetulu kwako konkhe kutsandza Jehova Nkulunkulu nelibito lakhe, kungako sitawuchubeka sishumayela tindzaba letimnandzi ngekutimisela, ngekuphutfuma nangemdlandla kuze kube ngulapho Jehova atsi: “Sekwanele!”