1. Bekubaluleke kangakanani kushumayela kuJesu? Chaza.

JESU bekatsandza kukhuluma ngeMbuso waNkulunkulu. Ngalesikhatsi alamhlabeni, abekhuluma kakhulu ngawo kwendlula nobe yini lenye. Ngesikhatsi ashumayela ngeMbuso, wakhuluma ngawo tikhatsi letingetulu kwa-100. UMbuso bewubaluleke mbamba kuJesu.—Fundza Matewu 12:34.

2. Bangakhi labeva lomyalo lokuMatewu 28:19, 20, futsi kungani sisho njalo?

² Ngekushesha ngemuva kwekuvuswa kwakhe, Jesu wahlangana nesicumbi sebantfu lebesingetulu kwa-500, lokungenteka besibafundzi bakhe. (1 Khorinte 15:6) Kungenteka kutsi kungalesikhatsi Jesu aniketa umyalo wekutsi kushunyayelwe “bantfu bato tonkhe tive.” Lomsebenti bewungeke ube melula. * (Fundza umbhalo longentansi.) Wabatjela kutsi lomsebenti wekushumayela  bewutawuchubeka sikhatsi lesidze kuze “kube sekupheleni kwalelive.” Nawushumayela tindzaba letimnandzi lamuhla, usuke ugcwalisa leso siphrofetho.—Matewu 28:19, 20.

3. Ngutiphi tintfo letintsatfu letisisitile kute sishumayele tindzaba letimnandzi?

³ Ngemuva kwekutsi Jesu sekanikete umyalo wekutsi kushunyayelwe, watsi: “Mine nginani.” (Matewu 28:20) Ngako Jesu wetsembisa balandzeli bakhe kutsi utawucondzisa lomsebenti futsi abasite bashumayele emhlabeni wonkhe. Jehova naye unatsi. Usinikete “tonkhe tintfo letinhle” kute tisisite sishumayele. (Hebheru 13:20, 21) Kulesihloko, sitawufundza ngaletintsatfu taletintfo letinhle: (1) emathulusi lesiniketwe wona, (2) tindlela lesitisebentisile, kanye (3) nekuceceshwa lesikutfolile. Asesicale ngekucoca ngalamanye alamathulusi lesiwasebentisile kuleminyaka lengu-100 leyendlulile.

4. Emathulusi lehlukahlukene asisite njani emsebentini wetfu wekushumayela?

⁴ Jesu wafananisa umlayeto weMbuso nenhlanyelo lehlanyelwa emhlabatsini lowehlukahlukene. (Matewu 13:18, 19) Kute alungiselele lomhlabatsi, umlimi usebentisa emathulusi langafani. Ngendlela lefanako, iNkhosi yetfu isinikete emathulusi lesingawasebentisa kute sisite bantfu bakwemukele loko lesikushoko. Lamanye alamathulusi abelusito kwesikhashana kantsi lamanye asabalulekile nalamuhla. Kodvwa onkhe lamathulusi asisitile kute sitfutfukise emakhono etfu ekushumayela.

5. Beliyini likhadi lekufakaza, futsi belisetjentiswa njani?

⁵ Nga-1933, bamemeteli bacala kusebentisa likhadi lekufakaza, lokulithulusi lelasita labanyenti kutsi bashumayele. Leli bekulikhadi lelincane lelinemlayeto lomfishane nalomelula losekelwe eBhayibhelini. Ngalesinye sikhatsi bekukhululwa emakhadi lamasha lanemlayeto lomusha. UMzalwane Erlenmeyer bekaneminyaka lelishumi budzala ngalesikhatsi acala kusebentisa lelikhadi. Wachaza watsi: “Singeniso lebesivame kusisebentisa sasitsi, ‘Ngicela ufundze lelikhadi.’ Nasekacedzile kulifundza umnikati welikhaya, besibese simnika incwadzi, emuva kwaloko sihambe.”

6. Belilusito ngayiphi indlela likhadi lekufaza?

⁶ Likhadi lekufakaza lasita bamemeteli ngetindlela letehlukahlukene. Sibonelo saloko kutsi labanye bamemeteli bebanemahloni ngisho nobe bebafuna mbamba kushumayela, kodvwa bebangati kutsi batawushumayela batsini. Labanye babo bebanesibindzi. Ngemizuzu lembalwa nje bebatjela umnikati welikhaya konkhe lebebakwati, kodvwa loko bebangakusho ngendlela lehlakaniphile. Likhadi lekufakaza lasita bonkhe bamemeteli kutsi bendlulisele umlayeto ngendlela lecacile nalemelula.

7. Ngutiphi tinsayeya lebetikhona nakusetjentiswa likhadi lekufakaza?

⁷ Likhadi lekufaka beliphindze libe netinsayeya. Dzadze Grace Estep watsi: “Ngalesinye sikhatsi banikati bemakhaya bebahle basibuta batsi, ‘Likhuluma ngani? Yini nje ungaveli ungitjela kutsi litsini?’” Labanye  banikati bemakhaya bebangakhoni kukufundza lobekubhaliwe. Labanye bebavele batsatse lelikhadi bavale umnyango. Labanye bantfu bebangawutsandzi lomlayeto ngako bebavele balidzabule libe ticucu. Ngetulu kwaletinsayeya, lelikhadi lekufakaza lasita bamemeteli kutsi bashumayele kubomakhelwane babo futsi batiwe njengebashumayeli beMbuso.

8. Beyisetjentiswa njani igalamafoni lephatfwako? (Buka sitfombe lesisekucaleni kwalesihloko.)

⁸ Lelinye lithulusi lebelisetjentiswa ngemuva kwa-1930 bekuyigilamafoni lephatfwako. Labanye BoFakazi bebayibita ngekutsi ngu-Aroni ngobe beyibakhulumela. (Fundza Eksodusi 4:14-16.) Nangabe umnikati welikhaya avuma kulalela, ummemeteli abedlala inkhulumo lemfishane lesekelwe eBhayibhelini bese umshiyela incwadzi. Ngalesinye sikhatsi, wonkhe umndeni bewuhlala phansi ulalele leyo nkhulumo. Nga-1934, i-Watch Tower Society yacala kwakha emagilamafoni laphatfwako lentelwe kuphatfwa ensimini. Bazalwane bagcine batsebule tinkhulumo letingu-92 letehlukahlukene.

9. Ibe lusito njani igilamafoni lephatfwako?

⁹ Ngesikhatsi Hillary Goslin eva lenye yetinkhulumo kugilamafoni, wayiboleka liviki kute alalelise bomakhelwane bakhe lomlayeto loseBhayibhelini. Umphumela waba kutsi bantfu labanyenti balitsandza liciniso futsi babhajatiswa. Ngekuhamba kwesikhatsi, emantfombatane lamabili eMzalwane Goslin aya eSikolweni saseGileyadi futsi abatitfunywa telivangeli. Njengalelikhadi lekufakaza, igilamafoni lephatfwako yasita bamemeteli labanyenti kutsi bacale kushumayela. Njengobe sikhatsi sichubeka, iNkhosi iceceshe bantfu bayo kute babe bafundzisi labaphumelelako, isebentisa Sikolwa Semsebenti WemaKhristu.

10, 11. Bewasetjentiswa njani emaphephandzaba nemsakato ekushumayeleni tindzaba letimnandzi, futsi kungani letindlela betiphumelela?

¹⁰ Ngekucondziswa yiNkhosi yetfu, bantfu baNkulunkulu basebentise tindlela letehlukahlukene kute bashumayele bantfu labanyenti. Letindlela betilusito, ikakhulukati njengobe tisebenti betimbalwa. (Fundza Matewu 9:37.) Nasi sibonelo: eminyakeni leminyenti leyendlulile emaphephandzaba abesetjentiswa ekushumayeleni tindzaba letimnandzi. Njalo ngeliviki, uMzalwane Russell abetfumela inkhulumo yeliBhayibheli kubantfu betindzaba. Bebabese batfumela lenkhulumo emaphephandzabeni aseCanada, aseYurophu newaseMelika. Nga-1913, tinkhulumo teMzalwane Russell besetishicilelwa emaphephandzabeni langu-2 000, futsi tifundvwa bantfu labacishe babe ngu-15 000 000.

¹¹ Bekusetjentiswa nemsakato kute kushunyayelwe tindzaba letimnandzi. Nga-April 16, 1922, uMzalwane Rutherford wetfula inkhulumo yakhe yekucala emsakatweni futsi beyilalelwe bantfu labacishe babe ngu-50 000. Ngekushesha sacala kusebentisa umsakato wetfu lebewubitwa  ngekutsi yi-WBBR, futsi luhlelo lwekucala lalalelwa ngaFebruary 24, 1924. Sicongosekulindza saDecember 1, 1924 satsi: “Sikholelwa kutsi lomsakato ube yindlela leyongako nalephumelelako yekusakata umlayeto weliciniso.” Njengobe bekunjalo ngemaphephandzaba, lomsakato usisitile kute sishumayele bantfu labanyenti etindzaweni letinebamemeteli labambalwa.

12. (a) Ngutiphi tindlela tekufakaza etindzaweni tawonkhe wonkhe lotijabulela kakhulu? (b) Yini lengasisita kute sincobe kwesaba lesingaba nako ngekufakaza etindzaweni tawonkhe wonkhe?

¹² Kushumayela etindzaweni tawonkhe wonkhe yindlela lephumelelako yekufinyelela bantfu lamuhla. Kwentiwa imetamo leminyenti kute kushunyayelwe bantfu etiteshini temabhasi, etiteshini tetitimela, etindzaweni tekupaka, etindzaweni letiphitsitelako nasetimakethe. Uyesaba yini kushumayela etindzaweni tawonkhe wonkhe? Nangabe kunjalo, thantazela lusito futsi ucabange ngaloko lokwashiwo nguMzalwane Manera, longumbonisi lojikeletako, lowatsi: “Indlela lensha yekushumayela besiyitsatsa njengendlela yekukhonta Jehova, yekumkhombisa kutsi setsembekile kuye neyekuvivinya bucotfo betfu. Besitimisele kukhombisa Jehova kutsi sifuna kumkhonta ngendlela layifunako.” Nasincoba kwesaba lesinako futsi sisebentisa tindlela letinsha tekushumayela, sisuke sicinisa kwetsembela kwetfu kuJehova  futsi siba bafundzisi labancono.—Fundza 2 Khorinte 12:9, 10.

13. Kungani kusebentisa i-website yetfu emsebentini wekushumayela kuyindlela lephumelelako, futsi yini lejabulisako loyitfolile nawuyisebentisa?

¹³ Bamemeteli labanyenti bayakujabulela kutjela labanye nge-website yetfu, letsi jw.org, lapho bangafundza futsi batitsatsele khona tincwadzi letisekelwe eBhayibhelini ngetilwimi letingetulu kwa-700. Onkhe malanga, bantfu labangetulu kwetigidzi letingu-1.6 bangena kule-website. Esikhatsini lesendlulile, umsakato bewufinyelela bantfu ngetindzaba letimnandzi etindzaweni letikhashane. Nalamuhla i-website yetfu yenta lokufanako.

14. Bamemeteli bebadzinga kuphi kuceceshwa, futsi ngusiphi sikolwa lesabasita kute babe bafundzisi labaphumelelako?

¹⁴ Lamathulusi naletindlela tekushumayela lesesicoce ngato, kwaphumelela kakhulu. Nobe kunjalo, bamemeteli ngaleso sikhatsi bebasadzinga kuceceshwelwa kuba bashumayeli. Nasi sibonelo: Ngalesinye sikhatsi umnikati welikhaya bekangavumelani naloko lakuvako kugilamafoni. Kantsi ngaletinye tikhatsi umnikati welikhaya bekakujabulela loko lakuvako futsi afune kwati lokunyenti. Bamemeteli bekudzingeka bati kutsi bangabhekana njani nekuphikiswa ngendlela lephumelelako nekutsi bangaba njani bafundzisi labancono. Acondziswa ngumoya longcwele waNkulunkulu, uMzalwane Knorr wabona kubalulekile kutsi bamemeteli bafundze indlela yekukhuluma nabasemsebentini wekushumayela. Ngako kusukela nga-1943, emabandla acala kuba neSikolwa Semsebenti WemaKhristu. Lesikolwa sasita bonkhe kutsi babe bafundzisi labaphumelelako.

15. (a)Kwentekani kulabanye nababeka inkhulumo eSikolweni Semsebenti WemaKhristu? (b) Setsembiso saJehova lesikuTihlabelelo 32:8 sibe njani liciniso kuwe?

¹⁵ Bazalwane labanyenti bebangakakwetayeli kukhuluma embikwebantfu. UMzalwane Ramu ukhumbula inkhulumo yakhe yekucala layibeka nga-1944. Lenkhulumo beyimayelana nemuntfu loseBhayibhelini lokutsiwa nguDowegi. Watsi: “Emadvolo ami bekagedletela, tandla tivevetela kantsi ematinyo ami bekachachatela.” Wengeta watsi: “Bekukwekucala ngca ngibeka inkhulumo, futsi angizange ngiyekele.” Nebantfwana bebatibeka tinkhulumo esikolweni ngisho nobe kwakungasimelula. UMzalwane Manera ukhumbula loko lokwenteka ngesikhatsi lomunye umfanyana abeka inkhulumo yakhe yekucala. Utsi: “Lomfana beketfuke kakhulu kangangekutsi nakacala kukhuluma, wavele wadzindza sililo. Bekatimisele kuyibeka lenkhulumo, ngako wakhala waze wayoyicedza.” Kungenteka kutsi  awuphendvuli esifundvweni ngobe unemahloni nobe uva shengatsi ngeke ukhone. Nangabe kunjalo, cela Jehova kutsi akusite ubhekane nalokwesaba. Utakusita njengobe asita labafundzi bekucala beSikolwa Semsebenti WemaKhristu.—Fundza Tihlabelelo 32:8.

16. Beyisolo iyini injongo yeSikolwa saseGileyadi (a) esikhatsini lesendlulile (b) kusukela nga-2011?

¹⁶ Inhlangano yaNkulunkulu iphindze yaniketa kucecesha ngeSikolwa saseGileyadi. Lenye injongo yalesikolwa kusita bafundzi kutsi bakhulise sifiso sabo sekushumayela tindzaba letimnandzi. Sikolwa saseGileyadi sacala nga-1943, futsi kusukela ngaleso sikhatsi kuceceshwe bafundzi labangu-8 500, batfunyelwa emaveni langu-170. Kusukela nga-2011, labo lababitelwa kulesikolwa basuke bangemahlahlandlela lakhetsekile, babonisi labajikeletako, emalunga emndeni waseBethel nobe titfunywa telivangeli letingakase tiye kuso.

17. Kubelusito kangakanani kucecesha kwaseGileyadi?

¹⁷ Sikolwa saseGileyadi siphumelele yini? Yebo. Cabanga ngaloko lokwenteka eJapan. Nga-August 1949, bekunebamemeteli labangaphansi kwelishumi kulelive. Ngasekupheleni kwaloyo mnyaka, bese kunetitfunya telivangeli letingu-13 lebetishumayela nebamemeteli bakulendzawo. Lamuhla, kunebamemeteli labangaba ngu-216 000 eJapan futsi cishe ihhafu yabo ingemahlahlandlela!

18. Ngutiphi letinye tikolwa lesinato?

¹⁸ Sinaletinye tikolwa letinyenti, letifaka ekhatsi Sikolwa Semsebenti WeMbuso, Sikolwa Semsebenti Semahlahlandlela, Sikolwa Sebavangeli BeMbuso, Sikolwa Sebabonisi Labajikeletako Nemakhosikati Abo neSikolwa Semalunga Emakomidi Emagatja Nemakhosikati Awo. Letikolwa ticeceshe bazalwane nabodzadze ngendlela lephumelelako futsi ticinise kukholwa kwabo. Kuyacaca kutsi Jesu uyachubeka nekucecesha bantfu labanyenti.

19. Yini uMzalwane Russell layisho ngemsebenti wekushumayela, futsi loko kube liciniso njani?

¹⁹ UMbuso waNkulunkulu sewubuse iminyaka lengetulu kwalengu-100. Kulesikhatsi sekubusa kwawo, iNkhosi yetfu Jesu Khristu beyicondzisa lomsebenti wekushumayela. Nga-1916, uMzalwane Russell bakakholelwa kutsi tindzaba letimnandzi titawushunyayelwa emhlabeni wonkhe. Watsi: “Lomsebenti ukhula ngekushesha futsi utawuchubeka ukhula ngobe ‘lelivangeli lembuso’ kufanele lishunyayelwe emhlabeni wonkhe.” (Faith on the March, ya-A. H. Macmillan, likhasi 69) Lomsebenti uyentiwa nalamuhla! Sibonga Jehova longuNkulunkulu wekuthula ngekutsi usiniketa konkhe lesikudzingako kute sente intsandvo yakhe!