Kulandzisa KwaMatewu 15:1-39
15 Ngemuva kwaloko, kwesuka baFarisi netati temtsetfo eJerusalema beta kuJesu,+ batsi:
2 “Kwentiwa yini kutsi bafundzi bakho bangalihloniphi lisiko labokhokho betfu? Ngobe abatigezi* tandla tabo ngaphambi kwekutsi badle.”+
3 Jesu wabaphendvula watsi: “Nine nentiwa yini kutsi ningawulaleli umtsetfo waNkulunkulu ngenca yemasiko enu?+
4 Ngobe Nkulunkulu watsi: ‘Hlonipha babe wakho namake wakho,’+ waphindze watsi: ‘Umuntfu lokhuluma kabi* ngababe wakhe nobe ngamake wakhe kufanele abulawe.’+
5 Kodvwa nine nitsi: ‘Nobe ngubani lotsi kubabe wakhe nobe kumake wakhe: “Konkhe lenginako lebenginganinakekela ngako sekusipho lesinikelwe kuNkulunkulu,”+
6 akusadzingeki abahloniphe batali bakhe.’ Ngako nilente laba lite livi laNkulunkulu ngenca yemasiko enu.+
7 Nine batentisi, Isaya waphrofetha kufanele ngani, nakatsi:+
8 ‘Labantfu bangidvumisa ngemilomo yabo, kodvwa tinhlitiyo tabo tikhashane nami.
9 Kungikhonta kwabo kulite, ngobe bafundzisa timfundziso tebantfu.’”+
10 Ngako wase ubita sicumbi sebantfu lebesisedvute, watsi kuso: “Lalelani futsi niwacondze lamavi latsi:+
11 Loko lokungena emlonyeni akumngcolisi umuntfu, kodvwa nguloko lokuphuma kuwo lokumngcolisako.”+
12 Ngako bafundzi beta kuye batsi: “Uyati yini kutsi loko lokushito kubakhubile baFarisi?”+
13 Wabaphendvula watsi: “Tonkhe tihlahla letingakahlanyelwa nguBabe losezulwini titawusishulwa.
14 Bayekeleni. Babaholi labatimphumphutse. Nangabe imphumphutse ihola imphumphutse, totimbili titawugcumukela emgodzini.”+
15 Phetro watsi kuye: “Sichazele lomfanekiso.”
16 Ngako Jesu watsi: “Kantsi nani solo anicondzi yini?+
17 Anati yini kutsi konkhe lokungena emlonyeni kuya esiswini, nakhona kufike kwendlule bese kuyaphuma?
18 Kodvwa tintfo letiphuma emlonyeni tivela enhlitiyweni, futsi ngito letingcolisa umuntfu.+
19 Ngobe enhlitiyweni kuphuma imicabango lemibi:+ kubulala, kuphinga, bugwadla,* kweba, kucala emanga nekuhlambalata.
20 Leti-ke ngito tintfo letingcolisa umuntfu, kodvwa kudla ngetandla letingakagezwa* akumngcolisi umuntfu.”
21 Jesu watsi nakesuka lapho, waya ngaseThire naseSidoni.+
22 Kweta umfati longumFenisiya lobekahlala lapho, wamemeta watsi: “Ngihawukele Nkhosi, Ndvodzana yaDavide. Indvodzakati yami ihlushwa lidimoni kamatima.”+
23 Kodvwa Jesu akazange amphendvule. Ngako bafundzi bakhe beta kuye batsi: “Mtjele ahambe, ngobe solo uyamemeta futsi uyasilandzela.”
24 Wabaphendvula watsi: “Angikatfunywa kulabanye bantfu, kodvwa ngitfunywe kubantfu baka-Israyeli labanjengetimvu letilahlekile.”+
25 Kodvwa lomfati wafike waguca embikwakhe watsi: “Nkhosi, ngisite!”
26 Jesu wamphendvula watsi: “Akukalungi kutsatsa sinkhwa sebantfwana usijikele tinja letisetincane.”
27 Yena watsi: “Kona kunjalo Nkhosi, kodvwa netinja letisetincane tidla timvutfu letiwa etafuleni lebanikati bato.”+
28 Ngako Jesu wamphendvula watsi: “Maye kukhulu kukholwa kwakho; akwenteke loko lokufisako.” Lendvodzakati yalomfati yelapheka ngaso leso sikhatsi.
29 Nakesuka lapho, Jesu waya ngaseLwandle LwaseGalile,+ futsi wakhuphukela entsabeni wahlala khona.
30 Kwase kufika sicumbi lesikhulu sebantfu, saletsa labachutako, labakhubatekile, labangaboni emehlweni, labangakhoni kukhuluma, nalabanye lebebagula, futsi sababeka embikwakhe, yena wabelapha.+
31 Labantfu bamangala nababona labangakhoni kukhuluma sebakhuluma, labakhubatekile sebelaphekile, labachutako sebahamba kahle, nalabangaboni emehlweni sebabona. Babese bakhatimulisa Nkulunkulu wema-Israyeli.+
32 Jesu wase ubita bafundzi bakhe watsi kubo: “Ngiyabavela labantfu+ ngobe sekuphele emalanga lamatsatfu bahleti nami futsi bete kudla. Angifuni bahambe balambile,* ngobe kungenteka baphelelwe ngemandla endleleni.”+
33 Kodvwa bafundzi bakhe batsi: “Kulendzawo lesiganga, singatitsatsaphi nje tinkhwa letingenela labantfu labanyenti kangaka?”+
34 Ngako Jesu watsi kubo: “Tingakhi tinkhwa leninato?” Bona batsi: “Sinaletingu-7 kanye netinhlanti letimbalwa.”
35 Ngemuva kwekutjela labantfu kutsi bahlale phansi,
36 watsatsa letinkhwa letingu-7 kanye naletinhlanti, futsi ngemuva kwekubonga, watihlephula, watinika bafundzi bakhe, bona batinika labantfu.+
37 Bonkhe badla besutsa, bafundzi babutsa kudla lobekusele, kwagcwala bobhasikidi labakhulu labangu-7.+
38 Bantfu labadla bekungemadvodza langu-4 000, kanye nebafati nebantfwana.
39 Watsi nasekabakhululile labantfu, wagibela esikebheni, waya esifundzeni saseMagadani.+
Imibhalo lengentansi
^ BaFarisi nalamanye emaJuda bebavame kugeza tandla tabo ngendlela lehambisana nemasiko abo.
^ Nobe “lotondza.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. Leligama lesiGriki lelitsi por·neiʹa lisebunyentini. Fundza Tinchazelo Temagama.
^ BaFarisi nalamanye emaJuda bebavame kugeza tandla tabo ngendlela lehambisana nemasiko abo.
^ Nobe “bazile kudla.”
