Ukutfola kumelula yini kulalela batali bakho ngaso sonkhe sikhatsi?— Ngaletinye tikhatsi kulukhuni kwenta njalo. Bewati yini kutsi Jesu bekalalela Jehova aphindze alalele nebatali bakhe?— Sibonelo sakhe singakusita kutsi ulalele batali bakho ngisho nome loko kungahle kungabi melula. Ase sifundze kabanti ngalendzaba.

Ngesikhatsi Jesu asengaketi emhlabeni, bekahlala ezulwini naBabe wakhe, longuJehova. Jesu bekaphindze abe nebatali lapha emhlabeni. Emabito abo bekuboJosefa naMariya. BoMariya naJosefa baba kanjani batali baJesu?—

Jehova watsatsa kuphila kwaJesu ezulwini wakufaka esiswini saMariya kuze Jesu atalwe emhlabeni aphindze aphile kuwo. Loku kwaba simangaliso! Jesu wakhula esiswini saMariya ngendlela lokwenteka ngayo kubo bonkhe bantfwana. Ngemuva kwetinyanga letingaba yimfica asesiswini saMariya, Jesu wase uyatalwa. Lena-ke ngiyo indlela Mariya kanye nendvodza yakhe Josefa lababa ngayo batali baJesu basemhlabeni.

Nakaneminyaka lengu-12 budzala, Jesu wenta lokutsite lokwakhombisa indlela lebekamtsandza ngayo Babe wakhe Jehova. Loko kwenteka ngesikhatsi Jesu nemndeni wakubo batsatsa luhambo loludze loluya eJerusalema kuze bayogubha liPhasika. Ngesikhatsi basendleleni lebuyela ekhaya, boJosefa naMariya abazange basambona Jesu. Bekakuphi Jesu ngaleso sikhatsi?—

BoJosefa naMariya babuyela emuva eJerusalema ngekushesha futsi bafuna Jesu yonkhe indzawo. Bebakhatsateke kakhulu ngobe bebasolo bangamtfoli. Ngemuva kwemalanga lamatsatfu, bamtfola asethempelini. Bekentani Jesu ngesikhatsi asethempelini?— Bekafundza ngaBabe wakhe Jehova. Bekamtsandza Jehova futsi afisa kufundza kutsi angamjabulisa njani. Ngisho nangesikhatsi asakhula waze waba yindvodza, Jesu bekahlale alalela Jehova. Jesu walalela nangesikhatsi kumetima kwenta njalo, futsi walalela ngisho nalapho kufanele ahlupheke. Jesu bekabalalela yini boJosefa naMariya?— LiBhayibheli litsi bekabalalela.

Yini longayifundza esibonelweni saJesu?— Kudzingeka ulalele batali bakho ngisho nome loko kungase kube lukhuni. Utimisele yini kukwenta loko?—