Leoatle le Shoeleng le ntse le psha ka sekhahla sa mithara selemo le selemo. Batho ba bang ba nahana hore leoatle leo le tla be le pshele ka ho feletseng ka selemo sa 2050. Ba boholong ba ntse ba batla litsela tsa ho rarolla bothata bona. Tsela e ’ngoe eo ba ntseng ba e nahana ke ho hloekisa metsi a Leoatleng le Lefubelu ka ho a ntša letsoai e le hore batho ba ka a sebelisa, ebe ba fetisetsa metsi ao a letsoai Leoatleng le Shoeleng. Batho ba bang ba nahana hore ho etsa sena ho tla senya lintho tse phelang Leoatleng le Shoeleng.

Phuputso e entsoeng ke k’hamphani e ’ngoe ea inshorense e bontšitse hore mokuli a le mong oa lefu la pelo ho ba bang le ba bang ba bararo o kena hangata sepetlele ka Letsatsi la Keresemese, ho feta ka nako leha e le efe ea selemo. K’hamphani eo e ile ea bontša hore khatello e khōlō ea maikutlo e bakoa ke ha ba malapa le metsoalle ba lebeletse ho rekeloa limpho tsa theko e holimo haholo.

Borasaense ba Brithani ba ile ba phatlalatsa hore khofu ea Iceland, eo ho neng ho hakanngoa hore e lilemo li 405, ha e le hantle e ne e le lilemo li 507, ha e tla shoa ka tšohanyetso ka 2006 ’me ke phoofolo e phetseng nako e telele ka ho fetisisa * ho tse tlalehiloeng. Khofu eo e ile ea shoa nakong eo bo-rasaense ba neng ba e hoamisitse ha ba e isa laboratoring ea bona.

Linaha tse mashome a mararo a metso e meraro tsa Latin America le Caribbean tse neng li le sebokeng se neng se tšoaretsoe Havana, Cuba, mathoasong a selemo sena, li phatlalalitse hore ke ‘linaha tsa khotso’ kaha li lumellane hore ha li sa tla hlola li rarolla liqabang tsa tsona ka ho loana. Har’a batho ba neng ba le teng, e ne e le Mongoli e Moholo oa Machaba a Kopaneng, e leng Ban Ki-moon.