RELANDI ambayo inaitwa “Kisiwa cha Zumaridi” ni inchi mbili: inchi kubwa ni Jamhuri ya Irelandi yenye kujitawala, na ndogo ni Irelandi ya Kaskazini, ambayo ni sehemu ya Uingereza.

Irelandi inaitwa Kisiwa cha Zumaridi kwa sababu ina maeneo mazuri ya mashambani yenye majani ya rangi ya kijani-kibichi kwa sababu mvua nyingi inanyesha katika kisiwa hicho. Maziwa na mito yenye kuvutia sana, sehemu za udongo karibu na bahari, na milima vinaifanya iwe inchi yenye kupendeza sana.

Watu wa Irelandi wamekwisha kupambana na matatizo mengi. Kwa mufano, watu fulani wanasema kwamba kuanzia mwaka wa 1845 hivi mupaka mwaka wa 1851, watu karibu milioni moja walikufa na njaa na magonjwa wakati ugonjwa unaoitwa kuvu ulishambulia mashamba ya viazi. Ili kuepuka kuishi katika umaskini mukubwa, watu wengi walihamia Australia, Uingereza, Kanada, na Amerika. Leo, Waamerika karibu milioni 35 wanakubali kwamba kizazi chao kilianzia Irelandi.

Wairelandi wanajulikana kuwa watu wachangamufu na wakaribishaji wageni. Wanapenda kujifurahisha kwa kutembea juu ya farasi na michezo ya watu wengi, kama vile, kriketi, kabumbu ya mabavu, ya miguu, na ya Kiselti (ambayo inafanana na kabumbu ya miguu). Lakini wanawake wanapenda muchezo unaoitwa camogie, ambao unafanana na kabumbu inayochezwa kwa muti.

 Watu wa Irelandi wanafurahia pia kuongea, na wanapenda muziki. Kuna dansi moja ya Irelandi ambayo inajulikana sana katika dunia yote. Wakati watu wanacheza dansi hiyo hawatikise sehemu ya juu ya mwili wao lakini wanatikisa-tikisa miguu yao kwa kufuata utaratibu fulani.

Mashahidi wa Yehova wamekuwa katika Irelandi kwa miaka zaidi ya mia moja. Kwa sasa, kuna Mashahidi zaidi ya 6 000 ambao wanaishi katika inchi hiyo na ambao wanaendelea kufundisha wengine Biblia.