¿ECHI bichíwali piri namuti kitra? Jaré náriwami we natéami kitra japi nárika noká echi pagótami. Pe mujé binói ma a nárika ijósiré isini kaachi japi riká jepunani:

• ¿Ata we natéami ju Onorúami kitra?

• ¿A suwibámiré echi weli nakówami alí risoa níliwami?

• ¿Chí ikiwá japalí ta suwí?

• ¿A nirú bilé buyelíami echi suwíami kitra?

• ¿Chútariká raʼíchisaré Onorúami kiti ta kipúrami niba?

• ¿Chúriká ta riwiboa echi kaníliwami?

¿Mujé kumi mi áamalé kiti mi ruyeba jepuná náriwami? A nirú wiká pagótami alí pali japi a mi ruyea ruyá aní jepuná. We nalí, wiká tasi katúwika noká. Jarecho ko, bachá nijí ruyelíami alí mayewa japi a bichíwali ju, we nalí tasi me wiʼlimi isimí japalí ma ke néwalelíwa alí jéaniwá japi ma ke aʼlá ju alí jarecho ruyelíami aniwá.

A be nirú bilé oselí japi ruyé né aʼlá machiná niraa alí né aʼlá bichíwali niraa. Jesús ko jéanili raʼíchika Onorúami: “Mujé Raʼíchala [ko] né Bichíwali ju” (Juan 17:17). Jipi ko machiwá echi Onorúami Raʼicháala japi riká echi Biblia. Jipi ko ma ineba echi bichíwali japi aní echi Biblia jepuná náriwami kitra.

¿CHÚSIÁ NIRÚ JEPUNÁ NÁRIWAMI? Ata piré kawichí japoná nirú wiká namuti chati alí japoná ke nirú najórowami. Wiká bichíwiliami bineri kiti nirú risoa níliwami kiti echi riká nakí Onorúami.

JAPI ECHI BIBLIA BINERI. Japalí chati namuti ikí ke siné Onorúami iyiri ju. Job 34:10 aní: “¡Echi Onorúami né bichíwali ko ke siné isimí japi chati ju, alí echi Suwaba Omérami ke tasi siné cho isimí japi ke aʼlá ju!”. Echi Onorúami we nakíami isiima namuti we baʼóami echi pagótami kitra, kiti bela Jesús ko binérili kiti tama jéaniká: “Tamujé Onorá mapu mi echoná ripá rewegachi atí [...]. Né aʼlá nulá Mujé jenaʼí wichimóbachi, né Warubera niraa. Suwaba aʼlá olá mapurigá Mujé nakí jenaʼí wichimóbachi, achigórigá mapurigá mi olá echoná ripá rewegachi” (Mateo 6:9, 10). A bichíwali ju kiti ta we nakiwáami ju Onorúami kitra kiti echi ko we risoa nílika isiili nijía japi echi nakí (Juan 3:16).

Ayénachó leeri Génesis 1:26-28; Santiago 1:13, alí 1 Pedro 5:6, 7.

¿CHÚSIÁ NIRÚ JEPUNÁ NÁRIWAMI? Echoná nakolíwachi suwí wikabé pagótami. Alí sinéami ta risoa nili.

JAPI ECHI BIBLIA BINERI. Onorúami ko anili kiti nirúlima kilii níliwami omáana Wichimóbachi. Japalí nulasa kipi Gobierno rewegachi nirúami, echi pagótami ma ke che “binema echi nakówami”, ayénachó “echi espádawala ko niwámalé arara chupala” (Isaías 2:4). Ayénachó, Onorúami ko suwábima echi risoa níliwami alí echi ke najórowami. Echi Biblia ko aní: “Riosi aʼlá ku kaníratama aboni, mapurigá ma ke tasi oʼmóniga narákama. Echarí jonsa echi pagótami ma ke tasi suwimea, nibiré auché narákama, nibiré auché risoa animea, nibiré auché okoma; mapu kiti suwaba mapu ikí chabénara nirúari ko, [alí echi ke najórowami] ma káraga simárari” (Apocalipsis 21:3, 4).

Ayénachó leeri Salmo 37:10, 11; 46:9, alí Miqueas 4:1-4.

¿CHÚSIÁ NIRÚ JEPUNÁ NÁRIWAMI? Né nokí suwaba echi bichíwiliami a bineri kiti bilé namuti rikamti japi pachánala ripokálachi a bijí bité japalí suwisaa echi pagótami. A nirú wiká japi jéaniká noká japi echi suwíami a omero risoa olayá echi japi piré, alí japi Onorúami rikiri echi cha nokáami waʼlú rajáachi awaka sinibimti.

JAPI ECHI BIBLIA BINERI. Japalí ta suwí, ma ta riwé pirea. Eclesiastés 9:5 aní japi “echi suwíami ko ke bilé iyiri machí”. Tasi omero machiyá, néwanilia, ke cho namuti nokayá, alí ke cho omero risoa olayá japi a piré, ke cho kuʼiria (Salmo 146:3, 4).

Ayénachó leeri Génesis 3:19 alí Eclesiastés 9:6, 10.

¿CHÚSIÁ NIRÚ JEPUNÁ NÁRIWAMI? Sinéami ta kanílika pirénali echi pagótami yúa japi ta nakí. Kiti bela ta checho a ku inénali echi pagótami japi ma suwili alí japi ta we nakiyé.

JAPI ECHI BIBLIA BINERI. Nokí sinéami echi pagótami japi ma suwili a checho a ku pirélima. Jesús anili kiti “sinéami echi jaré suwíami tamí námama raʼíchachi [alí] buyama” (Juan 5:28, 29). Echi pagótami japi ku jawásitami nima jenaʼí Wichimóbachi pirélima echoná alí riwimea japalí we baʼóami nilísiachi, echi riká japi riká anili Onorúami né chokichí jonsa. Echi riká ju, japalí echi Wichimóbachi we baʼóami niisa, echi pagótami japi a nijéwami nima Onorúami we kanílika pirélima sinibí ke bilé nayuka. Echi Biblia aní: “Echi japi né aʼlá wachía éena olama echi wichimoba, alí pirélima sinibí echoná” (Salmo 37:29).

Ayénachó leeri Job 14:14, 15; Lucas 7:11-17, alí Hechos 24:15.

¿CHÚSIÁ NIRÚ JEPUNÁ NÁRIWAMI? Né nokí suwaba echi bichíwiliami echi pagótami ko raʼichi kipi onorúamiwala. We nalí, wiká ko a mi mayea nili japi ke kipuliwa japalí raʼichi kipi onorúamiwala.

JAPI ECHI BIBLIA BINERI. Jesús ko anili japi ke tasi ta raʼichásaré bilepi raʼíchali wisabé niraa japalí ta raʼicha Onorúami yúa. Jériká anili: “Japalí mi raʼicha Riosi yúa, ke tasi wisabé raʼicha birepi raʼíchali niraa” (Mateo 6:7). Ata nakiyáaká kiti ta kipúrami niba Onorúami kitra, a ta raʼíchisaré japi riká echi kalé. Kiti bela, a ta binésaré chu iyiri ju japi echi nakí alí né echi riká raʼíchisaré japi riká echi kalé. “Echarí Riosi aʼlá kipu[sú] mapurigá ta tániga raʼicha”, aní 1 Juan 5:14.

Ayénachó leeri Salmo 65:2; Juan 14:6, 14, alí 1 Juan 3:22.

¿CHÚSIÁ NIRÚ JEPUNÁ NÁRIWAMI? Wiká pagótami né jiwérili noká kiti olama wiká winomí alí kiti we machirúami ka níliwa alí semati níliwa, echi riká noká kiti mayé japi kaníliami nima. We be nalí, ke omero kanilia.

JAPI ECHI BIBLIA BINERI. Jesús ko anili chúriká riwiboa echi kaníliwami japalí jéanili: “We kaníliami ju echi japi we aʼlá machí ko japi a kanílitisaré Onorúami” (Mateo 5:3, Traducción del Nuevo Mundo, [NM]). Japiré ta né bichíwali kaníliami nínalaká, a ta machisáré echi bichíwali Onorúami kitra alí japi echi nakí tamujé kitra. Jepuná bichíwali ko echoná Bíbliachi uchúi, alí a machiwáaká echi Biblia a nikúuroma machiria piri ju we natéami alí piri ke. Japalí ta noká japi aní echi Biblia, we ta kaníliami ju (Lucas 11:28).

Ayénachó leeri Proverbios 3:5, 6, 13-18 alí 1 Timoteo 6:9, 10.

 Ma ta ineli pe okuaa japi bineri echi Biblia jepuná usani náriwami kitra. ¿Ami che pe a wabé machinali? Japiré mujé nísaká ‘japi we aʼlá machí japi mi kanílitisaré Onorúami’, ami che pe wabé binénala nílimalé. Ami nárimiréma chúsiá riwé Onorúami japi nirúlima namuti chati alí risoa níliwami a ta né bichíwali we natéami niraa inéliwiré echi kitra. Ayénachó machinálimiré chúriká omero aʼlá kanílika bitea jarecho yúa. Echi Biblia ko machiná niraa ruyé jepuná alí jarecho náriwami.

We nalí, wiká pagótami tasi néenali echi Biblia. Mayé japi bilé oselí waʼlú ju alí jilírami ju námilia. ¿Ami kanílisa nili narea nikúurowami kiti mi machimea japi aní echi Biblia? Echi testigo Jeobá olá okuá namuti we natéami kiti mi kuʼíroma.

Echi bachá ko ju echi oselí Raʼíchali kalabé japi Onorúami nawesa, niwárami nili kiti kuʼíroma echi pagótami, ayénachó echi japi sinibí nóchami ju, kiti binema japi aní echi Biblia echi náriwami we natéami kitra. Echi okuaná ko ju bilé binelíwami echi Biblia kitra japi ke bilé nipaliwa alí echoná mujé bitélachi. Ami nakiyáaká, bilé testigo Jeobá japi we aʼlá machíami ju bineria echi Biblia kitra, a siméalé we kanílika japoná mi bité, kiti mi binema pe teili echi Biblia kitra bilé rawé tarali niraa. Wiká pagótami echi riká kuʼíritami ju, alí jipi ko kanílika noká kiti ma riwali echi japi bichíwali ju.

Mujé ayénachó a oméroma binea japi wabé natéami ju echi bichíwali japi aní echi Biblia. Jepuná ko nikúuroma kiti ta ke ékitami niba, ali kiti ta ke majaba echi ikaléwami japi bineri echi bichíwiliami japi ke bichíwali ju, kiti ta aliwa echi buyelíami alí kaníliwami. Jesús ko anili: “Machimea echi bichíwali, alí echi bichíwali botonama” (Juan 8:32, NM).