Ani ochériki bilé pueblo Acul riwéami, japi sierra ju echomí Guatemala. Nijé alí nijé téemala raʼíchami ju ixiles, jaré pagótami japi sili echi mayas jonsa. Ani bineki raʼicha ixil alí español. Ayénachó ni ochériki japalí niruili nakówami echoná país japi rojorali 36 bamíali. Echalí suwili wiká ixiles.

Japalí ni cuatro bamibi alí nijé bachilá kichao olali, echi ko riʼeya asali bilé granada yúa japi ratali. Echi ko mukuli alí nijé ko busukachi ripili. Echalí jonsa, ani simiki bilé escuela japoná biné echi busukachi echomí ciudad Guatemala alí ni echoná bineki leeria braille niraa. Ke ni siné machiki chúsiá echi maestros ke tamí riwé japi ni jarecho kuuchi yúa napawima, alí echi compañeros ke tamí muliwie. Sinibí ni bineli atiyé, ani we inili japi sibama echi okuá mechá jiti ni asimea nijé iyela yúa, jiti we tamí galei. Nalí echi ko mukuli japalí ni makoy bamibi. We ni omona nili, jiti echi bi ke japi we tamí galei.

Japalí ni 11 bamibi, ani checho ku simiki japoná ni ochériki alí ni yúa bitéliki japi nijé rejimala ju nasípasi alí echi téemala. Echi ko tamí iyali japi ni newalé, nalí ke bilé omérili tamí iʼwiria jiti ke machili japi ni inili. Isini kaachi weli ni sinaka raʼichi Onorúami jéaniká: “¿Chúsiá mukuli nijé iyela? ¿Chúsiá ni busukachi ripili?”. Wiká pagótami tamí ané japi Onorúami echi riká nakili. Jiti la ni mayeli japi Onorúami we cha isíami ju. Ani oméralaká, ani binoy miʼlimeli.

Jiti ni busukachi ripili, ke ni aʼlá omeri tibúa binoy niraa. Jiti la, japalí ni taa towí nili, ani tábitami nili wisabé niraa. Ke ni bilé ruyeki japi ni ikili jiti ni mayé japi ke bilé tamí galé. Echi pagótami ke me raʼichie tamí yúa. We ni omona nilie alí ke ni kanilie napawía jarecho yúa jiti ni we majae.

Japalí ni 13 bamibi, bilé niwíkami testigo Jeobá tamí raʼíchiki echi Biblia jitra echoná escuela japalí ti machíniki recreo. Bilé maestra aneli japi tamí yúa raʼichama jiti echi ko tamí natimali. Echi testigos tamí aneli japi echoná Biblia aní japi echi busukachi checho ku inema alí japi ma suwili a ku pirélima (Isaías 35:5; Juan 5:28, 29, TNM). We ni kanilie japi echi tamí bineri, nalí jiti ni ke siné yúa raʼichie jarecho, ke ni namú aniyé. Tákoré we ni riwélami nili, echi ko we kilí nili tamí yúa alí we simárika nokayé, alí ke riwé tamí bineria japi aní echi Biblia. Echi ko 10 kilómetros wichika simiyé ripá rabó jiti sibama japoná ni bité.

Japalí nijé bachilá tamí aneki chúriká ke echi hermanos, anili japi ke winomíwami ju nalí we simárika simibi. Néwariké japi tamí galei jiti tamí chiliweli jaré namuti. We ni kanilie jiti ni machiyé japi Onorúami nijéwami bi echi riká noká iʼwiria jarecho.

Ani biné echi Biblia néeka echi oselí braille niraa. Tákoré ani namie japi ni biné, nalí we ni jilí nirali bichiwia jaré namuti japi aní echoná Biblia. Japi riká, we ni jilí nirali bichiwia japi Onorúami tamí galé alí japi jarecho tamí galé japi riká echi. Ani bineki chúsiá riwé japi ikimea chati namuti, nalí ani we jilí niraki bichiwia japi Onorúami bilé onolá we galéami ju. *

Kilipi niraa, japalí ni aminabi bineki japi aní echi Biblia, ma ni ke echi riká natie jiti ni bineki japi Onorúami ayénachó omona japalí ti risoa nili. Echi Biblia jériká aní: “Ani ritiwá alí ni kipú japi nijé puéblowala we risoa nili [...]. We ni aʼlá machí chu nilia muchuwi” (Éxodo 3:7). Japalí ni machiki japi Jeobá we galéami ju, ani aniki japi echi bi nijéwima alí bamíali 1998 ani pakoki japi riká testigo Jeobá.

Japalí ma simírili bilé bamíali japalí ni pakoki, ani simiki bilé curso echomí Escuintla japoná binériwa japi busukachi ju. Bilé anciano a machili japi ni we jilí nirali simiyá echi napawíliwachi echomí Acul, jiti ni simiri ripá rabó japoná simárili echi niwíkami tamí binérisia. Echi anciano aneli bilé niwíkami achi ni omérima echi yúa bitea jiti tamí iʼwírima simiyá echoná napawíliwachi. Jipi chéami echi niwíkami a bijí tamí aʼlá tibú japi riká echi téemala.

Wiká jarecho namuti si nokali echi hermanos alí echi riká néwariwélitili japi tamí we galé. Ani we aʼlá machí japi echi testigo Jeobá a ne bichíwali cristianos ju (Juan 13:34, 35).

Jipi ko ni ma ke nili japi ni ke natéami ju alí ni we kanili jiti ni machí japi Onorúami isima pe aminana. Alí ni ma ke me nata japi ni busukachi ju, nalí ni iʼwiri jarecho jiti binema echi Biblia. Nijé ko anciano ju echoná congregación alí ni nawesa jaréanachó congregaciones. We ni matétara iyá Jeobá jiti ni a omero nawesia echoná waʼlú napawíliwachi japoná napawí wiká miles pagótami.

Echi bamíali 2010, ani simiki echi Escuela de Entrenamiento Ministerial (jipi ko aneliwa Escuela japi biné echi Nawésami Raʼíchali Kalabé) echomí El Salvador. Na escuela tamí iʼwírili jiti ni we aʼlá iʼwírima echi hermanos, alí ayénachó níliki japi Jeobá we tamí natéami niraa iné alí tamí galé, jiti echi isimí japi ta oméripo nokayá japi echi nakí.

Jesucristo jéanili: “We kaníliami ju japi jarecho pagótami kuʼiro” (Hechos 20:35, TNM). Ani natie japi ni ke oméroma iʼwiria jarecho, nalí jipi a ni we kaníliami ju jiti ni iʼwiri jarecho.