NGÚERUÜ̃ 35

Nhuãcü Tupanamaã tchaãmücü?

Wüi ngetücü Yeremi naéga poraãcü nangetchaü̃ yerü nanatü rü norü ĩpatacü̃ãꞌgüna niũ. Rü yemagagu nüü̃ nacuaꞌü̃tchi na nacaꞌ nameẽtchi na Tupanamaã naãmücü. Nüma rü nhanagürü: “Wüi ga tchutaü̃gu tchayumüẽ. Rü Yeuwana tchaca na tchorü papa nataeguü̃caꞌ.”

Yeremi poraãcü narümaãtchi rü Tupanaarü Ore naugütae. Rü yeguma nayangãü̃gu i Salmo 10:14 ãũrima nataãẽ. Ngẽma wertchicuru nüü̃ niu i nhaã: “Rü yíema turaee rü curü ngü̃ẽẽcaꞌ niĩ itadaugüü̃, erü cuma niĩ i tümaarü poü̃ruü̃ quiĩü̃. Rü cuma niĩ i tüü̃ curüngü̃ẽẽü̃ ya yíema tacutagü.” Yeremi nhanagürü: “Tchaucaꞌ niĩ na Yeuwa tchoü̃ naweꞌrüü̃ na tchorü ngü̃ẽẽcü rü tchaunatü niĩ. Rü Yeuwa guü̃arü yeera nameẽtchi niĩ.”

WOO cumaã nangupetü i Yeremirüü̃ urü tama, Yeuwa rü cumaã naãmücütchaü̃ rü ngẽmatchiga Tupanaarü Ore i Tiago 4:8wa nhanagürü: “Tupanana pengaicamagü! Rü nüma rü tá ta pena nangaicama.” Woo tama Yeuwaü̃ cudau, nüma rü cumaã naãmücütchaü̃.

Na Yeuwamaã cuãmücüü̃caꞌ cunawaꞌeü̃ na cugü cuporaẽẽ. Wüi cuaruü̃: ngẽguma wüi putüra natotchaü̃gu, nangẽma narüüü̃caꞌ rü niyatchigüü̃caꞌ cunawaꞌe na cuyamegü i ngẽma putüra. Nhamarüü̃ niĩ na Yeuwamaã cuamücüü̃caꞌ. Nhuãcü yeeratchigü Yeuwamaã cuamücü?

Tupanaarü Orecaꞌ cunguꞌ

Na tare duü̃ü̃gü naãmücügüü̃caꞌ name na nügü nideagü rü nügüü̃ naĩnüẽgü. Rü ta na Tupanamaã iãmücügüü̃caꞌ name niĩ na norü Ore i ümatüü̃ iugütaegü rü ngemaãcü nüü̃ iĩnüe. — Salmo 1:2,  3.

Bemana tama cuü̃ name na cunguü̃. Muü̃ma i ngetücügüü̃ yeera name i televisão urü videogame. Notürü, tchi Tupanamaã cuãmücütchaü̃ cunawaꞌe na Tupanaarü Ore cuugütae na nüü̃ cuĩnüü̃caꞌ.

Taü̃́ cuoegaãẽ, natautcha niĩ na Tupanaarü Ore cuugütaetchaü̃. Ngemacaꞌ cunawaꞌe na nüü̃ cuuneta i wüi i ngora na Tupanaarü Ore cuugütaecaꞌ. Wüie ya pacü ya Laís ngĩgürügü: “Tchawüü̃ taꞌacü tchanawaꞌe tchaüü̃. Wüitchigü i paꞌmama wüi capíturu i Tupanaarü Orewa tchaugütae.” Maria ya 15 iĩü̃ i tümaarü taunecü rü nhatarügü:“Wüitchigü i tchutaü̃gu Tupanaarü Orearü üye tchaugütae i tchapeü̃ü̃pa.”

Na nüü̃ cuunetaü̃caꞌ i ngora rü nhuãcü Tupanaarü Orecaꞌ cunguꞌ tá, nüü̃ nadau i  quadru i 292 átüwa. Rü yicama núma nhatügu nawü i ngora na 30 minutoguyani Tupanaarü Orecaꞌ cunguꞌ.

․․․․․

Woo marü nüü̃ cuunetaü̃ i wüi i ngora na Tupanaarü Ore cuugütaecaꞌ bemana nüü̃ cucuaꞌü̃tchi tá na nhuguãcü tama natautcha Tupanaarü Ore ugütae rü Yetchereérüü̃ ya 11 iĩü̃ norü taunecü nagu curüĩnü. Nüma rü nhanagürü: “Nümaü̃ i Tupanaarü Orearü üye tama natautcha niĩ rü ngẽmagagu tama tchaugütaetchaü̃etcha.” Tchi narüü̃ curüĩnü, taü̃́ nüü̃ curütchau. Ngẽguma Tupanaarü Orecaꞌ cunguꞌgu guü̃guma nüna cucuaꞌãtchi na ngẽma ngora niĩ na Yeuwa ya Tupana ya cumücüü̃ cüĩnüü̃caꞌ. Ngẽguma cugü cuporaẽẽ na Tupanaarü Orecaꞌ cunguꞌü̃caꞌ yeera cutaãẽ tá.

Nayumüẽ

Yumüẽwa Tupanamaã tideagü rü ngẽma rü wüi ãmare niĩ. Rü Tupana cuü̃ naĩnütchaü̃ nüetama i ngoragu, woo paꞌmamagu urü tchutaü̃gu. Rü nüü̃ tacuaꞌgü i ngẽma erü Tupanarü Orewa i Piripucü̃ãꞌ 4:6wa nhanagürü: “Rü nacaꞌ ípeca i norü ngü̃ẽẽ i ngẽguma taꞌacü peü̃́ gutchagu, rü moẽ nüna peãgü! Rü ngẽmaãcü Tupanamaã nüü̃ peiu i guü̃ma i ngẽma nüna nacaꞌ pecagütchaü̃ü̃!”— Piripucü̃ãꞌ 4:6.

Ngegumarüü̃ ngẽma wertchicuru nüü̃ niu, name niĩ na Tupanamaã quidea i guü̃ma i curü ĩnügü. Cuaꞌruü̃ namaã quidea i curü gutchaãẽgütchiga urü curü taãẽtchiga rü ta moẽ nüna cuã. Cuaꞌruü̃: ngẽguma wüi cumücü meü̃ cumaã naügu, moẽ nüna cuã, nhamarüü̃ Yeuwa ya cumücüü̃tchi na moẽ cunaã ta. — Salmo 106:1.

Núma nhatügu nawü na tüꞌcüü̃ Yeuwana moẽ cunaãtchaü̃.

․․․․․

Aicuma niĩ na nhuguãcü tamuü̃e rü taoẽgaãẽ rü ngẽmatchiga Salmo 55:22wa nhanagürü: “Notürü i cuma, Pa Tchamücü rü Cori ya Tupanameꞌẽwa nangeꞌ i curü gutchaü̃gü! Rü nüma rü tá cuü̃ naporaẽẽ. Rü tagutáma tchieü̃gu nananguẽẽ ya yimá yatü ya naga ĩnücü.”

Núma nhatügu nawü i curü oegaãẽ na natchiga cuyumüẽ tá.

․․․․․

Taꞌacü cumaã nangupetüü̃wa nüü̃ nacuáü̃tchi

Nangẽma to nacüma na Tupanamaã iãmücügüü̃. Salmo 34:8wa ga Dawí naümatüü̃ i nhaã: “Rü nüü̃ piüꞌ na ngẽmaãcü nüü̃ pecuáü̃caꞌ na nhuãcü namecümaü̃ ya Cori ya Tupana!” Wüi poraãcü ga tchiẽü̃ ga Dawímaã nangupetü. Rü yemawena nüma rü naümatüü̃ i ngẽma Salmo 34. Dawí ga ãẽꞌgacü ga Chaúna ninhá yerü nüma rü namátchaü̃. Rü yemagagu ga norü uwanügüarü ĩãnewa naũ rü na tama yamáü̃caꞌ ga Dawí nügü nadaiẽẽü̃. — 1 Samuel 21:10-15.

Yeguma yema Dawímaã nangupetügu nüma rü tama nagu narüĩnü na nügütama ínanguutchiẽẽ. Notürü naãẽwa nüü̃ nacuáü̃tchi na Yeuwa ga niĩ ga nüü̃ ínanguutchiẽẽ nawa ga tchiẽü̃. Rü yemacaꞌ nanaümatüü̃ i nhaã: “Rü Cori ya Tupanana tchaca rü nüma rü tchoü̃ nangãü̃ga, rü tchoü̃ ínanguutchiẽẽ nawa i guü̃ma i tchorü oégaãẽgü.” (Salmo 34:4) Dawí nügüãẽwatama nüü̃ nacuáü̃tchi ga yema. Rü yemagagu togüü̃ nayaucuꞌẽ na ‘nüü̃ naü na ngẽmaãcü nüü̃ nacuaꞌgüü̃caꞌ na nhuãcü namecümaü̃ ya Cori ya Tupana.’

Nüna cucuaꞌãtchi i wüi nguneü̃ na Yeuwa cuü̃ narüngü̃ẽẽ? Tchi ngẽma marü cumaã nangupetü núma nhaãtügu nawü i ngẽma. Wüi ucuꞌẽ: nagu narüĩnü na nhuãcü Yeuwa marü cuü̃ narüngü̃ẽẽ i wüitchigü i nguneü̃gu.

․․․․․

Bemana cunatü rü cue Tupanaarü Oretchiga cuü̃ tanguꞌẽẽ. Tchi ngẽma cumaã nangupetü nameẽtchi niĩ. Notürü cunawaꞌe na cumatama Tupanamaã cuãmücü rü nhaã ngúeruü̃ i nhaã poperawa cuü̃ narüngü̃ẽẽ tá na ngẽma cunaüü̃caꞌ. Yeuwa cuü̃ narüngü̃ẽẽ tá ega cugü naporaẽẽgu. Tupanaarü Ore nhanagürü: “Tupanana nacaꞌ peca! rü nüma tá pena nanaã. Rü Tupanaü̃tagu nacaꞌ pedau rü tá nüü̃ ipeyangau.” — Mateu 7:7.

YEERA NGẼMATCHIGA NAUGÜTAE I NÜĨRA I POPERA, NGÚERUÜ̃ 38 RÜ 39WA

TO NGÚERUÜ̃WA

Na cucaꞌ nagutcha niĩ togümaã Tupanatchiga quideꞌa? Nawa nanguꞌẽẽ na nhuãcü curü õtchiga quideꞌa.

WETCHICURU I NATCHIGA

“Rü ngẽma duü̃ü̃gü tá nüü̃́ nangẽma i maü̃ i taguma gúü̃ ega cuü̃ nacuaꞌgügu na cuicatama Tupana na quiĩü̃.” — Juã́ũ 17:3.

UCUꞌẼ

Wüitchigü i nguneü̃gu naugütae i ãgümücü naátügü i Tupanaarü Orewa rü wigütaa i wüi taunecügu rü marü guü̃ma cuugütae tá.

NA MARÜ NÜÜ̃ CUCUAꞌ . . .?

Cuugütae i nhaã popera rü naga cuĩnü i norü ucuꞌẽgü ngẽma rü naweꞌ na Yeuwa cumaã naãmücütchaü̃. — Juã́ũ 6:44.

TCHANAÜ TÁ!

Na yeera tchayonieü̃ca ngẽguma Tupanaarü Orecaꞌ tchanguꞌgu tchanaü tá i nhaã ․․․․․

Na guü̃guma tchayumüẽü̃caꞌ tchanaü tá i nhaã ․․․․․

Tchaunatü rü tchauecaꞌ tchacatchaü̃ i nhaã ․․․․․

NHUÃCÜ CUNANGÃÜ̃?

● Nhuãcü cugü cunangútchaü̃ẽẽ na Tupanaarü Orecaꞌ cunguꞌü̃caꞌ?

● Tüꞌcüü̃ ya Yeuwa tórü yumüẽgüü̃ naĩnütchaü̃ woo tipecaduãgüü̃?

● Nhuãcü cugü naporaẽẽ na meã cuyumüẽü̃caꞌ?

[Yadeetchiü̃]

Eve nhatarügü:Tchapagu rü ngeĩcaꞌ tchiuetcha tchorü yumüēwa. Notürü nhu’ma ngẽguma tchayumüēgu, natchiga tchiu i taꞌacü tchamaã nangupetüū i wüitchigu i nguneūgu. Rü ngẽma tchoū rüngūēē na tama ngeĩcaꞌ tchiuetcha.’

[Quadru/Natchicünaʼã]

Meã Tupanaarü Orecaꞌ cunguꞌ

  1. Nüü̃ nauneta i wüi natchiga na Tupanaarü Orewa cuugütaetchaü̃. Tupanana naca i cuaꞌ na nüü̃ cucuaꞌü̃caꞌ i norü Ore.

2. Meã naugütae i natchiga. Taü̃ paa naugütae rü meã nagu narüĩnü. Ngẽguma cuugütaegu yema duü̃ü̃rüü̃ narüĩnü rü nadau rü nüü̃ napa rü nügüü̃ nanatchiẽẽ.

3. Cuugütaewena natchiga nagu narüĩnü. Cugüna naca i nhaã:

● Tüꞌcüü̃ ga Yeuwa ngẽmatchiga niu ga Norü Ore i ümatüü̃wa?

● Ngẽma Orewa ngeü̃rüü̃ i meü̃ i cuaꞌruü̃ü̃ tidaugü? Rü ngeü̃rüü̃ i tchiẽü̃ i cuaꞌruü̃ü̃ tama name tidaugü?

● Taꞌacü ngẽma wertchicurugü tchoü̃ nanguꞌẽẽ i tchorü maü̃caꞌ?

● Taꞌacü ngẽma wertchicurugü tchoü̃ nanguꞌẽẽ i Yeuwatchiga rü natchiga ga taꞌacü naüü̃ ga nüma?

4. Nayumüẽ. Curü yumüẽwa Yeuwamaã nidea natchiga i taꞌacü norü Orewa nüü̃ cucuaꞌ rü na nhuãcü norü ucuꞌẽgüga cuĩnütchaü̃ i curü maü̃wa. Guü̃gutáma Yeuwana moẽ cunaã erü nüma cuna naã i Norü Ore – wüi meẽtchiü̃ i ãmare!

[Natchicünaʼã]

“Rü ngẽma curü ore rü nhama wüi i omürüü̃ niĩ i tchauꞌcaꞌ rü tchoü̃ nibáimaü̃.” — Salmo 119:105.

[Quadru/Natchicünaʼã]

Ngẽma na Narümemaẽcaꞌ Ĩra Nadau

Na cungearü i tempo na cuyumüẽ urü Tupanaarü orecaꞌ cunguꞌü̃caꞌ? Bemana erü to i ngemaü̃güü̃caꞌ ĩra cudau.

Naü i nhaã: Nayau i wüi deapaü̃ rü nanecümaã naüãcu. Rü ngẽmawena inanaü i nutagü i taü̃. Taucürüwa, cüna?

Nhuꞌma rü nagüane i nanecü rü deapaü̃ ngẽma nutagü i taü̃maã naũãcü. Rü ngẽmawena inanaü i nanecü. Nhuꞌmawina guü̃ma i nutagü deapaü̃wa nangẽma. Erü nüíraü̃ i nutagü cuma rü inanaü.

Taꞌacü nawa nüü̃ icuaꞌgüü̃? Tupanaarü Ore nhanagürü: ‘Meã penangugüü̃ i taꞌacü niĩ i aicuma meü̃ i Tupanapeꞌewa na penaüü̃caꞌ i ngẽma.’ (Piripucü̃ãꞌ1:10) Ngẽma nutagü rü nhama i taꞌacü Tupanacaꞌ cunaüü̃rüü̃ niĩ. Rü ngẽma nanecü rü nhama i to ngẽmaü̃gürüü̃. Ega ngẽma Tupanaarü ucuꞌẽga cuĩnügu rü Tupanacaꞌra cudau, nüü̃ cucuáü̃tchi tá na cungẽmaü̃ i tempo na cuĩnücawaꞌe ta rü televisão cudau rü curü amücügümaã curüãũ!

[Natchicünaʼã]

Tupanamaã iamücügüü̃ nhama rü wüi putürarüü̃ niĩ. Nanawaꞌe na meã nüna idaugü.