Ngeü̃rüü̃ i aicuma? Muü̃ma i caꞌgütchiga duü̃ü̃gü marü nügüna ügüü̃. Beꞌmana marü cugüna cucaꞌ:

• Tupanaãü̃ cutchuꞌuü̃?

• Yaguꞌü̃ ta wüi i nguneü̃gu i guera rü gutchaü̃gü?

• Taꞌacü yuwena ngupetüü̃?

• Taꞌacü nayaugüü̃ ta i ngema yuegüü̃?

• Taꞌacü tchaüü̃ na Tupana tchorü yumuꞌẽü̃ nainüü̃caꞌ?

• Nhuãcü taãẽü̃ tchingau?

Ngeta na ngaü̃ãü̃ i ngema caꞌgü? Rü tchi guü̃ma i poperagu nacaꞌ cudagu rü guü̃ma i poperagütchi toãcü nanangaü̃ i ngema caꞌgü. Nangema i poperagü wegu cüraü̃ ngueꞌẽẽwa, notürü ta düwa tauwama namegü, erü marü na tau i ngüꞌẽẽruü̃ i ngema poperagüwa.

Notürü nangema i wüi popera yeeraãcüü̃tchi nüü̃ a õü̃. Ngema poperawa rü nangema i aicuma. Ngetchutchu ya Cristu rü norü yumuꞌẽwa Tupanamaã nhaü̃ niꞌu: ‘Curü ore rü aicuma niꞌĩ.’ (Juã́ũ 17:⁠17) Nhuma rü ngema Ore rü Tupanaarü Oreãcü nüü̃ tacuaꞌgü. Nhaã i popera iraũatüwa rü Tupanaarü Ore tautchaãcü nanangaü̃ i caꞌgü i dauguãma. Rü ngemacaꞌ ta nüü̃ cucuaꞌ na tama womüẽẽtchi.

TÜꞌCÜÜ̃ NGEMAÃCÜ CUNA TACAꞌGÜ:

Nhaã i Naanewa rü nangema i duü̃ü̃gü i nüü̃ meü̃ na duẽꞌẽgümaã tchieü̃ naü rü tama wegugüü̃ üü̃. Muü̃ma i yaõgüü̃ nüü̃ iꞌugu a gutchaü̃gü rü Tupanaarü ngutchaü̃ niꞌĩ.

TUPANAARÜ ORE RÜ NHAÜ̃ NIꞌU:

Tchieü̃ rü tama Tupanawa ne naꞌũ. ‘Rü tauü̃ i nagu perüĩnüeü̃ ya yima Tupana ya guãetüwa ngemacü rü tchieü̃ naüü̃ rüeꞌna inatüü̃ i ngeguma teꞌeü̃ iyanaweꞌãtchieẽgu!’, nhanagürü Jó 34:⁠10. Tupana rü guü̃rüü̃ naü na norü ngutchaü̃ yanguꞌẽẽü̃caꞌ erü guema ya duẽꞌẽgüü̃ nangetchaü̃. Rü ngemacaꞌ ya Ngetchutchu rü nhaãcü tüü̃ nayumuꞌẽẽ: ‘Pa Tonatü ya dauü̃gucü, . . . Rü numa naꞌũ na torü ãẽꞌgacü cuiꞌĩü̃caꞌ! Rü tanawae i curü ngutchaü̃ na naügüü̃ i duü̃ü̃gü i nhama i Naanewa ngegumarüü̃ i dauü̃guü̃ i naanewa na curü ngutchaü̃ inaügüü̃rüü̃.’ (Mateu 6:⁠9, 10) Aũrima Tupanaãü̃ tatchuꞌu rü ngemacaꞌ guürüü̃ naü na norü ngutchaü̃ i nucümatchire naüegaü̃ yanguꞌẽẽü̃caꞌ. (Juã́ũ 3:⁠16)

Nüü̃ ta inadaumatü Gênesis 1:⁠26-28; Tiagu 1:⁠13 rü 1 Pedru 5:⁠6, 7.

TÜꞌCÜÜ̃ NGEMAÃCÜ CUNA TACAꞌGÜ:

Nangematama i muü̃tchiü̃ i duü̃ü̃gü i gueragu yuegüü̃. Gutchaü̃gü rü marü guẽü̃ nangupetü.

TUPANAARÜ ORE RÜ NHAÜ̃ NIꞌU:

Tupana nüü̃ iꞌugu rü nhaã i Naanewa ta maꞌẽü̃ rü duü̃ü̃gü i meã nügümaã maꞌẽü̃ ta niꞌĩ. ‘Rü [duü̃ü̃gü] tauü̃tama . . . i daicaꞌ nügü . . . nangueꞌẽẽü̃’ erü ta Tupana rü dauü̃guü̃ i naanewa nua Ãẽꞌgacü niꞌĩ. Taꞌacü i duü̃ü̃gü nanegümaã naügüü̃ ta? ‘Rü ngema nanegü . . . rü norü puracüruü̃ ta nayaĩgüꞌẽẽ.’ (Isaías 2:⁠4) Tupana rü duü̃ü̃gü i tama weguü̃ üü̃ narüoꞌẽ ta rü gutchaü̃gü rü nanaoꞌẽ ta ta. Guü̃ma i taꞌacü ya Tupana namaã nawaü̃ rü nayanguꞌẽẽ ta: ‘Rü nüma [Tupana] ta inanapi i naü̃tchiüetü i guü̃ma i ngema duü̃ü̃gü. Rü marü tautama teꞌe tayu, rü teꞌe tümaãrü ngetchaü̃maã taau, rü teꞌe nguü̃ tingegü. Erü guü̃ma i ngema nguü̃ [rü tama weguü̃ rü gutchaü̃gü i nhuma i ngupetüü̃] rü marü inayarüo.’ (Apocaríchiu 21:⁠3, 4)

Nüü̃ ta inadaumatü Salmo 37:⁠10, 11; 46:⁠9 rü Miquéias 4:⁠1-⁠4.

TÜꞌCÜÜ̃ NGEMAÃCÜ CUNA TACAꞌGÜ:

Duü̃ü̃gü rü nayaõꞌgü ngeguma iyueguwena rü taünewa inaũü̃ i taꞌacüme i tama yuü̃. Tümaü̃ẽ nüü̃ iꞌugu rü yuegüü̃ rü maꞌẽẽmaã tchieü̃ naügü. Tümaü̃ẽ ta nüü̃ iꞌugu rü Tupana tchiri namaã na­tchopetü i ngema tchieãcü yueü̃. Rü tümaü̃ẽ ta nüü̃ iꞌugu a ngema tchieãcü yueü̃ rü Tupana ta Üꞌü ya tauguma i oünewa nagagü na ngema gutchaü̃gü nacuaꞌgüü̃caꞌ.

TUPANAARÜ ORE RÜ NHAÜ̃ NIꞌU:

Duü̃ü̃gü nayuegu rü marü tama namaꞌẽ. Tüꞌcüü̃? Erü Tupanaarü Orewa rü nhaü̃ niꞌu Salmo 6:⁠5: ‘Erü yiema yue rü marü taucürüwa cuna tacuaꞌãtchi. Rü nhuãcü ta cuü̃ ticuaꞌüü̃ ya yiema yue ya tümamaü̃wa ngemae?’ Yuegüü̃ rü tama tüü̃ naꞌinü rü bai na tüü̃ nadaugü rü taumare naügü. (Salmo 146:⁠3, 4)

Nüü̃ ta inadaumatü Gênesis 3:⁠19.

TÜꞌCÜÜ̃ NGEMAÃCÜ CUNA TACAꞌGÜ:

Yiemagü rü tamaẽgüega. Yiemagü rü tanawae na naü̃tawa i maꞌẽü̃ i ngema tangetchaü̃güü̃. Yiemagü rü wenaꞌãrü duü̃ü̃gü ingetchaü̃güü̃ i yuegüü̃ tadaugütchaü̃. Ngema rü guãma tanawae.

TUPANAARÜ ORE RÜ NHAÜ̃ NIꞌU:

Tautama ta ya guẽma yueꞌẽ wenaꞌãrü tamaꞌẽ. Taꞌacü ya Ngetchutchu namaã nawaü̃ rü nayanguꞌẽẽ ta: ‘Wena na namaꞌẽü̃ i ngema yueü̃ i meü̃gü.’ (Puracügü 24:⁠15) Nucümacürüwa Tupanaarü ngutchaü̃ niꞌĩ na Meẽtchiü̃ i Naanewa namaꞌẽü̃ i ngema wenaꞌãrü maꞌẽgü. Ingu­tchaü̃ü̃wa, duẽꞌẽgü ya Tupanaga inüꞌẽẽ rü taugumata tidawegü rü maꞌü̃ i tauguma i guꞌü̃ tayaugü ta. Tupanaarü Ore rü nhaü̃ niꞌu: ‘Notürü ngema meü̃gü rü norü ta niꞌĩ i nhaã naane rü guü̃gutama nawa namaẽ.’ (Salmo 37:⁠29)

Nüü̃ ta inadaumatü Juã́ũ 11:⁠25 rü Luca 7:⁠11-17.

TÜꞌCÜÜ̃ NGEMAÃCÜ CUNA TACAꞌGÜ:

Muẽma ya duẽꞌẽgü yaꞌõgüe rü tayumuꞌẽgü. Muũtchiü̃ i duü̃ü̃gü rü nayumuꞌẽtae notürü nüü̃ tacuaꞌgurü Tupana rü tama tüü̃ nüü̃ nainü.

TUPANAARÜ ORE RÜ NHAÜ̃ NIꞌU:

Ngetchutchu tüü̃ nangueꞌẽẽ na nhuãcü tama yecü torü yumuꞌẽtaewa ngeĩcatama iꞌuetchaü̃caꞌ. Nümatama tama yecü ngeĩcatama niꞌuetcha ngeguma nayumuꞌẽtaegu. Ngema niꞌĩ Mateu 6:⁠9-13wa rü Luca 11:⁠2-4wa naüü̃ ga Ngetchutchu. Tupana torü yumuꞌẽtaegü naꞌinüegagu, name niꞌĩ norü ngutchaü̃ãcü iyumuꞌẽtaegüü̃. Ngemaãcü, name niꞌĩ i Tupanaarü ngutchaü̃ icuaꞌü̃ rü yicama norü ngutchaü̃ãcü iyumuꞌẽü̃. Ngema niꞌĩ 1 Juã́ũ 5:⁠14gu wüü̃: ‘Rü nüü̃ tacuaꞌgü ega tacücaꞌ nüna icagu, rü nüma tüü̃ naꞌinü i ngeguma norü ngutchaü̃ yiꞌĩgu i ngema nacaꞌ nüna icaü̃.’

Nüü̃ ta inadaumatü Salmo 65:⁠2; Juã́ũ 14:6, 14 rü 1 Juã́ũ 3:⁠22.

TÜꞌCÜÜ̃ NGEMAÃCÜ CUNA TACAꞌGÜ:

Muẽma ya duẽꞌẽgü nüü̃ cuaꞌgurü dĩẽruãẽ rü guema tüü̃ cuaꞌe rü meẽtchie niꞌĩ taãẽ tüü̃ ngemaẽ. Ngemacaꞌ, dĩẽrucaꞌ, guema tüü̃ cuaꞌü̃caꞌ rü tameẽtchiü̃caꞌ tadaugü rü ngeguma nüü̃ tadaugügu rü nüü̃ ticuaꞌãtchitanü na tama tataãẽgüãü̃.

TUPANAARÜ ORE RÜ NHAÜ̃ NIꞌU:

Ngetchutchu nanawe na nhuãcü ta itaãẽ. Ngemacaꞌ nhanagürü: ‘Yeeraãcü tataãẽ ya yiema nüü̃ inüẽ i Tupanaarü ore rü naga inüẽ.’ (Luca 11:⁠28) Cutaãẽ ta ngeguma nacaꞌ cudaugu i ngema aicuma cuü̃ tau: Tupanaarü aicumaarü cuaꞌtchaü̃ rü ngema taꞌacü nüma tüü̃ nanawaeü̃. Ngema aicuma rü Tupanaarü Orewa nangema. Nüü̃ cucuaꞌgu i aicuma, cuü̃ ta narüngüꞌẽẽ na cunangugüü̃ i taꞌacü meü̃ rü tama meü̃. Cumaã nacuaꞌgu i Tupanaarü Orearü aicuma, cuü̃ ta nangema i maꞌü̃ i tauguma i guꞌü̃ rü ta cutaãẽã naü̃tawa i cutanüü̃ rü cumücügü.

Nüü̃ ta inadaumatü Provérbios 3:⁠5, 6; Salmo 1:⁠1 rü 1 Timúteu 6:⁠9, 10.

 Nhaã i popera iraũatüwa 6 epücüna cuna tacaꞌgü. Rü Tupanaarü Ore nanangaü̃. Nhuĩca nüü̃ cucuaꞌtchaü̃? Cuma rü eꞌna ‘nüü̃ inüẽ i Tupanaarü ore rü naga inüẽꞌ quiꞌĩ? Beꞌmana marü cugüna ta cuca’: ‘Aicumatchi ya Tupana duẽꞌẽgügu narüꞌinügu, tüꞌcüü̃ ya duẽꞌẽgü nhatarügü: Tüꞌcüü̃ nhaã i Naanewa nangema i tchieü̃ rü gutchaü̃gü? Nhuãcü i tchautanüü̃ tcharüngüꞌẽẽü̃ na yeeraãcü nataãẽgüü̃caꞌ?’ Taꞌacü cuma rü to i duü̃ü̃gümaã cugüna cucaꞌü̃,Tupanaarü Ore rü nana­ngaü̃ ta.

Notürü nhuma rü muẽma ya duẽꞌẽgü rü tama Tupanaarü Orewa taugütae. Nacaꞌ rü Tupanaarü Ore rü natatchipeetchi rü nhuguacü i taꞌacü nagu wüü̃ rü nagutchaütchi na nüü̃ cuaꞌü̃. Tupanaarü Oretchiga cucuaꞌü̃caꞌ, cunawaeü̃ i ngüꞌẽẽ? Yeuwaarü Orearü Uruü̃güü̃tawa nangema i tare i ngüꞌẽẽruü̃ i nacaꞌ cuwaü̃ ta.

Nüiraü̃ü̃ i ngüꞌẽẽruü̃ rü poperaatü Tupanaga Naꞌinü rü Nayau i Maꞌü̃ i Tauguma i Guꞌü̃ niꞌĩ, duẽꞌẽgü gutchaãẽgüecaꞌ üü̃ na Tupanaarü Orearü ngueü̃ tacuaꞌgüü̃caꞌ rü ngaü̃gü i tautchaü̃ tingaugüü̃caꞌ. Norü tare i ngüꞌẽẽruü̃, rü wüi nguꞌ Tupanaarü Orearü iꞌĩü̃ niꞌĩ rü ngetanüü̃. Yeuwaarü Orearü Uruü̃gü iꞌĩü̃ cupatawa ta cuü̃ nangueꞌẽẽ urü ngeta na cuãẽguü̃wa i Tupanaarü Ore, ngetanüãcü, guü̃ i yüügu Tupanaarü Oregu cumaã yadeꞌaü̃caꞌ. Muũtchiema ya duẽꞌẽgü ya guü̃ i Naanewa maꞌẽẽ rü marü tanayaugü i ngüꞌẽẽ erü Tupanaarü Orecaꞌ tangue. Muẽma ga duẽꞌẽgü rü tataãẽgü, ngemacaꞌ nhaãcü tadeꞌaãtchitanü: “Aicumaü̃ tchi­ngau.”

Na tauma i to i meü̃ na nüü̃ ingautchaü̃. Tupanaarü Orearü aicuma icuaꞌgu, duü̃ü̃güarü ngue i gutchinüü̃wa itanguü̃ rü ngema guü̃ma nüü̃ muũü̃wa ta. Tupanaarü Orearü aicuma cuü̃ narüngüꞌẽẽ na meü̃ i nguneü̃gü iquinguꞌẽẽü̃caꞌ, rü cuü̃ nüü̃ nacuaꞌẽẽ nhuãcü meã cumaꞌü̃ü̃ rü cutaãẽãü̃. Ngetchutchu rü nhanagürü: ‘Rü ta nüü̃ pecuaꞌ i ore i aicuma iꞌĩü̃. Rü ngema ore ta peü̃ inanguü̃ꞌẽẽ.’ (Juã́ũ 8:⁠32)