Timbá i̱yi̱i̱ʼ rí na̱jkha̱ inún Corintios 16:1-24
16 Ga̱jma̱a̱ numuu rí naxtágímbóó mixnún a̱ngiu̱lú,* gunimbáníí xóo awan dí nixnu̱u̱n a̱ngiu̱lú bi̱ nagimbíi̱n* náa Galacia.
2 Mámbá mbiʼi rí ndayáa xmáná, mámbáa dí ikháanʼla garíyaʼ wájíʼ* xó má eʼngo̱o̱ maxná, mu xáʼyóoʼ mugímbóó índo̱ ikhúúnʼ gáʼgánú.
3 Índo̱ gáʼgánú ikhí, makuʼnguíinʼ náa Jerusalén xa̱bu̱ bi̱ ikháanʼ gúta náa i̱yi̱i̱ʼ ndrígála mu magún kudúún dí ikháanʼla gúxna̱.
4 Á mu ndayóoʼ rí mangúún maʼgá, maʼgá gajmíʼ.
5 Maʼgá gáyala índo̱ gánújngoʼ náa Macedonia, numuu rí mbaʼyóoʼ maʼgá ikhí ma̱ngaa,
6 mbáa maguanúʼ ikhí ga̱jma̱á nindxa̱la mbá nguáthá mbiʼi o maguanúʼ xúgíʼ gu̱nʼ rí maʼni migúwán, mú nda̱wa̱á muʼgua ga̱jma̱á ni̱ndxu̱ʼ mbá chíʼmbaʼ kamba̱a̱ náa gáʼgá.
7 Mú tsíyóʼ manújngoʼ mbá xngaa kayuuʼ náa ikháanʼla, numuu rí gúʼthu̱u̱n maxtáá mbá nguáthá mbiʼi ga̱jma̱á nindxa̱la, á mu Jeobá* nandoo.
8 Aʼkho maxtáá náa Éfeso asndu índo̱ gáʼni Ndxa̱a̱ Pentecostés*
9 numuu rí nimbaʼtoo mbá xkrugua mba̱a̱ mu mañajunʼ itháan, mú kúwi̱i̱n wéñuuʼ xa̱bu̱ sia̱nʼ.
10 Á mu na̱jkha̱nú Timoteo, gumbáyííla mu xámiñuu índo̱ gáxtáa ga̱jma̱á nindxa̱la, numuu dí ikhaa xtáa raʼni ñajuunʼ Jeobá,* xó má ikhúúnʼ.
11 Ikha jngóo, nimbáa xáʼyoo dí ragíʼdoo numuu. Gumbáyíí mu nda̱a̱ rí gágíʼnuu índo̱ gáʼkha̱ gáʼyoʼ, numuu rí ikhúúnʼ gajmíʼ a̱ngiu̱lú kuwa̱a̱nʼ raguaʼthi̱i̱nxu.
12 Nitakáñuu wéñuuʼ ndxájulú Apolos mu maʼga gajmíi̱n a̱ngiu̱lú gáʼyala. Ikhaa tséguapaa maʼga xúgi̱, mú maʼga índo̱ gáguapaa.
13 Gakuwa̱a̱nʼla xawii, gaguaʼdáá má xúʼko̱ fe, xámiñalaʼ, gakhi̱i̱ a̱jkia̱la gúni̱.
14 Gu̱ni̱ xúgíʼ ga̱jma̱a̱ ngajua.
15 Mú rígá rí nandoʼ ma̱tala a̱ngui̱nʼ. Ikháanʼ ndu̱ya̱a̱ rí bi̱ kúwá náa goʼwóo Estéfanas ninindxu̱ún timbíin* xa̱bi̱i̱ Cristo náa Acaya ga̱jma̱a̱ ikhiin nixnaximíjna̱ mu mumbañún a̱ngiu̱lú.*
16 Ikháanʼla mangáanʼ gunimbala kuñu̱u̱n xa̱bu̱ xóo buʼko̱ ga̱jma̱a̱ xúgíinʼ bi̱ nuyambáá ma̱ngaa bi̱ nuñajunʼ gakhi̱i̱.
17 Nadxuʼ numuu dí na̱ʼkha̱ Estéfanas, Fortunato ga̱jma̱a̱ Acaico, índo̱ nda̱ñu̱u̱n ikhiin asndu xóo naku̱mu̱ʼ dí nda̱ya̱la ikháanʼ.
18 Ikhiin nixnuʼ tsiakii,* xúʼko̱ má nixnala tsiakii mangáanʼ. Ikha jngóo gusngajmá dí nduyamajkhún xa̱bu̱ xóo buʼko̱.
19 A̱ngiu̱lú bi̱ nagimbíi̱n* náa Asia nurajxáanʼla. Áquila ga̱jma̱a̱ Prisca, xúgíinʼ bi̱ nagimbíi̱n náa goʼwóo nurajxáanʼla ga̱jma̱a̱ mbiʼyuu Tátá.
20 Xúgíinʼ a̱ngiu̱lú nurajxáanʼla. Guraximijnáa ga̱jma̱a̱ beso.*
21 Ikhúúnʼ Pablo, naniraʼmáʼ i̱yi̱i̱ʼ rígi̱ ga̱jma̱a̱ ñawúnʼ mu marajxa̱a̱nʼla.
22 Á mu mbáa tsíyoo kaʼyoo Tátá, gajuiʼtá tsríguíi. ¡Tátá ndrígúxu̱, mbá péñu, aye̱!
23 Garigá rí májánʼ wéñuuʼ a̱jkiu̱u̱n* Tátá Jesús náa ikháanʼla, maski ajndu rakáʼyala.
24 Nandoʼ ka̱ya̱la xúgiáanʼ ikháanʼ bi̱ kuwáanʼ mbóó jnduʼ gajmiála Cristo Jesús.
Mbaʼa nota
^ Náa ajngáa griego naʼthí, “bi̱ kaʼwiin”.
^ O “kanííʼ”.
^ Náa ajngáa griego naʼthí, “xndú rí najma̱a̱ ginii”.
^ Náa ajngáa griego naʼthí, “bi̱ kaʼwiin”.
^ Náa ajngáa griego naʼthí, “xi̱ʼ”.
^ Náa ajngáa griego naʼthí, “beso rí kaʼwu”. Beso rígi̱ nuxnamijná a̱ngiu̱lú bi̱ ndiʼkhún eniʼnumijná.
^ O “ámiu̱u̱n”.
