Raga̱jma̱ i̱yi̱i̱ʼ rí na̱jkha̱ inún Corintios 8:1-24
8 A̱ngui̱nʼ, rí xúgi̱ nanduxu mbu̱ya̱a̱la rí májánʼ wéñuuʼ a̱jkiu̱u̱n Dios maski ajndu rakáʼyulú rí nisngájma náa bi̱ nagimbíi̱n* náa Macedonia.
2 Índo̱ niraʼníí gamiéjunʼ ikhiin nimíniiʼ wéñuuʼ, nixna ga̱jma̱a̱ gagi maski ajndu ra̱ʼkhá tháán gíníin. Rígi̱ nasngájma rí májánʼ wéñuuʼ a̱jkiu̱ún nixna dí guáʼdáá.
3 Numuu rí ikhúúnʼ ndi̱yo̱o̱ dí ikhiin nixna xúgíʼ xó má eʼngu̱u̱n, nixna asndu itháan rí xóo guáʼdáá,
4 numuu dí ikhiin nitakáñuxu má xúʼko̱ dí muniʼñúunʼxuʼ muxna dí guáʼdáá ga̱jma̱a̱ xúʼko̱ ma̱ndoo mumbañún bi̱ kaxtaʼwíin.
5 Ikhiin nini̱ itháan ki xóo dí niguáʼti̱i̱nxoʼ, ginii nixnaximi̱jna̱ náa Tátá nda̱wa̱á náa ikháanʼxu mu muni̱ ñajuunʼ Dios.
6 Ikha jngóo nitha̱a̱nxu Tito dí mambóo ragímbóó mbújkha̱a̱ dí ikháanʼ gúxnala, numuu dí ikhaa nigíʼdu̱u̱ nimbáyalaʼ ikháanʼ.
7 Xó má ikháanʼ kuaʼdáá mba̱a̱ wéñuuʼ náa xúgíʼ rígi̱, kuaʼdáá mba̱a̱ fe, najmañala wéñuuʼ nu̱ta̱, kuaʼdáá wéñuuʼ ku̱ma̱, kuaʼdáá wéñuuʼ gagi ga̱jma̱a̱ nusngajmála ngajua xó má ikháanʼxu, xúʼko̱ má gánindxu̱u̱ májánʼ a̱jkia̱la índo̱ gúxna̱.
8 Índo̱ na̱tala rígi̱ tsétañájuanla, i̱ndó na̱tala mu mbuya̱a̱ gagi rí guáʼdáá eʼwíinʼ mu xúʼko̱ musngajmá dí gajkhun nandala ku̱ñu̱u̱n eʼwíinʼ.
9 Numuu rí ikháanʼ ndu̱ya̱a̱ rí májánʼ wéñuuʼ a̱jkiu̱u̱n Tátá Jesucristo ndrígúlú maski ajndu rakáʼyulú: Maski ajndu ikhaa gíʼdoo wéñuuʼ, mú niʼniminaʼ mani̱ndxu̱u̱ migínáa ga̱jma̱á numala, mu ikháanʼ ma̱ndoo maguaʼdáá wéñuuʼ ga̱jma̱a̱ numuu dí ikhaa niʼni migínáa.
10 Na̱tala rí nandxa̱ʼo̱o̱ edxu̱ʼ. Numuu dí rígi̱ mambáyala ikháanʼ maski ajndu niʼni má mbá tsiguʼ dí nigíʼdi̱i̱ ñajunʼ rígi̱; mú nisngajmá rí nindala mu̱ni̱.
11 Ikha jngóo gambála ñajunʼ rí nigíʼdi̱i̱ mu̱ni̱, xúgíʼ rí gúxna̱, guxna̱ xó má eʼngala xúʼko̱ gúsngajmá dí ikháanʼ nandala muñambáá.
12 Numuu rí índo̱ mbáa nandoo mañambáá, naxná rí gíʼdoo, rúʼko̱ eʼni dí makujmaa májánʼ índo̱ naxná rí gíʼdoo raʼkháa dí ragíʼdoo.
13 Na̱nguá e̱tha̱ mbá rí maʼniala mingíjyúuʼ ikháanʼ mú eʼwíinʼ xáʼniún mingíjyúuʼ.
14 Rí phú nandoʼ, dí napíduunʼ nuni̱la xúgi̱ gúxnu̱u̱nla bi̱ nda̱ñúunʼ: Mu xúʼko̱ dí napíduunʼ nuni̱ ikhiin muxnala ikháanʼ índo̱ gáʼyála, mu xúʼko̱ maʼni mbríguu.
15 Xó má kiʼniraʼmáʼ: “Xa̱bu̱ bi̱ nagiʼdoo wéñuuʼ nándáa má rí napíduunʼ náa ikhaa ga̱jma̱a̱ xa̱bu̱ bi̱ tágiʼdoo wéñuuʼ táʼyóoʼ nditháan”.
16 Nuxnáalú núma̱aʼ Dios dí nigíwánʼ náa a̱jkiu̱u̱n Tito rí nixmiéjuunʼ kaʼyala xó má ikháanʼ naxmiéjunxu ku̱ya̱la.
17 Ikhaa raʼkháa i̱ndó nigruigú tsiakii dí ikháanʼ nixna̱la ma̱ngaa nidxuu wéñuuʼ dí asndu maʼga gáʼyala numuu dí ikhaa má nindoo maʼga.
18 Ga̱jma̱a̱ ikhaa nuxuʼmáaxu mbáa ndxájulú bi̱ nuni̱ mba̱a̱ náa xúgíʼ dí nagimbíi̱n ga̱jma̱a̱ numuu dí naʼtáraʼa ajngáa rí májánʼ.
19 Raʼkháa i̱ndó rúʼko̱, bi̱ nagimbíi̱n nigíiʼ ikhaa muʼguá gajmiúxu mu maxpíʼtáa mbújkha̱a̱ dí ikháanʼ nixna̱la mu maguma mba̱a̱ Tátá ga̱jma̱a̱ mu musngajmá rí nanduxu muñambáá.
20 Xúʼko̱ nimbáa xáʼthí numa xóo nuxpíʼtáaxu mbújkha̱a̱ dí najuixná.
21 Numuu ‹dí nu̱ni̱ tsiakimíjna̱xu mu̱ni̱ xúgíʼ rí májánʼ, raʼkháa i̱ndó náa inuu Jeobá,* ma̱ngaa náa inún xa̱bu̱›.
22 Ma̱ngaa nixuʼmáaʼxu mbáa ndxájulú, mu maʼga gajmíi̱n ikhiin bi̱ nisngájma dí naʼni rí májánʼ ga̱jma̱a̱ naʼni xúgíʼ. Mú rí xúgi̱ maʼni itháan, numuu rí naku̱mu̱u̱ kaʼyala ikháanʼ.
23 Á mu mbáa naʼni a̱jma̱ a̱jkiu̱u̱n kaʼyoo Tito, gu̱ya̱a̱ dí ikhaa nañajunʼ mbóó ga̱jmu̱ʼ mu mambáyala ikháanʼ. O, á mu mbáa naʼni a̱jma̱ a̱jkiu̱u̱n kaʼñún a̱ngiu̱lú, gu̱ya̱a̱ dí ikhiin ni̱ndxu̱ún apóstoles náa rí nagimbáanʼ ga̱jma̱a̱ rígi̱ naxnúu gamajkhu Cristo.
24 Ikha jngóo, gusngajmá ngajua náa ikhiin ma̱ngaa gusngajmá náa nagimbáanʼ náá numuu dí nadxuxu ga̱jma̱a̱ numala ikháanʼ.
