Raga̱jma̱ i̱yi̱i̱ʼ rí na̱jkha̱ inún Corintios 9:1-15
9 Ga̱jma̱a̱ numuu dí mumbáñúún bi̱ kaxtaʼwíin* tséyóoʼ má maniraʼmáʼ náa inala,
2 numuu rí nda̱yo̱o̱ dí ikháanʼ nandala muñambáá ga̱jma̱a̱ nadxuʼ índo̱ nathu̱u̱n bi̱ kúwá náa Macedonia ga̱jma̱á numala, nathu̱u̱n dí bi̱ kúwá náa Acaya kúwá xawii mu muñambáá asndu nákha timbá tsiguʼ. Tsiakii rí nuni̱la naxkajxi̱i̱n mbaʼin dí ikhiin muni̱ xúʼko̱ mangiin.
3 Mú nakuʼnguíinʼ a̱ngiu̱lú mu ikháanʼla makuwáanʼ xawii xó má ni̱tha̱ rí makuwa̱a̱nʼla, xúʼko̱ xáʼni ndíí rí ikháanʼxu ni̱tha̱ ga̱jma̱á numala.
4 Numuu rí á mu bi̱ kúwá náa Macedonia gágún ga̱jma̱á ni̱ndxu̱ʼ ga̱jma̱a̱ ikháanʼ na̱nguá kuwa̱a̱nʼ xawii, ikháanʼ mati̱yu̱xu wéñuuʼ numuu rí niku̱mu̱xu ku̱ya̱la, mú itháan gáti̱ya̱la ikháanʼ.
5 Ikha jngóo niku̱mu̱ʼ dí májánʼ gáʼni dí makuʼnguíinʼ a̱ngiu̱lú magún wapháá mu ikhiin mugimbóó mbújkha̱a̱ rí ikháanʼ nixuʼdámíjná muxna̱la, xúʼko̱ marigá xawii mbújkha̱a̱ rí ikháanʼ gúxna̱ ga̱jma̱a̱ xúgíʼ a̱jkia̱la, raʼkháa rí katsudáanʼla mu̱xna̱.
6 Numuu rí bi̱ naʼdu chíʼgíiʼ, chíʼgíiʼ má gágúu ga̱jma̱a̱ bi̱ naʼdu mba̱a̱, mba̱a̱ má gágúu.
7 Mámbáa gáxná xó má nagájnuu náa a̱jkiu̱u̱n,* raʼkháa ga̱jma̱a̱ a̱jma̱ a̱jkiu̱u̱n, ni má rí katsudaa, numuu rí Dios nandoo kaʼyoo bi̱ naxná ga̱jma̱a̱ gagi.
8 Dios ma̱ndoo masngájmala rí májánʼ wéñuuʼ a̱jkiu̱u̱n maski ajndu rakáʼyala, mu maguaʼdáá xúgíʼ rí ndayála ma̱ngaa mu maguaʼdáá itháan mu muyambáá náa xúgíʼ enii ñajunʼ dí májánʼ.
9 (Xó má kiʼnirámáʼ: “Ikhaa naxpíʼtaa mba̱a̱ wéñuuʼ náa bi̱ migíníin; rí májánʼ dí naʼni marigá asndu kámuu”.
10 Dios naxnúu mba̱a̱ tsígáʼ bi̱ naʼdu ga̱jma̱a̱ naxnún pan mu̱phu̱ xúgíinʼ, maxnála mba̱a̱ tsígáʼ ikháanʼ mudula, xúʼko̱ mugímbóo itháan mba̱a̱ náa rí májánʼ dí nuni̱la).
11 Dios naʼni tsajkurámáanʼla mu ikháanʼ mu̱xna̱ mba̱a̱ dí kuaʼdáá náa dí ndayóoʼ, ma̱ngaa ga̱jma̱a̱ numulú ikháanʼ eʼwíinʼ muxna̱a̱ wéñuuʼ núma̱a̱ Dios.
12 Numuu dí numbáñún eʼwíinʼ raʼkháa i̱ndó nandoo gáʼthí rí muxnúún rí nda̱ñúnʼ bi̱ kaxtaʼwíin, ma̱ngaa dí ikhiin muxna̱a̱ wéñuuʼ núma̱aʼ Dios.
13 Xúʼko̱ ikhiin muni̱ mba̱a̱ Dios numuu dí ikháanʼ numbáñúún eʼwíinʼ ga̱jma̱a̱ rígi̱ nasngájma rí ikháanʼ nunimbáníí ajngáa rí májánʼ ga̱jma̱a̱ numuu Cristo, xó má ikháanʼla nitaráʼa pa̱jnu ga̱jma̱a̱ dí ikháanʼ nuxnu̱u̱la mba̱a̱ dí kuaʼdáá ga̱jma̱a̱ nuxnu̱u̱la xúgíinʼ.
14 Índo̱ ikhiin gútajkáan* ga̱jma̱á numala muthi rí nandún kuyala ga̱jma̱a̱ numuu rí Dios nisngájma náa ikháanʼla dí ra̱ʼkhá tháán májánʼ wéñuuʼ a̱jkiu̱u̱n maski ajndu rakáʼyala.
15 Nuxnáa núma̱aʼ Dios numuu rí nimínáanʼ mbá rí nda̱a̱ ajngáa xóo muʼthá.
