“Ebri wod blo God wea i spik i bin kam prom God.”—Leta 2 po Timoti 3:16, Baibol – Tores Streit Yumplatok.

Yu go paine prapa ansa po dem big kwestin po laip.—Leta 2 po Timoti 2:7.

I go elpe mipla sabe wanem po mekem wea laip.—Matiu 7:12.

Prapa oup ane promis i go kam bambai.—Leta po Rom 15:4.

Wa, i gad tri gud rizen:

• Ebri buk blo Baibol olgeda agri. I bin gad 40 dipren man uda bin raite Baibol. I bin teke 1,600 iya po raite Baibol. Dempla no bin sabe wananada. Bat da Baibol olgeda agri ane i ona neim ane rul blo God!

• I gad tru stori. Sam stori raita prom bipotaim bin aide dempla nugud stori. Bat, dem Baibol raita no bin aide stori blo dempla. Ip dempla bin meke misteik ane bin pil nugud baut demplaselp, ol bin raite ebri demting insaid Baibol.—Leta po Rom 7:21-24.

• Olgeda propesi i kam tru ebritaim. Baibol bin spik mipla baut wea Zizas Kraist go bon. I bin pinis kole da neim ‘Betliem’ 700 iya bipo i bin apen. (Micah 5:2) Wea Zizas bin bon? Betliem.—Matiu 2:1-6.

  I gad plenti nada Baibol propesi dat bin kam tru. I gad propesi wea i tokbaut ol mina smol samting ane i bin kam tru tu. Wiswei, i mas ip i Wod blo God a?—Leta 2 prom Pita 1:21.