• TINAN MORIS: 1963

• HUSI RAI: BRETAÑA BOOT

• MORIS ULUK NIAN: IHA SERBISU DIʼAK

HAʼU-NIA MORIS ULUK NIAN:

Haʼu moris iha Croydon, Londres Súl. Haʼu mak oan númeru neen husi oan naʼin-sia. Haʼu-nia inan-aman husi illa Saun Visente iha Karaíba. Haʼu-nia amá mak membru ba igreja Metodista. Maski haʼu gosta tebes atu aprende buat oioin, maibé haʼu la interese atu aprende kona-ba Maromak. Durante feriadu husi eskola, haʼu baibain bá lagoa besik haʼu-nia uma no lee livru barak neʼebé haʼu empresta husi biblioteka.

Tinan balu depois haʼu remata eskola, haʼu rekoñese katak haʼu hakarak atu ajuda ema sira neʼebé moris iha susar laran. Haʼu komesa serbisu atu ajuda ema sira neʼebé la iha hela-fatin, ema neʼebé defisiente no mós ema neʼebé la iha kbiit atu aprende. Tuirmai haʼu tama universidade no hili departamentu saúde. Depois gradua, haʼu hetan serbisu ho pozisaun neʼebé diʼak no haʼu iha moris neʼebé diʼak. Nuʼudar peskizadora sosiál no konsultora independente, haʼu presiza deʼit laptop no internét atu halo serbisu. Haʼu sai beibeik ba rai liʼur atu feriadu durante semana balu, toba iha otél neʼebé haʼu gosta, haree natureza no bá spa no mós gym atu mantein haʼu-nia fíziku. Tuir haʼu-nia hanoin, haʼu goza moris duni. Maibé haʼu sempre hanoin kona-ba ema barak neʼebé moris iha susar laran.

OINSÁ BÍBLIA TROKA HAʼU-NIA MORIS:

Ba tinan barak, haʼu sempre hanoin: ‘Tanbasá ita moris, no moris iha duni objetivu ka lae?’ Maibé haʼu nunka koko atu buka resposta iha Bíblia. Loron ida iha tinan 1999, haʼu-nia alin-feto Margaret neʼebé sai ona Testemuña ba Jeová vizita haʼu hamutuk ho ninia kolega feto Testemuña neʼebé hatudu laran-diʼak mai haʼu. Haʼu konkorda atu estuda Bíblia ho haʼu-nia alin nia kolega neʼe, maibé haʼu ladún halo mudansa, tanba haʼu uza tempu barak atu serbisu no goza moris.

Iha tempu veraun tinan 2002, haʼu muda ba rai-Inglaterra nia parte sudueste. Iha neʼebá, haʼu komesa foti programa pozgraduadu peskiza sosiál iha universidade atu bele hetan doutoranda. Haʼu komesa tuir reuniaun beibeik iha Reuniaun-Fatin hamutuk ho haʼu-nia oan-mane neʼebé kiʼik hela. Maski haʼu gosta atu hetan edukasaun aas, maibé aprende Bíblia ajuda haʼu atu komprende liután kona-ba problema sira iha ema nia moris no mós solusaun ba problema sira-neʼe. Haʼu foin komprende lia-loos husi Mateus 6:24 kona-ba ita labele serbí patraun naʼin-rua. Haʼu tenke hili atu serbí Maromak ka rikusoin. Haʼu hatene katak haʼu tenke halo desizaun kona-ba saida mak importante liu iha haʼu-nia moris.

Tinan ida tuirmai, haʼu tuir beibeik grupu estuda nian neʼebé Testemuña sira mak halaʼo hodi uza livru Apakah Ada Pencipta yang Mempedulikan Anda? * Haʼu mós komesa fiar katak só ita-nia Kriadór Jeová mak bele rezolve ema nia problema hotu. Maibé iha universidade, haʼu aprende katak atu hetan moris neʼebé iha objetivu, ita la presiza tau fiar ba Kriadór. Haʼu hirus tebes. Fulan rua liutiha, haʼu sai husi universidade no deside atu uza tempu barak liután atu hakbesik ba Maromak.

Eskritura husi Bíblia neʼebé anima tebes haʼu atu troka haʼu-nia moris mak Provérbios 3:5, 6: “Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.” Aprende kona-ba ita-nia Aman neʼebé hadomi ita mak lori kontente boot liu duké iha rikusoin barak ka iha títulu doutoranda. Bainhira haʼu aprende liután kona-ba Jeová nia hakarak ba mundu no kona-ba Jesus neʼebé fó ninia moris atu salva ita, haʼu-nia hakarak atu dedika an ba Kriadór sai makaʼas liután. Haʼu hetan batizmu iha fulan-Abríl tinan 2003. Depois batizmu, neineik-neineik haʼu halaʼo moris neʼebé simples.

BUAT DIʼAK NEʼEBÉ HAʼU HETAN:

Haʼu bele sai Jeová nia belun no neʼe mak folin-boot tebes. Haʼu-nia laran sente dame no kontente tanba koñese nia. Haʼu mós hetan ksolok tanba bele ransu ho ema sira neʼebé adora Maromak Jeová.

Haʼu nafatin gosta aprende buat oioin no haʼu kontinua aumenta haʼu-nia koñesimentu kona-ba Maromak liuhusi aprende Bíblia no tuir reuniaun Kristaun sira. Haʼu gosta atu fahe buat neʼebé haʼu aprende ba ema seluk. Neʼe mak serbisu neʼebé bele duni ajuda ema seluk atu iha moris neʼebé diʼak liu agora no mós iha esperansa furak atu moris iha mundu paraízu. Husi fulan-Juñu tinan 2008, haʼu uza haʼu-nia tempu tomak atu haklaken kona-ba Maromak, no haʼu sente kontente liu no mós kontente ho buat neʼebé haʼu iha. Haʼu hetan ona moris nia objetivu neʼebé loos no haʼu agradese tebes ba Jeová.

• TINAN MORIS: 1973

• HUSI RAI: ÁUSTRIA

• MORIS ULUK NIAN: JOGA OSAN

HAʼU-NIA MORIS ULUK NIAN:

Haʼu boot iha sidade kiʼik ida naran Braunau, iha rai-Áustria. Ema neʼebé moris iha sidade neʼe mak riku no ladún iha krime. Haʼu-nia família mak Katólika no sira haboot haʼu tuir relijiaun Katólika.

Iha akontesimentu boot ida bainhira haʼu kiʼik neʼebé afeta loos haʼu. Iha tinan 1984, kuandu haʼu-nia tinan maizumenus 11, haʼu hanoin-hetan haʼu joga bola ho haʼu-nia belun diʼak ida. Tuirmai, iha loron neʼebé hanesan, iha lokraik, nia mate tanba asidente karreta. Haʼu triste tebes tanba haʼu-nia belun mate. Durante tinan barak depois asidente neʼe, haʼu sempre hanoin kona-ba saida mak akontese bainhira ema mate.

Kuandu haʼu remata eskola, haʼu serbisu nuʼudar eletrisista. Maski haʼu sai toman atu joga osan no taru osan boot, maibé haʼu la iha problema ekonomia. Haʼu mós gasta tempu barak ba desportu sira no mós haʼu gosta atu rona múzika metal no punk rock. Haʼu sempre bá diskoteka no festa sira. Maski haʼu goza moris hodi buka ksolok no halaʼo moris neʼebé la morál, maibé haʼu sente haʼu-nia moris la iha objetivu.

OINSÁ BÍBLIA TROKA HAʼU-NIA MORIS:

Iha tinan 1995, katuas Testemuña ida dere haʼu-nia odamatan no oferese livru ida neʼebé fó sai Bíblia nia resposta ba pergunta, saida mak akontese bainhira ita mate? Tanba haʼu nafatin hanoin kona-ba haʼu-nia belun diʼak neʼebé mate iha asidente. Haʼu simu livru neʼe. Haʼu la lee deʼit kapítulu kona-ba saida mak akontese bainhira ita mate, haʼu mós lee livru neʼe tomak!

Livru neʼe hatán haʼu-nia pergunta sira kona-ba mate. Maibé haʼu mós aprende buat seluk tan. Tanba haʼu boot iha família Katólika, entaun fiar ba Jesus mak buat neʼebé importante liu. Maibé hodi estuda didiʼak Bíblia, neʼe ajuda haʼu atu haburas relasaun diʼak ho Jesus nia Aman, Maromak Jeová. Haʼu hakfodak tebes bainhira aprende katak Jeová hanoin ita no anima ita atu hakbesik ba nia. (Mateus 7:7-11) Haʼu aprende katak Jeová iha sentimentu. Haʼu mós aprende katak nia sempre kumpre ninia liafuan. Neʼe halo haʼu interese liután ba Bíblia nia profesia no hakarak atu buka-hatene oinsá profesia sira-neʼe sai loos ona. Buat neʼebé haʼu aprende hametin tebes haʼu-nia fiar ba Maromak.

Lakleur, haʼu rekoñese katak só Testemuña ba Jeová deʼit mak hakarak ajuda ema atu aprende kona-ba Bíblia. Haʼu haree eskritura sira neʼebé temi iha Testemuña sira-nia publikasaun no loke eskritura sira-neʼe iha haʼu-nia Bíblia Katólika. Nuʼudar haʼu estuda didiʼak, haʼu mós komesa fiar liután katak haʼu hetan ona lia-loos.

Liuhusi estuda Bíblia, haʼu aprende katak Jeová hakarak haʼu atu moris tuir ninia matadalan. Husi buat neʼebé haʼu lee iha Éfeso 4:22-24, haʼu aprende katak haʼu tenke hasai tiha haʼu-nia “hahalok tuan” neʼebé mai husi haʼu-nia “moris uluk nian” no haʼu presiza tau “hahalok foun neʼebé Maromak kria tuir ninia hakarak”. Tan neʼe, haʼu husik tiha haʼu-nia moris neʼebé la morál. Haʼu mós rekoñese katak haʼu tenke para joga osan, tanba toman neʼe bele halo ema sai materializmu no kaan-teen. (1 Korinto 6:9, 10) Haʼu hatene katak atu bele halo mudansa, haʼu tenke para ransu ho haʼu-nia kolega sira no buka fali kolega foun neʼebé iha morál neʼebé diʼak.

La fasil atu halo mudansa sira-neʼe. Maibé haʼu komesa tuir reuniaun sira iha Testemuña ba Jeová nia Reuniaun-Fatin no komesa hetan kolega iha kongregasaun neʼe. Haʼu mós kontinua estuda didiʼak Bíblia mesak. Ida-neʼe ajuda haʼu atu troka múzika neʼebé haʼu gosta, troka planu sira ba haʼu-nia moris, no hadiʼa an. Iha tinan 1995, haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN:

Agora haʼu iha hanoin neʼebé loos kona-ba osan no rikusoin. Uluk haʼu hirus lalais, maibé agora lae ona. Haʼu mós la hanoin barak demais kona-ba futuru.

Haʼu kontente tanba bele sai parte ba organizasaun internasionál neʼebé serbí Jeová. Iha organizasaun neʼe, haʼu haree ema sira neʼebé luta hasoru problema oioin maibé nafatin serbí Maromak ho laran-metin. Agora haʼu sente kontente tanba bele uza haʼu-nia forsa no tempu-tomak atu serbí Jeová no halo buat diʼak ba ema seluk, laʼós buka ksolok ba haʼu-nia an rasik.

• TINAN MORIS: 1963

• HUSI RAI: INGLATERRA

• MORIS ULUK NIAN: LA KONTENTE HO MORIS

HAʼU-NIA MORIS ULUK NIAN:

Haʼu moris iha rai-Inglaterra, maibé kuandu haʼu tinan hitu, haʼu-nia família muda ba rai-Austrália. Ami hela área turizmu iha Gold Coast, Queensland, rai-Austrália. Maski haʼu-nia família la riku, maibé ami mós la kuran buat ida.

Maski haʼu sai boot ho situasaun neʼebé la kuran buat ida, haʼu nunka sente kontente neʼebé loos. Haʼu la sente kontente ho moris. Haʼu-nia apá hemu tua demais. Haʼu ladún hadomi nia tanba ninia toman atu hemu tua demais no mós ninia dalan trata haʼu-nia amá. Ikusmai, haʼu deskobre katak haʼu-nia apá sai hanesan neʼe tanba ninia esperiénsia aat bainhira sai soldadu iha Malaya, husi tempu neʼebá haʼu komprende tanbasá nia hatudu hahalok hanesan neʼe.

Haʼu komesa hemu tua demais kuandu haʼu iha eskola sekundária. Kuandu haʼu tinan 16, haʼu remata eskola no tama forsa navál. Haʼu komesa uza droga oioin no haʼu sai dependente ba tabaku. Haʼu mós sai dependente ba tua. Foufoun haʼu hemu tua demais iha findesemana, maibé lakleur haʼu hemu tua demais loroloron.

Kuandu haʼu maizumenus tinan 20, haʼu komesa husu pergunta oioin kona-ba Maromak. Haʼu hanoin: ‘Se Maromak iha duni, tanbasá mak nia husik ema hetan terus no mate?’ Haʼu mós hakerek poezia neʼebé fó-sala ba Maromak tanba buat aat hotu neʼebé akontese ba ema iha mundu neʼe.

Haʼu para husi forsa navál kuandu haʼu tinan 23. Depois neʼe, haʼu halo serbisu oioin no halo viajen ba nasaun oioin durante tinan ida, maibé haʼu nafatin la sente kontente. Haʼu la interese atu halo planu ruma ka kumpre planu neʼe. Haʼu la interese ba buat ida. Haʼu mós la interese atu iha uma, iha serbisu diʼak, no hetan pozisaun diʼak. Haʼu sente buat hotu neʼe mak saugati deʼit. Buat ida deʼit neʼebé lori “kmaan” mai haʼu mak hemu tua no rona múzika.

Haʼu sei hanoin-hetan tempu neʼebé haʼu hakarak tebes atu buka-hatene moris nia objetivu. Neʼe mak kuandu haʼu vizita kampu-konsentrasaun iha Auschwitz, rai-Polónia. Haʼu lee ona kona-ba ema barak neʼebé hetan kastigu iha fatin neʼe. Maibé kuandu haʼu hamriik no hateke haleʼu komarka neʼebé luan tebes, neʼe book duni haʼu-nia laran. Haʼu la komprende tanbasá ema bele hatudu laran-aat ba ema seluk hanesan neʼe. Haʼu hanoin-hetan, haʼu laʼo haleʼu komarka neʼe ho matan-been no husu: ‘Tanbasá?’

OINSÁ BÍBLIA TROKA HAʼU-NIA MORIS:

Iha tinan 1993, kuandu fila husi rai seluk, haʼu komesa lee Bíblia atu buka resposta. Lakleur, Testemuña ba Jeová naʼin-rua dere haʼu-nia odamatan no konvida haʼu atu tuir reuniaun boot neʼebé halaʼo iha estádiu besik haʼu-nia hela-fatin. Haʼu deside atu tuir.

Fulan balu antes neʼe, haʼu tama estádiu neʼe atu haree jogu, maibé neʼe la hanesan duni ho reuniaun boot neʼe. Testemuña sira hatudu respeitu no hatais ho kabeer, no sira-nia oan sira mós la nakar. Haʼu hakfodak ho buat neʼebé haʼu haree bainhira tempu han-meiudia. Testemuña atus ba atus tuur no han iha kampu laran, maibé kuandu sira fila fali ba sira-nia tuur-fatin, la iha lixu ida iha kampu laran! Liután neʼe, haree hanesan sira iha moris neʼebé kontente no nakonu dame. Neʼe mak buat neʼebé haʼu hakarak tebes atu sente. Haʼu la hanoin-hetan diskursu sira iha reuniaun boot neʼe, maibé haʼu nafatin hanoin-hetan Testemuña sira-nia hahalok iha tempu neʼebá.

Iha kalan neʼe, haʼu hanoin kona-ba haʼu-nia primu neʼebé lee Bíblia no estuda relijiaun oioin. Tinan balu liubá, nia hatete mai haʼu katak Jesus dehan ita bele rekoñese relijiaun neʼebé loos liuhusi ninia membru nia hahalok. (Mateus 7:15-20) Tan neʼe haʼu hanoin katak haʼu mós presiza buka-hatene saida mak halo Testemuña sira la hanesan ho relijiaun seluk. Dala primeiru iha haʼu-nia moris, haʼu sente iha motivasaun no esperansa.

Semana balu liutiha, Testemuña rua neʼebé konvida haʼu atu tuir reuniaun boot, vizita fali haʼu. Sira oferese estuda Bíblia mai haʼu, no haʼu simu. Haʼu mós komesa tuir reuniaun Kristaun sira hamutuk ho sira.

Nuʼudar haʼu estuda Bíblia, haʼu-nia hanoin kona-ba Maromak mós troka. Haʼu aprende katak Maromak la hamosu terus no buat aat ba ema no Maromak mós sente laran-kanek bainhira ema halo buat aat. (Génesis 6:6; Salmo 78:40, 41) Haʼu deside atu nunka halo Jeová laran-kanek. Haʼu hakarak halo ninia laran kontente. (Provérbios 27:11) Haʼu para hemu tua no la uza tan tabaku. Haʼu mós la halo tan hahalok la morál sira. Iha fulan-Marsu 1994, haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN:

Haʼu sente kontente tebes ho haʼu-nia moris. Haʼu la koko atu rezolve haʼu-nia problema ho hemu tua. Maibé haʼu aprende atu entrega haʼu-nia laran-susar ba Jeová.​—Salmo 55:22.

Durante tinan sanulu nia laran, haʼu kaben ho Testemuña ida naran Karen, neʼebé iha oan-feto naran Nella. Ami naʼin-tolu uza ami-nia tempu barak atu haklaken no ajuda ema atu aprende lia-loos kona-ba Maromak. Ikusmai, haʼu-nia moris iha objetivu.