Haʼu boot iha knua ida naran Warialda iha New South Wales. Neʼe mak área agrikultura neʼebé ema oioin mak hakiak bibi, karau, no mós kuda trigu no buat seluk tan. Knua neʼe moos tebes no ladún iha krime.

Haʼu mak oan primeiru husi oan naʼin-10, tan neʼe bainhira haʼu tinan 13, haʼu komesa serbisu hodi ajuda sustenta família. Tanba haʼu la eskola boot, haʼu serbisu iha toʼos. Bainhira haʼu tinan 15, haʼu tau matan ba karau sira no treinu kuda neʼebé fuik.

Serbisu iha agrikultura lori buat diʼak, maibé iha mós problema. Haʼu kontente tebes ho haʼu-nia serbisu no mós ambiente. Iha kalan, haʼu haneruk ahi no hateke ba fulan no fitun barak neʼebé nakonu iha lalehan no haʼu bele sente anin fresku lori natureza nia morin husi ai-laran. Haʼu hanoin tenkesér iha ida-neʼebé kria buat furak sira-neʼe hotu. Maibé haʼu mós hetan influénsia la diʼak husi ema seluk neʼebé halo serbisu hamutuk. Sira tolok beibeik no fuma. Ikusmai, haʼu mós sai toman atu fuma no tolok loroloron.

Bainhira haʼu halo tinan 18, haʼu muda ba Sydney. Haʼu hakarak atu sai militár, maibé sira la simu haʼu tanba haʼu eskola kiʼik deʼit. Haʼu hetan serbisu seluk no hela iha Sydney ba tinan ida. Iha tempu neʼebá mak haʼu foin hasoru Testemuña ba Jeová. Haʼu simu konvite atu tuir sira-nia reuniaun, no haʼu rekoñese kedas katak buat neʼebé sira hanorin mak lia-loos.

Maibé lakleur depois neʼe, haʼu deside atu muda fali ba foho. Haʼu muda ba Goondiwindi iha Queensland. Haʼu hetan serbisu no kaben, maibé triste mak haʼu komesa hemu tua.

Haʼu ho haʼu-nia feen iha oan-mane naʼin-rua. Depois sira moris, haʼu komesa hanoin didiʼak kona-ba haʼu-nia moris sei sai oinsá. Haʼu hanoin-hetan buat neʼebé haʼu rona bainhira haʼu tuir Testemuña nia reuniaun iha Sydney no haʼu deside atu halo buat ruma iha haʼu-nia moris.

Haʼu hetan Livru Haklaken neʼebé tuan, neʼebé iha diresaun kona-ba Testemuña ba Jeová nia sukursál iha Austrália. Haʼu hakerek karta ba sira atu husu ajuda. Ikusmai, Testemuña ida neʼebé laran-diʼak mai vizita haʼu. No nia komesa fó estuda Bíblia mai haʼu.

Liuhusi estuda Bíblia, haʼu rekoñese katak haʼu presiza halo mudansa barak iha haʼu-nia moris. Eskritura ida neʼebé book tebes haʼu-nia laran mak 2 Korinto 7:1. Eskritura neʼe anima ita atu “hamoos ita-nia an husi buat hotu neʼebé hafoʼer isin”.

Haʼu deside atu para fuma no la hemu tua demais. Neʼe la fasil, tanba haʼu toman halo buat sira-neʼe kleur ona. Maibé haʼu deside metin atu halaʼo haʼu-nia moris iha dalan neʼebé halo Maromak kontente. Haʼu hetan ajuda boot hodi halo tuir prinsípiu iha Roma 12:2, neʼebé dehan: “Keta halo tuir mundu ohin neʼe, maibé troka imi-nia an hodi hafoun imi-nia hanoin.” Haʼu komprende katak atu bele troka haʼu-nia toman, haʼu presiza troka uluk haʼu-nia hanoin hodi tuir Maromak nian haree no rekoñese katak haʼu-nia toman mak aat tebes. Ho Jeová nia ajuda, haʼu konsege para fuma no la hemu tan tua barak.

Maibé susar liu ba haʼu mak atu para tolok. Haʼu hatene konsellu husi Bíblia iha Éfeso 4:29 dehan: “Keta husik liafuan aat sai husi imi-nia ibun.” Maski nuneʼe, haʼu labele halakon kedas haʼu-nia toman neʼe. Maibé hodi hanoin kleʼan kona-ba liafuan iha Isaias 40:26 ajuda duni haʼu. Kona-ba fitun sira iha lalehan, eskritura neʼe dehan: “Foti matan ba lalehan no haree bá. Sé mak kria buat sira-neʼe? Neʼe mak Ida neʼebé dirije ninia tropa tuir sira-nia númeru; Nia bolu sira ida-idak nia naran. Tanba ninia forsa neʼebé boot no ninia kbiit neʼebé kmanek, sira ida mós la falta.” Haʼu hanoin, se Maromak iha kbiit boot atu kria universu ho fitun sira neʼebé haʼu sempre gosta haree, nia mós bele fó forsa mai haʼu atu troka haʼu-nia hahalok hodi bele halo nia kontente. Haʼu halo orasaun beibeik no hakaʼas an, no neineik-neineik haʼu konsege kontrola haʼu-nia liafuan.

Haʼu-nia serbisu mak tau matan ba animál, haʼu ladún iha oportunidade atu koʼalia ho ema, tanba la iha ema barak iha toʼos neʼebé haʼu serbisu. Maski nuneʼe, liuhusi treinu neʼebé haʼu simu iha Testemuña ba Jeová nia reuniaun sira, haʼu aprende oinsá atu fó sai haʼu-nia hanoin no sentimentu. No neʼe mós ajuda haʼu atu haklaken liafuan diʼak kona-ba Maromak nia Ukun.​—Mateus 6:9, 10; 24:14.

Ba tinan balu ona, haʼu serbí nuʼudar katuas iha kongregasaun. Haʼu sente haʼu iha priviléjiu atu ajuda haʼu-nia maluk fiar-naʼin sira hodi halo buat naran deʼit neʼebé haʼu bele. Maibé bensaun boot liu neʼebé haʼu hetan mak haʼu bele serbí Jeová ho unidade hamutuk ho haʼu-nia feen doben no ami-nia oan-mane sira.

Haʼu agradese ba Jeová tanba nia hanorin ema hanesan haʼu neʼebé eskola kiʼik. (Isaias 54:13) Haʼu fiar liafuan tuirmai iha Provérbios 10:22 mak loos duni: “Bensaun husi Jeová mak halo ema sai riku.” Haʼu no haʼu-nia família hakarak tebes atu aprende liután kona-ba Jeová no serbí nia ba nafatin.