Bíblia troka ema nia moris

SAIDA mak book mane ida atu fila fali ba relijiaun neʼebé uluk nia husik kuandu joven? Oinsá mane joven ida hetan aman neʼebé nia buka durante ninia moris tomak? Lee toʼok sira-nia esperiénsia.

“Haʼu presiza fila fali ba Jeová.”​—ELIE KHALIL

TINAN MORIS: 1976

HUSI RAI: XIPRE

MORIS ULUK NIAN: OAN-MANE NEʼEBÉ FILA FALI

HAʼU-NIA MORIS ULUK NIAN: Haʼu moris iha rai-Xipre, maibé haʼu boot iha rai-Austrália. Haʼu-nia inan-aman mak Testemuña ba Jeová no sira hakaʼas an atu ajuda haʼu hadomi Jeová no hafolin ninia Liafuan Bíblia. Maibé iha haʼu-nia tempu foin-saʼe, haʼu komesa kontra sira. Iha kalan, haʼu sai nonook husi uma atu bele hasoru joven sira seluk. Ami naʼok karreta no halo buat aat oioin.

Foufoun haʼu halo buat sira-neʼe subasubar tanba taʼuk haʼu-nia inan-aman la kontente. Maibé neineik-neineik haʼu la taʼuk tan. Haʼu habelun ho ema sira neʼebé tinan boot liu no sira la hadomi Jeová no mós fó influénsia aat ba haʼu. Ikusmai, haʼu fó-hatene haʼu-nia inan-aman katak haʼu lakohi tan tuir sira-nia relijiaun. Ho pasiénsia, sira koko ajuda haʼu, maibé haʼu lakohi simu sira-nia ajuda. Haʼu-nia inan-aman laran-kanek tebes.

Haʼu sai husi uma no lakleur haʼu komesa uza droga oioin. Haʼu mós kuda no faʼan ganja barak. Haʼu halaʼo moris neʼebé la morál no haʼu sempre bá diskoteka. Haʼu sai ema neʼebé hirus lalais. Se ema ruma koʼalia ka halo buat ruma neʼebé haʼu la gosta, haʼu sei hirus tebes, hakilar sira no baku sira. Tuir loloos, haʼu halo buat hotu neʼebé ema Kristaun labele halo.

OINSÁ BÍBLIA TROKA HAʼU-NIA MORIS: Haʼu iha belun diʼak ida neʼebé mós uza droga no ninia apá mate kuandu nia tinan sei kiʼik. Dala barak ami koʼalia hamutuk toʼo kalan-boot. Dala ruma nia fó sai mai haʼu katak nia saudades tebes ninia apá. Tanba husi kiʼik kedas haʼu hatene kona-ba esperansa moris-hiʼas, entaun haʼu fó-hatene nia kona-ba oinsá uluk Jesus fó moris-hiʼas ba ema no oinsá Jesus mós promete atu fó moris-hiʼas ba ema iha futuru. (João 5:28, 29) Haʼu hatete ba nia: “Imajina toʼok, ó bele hasoru fali ó-nia apá no ita hotu bele moris ba nafatin iha mundu paraízu.” Liafuan sira-neʼe book tebes ninia laran.

Tempu seluk, haʼu-nia belun koʼalia kona-ba loron ikus sira no doutrina Trindade. Haʼu foti ninia Bíblia no hatudu ba nia eskritura oioin neʼebé fó sai lia-loos kona-ba Maromak Jeová, Jesus no loron ikus sira. (João 14:28; 2 Timóteo 3:1-5) Bainhira haʼu koʼalia beibeik ho haʼu-nia belun kona-ba Jeová, haʼu mós hanoin beibeik kona-ba Jeová.

Neineik-neineik fini lia-loos neʼebé uluk haʼu-nia inan-aman kuda iha haʼu-nia laran, komesa moris. Porezemplu, dala ruma kuandu festa hela no uza daudaun droga ho haʼu-nia kolega sira, derrepente deʼit haʼu hanoin kona-ba Jeová. Haʼu-nia kolega barak dehan katak sira hadomi Maromak, maibé sira la hatudu hahalok hanesan ema neʼebé hadomi Maromak. Haʼu lakohi sai hanesan sira no haʼu rekoñese buat neʼebé haʼu presiza halo. Haʼu presiza fila fali ba Jeová.

Maski haʼu hatene saida mak haʼu presiza halo, maibé la fasil atu halo ida-neʼe. Mudansa balu mak fasil deʼit. La susar ba haʼu atu para uza droga. Haʼu mós la ransu tan ho haʼu-nia kolega sira no komesa estuda Bíblia ho katuas kongregasaun ida.

Mudansa seluk mak susar tebes. Susar tebes ba haʼu atu la sai hirus lalais. Dala ruma haʼu konsege kontrola an no la hirus, maibé tempu seluk haʼu labele kontrola haʼu-nia hirus. Bainhira la kontrola an, haʼu sempre sente la diʼak no fó-sala ba haʼu-nia an. Kuandu haʼu sente laran-kraik, haʼu koʼalia ho katuas kongregasaun neʼebé fó estuda haʼu. Nia sempre laran-diʼak no pasiénsia no nia mós anima tebes haʼu. Loron ida, nia husu haʼu atu lee informasaun husi Livru Haklaken kona-ba tanbasá importante atu la rende an. * Ami koʼalia kona-ba hakat sira neʼebé haʼu bele halo kuandu haʼu sente hirus. Hodi hanoin kona-ba informasaun neʼe no halo orasaun beibeik, neineik-neineik haʼu konsege kontrola haʼu-nia hirus. Ikusmai, iha fulan-Abríl tinan 2000, haʼu hetan batizmu nuʼudar Testemuña ba Jeová. Haʼu-nia inan-aman kontente tebes.

BUAT DIʼAK NEʼEBÉ HAʼU HETAN: Agora haʼu-nia neon hakmatek no haʼu iha konxiénsia neʼebé moos tanba haʼu la hafoʼer tan haʼu-nia isin ho droga ka ho hahalok neʼebé la morál. Bainhira haʼu halo serbisu, tuir reuniaun sira ka halo atividade halimar ruma, agora haʼu kontente liu fali uluk. Haʼu iha hanoin neʼebé pozitivu kona-ba moris.

Haʼu agradese tebes ba Jeová tanba haʼu-nia inan-aman nunka haluha haʼu. Haʼu mós hanoin kona-ba Jesus nia liafuan iha João 6:44: “Ema ida labele hakbesik haʼu se Aman neʼebé haruka haʼu mai la dada nia.” Haʼu bele fila fali ba Jeová tanba nia mak dada haʼu, no ida-neʼe book tebes haʼu-nia laran.

“Haʼu hakarak tebes atu iha aman.”​—MARCO ANTONIO ALVAREZ SOTO

TINAN MORIS: 1977

HUSI RAI: XILE

MORIS ULUK NIAN: MEMBRU BA BANDA MÚZIKA METAL

HAʼU-NIA MORIS ULUK NIAN: Haʼu-nia amá haboot haʼu iha sidade Punta Arenas iha Estreito de Magalhães besik Amérika Súl nia parte súl liu. Haʼu-nia inan-aman soe-malu kuandu haʼu tinan lima. Neʼe halo haʼu sente mesamesak. No haʼu hakarak tebes atu iha aman ida.

Haʼu-nia amá estuda Bíblia ho Testemuña ba Jeová, no nia lori haʼu tuir reuniaun sira. Maibé haʼu la gosta reuniaun sira, no kuandu ami iha dalan atu bá reuniaun, dala barak haʼu tanis, kontra no nakar tebes. Bainhira haʼu tinan 13, haʼu para atu tuir reuniaun sira.

Iha tempu neʼebá, haʼu gosta tebes múzika no haʼu mós iha talentu kona-ba múzika. Bainhira haʼu tinan 15, haʼu toka múzika metal iha festa sira, bar no iha eventu privadu sira. Haʼu ransu ho tokadór sira no neʼe book haʼu atu gosta múzika klásiku. Haʼu komesa estuda múzika iha universidade. Bainhira tinan 20, haʼu muda ba sidade kapitál Santiago atu aprende liután múzika. Haʼu mós kontinua toka múzika metal iha banda sira.

Durante tempu neʼe, haʼu sente haʼu-nia moris la iha objetivu. Haʼu koko halakon sentimentu sira-neʼe liuhusi hemu lanu no uza droga hamutuk ho haʼu-nia kolega banda. Haʼu haree kolega sira-neʼe nuʼudar família. Haʼu mak kontradór no dalan neʼebé haʼu hatais hatudu sai ida-neʼe. Haʼu hatais roupa kór-metan, iha hasarahun naruk, no haʼu-nia fuuk naruk toʼo knotak.

Dala barak haʼu-nia hahalok lori problema ba haʼu. Haʼu baku malu no kontra lei sira. Loron ida kuandu lanu, haʼu ataka grupu ida neʼebé faʼan droga tanba sira halo problema ho haʼu no haʼu-nia kolega sira. Sira baku tasak haʼu no haʼu-nia hasan-ruin tohar.

Maibé buat neʼebé halo haʼu laran-kanek tebes mak ema sira neʼebé haʼu hadomi tebes. Loron ida, haʼu deskobre katak ba tinan balu ona, haʼu-nia namorada namora subasubar ho haʼu-nia belun diʼak. Haʼu-nia kolega hotu hatene kona-ba neʼe, maibé sira subar ida-neʼe husi haʼu. Haʼu-nia fuan rahun loos.

Haʼu muda fali ba Punta Arenas, no komesa hanorin múzika no serbisu nuʼudar violonselista. Haʼu mós kontinua toka no grava múzika ho banda metal. Haʼu hasoru feto bonita ida naran Sussan no ami komesa hela hamutuk. Liutiha tempu balu, Sussan rona katak ninia inan fiar ba Trindade maibé haʼu la fiar Trindade. Entaun nia husu haʼu: “Entaun ida-neʼebé mak loos?” Haʼu hatán katak haʼu hatene doutrina Trindade mak falsu, maibé haʼu labele prova ida-neʼe husi Bíblia. Maibé haʼu hatene ema neʼebé bele prova ida-neʼe. Haʼu fó-hatene nia katak Testemuña ba Jeová bele hatudu ba nia lia-loos husi Bíblia. Tuirmai haʼu halo buat neʼebé kleur ona haʼu la halo. Haʼu halo orasaun ba Maromak hodi husu ninia ajuda.

Loron balu liutiha, haʼu haree mane ida no haʼu sente katak haʼu koñese nia no haʼu husu se nia mak Testemuña ida. Maski nia hakfodak ho haʼu-nia dalan hatais, maibé nia hatán ho laran-diʼak ba haʼu-nia pergunta sira kona-ba reuniaun. Haʼu fiar metin katak neʼe mak dalan neʼebé Jeová hatán ba haʼu-nia orasaun. Haʼu bá Reuniaun-Fatin no tuur iha kotuk liu atu la dada ema nia atensaun. Maibé ema barak koñese haʼu no hanoin-hetan katak uluk haʼu tuir reuniaun sira kuandu haʼu kiʼik. Sira simu haʼu no hakoʼak haʼu ho domin. Haʼu sente kalma no dame hanesan fila fali ba uma. Bainhira haʼu haree mane neʼebé uluk fó estuda haʼu kuandu haʼu kiʼik, haʼu husu nia atu estuda fali ho haʼu.

OINSÁ BÍBLIA TROKA HAʼU-NIA MORIS: Loron ida, haʼu lee Provérbios 27:11 neʼebé hatete: “Haʼu-nia oan, sai matenek bá, no halo haʼu-nia laran haksolok.” Afinál ema ida bele halo Kriadór ba universu haksolok, neʼe book tebes haʼu-nia laran. Haʼu rekoñese katak Jeová mak Aman neʼebé haʼu buka durante haʼu-nia moris tomak.

Haʼu hakarak halo kontente haʼu-nia Aman no halo tuir ninia hakarak, maibé haʼu sai atan ba droga no tua durante tinan barak ona. Haʼu komprende Jesus nia hanorin iha Mateus 6:24 neʼebé hatete katak “la iha ema ida mak bele sai atan ba patraun naʼin-rua”. Haʼu sente susar atu halo mudansa, maibé prinsípiu iha 1 Korinto 15:33 book haʼu-nia laran: “Ransu hamutuk ho ema aat sei estraga toman diʼak.” Haʼu rekoñese katak haʼu labele husik haʼu-nia toman aat se haʼu kontinua bá fatin sira neʼebé hanesan no ransu ho ema neʼebé hanesan. Bíblia nia matadalan mak klaru tebes: Haʼu tenke hadook an husi buat neʼebé halo haʼu sidi.​—Mateus 5:30.

Haʼu gosta tebes múzika, tan neʼe desizaun atu para toka múzika metal mak desizaun neʼebé susar liu iha haʼu-nia moris. Maibé belun sira iha kongregasaun ajuda haʼu no ikusmai haʼu bele para. Haʼu para atu hemu tua demais no para uza droga. Haʼu tesi haʼu-nia fuuk, koir haʼu-nia hasarahun no la hatais deʼit roupa kór-metan. Bainhira haʼu fó-hatene Sussan katak haʼu atu tesi fuuk, neʼe halo nia hakarak hatene liután. Nia hatete: “Haʼu sei bá Reuniaun-Fatin ho ó, haʼu hakarak hatene saida mak akontese iha neʼebá.” Nia gosta tebes buat neʼebé nia haree iha neʼebá no lakleur nia mós komesa estuda Bíblia. Ikusmai, haʼu no Sussan kaben. Iha tinan 2008, ami hetan batizmu nuʼudar Testemuña ba Jeová. Ami kontente tebes atu serbí Jeová hamutuk ho haʼu-nia amá.

BUAT DIʼAK NEʼEBÉ HAʼU HETAN: Haʼu sai livre husi mundu neʼebé nakonu ho kontente neʼebé falsu no belun neʼebé falsu. Haʼu nafatin gosta múzika, maibé agora haʼu hili didiʼak haʼu-nia múzika. Haʼu uza haʼu-nia esperiénsia atu ajuda haʼu-nia família no mós ema seluk, liuliu joven sira. Haʼu hakarak ajuda sira haree katak maski buat neʼebé iha mundu neʼe haree diʼak, maibé tuir loloos buat hotu iha mundu neʼe mak “lixu deʼit”.​—Filipe 3:8, nota-rodapé.

Haʼu hetan belun sira neʼebé laran-metin iha kongregasaun Kristaun neʼebé nakonu ho domin no dame. Maibé importante liu mak haʼu hetan haʼu-nia Aman bainhira haʼu hakbesik ba Jeová.

[Nota-rodapé]

[Liafuan importante]

“Haʼu bele fila fali ba Jeová tanba nia mak dada haʼu”