Bíblia troka ema nia moris

SAIDA mak book mane ida iha rai-Méxiku atu husik ninia moris neʼebé la morál? Haree toʼok ninia esperiénsia.

“Sira trata haʼu ho dignidade.”​—GUADALUPE VILLARREAL

TINAN MORIS: 1964

HUSI RAI: MÉXIKU

MORIS ULUK NIAN: HALAʼO MORIS LA MORÁL

HAʼU-NIA MORIS ULUK: Ami hamutuk maun-alin naʼin-hitu, no ami boot iha Hermosillo, Sonora, iha rai-Méxiku. Neʼe mak área neʼebé ema barak moris kiak. Haʼu-nia aman mate ona bainhira haʼu sei kiʼik, tan neʼe haʼu-nia inan presiza serbisu atu tau matan ba ami. Baibain haʼu laʼo ho ain-tanan deʼit tanba la iha osan atu sosa sapatu. Haʼu komesa serbisu ho tinan kiʼik atu bele ajuda haʼu-nia família. Ami toman moris hamutuk iha fatin neʼebé kloot.

Baibain ami-nia inan presiza husik ami mesak no labele proteje ami loron tomak. Bainhira haʼu tinan 6, mane joven ho tinan 15 komesa abuza haʼu iha dalan seksuál, no haʼu sai vítima ba abuzu seksuál ba tempu kleur husi mane neʼe. Rezultadu mak haʼu sai konfuzaun tebes kona-ba buat seksuál. Haʼu hanoin katak haʼu-nia sentimentu gosta mane mak buat baibain deʼit. Bainhira haʼu buka ajuda husi doutór ka padre sira, sira hatete deʼit mai haʼu katak haʼu-nia sentimentu neʼe mak normál.

Bainhira haʼu tinan 14, haʼu deside atu moris hanesan feto nuʼudar ema omoseksuál. Husi tempu neʼebá haʼu kontinua moris hanesan neʼe ba tinan 11, no hela hamutuk ho mane oioin durante tempu neʼe. Haʼu hetan kursu atu tesi fuuk, no loke salon. Maibé haʼu la kontente. Haʼu-nia moris nakonu ho susar no dala barak haʼu sente triste tanba ema seluk la laran-metin mai haʼu. Haʼu sente buat neʼebé haʼu halo mak la loos. Haʼu komesa husu ba haʼu-nia an, ‘Iha ka lae, ema neʼebé diʼak no moris ho moos?’

Haʼu hanoin kona-ba haʼu-nia biin. Nia komesa estuda Bíblia ho Testemuña ba Jeová no hetan batizmu. Nia fó-hatene mai haʼu kona-ba buat neʼebé nia aprende, maibé haʼu la interese. Maski nuneʼe, haʼu admira ninia hahalok no ninia moris kaben. Haʼu bele haree ho klaru katak nia ho ninia laʼen hadomi malu no respeitu malu tebes. Sira hatudu laran-diʼak ba malu. Lakleur, haʼu komesa estuda Bíblia ho Testemuña ba Jeová. Foufoun, haʼu rona deʼit, no ladún interese. Maibé haʼu-nia situasaun troka.

OINSÁ BÍBLIA TROKA HAʼU-NIA MORIS: Testemuña sira konvida haʼu atu tuir sira-nia reuniaun, tan neʼe haʼu bá. Neʼe mak esperiénsia foun ida mai haʼu. Baibain ema goza haʼu, maibé Testemuña sira la halo hanesan neʼe. Sira hasé haʼu ho laran-diʼak no trata haʼu ho dignidade. Neʼe book tebes haʼu-nia laran.

Haʼu gosta liután Testemuña sira bainhira haʼu tuir reuniaun boot. Haʼu haree katak maski sira halibur nuʼudar grupu boot, sira-nia hahalok mak hanesan ho haʼu-nia biin, sira hanoin malu no laran-moos. Haʼu hanoin, karik neʼe mak ema diʼak neʼebé haʼu buka kleur ona. Haʼu admira tebes sira-nia domin no unidade, no haʼu mós gosta sira tanba sira sempre uza Bíblia atu hatán ba pergunta hotu. Haʼu rekoñese katak Bíblia mak book sira atu moris ho hahalok diʼak. No haʼu mós komprende katak haʼu presiza halo mudansa barak ba haʼu-nia hahalok atu nuneʼe haʼu mós bele sai hanesan sira.

Tuir loloos, haʼu presiza halo mudansa kompletu tanba haʼu moris hanesan feto. Haʼu presiza troka dalan neʼebé haʼu koʼalia, book an, hatais, modelu fuuk, no kolega sira neʼebé haʼu ransu. Haʼu-nia kolega uluk nian komesa goza haʼu, hodi dehan: “Tanbasá ó halo hanesan neʼe? Ó la presiza halo mudansa. Lalika estuda Bíblia. Ó iha ona buat hotu.” Maibé buat neʼebé susar liu ba haʼu mak atu troka haʼu-nia moris neʼebé la morál.

Maski nuneʼe, haʼu hatene katak haʼu bele halo mudansa boot, tanba Bíblia nia liafuan iha 1 Korinto 6:9-11 kona loos haʼu-nia laran: “Imi la hatene ka? Ema aat sei la simu Maromak nia Ukun nuʼudar liman-rohan. Keta lohi imi-nia an. Ema neʼebé halo sala seksuál, adora estátua, halo adultériu, mane neʼebé fó an ba mane seluk atu halo hahalok omoseksuál, no mane neʼebé halo hahalok omoseksuál . . . sei la simu Maromak nia Ukun nuʼudar liman-rohan. Uluk imi balu mós halo hanesan neʼe. Maibé agora Maromak fase moos ona imi.” Jeová ajuda ona ema iha tempu uluk atu troka sira-nia hahalok, no nia mós ajuda ona haʼu. Haʼu presiza tinan balu atu luta makaʼas hodi kontra haʼu-nia fraku, maibé haʼu konsege husik haʼu-nia hahalok uluk nian hodi simu ajuda no domin husi Testemuña sira.

BUAT DIʼAK NEʼEBÉ HAʼU HETAN: Ohin loron, haʼu moris normál. Haʼu kaben, no haʼu ho haʼu-nia feen hanorin ami-nia oan-mane atu moris tuir Bíblia nia matadalan. Haʼu soe tiha ona haʼu-nia moris uluk nian ba kotuk, no haʼu kontente iha relasaun diʼak ho Maromak no serbí nia. Agora haʼu serbí nuʼudar katuas iha kongregasaun, no haʼu mós bele ajuda ema seluk atu aprende lia-loos husi Maromak nia Liafuan. Tanba haʼu halo mudansa iha haʼu-nia moris, neʼe halo haʼu-nia inan kontente tebes no nia mós komesa estuda Bíblia no hetan batizmu. Haʼu-nia alin-feto neʼebé uluk halaʼo moris la morál mós agora sai ona Testemuña ba Jeová.

Ema balu neʼebé koñese haʼu husi uluk kedas mós rekoñese katak haʼu-nia moris sai diʼak liu. Haʼu hatene saida mak ajuda haʼu atu troka haʼu-nia moris. Uluk haʼu buka ajuda husi profisionál sira, maibé hetan deʼit konsellu neʼebé la diʼak. Maibé Jeová mak ajuda tebes haʼu. Maski uluk haʼu sente haʼu la iha folin, maibé Jeová haree haʼu no hatudu domin no pasiénsia mai haʼu. Maromak neʼebé boot tebes, matenek no domin nian tau matan mai haʼu no nia hakarak haʼu atu moris kontente. Ida-neʼe mak book haʼu atu troka haʼu-nia moris.