Liafuan Diʼak kona-ba Maromak nia Ukun No. 37

Mensajen ba mundu tomak

Relijiaun falsu nia rohan besik ona!

▪ Saida mak relijiaun falsu?

▪ Oinsá mak relijiaun falsu sei ramata?

▪ Ida-neʼe katak sá ba Ita?

 Saida mak relijiaun falsu?

Ita sente laran-susar ka lae, kona-ba krime neʼebé ema halo hodi relijiaun nia naran? Ita sente hirus ka lae, tanba ema dehan sai katak sira serbí Maromak maibé halo funu, terrorizmu, no korrupsaun? Tanbasá relijiaun mak hanesan hun ba problema barak?

Relijiaun hotu la sala, maibé relijiaun falsu mak sala. Ema fiar-naʼin ida neʼebé ema barak respeita, Jesus Kristu, hatudu katak relijiaun falsu hamosu hahalok aat, hanesan deʼit ho ‘ai neʼebé aat fó fuan aat’. (Mateus 7:15-17) Relijiaun falsu hamosu ai-fuan saida?

Relijiaun falsu . . .

◼ RELIJIAUN FALSU HOLA PARTE IHA FUNU NO POLÍTIKA: Revista Asiaweek hateten: “Iha Ázia no iha fatin seluseluk, naʼi-ulun sira neʼebé hakarak kbiit boot koko makaʼas atu aproveita ema sira-nia sentimentu kona-ba relijiaun atu kumpre naʼi-ulun sira-nia hakarak.” Revista neʼe fó avizu kona-ba rezultadu husi ida-neʼe, hodi dehan: “Mundu sei sai runguranga.” Ulun-naʼin relijiaun ida neʼebé iha naran-boot iha Estadus Unidus dehan: “Atu hapara mate husi terrorista, ita tenke oho terrorista sira.” Ninia solusaun? “Hodi Maromak nia naran oho terrorista hotu.” Ida-neʼe la hanesan ho Bíblia neʼebé hateten: ‘Ema ruma karik dehan katak nia hadomi Maromak, maibé hirus nia maluk, ema neʼe bosok-teen.’ (1 Joao 4:20) Jesus mós hateten: ‘Hadomi imi-nia funu-balun sira.’ (Mateus 5:44) Tuir Ita-nia hanoin, membru husi relijiaun hira mak hola parte iha funu?

◼ RELIJIAUN FALSU HABELAR HANORIN NE’EBÉ FALSU: Relijiaun barak hanorin katak klamar, ka espíritu, mak buat ida neʼebé moris hela depois isin-lolon mate. Liuhusi hanorin neʼe, relijiaun barak aproveita sira-nia membru atu fó osan hodi halo orasaun kona-ba ema mate sira-nia klamar. Maibé Bíblia hanorin la hanesan ho ida-neʼe. “Klamar ne’ebé halo sala—klamar ne’e sei mate.” (Ezequiel 18:4) “Ema neʼebé moris hatene katak sira sei mate; maibé ema mate, sira la hatene buat ida.” (Eclesiastes 9:5) Jesus hanorin katak ema mate sei hetan moris-hiʼas—moris-hiʼas sei la bele akontense se ema mate iha klamar neʼebé moris hela. (Joao 11:11-25) Ita-nia relijiaun hanorin katak klamar mate ka lae?

◼ RELIJIAUN FALSU HUSIK DEʼIT RELASAUN SEKSUÁL NE’EBÉ IMORÁL: Iha rai barak, grupu igreja ordena membru omoseksuál no lézbika atu sai amlulik no hakaʼas governu atu rekoñese kazamentu entre ema ho seksu hanesan. Igreja seluk, neʼebé dehan sai katak hahalok imoralidade sala, mós husik deʼit ulun-naʼin relijiaun sira neʼebé abuza seksu ba labarik. Maibé, saida mak Bíblia hanorin? Ho klaru Bíblia hateten: ‘Keta husik ema bosok imi: sira neʼebé halo sala-foʼer ho feto-raan, ka adora lulik, ka halo sala-foʼer ho kaben-naʼin, ka halo sala-foʼer ho maluk mane ka maluk feto . . . sei la simu Maromak nia reinu nuʼudar liman-rohan.’ (1 Korinto 6:9, 10) Ita hatene relijiaun ruma neʼebé husik deʼit imoralidade seksuál ka lae?

 Saida mak futuru ba relijiaun sira neʼebé hamosu ai-fuan aat? Jesus fó avizu: ‘Ai sira neʼebé la fó fuan diʼak sei tesi tiha hodi soe ba ahi.’ (Mateus 7:19) Loos duni, relijiaun falsu sei tesi tiha no lakon! Maibé oinsá no bainhira ida-neʼe sei akontese? Vizaun profétiku ida neʼebé hakerek iha Bíblia iha Apokalipse kapítulu 17 no 18 fó resposta.

Oinsá mak relijiaun falsu sei ramata?

Hanoin toʼok kona-ba ida-neʼe. Feto-aat ida tuur iha animál fuik neʼebé siʼak nia leten. Animál fuik neʼe iha ulun hitu no dikur sanulu. (Apokalipse 17:1-4) Feto-aat neʼe reprezenta sé? Nia iha forsa kuandu envolve ho “liurai sira hotu raiklaran nian.” Nia hatais roupa mean, uza insensu, no iha rikusoin barak tebetebes. No mós, liuhusi espiritizmu, nia “lohi nasaun sira hotu”. (Apokalipse 17:18; 18:12, 13, 23) Bíblia ajuda ita atu haree katak feto-aat neʼe mak organizasaun relijiaun nian iha mundu tomak. Nia reprezenta, laʼós relijiaun ida deʼit, maibé relijiaun hotu neʼebé hamosu ai-fuan aat.

Animál fuik neʼebé feto-aat saʼe mak reprezenta mundu nia governu sira. * (Apokalipse 17:10-13) Relijiaun falsu tuur iha animál fuik polítiku nia leten, hodi koko hola parte iha governu nia desizaun no kontrola ninia diresaun.

Maibé, la kleur tan, akontesimentu ida neʼebé halo ema hakfodak sei mosu. ‘No dikur sanulu neʼebé ó haree: sira no animál fuik sei foti liman hasoru feto-aat neʼe, hodi kolu nia hatais no husik nia isin-tanan; sira sei han nia isin lolon hodi sunu nia iha ahi laran.’ (Apokalipse 17:16) Derrepente deʼit, mundu nia governu sira sei halo ema hakfodak hodi ataka relijiaun falsu no halakon nia tomak! Sé mak halo ida-neʼe akontese? Livru Apokalipse iha Bíblia fó-hatene: ‘Maromak tau ona iha sira-nia laran atu halaʼo Ninia hakarak.’ (Apokalipse 17:17) Loos, Maromak sei halo relijiaun falsu lori todan ba buat aat hotu neʼebé nia halo hodi Maromak nia naran. Iha dalan neʼebé hatudu justisa, Maromak sei uza sistema polítika nian neʼebé mak nuʼudar relijiaun falsu nia doben, atu halakon relijiaun falsu.

Saida mak ita tenke halo se Ita lakohi hola parte ba buat neʼebé sei akontese ba relijiaun falsu? Maromak nia manu-ain anima ita: ‘Haʼu-nia povu, hadook husi nia.’ (Apokalipse 18:4) Entaun, agora mak tempu atu halai husi relijiaun falsu! Maibé Ita halai ba neʼebé? Labele hamutuk ho ema neʼebé la fiar Maromak, tanba sira mós la iha futuru. (2 Tesalonika 1:6-9) Ita bele hetan mahon iha relijiaun neʼebé loos deʼit. Oinsá Ita bele hatene relijiaun ida-neʼebé mak loos?

 Oinsá atu hatene relijiaun ida-ne’ebé mak loos

Relijiaun loos hamosu ai-fuan diʼak saida?—Mateus 7:17.

Relijiaun loos . . .

◼ RELIJIAUN LOOS HATUDU DOMIN: Adora-naʼin neʼebé loos ‘laʼós mundu neʼe nian’, no la haketak malu maski husi rasa ka kultura neʼebé la hanesan, no mós “hadomi malu”. (Joao 13:35; 17:16; Apostolu 10:34, 35) Sira la oho malu, maibé sira hadomi malu toʼo sira fó sira-nia moris tanba sira-nia maluk.—1 Joao 3:16.

◼ RELIJIAUN LOOS FIAR BA MAROMAK NIA LIAFUAN: Sira la hanorin “lisan” no ‘ema sira-nia doutrina no ukun-fuan sira’, maibé buat hotu neʼebé sira hanorin mai husi Maromak nia Liafuan, Bíblia. (Mateus 15:6-9) Tanbasá? Tanba ‘Maromak leno Eskritura hotu; nia diʼak atu hanorin, atu halakon hanorin neʼebé la loos, atu sai matadalan ba ema nia moris’.—2 Timoteo 3:16.

◼ RELIJIAUN LOOS HAMETIN FAMÍLIA NO APOIA MORÁL NE’EBÉ LOOS: Relijiaun loos hanorin laʼen atu ‘hadomi sira-nia kaben hanesan sira hadomi sira rasik nia isin-lolon’, ajuda feen atu hatudu respeitu ba sira-nia laʼen, no hanorin oan atu ‘halo tuir sira-nia aman inan nia hakarak’. (Efeso 5:28, 33; 6:1) No mós, ba sira neʼebé kaer responsabilidade boot tenkesér hatudu ezemplu morál neʼebé loos.—1 Timoteo 3:1-10.

Iha relijiaun ruma neʼebé halo tuir buat hotu neʼe ka lae? Livru Holocaust Politics (Polítika Olokausta), neʼebé hasai iha tinan 2001, hateten: “Se ema barak liu moris tuir Testemuña ba Jeová nia hanorin no hahalok, Olokaustu la akontese no la iha tan jenosídiu neʼebé agora haterus mundu.”

Loos duni, iha rai 235, Testemuña ba Jeová la haklaken deʼit kona-ba morál husi Bíblia—sira mós halo tuir ida-neʼe iha sira-nia moris. Ami anima Ita atu husu ba Testemuña ba Jeová atu ajuda Ita aprende kona-ba saida mak Maromak hakarak Ita atu halo hodi Ita bele adora nia iha dalan neʼebé loos. Agora mak tempu atu halo ida-neʼe. Labele hein tan. Relijiaun falsu nia rohan besik ona!—Sofonias 2:2, 3.

Se Ita hakarak informasaun kona-ba mensajen husi Bíblia neʼebé Testemuña ba Jeová haklaken, halo favór hakerek ba sira, iha diresaun ruma iha kraik

□ Lahó obrigasaun, haʼu husu broxura Saida maka Maromak Hakarak ita atu Halo?

□ Halo favór kontakta haʼu kona-ba estudu Bíblia nian neʼebé la selu

[Nota–rodapé]

[Liafuan neʼebé foti husi pájina 3]

Relijiaun falsu iha forsa kuandu envolve ho “liurai sira hotu raiklaran nian”

[Liafuan neʼebé foti husi pájina 3]

‘Haʼu-nia povu, hadook husi nia’