INFORMASAUN IHA OIN | BÍBLIA LA VALE ONA KA LAE?
Hahalok sira neʼebé diʼak husi tempu uluk toʼo agora—Domin
BÍBLIA NIA MATADALAN: “Tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.”—Koloso 3:14.
OINSÁ MAK HAHALOK NEʼE LORI DIʼAK BA ITA? “Domin” neʼebé temi iha Bíblia laran, dala barak kona-ba domin neʼebé book ita halo tuir Maromak nia hakarak, laʼós domin romántiku nian. Domin neʼe book ema atu haraik an, laran-metin, laran-diʼak, laran-maus, hanoin ema, fó perdua no pasiénsia. (Miquéias [Mikha] 6:8; Koloso 3:12, 13) Domin neʼe bele metin ba beibeik, la hanesan ho domin romántiku nian neʼebé bele namlaek lalais.
Feto ida naran Brenda neʼebé kaben besik tinan 30 ona, hatete: “Domin entre feen-laʼen neʼebé foin kaben bele sai buras ba beibeik nuʼudar tempu liu daudaun.”
Sam neʼebé kaben ba tinan 12 ona mós hatete: “Haʼu ho haʼu-nia feen sempre kontente ho Bíblia nia matadalan no ami mós hakfodak haree oinsá matadalan simples husi Bíblia bele hadiʼa ami-nia moris! Tuir loloos, dala ruma haʼu la konsege halo tuir Bíblia nia matadalan, liuliu kuandu haʼu hanoin barak, hanoin an deʼit, ka kolen demais. Iha tempu hanesan neʼe, haʼu halo orasaun ba Maromak Jeová hodi bele halakon sentimentu laloos neʼe. Tuirmai, haʼu hakoʼak haʼu-nia feen, no ami-nia problema la iha tan!”
“Liuhusi ema nia hahalok loos mak nia hatudu sai ninia matenek”
Jesus Kristu hatete: “Liuhusi ema nia hahalok loos mak nia hatudu sai ninia matenek.” (Mateus 11:19) Bíblia mak hun ba matenek neʼebé loos, tanba ninia matadalan sira bele book ema atu hatudu sai hahalok diʼak. Matadalan sira-neʼe vale ba nafatin, ba ema hotu husi kultura no nasaun oioin. Bíblia mak Liafuan husi ita-nia Kriadór Maromak Jeová, tanba nia hatene ho loloos ema nia laran mak oinsá. Atubele hetan rezultadu diʼak, ita presiza halo tuir Bíblia iha ita-nia moris rasik. Bíblia hatete mai ita: “Koko no haree bá katak Jeová mak diʼak.” (Salmo [Mazmur] 34:8) Ita-Boot mós hakarak koko ka lae?
